Kucezga na Munthu—Kasi Ŵanthu Ŵawemi Wose Ŵakuluta Kucanya?

ŴAKABONI ŴA YEHOVA wakutemwa kudumbiskana vya mu Baibolo na ŵazengezgani ŵawo. Kasi muli na fumbo lakukhwaskana na Baibolo ilo likumuzizikani? Kasi vilipo vinthu vinyake ivyo Ŵakaboni ŵa Yehova ŵakugomezga, kweni imwe mukuvipulikiska yayi? Usange ni nthena, fumbani yumoza wa Ŵakaboni ŵa Yehova para mwakumana nayo. Wazamukondwa comene kumuzgorani.

Musi umu, muwonenge umo Ŵakaboni ŵa Yehova ŵakuzgolera mafumbo agho ŵanthu ŵakuŵafumba. Titore kuti A Muhoni, awo ni Kaboni wa Yehova, ŵiza ku nyumba ya A Bota.

Kasi Awo Ŵakuluta Kucanya Ŵamucitakoci?

A Muhoni: Para mukughanaghanira za munthazi, kasi mukuwona kuti vinthu vizamusintha panji vizamuhenipirathu?

A Bota: Ine nkhughanaghana kuti vizamusintha. Nkhulindilira kuzakaluta kucanya na kukakhala na Fumu yithu.

A Muhoni: Ico nchiwemi. Baibolo likuyowoya vinandi vyakukhwaskana na umo kucanya kuliri ndipo likuti ŵanji ŵali na mwaŵi wakuluta kucanya. Kasi muli kughanaghanirapo ivyo awo ŵakuluta kucanya ŵamucita?

A Bota: Enya, tamukhala na Ciuta na kumwimbira muyirayira.

A Muhoni: Muli na cilindizga ciwemi nadi. Cakukondweska nchakuti, Baibolo likuyowoya waka za vitumbiko ivyo awo wakuluta kucanya ŵamupokera yayi, kweni likuyowoyaso mulimo wakuzirwa uwo ŵamucita.

A Bota: Ni mulimo wuli?

A Muhoni: Mulimo uwu ukuzunulika pa Uvumbuzi 5:10. Vesi ili likuti: “[Imwe Yesu] mukaŵazgora kuŵa ufumu na ŵasofi ŵa Ciuta withu, ndipo ŵawusenge caru capasi nga ni mathemba.” Kasi mwawona Bota mulimo uwo awo ŵakuluta kucanya ŵazamuŵa nawo?

A Bota: Apa vesi ili likuti ŵazamuwusa caru capasi nga ni mathemba.

A Muhoni: Fundo iyi njakukondweska ŵati?

Kasi Ŵazamuwusa Anjani?

A Muhoni: Kasi nchakupulikikwa yayi kuti usange ŵanthu awo ŵakuluta kucanya ŵamuwusa nga ni mathemba, ndikuti pakwenera kuŵa ŵanji awo ŵazamuŵawusa? Nakuti boma likwenera kuŵa na ŵanthu ŵakuti liŵawusenge asi nthe?

A Bota: Namanya apo pali fundo yinu.

A Muhoni: Ntheura fumbo lakuzirwa ilo mungajifumba ndakuti, kasi ŵazamuwusa anjani?

A Bota: Nkhughanaghana kuti tizamuwusa ŵanthu pa caru awo ŵazamuŵa kuti ŵandafwe na kuluta kucanya.

A Muhoni: Uwo ungaŵa unenesko, usange ŵanthu ŵawemi wose ŵakuluta kucanya. Kweni apa paliso fundo yinyake iyo tingaghanaghanirapo. Kasi vingaŵa kuti pazamuŵa ŵanthu ŵanji ŵawemi awo ŵazamuluta yayi kucanya?

A Bota: Nindapulikepo Mkhristu nanga njumoza uyo wakugomezga nthena.

 A Muhoni: Nafumba fumbo ili cifukwa ca ivyo tikuŵazga pa Salmo 37:29. Kasi mungaŵazga vesi ili?

A Bota: Oho, likuti: “Ŵakunyoloka ŵamkuhara caru na kukhala mwenemumo kwandanda.”

A Muhoni: Nawonga comene. Kasi mwawona uko ŵanthu ŵawemi ŵanandi ŵazamukhala?

A Bota: Vesi ili likuti ŵazamukhala pa caru capasi.

A Muhoni: Mwaneneska, kweni likuti ŵazamukhalapo kwanyengo yicoko waka ngati? Wonani kuti vesi ili likuti: ‘Ŵazamukhala mwenemumo kwandanda.’

A Bota: Panji cikung’anamura waka kuti nyengo zose pa caru capasi paŵenge ŵanthu ŵawemi. Para tafwa na kuluta kucanya ndikuti pa caru capasi paŵengeso ŵanthu ŵanyake ŵawemi awo ŵababikengeso.

A Muhoni: Ŵanandi ŵakuwona nadi kuti ndivyo vesi ili likung’anamura. Kweni kasi mukughanaghana kuti vesi ili lingaŵa kuti likung’anamura vinyake? Kasi lingaŵa kuti likuyowoya kuti ŵanthu ŵawemi ŵazamukhala pa caru capasi kwamuyirayira?

A Bota: Nkhukayika, kweni yowoyaninge nkhupulika.

Paradiso wa pa caru Capasi Kunthazi

A Muhoni: Ipo tiyeni tiwoneso vesi linyake ilo likuyowoya za umo umoyo uzamuŵira pa caru capasi kunthazi. Tiyeni tiŵazge Uvumbuzi 21:4. Pakuyowoya za ŵanthu awo ŵazamuŵa ŵamoyo pa nyengo iyi, vesi ili likuti: “[Ciuta] wazamufyura sozi lililose ku maso ghawo, ndipo nyifwa yizamuŵakoso cara, nesi kutengera panji kutampha nesi vyakuŵinya vizamuŵakoso cara. Vinthu vyakale vyafumapo.” Kasi ici nchakukondweska yayi?

A Bota: Enya. Kweni nkhughanaghana kuti lemba ili likuyowoya za umo umoyo uzamuŵira kucanya.

A Muhoni: Mbunenesko kuti awo ŵakuluta kucanya nawo ŵazamuŵa na vitumbiko vyakuyana waka. Kweni wonaniso ivyo vesi ili likuyowoya. Kasi likuti nchivici cizamucitika pa nkhani ya nyifwa?

A Bota: Likuti, “nyifwa yizamuŵakoso cara.”

A Muhoni: Mwaneneska. Nkhugomezga kuti mungazomerezga kuti usange cinthu cinyake cizamuŵakoso yayi ndikuti cinthu ico cikaŵako kale.

A Bota: Ni nthena nadi.

A Muhoni: Kweni kasi muli kupulikapo kuti kucanya kukuŵa nyifwa? Asi mpha caru capasi pera apo ŵanthu ŵakufwa?

A Bota: Mmm! Nkhwenera kughanaghanirapo dankha.

A Muhoni: Mwawona, Baibolo likusambizga kuti ŵanthu ŵanyake ŵawemi ŵazamuluta kucanya, kweni ŵanandi ŵazamukhala pa caru capasi kwamuyirayira. Nakuti panji muli kupulikapo mazgu ghakumanyikwa agha: “Mbakukondwa awo mbakuzika, pakuti ŵazamuhara caru capasi.”—Mateyu 5:5

A Bota: Enya, nili kughapulikapo kanandi waka ku chalichi.

A Muhoni: Usange ŵarunji ŵazamuhara caru, asi ndikuti pa caru pazamukhalanga ŵanthu? Awo ŵazamukhala pa caru capasi ŵazamusangwa na vitumbiko ivyo vyayowoyeka mu buku la Uvumbuzi. Ŵazamuwona umo caru cithu ici cizamusinthira, cifukwa Ciuta wazamuwuskapo viheni vyose kusazgapo nyifwa.

A Bota: Namanya apo pali fundo yinu, kweni nkhukayika usange mavesi ghaŵiri pera agha ngakukwana kukhozgera fundo yinu.

A Muhoni: Ndimo viliri yayi. Paliso mavesi ghanandi comene agho ghakuyowoya umo umoyo uzamuŵira pa caru capasi kunthazi. Ningamulongorani limoza mwa malemba agho nkhutemwa pa kanyengo kacoko waka.

A Bota: Suzgo palije.

“Muheni kuti Tiwaŵepo Cara”

A Muhoni: Pakwamba tanguŵazga Salmo 37:29. Tiyeni tijureso penepara. Sono tiŵazgenge vesi 10 na 11. Kasi mungaŵazga mavesi agha?

 A Bota: Enya yayi! “Kwakhala kanyengo, ndipo muheni kuti tiwaŵepo cara; tiuŵanike malo ghake kweni iye ntha waŵengemo. Ŵakuzika ndiwo tiŵaharenge caru, tiŵakondwenge na kusakata comene.”

A Muhoni: Nawonga. Para tikuwona mu vesi 11, kasi “ŵakuzika” panji kuti ŵanthu ŵawemi ŵazamukhala nkhu?

A Bota: Likuti ‘ŵazamuhara caru.’ Ndipouli, nkhughanaghana kuti vesi ili likuyowoya za sono. Nakuti ka ŵanthu ŵawemi ŵalipo pa caru mazuŵa ghano.

A Muhoni: Uwo mbunenesko. Kweni wonani kuti vesi ili likuti ŵanthu ŵawemi ŵazamusangwa na “kusakata comene.” Kasi sono ŵanthu ŵakusangwa na mtende wanadi ngati?

A Bota: Viŵi yayi.

A Muhoni: Ipo kasi layizgo lakuti ŵanthu ŵazamusangwa na mtende lizamufiskika wuli? Tiyelezgere kuti muli na mudadada wa nyumba iyo mukukhala ŵarenti. Ŵanji mbawemi, ndipo ŵakuyipwelelera nyumba yinu, kweniso ŵakukhala makora na ŵazengezgani ŵawo. Mukukondwa kuti ŵakucita renti mu nyumba yinu. Kweni ŵarenti ŵanji mbaheni, ŵakuyinanga nyumba yinu ndipo ŵakukhala makora ca na ŵazengezgani ŵawo. Kasi imwe mungacita wuli usange ŵarenti ŵaheni ŵara ŵakukana kuleka nkharo zawo?

A Bota: Mbwe niŵacimbizgengemo.

A Muhoni: Ivi ndivyo Ciuta wazamucita na ŵanthu ŵaheni awo ŵali mu caru. Wonaniso vesi 10 ilo likuti: “Muheni kuti tiwaŵepo cara.” Mu mazgu ghanyake tingati, Ciuta “wazamucimbizga” ŵanthu awo ŵakusuzga ŵanyawo. Pamasinda ŵanthu ŵawemi ŵazamukhala mwamtende pa caru capasi. Nkhugomezga kuti fundo yakuti ŵanthu ŵawemi ŵazamukhala pa caru capasi kwamuyirayira yikupambanako na ivyo mukasambizgika kumasinda.

A Bota: Enya, fundo iyi nindayipulikepo ku chalichi kwithu.

A Muhoni: Nga umo mwanguyowoyera pakwamba nchakukwana yayi kuŵazga waka malemba ghacoko waka pa nkhani iyi. Tikukhumbikwira kusanda makora ivyo Baibolo lose likuyowoya pa nkhani ya ico cizamucitikira ŵanthu ŵawemi kunthazi. Mwakuyana na Malemba agho taŵazga, kasi mukuwona kuti vingacitika yayi kuti ŵanthu ŵanji ŵawemi ŵalute kucanya ndipo ŵanji ŵanandi ŵazakakhale pa caru capasi kwamuyirayira?

A Bota: Nkhukayika. Kweni vikuŵa nga mbunenesko mwakuyana na malemba agho mwaŵazga. Nkhwenera kughanaghaniraposo makora.

A Muhoni: Apo mukughanaghanirapo nkhani iyi, nyengo zinyake muŵengeso na mafumbo ghanyake. Mwaciyelezgero, panji mungajifumba kuti, kasi ŵanthu ŵawemi awo ŵakaŵako pambere ise tindaŵeko ŵali kuya nkhu? Kasi wose ŵali kuluta kucanya? Usange ŵali kucanya ca, ŵali nkhu pasono?

A Bota: Mafumbo agha ngawemi nadi.

A Muhoni: Pali vinthu viŵiri ivyo ningamucitirani. Cakwamba, ningamulemberani mavesi ghakukhwaskana na nkhani iyi. a Caciŵiri, ningakaweraso na kuzakadumbiskana namwe mavesi agha para mwaghaŵazga na kughanaghanirapo. Imwe mukuwona wuli?

A Bota: Ico nchiwemi. Nawonga comene.

[Mazgu ghamusi]