Kasi Mazgoro Nganchito Wuli?

“Mumanyenge unenesko, ndipo unenesko umufwaturaninge.”—YOHANE 8:32.

BAIBOLO likutisambizga unenesko uwo ungatifwatura ku vigomezgo vyakutimbanizga na vyakupuluska pa nkhani ya Yesu. Kweni kasi ivyo tikugomezga pa nkhani iyi vili na nchito? Enya. Vili na nchito kwa Yehova na Yesu. Ipo vikweneraso kuŵa na nchito kwa ise.

● Cifukwa wuli vili na nchito kwa Yehova? Cifukwa “Ciuta nchitemwa.” (1 Yohane 4:8) Yehova wakukhumba kuti tikhalenge mwakukondwa kwamuyirayira. Yesu wakati: “Ciuta wakacitemwa comene caru, mwakuti wakapeleka Mwana wake wapadera yekha, ntheura kuti waliyose uyo wakupulikana mwa iyo . . . waŵenge na umoyo wamuyirayira.” (Yohane 3:16) Ciuta wakatuma Mwana wake kuti watiwombore na kujura nthowa yakuti ise tiŵe ŵamoyo kwamuyirayira pa caru capasi mwakuyana na khumbo lake. (Genesis 1:28) Ciuta ngwakunweka kupeleka umoyo wamuyirayira kwa awo ŵakusambira unenesko pa nkhani ya Yesu na kulondezga ivyo ŵakusambira.—Ŵaroma 6:23.

● Cifukwa wuli vili na nchito kwa Yesu? Yesu nayo wakuŵatemwa comene ŵanthu. Wakapeleka umoyo wake cifukwa ca ise. (Yohane 15:13) Wakamanya kuti palije nthowa yinyake iyo ŵanthu ŵangasangira ciponosko. (Yohane 14:6) Lekani Yesu wakukhumba kuti ŵanthu ŵanandi ŵasange candulo na sembe iyo wali kupeleka. Ntheura wakatuma ŵasambiri ŵake ŵaunenesko kuti ŵasambizge ŵanthu pa caru cose capasi mwakuti ŵamanye khumbo la Ciuta.—Mateyu 24:14; 28:19, 20.

● Cifukwa wuli vili na nchito kwa ise? Ghanaghanirani vinthu ivyo mukuwona kuti ni vyakuzirwa kwa imwe, nga ni umoyo winu na mbumba yinu. Kasi mukukhumba yayi kuti imwe na ŵanthu awo mukutemwa mukhalenge makora kwambura kulwara? Kwizira mwa Yesu, Yehova wakumupani mwaŵi wakuti imwe na ŵanthu awo mukutemwa muzakakhale mu caru ciphya kwamuyirayira. Mu caru ici muzamuŵavya vyakuŵinya na masuzgo. (Salmo 37:11, 29; Uvumbuzi 21:3, 4) Kasi mungatemwa yayi kukhala mu caru canthena? Usange ni nthena mukwenera kucitapo kanthu.

Wonaniso vesi ilo lili musi mwa mutu wa nkhani iyi. Vesi ili likuti: “Mumanyenge unenesko, ndipo unenesko umufwaturaninge.” Unenesko uwu ukulongosora vya Yesu na nchito iyo wakucita kuti khumbo la Ciuta licitike ndipo ungamufwaturani ku kwananga na nyifwa. Kweni kuti mufwatuke, mukwenera ‘kumanya unenesko.’ Ipo cingaŵa makora kuti muwumanye unenesko uwu na umo imwe kweniso awo mukutemwa mungasangira nawo candulo. Ŵakaboni ŵa Yehova mbakunozgeka kumovwirani.