KUCEZGA NA MUNTHU
Kasi Ciuta Vikumukhwaska Para Tikusuzgika?
Musi umu, muwonenge umo Ŵakaboni ŵa Yehova ŵakuzgolera mafumbo agho ŵanthu ŵakuŵafumba. Titore kuti a Nyausiska, awo Mbakaboni ŵa Yehova, ŵiza ku nyumba kwa a Nyabanda.
CIFUKWA WULI CIUTA WAZOMEREZGA KUTI IVI VICITIKE?
A Nyausiska: Ine ndine Nyausiska, kwali imwe ndimwe anjani?
A Nyabanda: Ndine Nyabanda.
A Nyausiska: Nakondwa kumumanyani.
A Nyabanda: Yewo.
A Nyausiska: Mwahuno nkhugaŵira waliyose thirakiti ili, ilo lili na mutu wakuti, Kasi Mungatemwa Kumanya Unenesko? Namwe linu ili.
A Nyabanda: Ka ni vya chalichi?
A Nyausiska: Enya. Wonani mafumbo 6 agho ghali pakwambilira apa. Pa mafumbo agha, ka ni ndi—
A Nyabanda: Yimani dankha. Mungataya waka nyengo yinu kudumbiskana na ine.
A Nyausiska: Cifukwa wuli mwayowoya nthena?
A Nyabanda: Unenesko ngwakuti, nkhukayika kuti Ciuta waliko.
A Nyausiska: Nawonga kuti mwaniphalira unenesko. Kweni ka ndivyo mukugomezga kwamba kale?
A Nyabanda: Yayi, pakwamba nkhalutanga ku chalichi. Kweni nkhazakaleka kulutako ndipo pajumpha nyengo yitali comene.
A Nyausiska: Nkhukhumba kumucicizgani yayi kuti mugomezge ivyo ine nkhugomezga. Kweni nili wakunweka kucezga namwe. Kasi cilipo ico cikumukayikiskani kuti Ciuta waliko?
A Nyabanda: Enya. A mama wakacita ngozi pa galimoto vilimika 17 ivyo vyajumpha.
A Nyausiska: Phepani comene. So vinthu vikaŵa wuli?
A Nyabanda: Vikaŵa makora ca nthe ŵali kupendera.
A Nyausiska: Phepani comene. Mukwenera kuti mukusuzgika comene.
A Nyabanda: Ni nthena nadi. Lekani nkhujifumba kuti, Usange Ciuta waliko, cifukwa wuli wali kuzomerezga kuti ivi vicitike? Cifukwa wuli Ciuta wakuzomerezga kuti tisuzgikenge nthena?
KASI KUFUMBA NTHENA NKHWANANGA?
A Nyausiska: Mukubudiska yayi para mukujifumba mafumbo ghanthena. Ndipo kanandi ndimo tikucitira para vinthu vyatisuzga. Nakuti ŵanalume ŵanji ŵakugomezgeka ŵa mu nyengo yakale nawo ŵakafumbapo mafumbo ghanthena.
A Nyabanda: Nadi?
A Nyausiska: Enya. Ka mungatemwa kuti nimulongorani kufuma mu Baibolo?
A Nyabanda: Enya.
A Nyausiska: Wonani ivyo nchimi yakugomezgeka Habakuku yikafumba Ciuta pa Habakuk, capitara 1, vesi 2 na 3. Yikafumba kuti: “Yehova, nditi ndilire nkhuto mpaka pauli, ndipo Imwe muleke kupulika? Panji kucemerezga kwa Imwe “Nkhaza!” ndipo muleke kuponoska? Mukundirongoleraci maubendezi na kundiwoneska vyasuzgo?” Kasi mafumbo agha ghakuyanako na agho imwe mukujifumba?
A Nyabanda: Ghakuyana nadi.
A Nyausiska: Ciuta wakamukalipira yayi Habakuku cifukwa ca kufumba mafumbo agha nesi kumuphalira kuti wakukhumbikwira cipulikano cakukhora.
A Nyabanda: Vici!
YEHOVA WAKUKHUMBA YAYI KUTI ŴANTHU ŴASUZGIKENGE
A Nyausiska: Baibolo likutiphalira kuti Ciuta wakuwona masuzgo ghithu kweniso kuti vikumukhwaska.
A Nyabanda: Mukung’anamuraci?
A Nyausiska: Lekani nimulongorani ivyo lemba la Exodus 3:7 likuyowoya. Ka mungaŵazga?
A Nyabanda: Palije suzgo. Likuti: “Ndipo Yehova wakati, ‘Nadi ndawona visuzgo vya ŵanthu ŵane ŵeneaŵa ŵali mu Eguputo, ndapulika kulira kwawo cifukwa ca ŵakuru ŵa milimo; pakuti nkhumanya vitima vyawo.’”
A Nyausiska: Nawonga comene. Mwakuyana na lemba ilo mwaŵazga, kasi tingati Ciuta wakuwona para ŵanthu ŵake ŵakusuzgika?
A Nyabanda: Enya, vikuwoneka kuti wakuwona.
A Nyausiska: Nakuti wakuwona waka pacanyacanya yayi. Wonaniso vesi lenelili cigaŵa caumaliro. Ciuta wakati: “Nkhumanya vitima vyawo.” Mwakuyana na mazgu agha, kasi tingati Ciuta vikumukhwaska yayi para tikusuzgika?
A Nyabanda: Yayi.
A Nyausiska: Wonani kuti Ciuta wakuwona waka masuzgo ghithu yayi, kweni wakutilengera citima para tikusuzgika.
A Nyabanda: Uwo mbunenesko.
A Nyausiska: Uku tikughanaghanira fundo iyi, tiyeni tiŵazgeso nkhani iyo yili pa Yesaya 63:9. Nkhani iyi yikulongora ivyo Ciuta wakacita apo ŵanthu ŵake ŵakasuzgikanga. Mzere wakwamba wa vesi ili ukuti: “Mu visuzgo vyawo vyose nayeso wakasuzgika.” Ntheura mungawona kuti apa napo Ciuta wakakhwaskika na masuzgo gha ŵanthu ŵake.
A Nyabanda: Vikuŵa nga ndimo viliri nadi.
A Nyausiska: A Nyabanda, apa unenesko ngwakuti, Ciuta wakutipwelelera comene ndipo wakukwenyelera para tikusuzgika. Para tikusuzgika, nayo vikumupweteka.
CIFUKWA WULI WANDACITEPO KANTHU KWANYENGO YITALI?
A Nyausiska: Pambere nindalute, pali fundo yimoza iyo nkhukhumba kuti tidumbiskane.
A Nyabanda: Oho.
A Nyausiska: Tiyeni tiwone ivyo Baibolo likuyowoya za nkhongono izo Ciuta wali nazo. Nkhukumbuka ivyo vili pa Yeremiya 10:12. Mungaŵazga?
A Nyabanda: Enya. Likuti: “Ndiye uyo wakalenga caru capasi na nkhongono zake, uyo wakhozga caru na vinjeru vyake, na kutandazga mitambo na mano ghake.”
A Nyausiska: Nawonga comene. Tiyeni tiwone fundo ya vesi ili. Kasi Ciuta wakakhumbikwiranga nkhongono zapadera kuti walenge caru na vyose ivyo vilimo?
A Nyabanda: Nkhanira kwali!
A Nyausiska: Ehe! Usange Ciuta wali na nkhongono zakulengera vyose ivyo tikuviwona, asi ndikuti wali na nkhongono zakumazgira masuzgo ghithu ghose?
A Nyabanda: Enya.
A Nyausiska: Ghanaghanirani za amama ŵinu ŵara. Cifukwa wuli mukukwenyelera kuti ŵakusuzgika?
A Nyabanda: Cifukwa cakuti nkhuŵatemwa, nakuti mbamama na.
A Nyausiska: Para mungaŵa na nkhongono zakumazgira suzgo lawo, kasi mungalimazga?
A Nyabanda: Nkhanira kwali.
A Nyausiska: Mukughanaghana kuti ici cikutiphalira vici? Baibolo likuti Ciuta wakuwona masuzgo ghithu, ndipo wakuticitira citima kweniso ngwankhongono comene. Ntheura, mungawona kuti Ciuta wakuzizipizga pakuleka kunjilirapo kuti wamazge masuzgo ghithu sono.
A Nyabanda: Nkhakwamba kupulika fundo iyi, nindaghanaghanirepo.
A Nyausiska: Kasi vingaŵa kuti wali na vifukwa vyakupulikikwa ivyo wakulekera kunjilirapo kuti wamazge masuzgo ghithu? *
A Nyabanda: Wakwenera kuti wali navyo nadi.
A Nyausiska: Nkhupulika foni yinu yikulira, sono tilekezge dankha, nizamwizaso nyengo yinyake kuti tizakadumbiskane vinandi pa nkhani iyi.
A Nyabanda: Nawonga comene. Muzakize nadi tu! *
Kasi muli na fumbo pa ivyo Baibolo likusambizga? Kasi pali vinthu ivyo Ŵakaboni ŵa Yehova ŵakugomezga, kweni imwe mukuvipulikiska yayi? Usange ni nthena, fumbani yumoza wa Ŵakaboni ŵa Yehova para mwakumana nayo. Wazamukondwa comene kumuzgorani.
^ ndime 61 Kuti mumanye vinandi, wonani cipaturo 11 ca buku la mutu wakuti, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.
^ ndime 64 Nkhani yakulondezgapo ya nga ni iyi yizamulongosora cifukwa ico Ciuta wazomerezgera masuzgo?
Panji Mungatemwa Kuŵerengaso Nkhani Izi
GONGWE LA MULINDA
Cifukwa Wuli Ciuta Wazomerezga Kuti Tisuzgikenge?
Buku lakwamba mu Baibolo likuyowoya cifukwa ico Ciuta wazomerezgera masuzgo kuŵapo uku iyo wali na nkhongono.
