Sendelerani Kwa Ciuta
“Tizomerezgani Tiwelere Kunyumba”
Kasi muli kuleka kuteŵetera Yehova? Kasi mukukhumba kwambaso kweni mukughanaghana kuti Ciuta wangamupokelerani yayi? Ŵazgani nkhani iyi na yakulondezgapo. Nkhani izi zalembekera imwe.
MAMA munyake wakasambizgika kopa Ciuta kwamba pa wanici, kweni wakapuluka. Iyo wakati, “Nkhaŵeyelera Yehova kuti niwelere kwa iyo kweniso kuti wanigowokere.” Kasi mukumulengera lusungu mama uyu? Kasi mukughanaghana kuti Ciuta wakujipulika wuli para wakuwona ŵanthu awo ŵali kuleka kumuteŵetera? Kasi wakuŵakumbuka? Kasi wakukhumba kuti ‘ŵawelere kwa iyo’? Kuti tizgore mafumbo agha, tiyeni tiwone ivyo Yeremiya wakalemba. Mupembuzgikenge kumanya mazgoro gha mafumbo agha.—Ŵazgani Yeremiya 31:18-20.
Tiyeni tiwone umo vinthu vikaŵira apo Yeremiya wakalembanga mazgu agha. Mu cilimika ca 740 B.C.E., Yehova wakazomerezga Ŵaasiriya kuti ŵathereske ufumu wa mafuko khumi wa Israyeli na kuŵatolera ku wuzga. * Ciuta wakacita ivi kuti ŵanthu ŵake ŵasambirepo kanthu, cifukwa ŵakacitanga zakwananga ziheni comene. Iwo ŵakapulikiranga yayi para nchimi za Ciuta zikuŵacenjezga. (2 Mathemba 17:5-18) Kura, ŵakasuzgika comene, cifukwa ŵakaŵa kutali na kwawo kweniso ŵakapambana na Ciuta wawo. Kasi ŵakasintha? Kasi Yehova wakaŵaluwa? Kasi iyo wakaŵa wakunozgeka kuŵapokelera?
“Ndazgoka Mtima”
Ku wuzga uko ŵakaŵa, Ŵaisrayeli ŵakajinyumwa ndipo ŵakapera. Yehova wakawona kuti ŵapera kufumira pasi pa mtima. Tegherezgani apo Yehova wakulongosora umo Ŵaisrayeli ŵakajipulikiranga mu mtima. Mu lemba ili, Ŵaisrayeli ŵakucemeka Efraimu.
Yehova wakati: “Ndamupulika Efraimu wakujililira.” (Vesi 18) Yehova wakapulikanga apo Ŵaisrayeli ŵakadandawuranga na suzgo iyo yikaŵasanga cifukwa ca kuleka kupulikira. Munthu munyake wakati mazgu ghakuti ‘kujililira’ ghakung’anamuraso ‘kupukunya.’ Iwo ŵakaŵa nga ni mwana wakuzgeŵa uyo wakupukunya mutu apo wakughanaghanira viphyo ivyo wasanga ndipo wakukhumba comene kuwelera kwawo. (Luka 15:11-17) Kasi Ŵaisrayeli ŵakayowoyanga vici?
“Mwandilanga . . . ngati nkhambako yambura kuzgoŵera goliwoli.” (Vesi 18) Ŵanthu aŵa ŵakamanya kuti ŵakeneranga kulangika. Nakuti iwo ŵakaŵa nga ni nkhambako yambura kusambizgika. Buku linyake likuti panji ntharika iyi yikung’anamura kuti ŵanthu aŵa ŵakaŵa nga ni nkhambako iyo “yilekenge kukana goliwoli, mphanyi ŵakayicokonya yayi.”
“Ndiwezgani ndipo ndiwezgekenge, cifukwa Imwe ndimwe Yehova Ciuta wane.” (Vesi 18) Ŵanthu aŵa ŵakajiyuyura na kucema Ciuta. Iwo ŵakapuluka, kweni sono ŵakaŵeyelera Yehova kuti ŵawelere kwa Iyo. Mu Baibolo linyake, vesi ili likuŵazgika kuti: “Ndimwe Ciuta withu, taŵeya, tizomerezgani tiwelere.”—Contemporary English Version.
“Ndazgoka mtima; . . . nkhaŵa na soni, mahara ghakandimalira.” (Vesi 19) Citima cikaŵakora ŵanthu aŵa cifukwa ca kwananga. Ŵakazomera ubudi wawo. Ŵakaŵa nga ŵakujitimba pa nganga, ndipo soni zikaŵakora comene.—Luka 15:18, 19, 21.
Ŵaisrayeli ŵakapera. Ŵakaŵa na citima comene. Ŵakaphalira Ciuta ubudi wawo, na kuleka nthowa zawo ziheni. Kasi Ciuta wakaŵapulika? Kasi wakaŵapokelera?
‘Nadi Niŵenge Nayo na Lusungu’
Ŵaisrayeli ŵakaŵa ŵanthu ŵapadera kwa Yehova. Iyo wakati: “Ndine wiske wa Israyeli, Efraimu mwana wane wauŵere.” (Yeremiya 31:9) Kasi dada wacitemwa wangakana kupokelera mwana wake uyo wapera zanadi? Pulikani umo Yehova wakajipulikira pakuyowoya mazgu agha ku ŵanthu ŵake:
“Kasi Efraimu ndi mwana wane wakutemweka? Kasi ndi mwana wakukondwereska? Cifukwa nanga nkhuyowoya nayo kumususka, ndicali kumukumbuka ndipera.” (Vesi 20) Agha ni mazgu ghacitemwa nadi! Pakuŵa mupapi wambura kulekelera kweniso wacitemwa, Ciuta wakawona kuti cikaŵa cakwenelera ‘kususka’ ŵana ŵake pa ivyo ŵakacitanga. Wakacita ici kanandi waka. Kweni wakati wawona kuti ŵakupulika yayi, wakaŵasida. Ŵakakoreka na kuŵa ŵazga, kuleka cikaya cawo. Nangauli wakaŵalanga, wakaŵaluwa yayi. Nakuti wangacita yayi cinthu canthena. Dada uyo wakutemwa ŵana ŵake wangaŵaluwa yayi. Kweni kasi Yehova wakajipulika wuli wakati wawona kuti ŵana ŵake ŵapera nadi?
“Ntheura mtima wane ukumupukwira; nadi . . . ndiŵe nayo na lusungu.” (Vesi 20) Mtima wa Yehova ukaŵa ku ŵana ŵake. Vikamukhwaska Yehova kuwona kuti ŵana ŵake ŵapera, ndipo wakakhumba comene kuti ŵawelere kwa iyo. Yehova wakajipulika nga ni wiske wa mwana wakuzgeŵa uyo wakuzunulika mu ntharika ya Yesu. ‘Lusungu lukamukora’ ndipo wakaŵa wakunozgeka kupokelera ŵana ŵake.—Luka 15:20.
“Yehova Nizomerezgani Niwelere”
Ivyo vili pa Yeremiya 31:18-20 vikutovwira kumanya kuti Yehova ngwacisungusungu. Ciuta wakuluwa yayi awo ŵali kumuteŵeterapo. Wuli usange awo ŵakaleka ŵakukhumba kuwelera kwa iyo? Ciuta ngwakunozgeka ‘kugowokera.’ (Salmo 86:5) Wangaŵawezga yayi awo ŵiza kwa iyo na mtima wakupera. (Salmo 51:17) Kweni iyo wakuŵapokelera mwakukondwa.—Luka 15:22-24.
Mama yura wazunulika pakwamba wakacitapo kanthu kuti wawelere kwa Yehova. Wakaluta ku maungano gha Ŵakaboni ŵa Yehova. Pakwamba wakajiwona nga ngwawakawaka. Iyo wakati, “Nkhajiwonanga kuti nili wambura kwenelera.” Kweni ŵalara ŵakamukhozga na kumovwira kuti wakhoreso mwauzimu. Iyo wakawonga kufumira pasi pa mtima kuti, “Nili wakukondwa comene kuti Yehova wali kunizomerezga kuwelera kunyumba!”
Para mukateŵeterapo Yehova ndipo sono mukukhumba kwambaso, tikumupemphani kuti mulute ku maungano gha Ŵakaboni ŵa Yehova kufupi na uko mukukhala. Manyani kuti Yehova wakucitira lusungu awo ŵakucemerezga kuti: “Tizomerezgani tiwelere kunyumba!”
Vipaturo ivyo mungaŵazga mu Epulero:
[Mazgu ghamusi]
^ ndime 5 Vilimika vinandi pambere ivi vindacitike, mu cilimika ca 997, ufumu wa Israyeli ukagaŵika paŵiri. Kumwera, kukaŵa ufumu wa mafuko ghaŵiri wa Yuda. Kumpoto kukaŵa ufumu wa mafuko khumi wa Israyeli, uwo ukacemekangaso Efraimu cifukwa ndilo likaŵa fuko lakumanyikwa comene.
