Madokotala ghakusanda matenda gha maghanoghano ghakuti munthu wakwenera kusambira vya Ciuta kuti waŵe wakukondwa. Nakuti mwakawiro ŵanthu ŵakutemwa kucita vinthu vinyake panji kukhumba kuteŵetera munthu uyo ngwakuzirwa kuluska iwo. Kuti ŵakondwe, ŵanji ŵakumalira nyengo yawo pa sumu, vyakujamburajambura, kuwona malo panji vinyama, na vinyake vyantheura. Ndipouli, ŵakukondwa kwa nyengo yicoko waka.

Awo ŵakuŵazga Baibolo ŵakuzizwa yayi kuwona kuti munthu wali na khumbo la kusambira vya Ciuta. Vipaturo vyakwambilira vya buku la Genesis vikulongora kuti Ciuta wati walenga ŵanthu ŵakwamba, wakayowoyanga nawo kuti ŵalutilire kuŵa nayo paubwezi. (Genesis 3:8-10) Ciuta wakalenga ŵanthu kuti ŵajilongozgenge ŵekha yayi. Nakuti ŵakukhumbikwira kulutilira kuŵa paubwezi na Mlengi wawo. Fundo iyi, yikuzunulika kanandi waka mu Baibolo.

Mwaciyelezgero, Yesu wakati: “Mbakukondwa awo ŵakumanya kusoŵerwa kwawo kwauzimu.” (Mateyu 5:3) Lemba ili likulongora kuti munthu kuti waŵe wakukondwa wakwenera kumumanya makora Ciuta. Kasi tingamumanya wuli Ciuta? Yesu wakati: “Munthu wakwenera kuŵa wamoyo na cingwa pera cara, kweni na lizgu lililose lakufuma mu mulomo wa Yehova.” (Mateyu 4:4) Kasi mazgu gha Ciuta panji kuti ulongozgi uwo wuli mu Baibolo, ukutovwira wuli kuti tiŵe ŵakukondwa? Tiyeni tiwone nthowa zitatu.

Mazuŵa ghano, pali nkhwantha zinandi izo zikupeleka ulongozgi wa umo ŵanthu ŵangakhalira makora mu mbumba, na ŵanyawo, umo ŵangamazgira mphindano, kweniso umo ŵangaŵira ŵakukondwa. Kasi ninjani uyo ngwakwenelera kupeleka ulongozgi wakovwira pa nkhani izi, kuluska Yehova Ciuta uyo wakatilenga?

Mwaciyelezgero, para mwagura cinthu ciphya nga ni kamera panji kompyuta, mukukhazga kuti  ŵamupaninge kabuku ako kakulongosora umo cinthu ico cikugwilira nchito. Baibolo nalo tingaliyaniska na kabuku aka. Ni buku ilo Mlengi wali kutipa ndipo likulongosora umo tingacitira kuti tiŵe na umoyo uwemi.

Nga umo vikuŵira na kabuku kakulongosora umo cinthu cikugwilira nchito, Baibolo nalo likuticenjezga za vinthu ivyo vingananga umoyo withu. Nyengo zinyake ŵanji ŵangatipa ulongozgi wakupambana na uwo wuli mu Baibolo, ndipo ungawoneka nga nguwemi waka. Kweni manyani kuti para tilondezgenge ulongozgi wa Ciuta, vinthu vitenderenge makora comene, kweniso tigegenge masuzgo ghanandi.

Nangauli Yehova wakutipa ulongozgi, kweni wakucita kuticicizga yayi kuti tiwulondezgenge. Kweni pakuti wakutitemwa, wakutiphalira kuti: “Ine ndine Yehova, Ciuta winu uyo wakumusambizgani kuti muwone candulo, uyo wakumulongozgani mu nthowa iyo mukwenera kwendamo. A! mupulikirenge malango ghane mphanyi cimango cinu canguŵa nga ndi mlonga, na urunji winu nga ndi majigha gha nyanja.” (Yesaya 48:17, 18) Mwakudumura tingati, para tikupulikira ulongozgi wa Ciuta tikhalenge makora. Panji kuti tiŵe ŵakukondwa, vyose vikuthemba pa Ciuta.

Ŵanji ŵakuwona kuti Ciuta walije nchito cifukwa cakuti ŵakusangana na masuzgo ghakuru comene. Ntheura vikuŵasuzga kugomezga kuti ngwacitemwa. Mwaciyelezgero, ŵangafumba kuti: ‘Cifukwa wuli ŵanthu ŵambura mulandu ŵakusuzgika? Cifukwa wuli ŵana ŵanji ŵakubabika vilima panji ŵakupendera? Cifukwa wuli umoyo ngwakuzura na masuzgo?’ Mafumbo agha ngakuzirwa comene. Ndipo para tingamanya mazgoro ghake tambenge kuwona vinthu mwakwenelera. M’malo mwa kucimbilira kumupa mulandu Ciuta, tiyeni tiwone ivyo Baibolo likuyowoya pa nkhani ya masuzgo.

Mu cipaturo cacitatu ca Genesis, tikuwona kuti kwizira mu njoka, Satana wakacitiska kuti ŵanthu ŵakwambilira ŵagalukire Yehova Ciuta. Ŵakaleka kupulikira dango lakuti ŵaleke kurya cipambi ca khuni la kumanyiska uheni na uwemi. Satana wakaphalira Eva kuti: “Mutimufwenge cara. Cifukwa Ciuta wakumanya kuti mu zuŵa leneilo timuryengepo maso ghinu tighajurikenge, timuŵenge nga ndi Ciuta, kumanya uwemi na uheni.”—Genesis 2:16, 17; 3:4, 5.

Satana wakayowoyanga kuti Ciuta ni mutesi kweniso kuti wakulongozga makora yayi. Apa Dyabulosi wakang’anamuranga kuti para ŵanthu ŵangapulikira iyo, vinthu viŵenderenge makora. Kasi nkhani izi zikeneranga kumara wuli? Yehova wakasankha kuti pajumphe nyengo kuti ŵanthu wose ŵawone usange Satana wakaneneskanga panji yayi. Ciuta wali kupa mwaŵi Satana na awo ŵali ku cigaŵa cake kuti ŵalongore usange ŵanthu ŵangajilongozga makora kwambura Ciuta.

Kasi zgoro lakukhwaskana na utesi uwo Satana wakayowoyera Ciuta mwalisanga? Kasi ŵanthu  ŵangajilongozga makora ŵekha kwambura Ciuta? Nakuti kwa vyaka vinandi ŵanthu ŵasuzgika na masuzgo nga mbulwari, vinthu vyambura urunji, nyifwa, ucikanamalango, nkharo ziheni, nkhondo, kukomana, na vinyake vyakofya. Uwu mbukaboni wakuti ŵanthu ŵangajilongozga ŵekha yayi. Baibolo likuyowoyapo yayi kuti Ciuta ndiyo wakucitiska masuzgo. Kweni likutiphalira cifukwa ico paliri masuzgo. Likuti para munthu wakuwusa munyake wakumupweteka.—Mupharazgi 8:9.

Nga umo tawonera, nchamahara kuthemba Yehova kuti timanye mazgoro gha mafumbo agho ŵanthu ŵakusuzgika nagho kweniso umo masuzgo ghazamumalira. Kasi Ciuta wazamucita wuli?

Kwa nyengo yitali comene ŵanthu ŵakhumbisiska kuti ŵafwatuke ku ulwari, ucekuru na nyifwa. Ŵayezga nthowa izi na izi kuti ŵawuskepo vinthu ivi, kweni ŵatondeka. Ŵanji ŵayezgayezga kumwa munkhwala panji kukhala ku malo ghanyake na cilato cakuti ŵaleke kucekura kweni pawaka. Vyose ivyo ŵayezgayezga kucita vyatondeka.

Ciuta wakukhumba kuti ŵanthu ŵakhalenge makora kweniso ŵakondwenge. Ili ndilo likaŵa khumbo lake pakulenga ŵanthu ndipo wacali kulikumbuka. (Genesis 1:27, 28; Yesaya 45:18) Yehova wakutisimikizgira kuti cilicose ico wakukhumba kucita wacitenge kwambura kutondeka. (Yesaya 55:10, 11) Baibolo likuti Ciuta wazamuwezgerapo paradiso uyo ŵanthu ŵakwambilira ŵakataya. Likuti: “[Yehova Ciuta] wazamufyura sozi lililose ku maso ghawo, ndipo nyifwa yizamuŵakoso cara, nesi kutengera panji kutampha nesi vyakuŵinya vizamuŵakoso cara. Vinthu vyakale vyafumapo.” (Uvumbuzi 21:4) Kasi Ciuta wazamucita wuli ivi, ndipo tingacita wuli kuti tizakasange candulo?

Yesu wakasambizga ŵalondezgi ŵake kuti ŵalombenge kuti khumbo la Ciuta lifiskike. Ŵanthu ŵanandi ŵakulimanya makora lurombo ulu. Ndipo ŵanji ŵakulucema kuti Lurombo lwa Fumu ndipo kanandi ŵakuluwerezgawerezga. Lurombo ulu lukuti: “Ŵadada ŵithu imwe muli kucanya, zina linu lituŵiskike. Ufumu winu wize. Khumbo linu licitike, umo kuliri kucanya, ntheura pera pa caru capasi.” (Mateyu 6:9, 10) Ufumu wa Ciuta ndiwo ni nthowa yekha iyo Yehova wazamuwuskirapo masuzgo ghose agho ghalipo cifukwa ca kutondeka kwa ŵanthu. Ndipo wazamukhazikiska caru ciphya ico muzamuŵa urunji. * (Daniel 2:44; 2 Petrosi 3:13) Kasi tikwenera kucitaci kuti tizakasange candulo na ivyo Ciuta walayizga?

Yesu Khristu wakayowoya ico tikwenera kucita. Wakati: “Kuti ŵaŵe na umoyo wamuyirayira, ŵakwenera kumumanyani imwe Ciuta waunenesko yekha, ndiposo Yesu Khristu, mweneuyo mukamutuma.” (Yohane 17:3) Yehova wangatovwira  kuti tizakasange umoyo wamuyirayira mu caru ciphya. Ici nchimoza mwa vifukwa ivyo tingayowoyera kuti Ciuta ngwakukhumbikwa kwa ise.

Vyaka 2000 ivyo vyajumpha, Paulosi wakaphalira ŵanthu ŵa ku Ateni vya Ciuta kuti: “Iyomwene wakupeleka ku ŵanthu wose umoyo na mvuci na vinthu vyose. Pakuti mwa iyo tili ŵamoyo, tikwenda ndipo tiliko, nga ni umo ŵanji ŵa ŵakulemba pakati pinu ŵayowoyera kuti, ‘Cifukwa nase tili mphapu yake.’”—Milimo 17:25, 28.

Fundo iyo Paulosi wakaphalira Ŵaateni yindasinthe. Ciuta ndiyo wakutipa umoyo, cakurya, maji na vinyake. Mwakudumura tingati, tingaŵa na umoyo yayi kwambura vinthu viwemi ivyo iyo wakutipa. Kweni kasi cifukwa wuli Ciuta wakulutilira kupeleka vinthu ivi ku ŵanthu wose, nanga ni awo vya Ciuta ŵalije navyo nchito? Paulosi wakati mwakuti iwo “ŵapenje Ciuta usange ŵangamupapaska na kumusanga nadi, nangauli kuti wali kutali cara na waliyose wa ise.”—Milimo 17:27.

Kasi mungatemwa kuti mumumanye makora Ciuta? Panji kusambira vinandi vya khumbo lake kweniso ulongozgi wake wa umo tingakhalira makora sono kweniso munthazi? Para ni nthena tikumupemphani kuti muphalire munthu uyo wakamupani magazini iyi panji lemberani ŵeneco. Ŵazamuŵa ŵakukondwa kumovwirani.