Ŵaŵazgi Ŵithu Ŵakufumba Kuti . . .

Cifukwa Ŵuli Ciuta Ŵakukhumba Kuti Ŵateŵeti Ŵake Ŵatoranenge na Ŵakhristu ŵanyawo?

▪ Pa malango agho Ciuta wakapeleka ku Ŵaisrayeli pakaŵaso Dango la umo ŵakeneranga kucitira na ŵanthu ŵamitundu yinyake. Dango ili likati: “Mungatorerananga nawo nthengwa. Mungamupanga mwanamwanarume wa iwo mwanamwanakazi wako, panji kutolera mwana wako mwanalume mwanamwanakazi wa iwo.” (Duteronome 7:3, 4) Cifukwa wuli Yehova wakaŵakanizga?

Yehova wakamanyanga kuti Satana wakakhumbanga kupuluska ŵanthu ŵake kuti ŵambe kusopa vikozgo. Lekani Ciuta wakalutilira kuŵacenjezga kuti ŵakusopa vikozgo aŵa ‘tiŵapatuske ŵana ŵinu kuleka kulondezga Ine, mwakuti ŵateŵetere ŵaciuta ŵanyake.’ Vinandi vikatenge vinangikenge. Ŵaisrayeli ŵambenge kusopa ŵaciuta ŵanyake, mphanyi Ciuta wakaleka kuŵatemwa, na kuŵavikilira. Nakuti mphanyi cikaŵa cipusu kuwa mu mawoko gha ŵalwani ŵawo. Ipo vikate vyendenge wuli kuti mtundu wawo uzakafumiske mphapu yakulayizgika panji kuti Mesiya? Ntheura, Satana wakakhumbanga kupuluska Ŵaisrayeli kuti ŵatoranenge na ŵanthu ŵakusopa vikozgo.

Kumbukani kuti Ciuta wakapweleleranga Muisrayeli waliyose payekha. Wakamanyanga kuti waliyose wangaŵa wakukondwa usange wali nayo paubwezi. Cifukwa wuli Yehova wakafipiranga mtima ŵanthu ŵake pa nkhani ya kutorana na mitundu yinyake? Wonani ivyo vikacitikira Themba Solomoni. Solomoni wakalimanyanga cenjezgo la Yehova lakukhwaskana na ŵanakazi ŵakusopa vikozgo. Cenjezgo ili likati: “[Ŵanakazi aŵa] tiŵazgore mtima winu kuti mulondezge ŵaciuta ŵawo.” Pakuti Solomoni wakaŵa na vinjeru vyapadera, panji wakaghanaghananga kuti ulongozgi uwu ukumukhwaska yayi. Wakasulako cenjezgo ili. Kasi cikacitika nchivici? “Ŵawoli ŵake ŵakapatuska mtima wake . . . kulondezga ŵaciuta ŵanyake.” Ici cikaŵa cacitima comene. Yehova wakaleka kumutemwa Solomoni, ndipo ŵanthu ŵakagaŵikana cifukwa ca kuleka kugomezgeka kwake.—1 Mathemba 11:2-4, 9-13.

Ŵanji ŵangayowoya kuti kweni pali ŵanji awo vikaŵayendera makora. Mwaciyelezgero, Malon wakatora Rute mwanakazi wa ku Moabu kweni asi wakamba kusopa Ciuta? Kutora ŵanakazi ŵa ku Moabu kukaŵa kwakofya. Malon wakulumbika yayi cifukwa cakutora mwanakazi wa ku Moabu, nakuti wakafwa luŵiro. Ndipo panyengo iyi Rute wakaŵa kuti wandambe kusopa Yehova. Munung’una wa Malon, Kilion wakatora Oripa mwanakazi wa ku Moabu uyo wakademelera ku “ŵaciuta ŵake.” Bowazi wakatora Rute pati pajumpha vilimika vinandi. Kweni panyengo iyi wakaŵa kuti wamba kusopa Yehova. Nakuti pamasinda Ŵayuda ŵakawonanga Rute nga ni Muyuda mweneko. Nthengwa ya Rute na Bowazi likaŵa thumbiko ku wose ŵaŵiri.—Ruth 1:4, 5, 15-17; 4:13-17.

Pakuti Malon wakatora Rute mwanakazi wa ku Moabu, ipo kasi nchamahara kughanaghana kuti nase vinthu vitenderenge makora nanga tingaleka kulondezga ulongozgi wa Yehova wakutorana na Ŵakhristu ŵanyithu? Asi kughanaghana nthena kungayana waka na kuyowoya kuti kuchova njuga ni nthowa yiwemi yakusangira vyakukhumbikwa pa umoyo cifukwa cakuti munthu munyake wakawinapo?

Baibolo likuciska Ŵakhristu kuti ŵatorenge panji kutengwa “mu Fumu pera.” Likuticenjezga kuti tikwenera yayi kukakika “joko mwakupambana pamoza na ŵambura kugomezga.” Ulongozgi uwu ukuluta ku Ŵakhristu awo ŵakupenja munyawo wakuti ŵatorane nayo. Kwa awo ŵali kutorana kale na ŵanthu ŵambura kugomezga, Baibolo likupeleka ulongozgi wakovwira comene pa umo ŵangacitira na suzgo ili. (1 Ŵakorinte 7:12-16, 39; 2 Ŵakorinte 6:14) Ulongozgi wose uwu ukulongora kuti Yehova Ciuta, uyo wakambiska nthengwa, wakukhumba kuti tikondwenge pakuŵa ŵateŵeti ŵake, kwali tili mu nthengwa panji yayi.