Baibolo Likusintha Umoyo wa Ŵanthu

KASI mwanakazi munyake uyo wakalereka makora yayi wakacita wuli kuti umoyo wake uŵe wacandulo? Nchivici cikapangiska munyamata munyake uyo wakagalukira boma kuti waŵe mupharazgi wa makani ghawemi? Ŵazgani nkhani izi kuti musange mazgoro.

“Nkhakhumbanga comene kutemweka.”—INNA LEZHNINA

CILIMIKA ICO WAKABABIKIRA: 1981

UKO WAKABABIKIRA: RUSSIA

IVYO VIKAMUCITIKIRA: WAKALEREKA MAKORA YAYI

UMO NKHAŴIRA KALE: Nili kubabika wakumangwa makutu, ndipo ŵapapi ŵane nawo ŵakaŵa ŵakumangwa makutu. Nkhakhalanga makora comene kwamba pa ubonda kuzakafika apo nkhaŵa na vilimika 6. Pamanyuma, ŵapapi ŵane ŵakapatana. Nangauli nkhaŵa mucoko comene, nkhamanyanga umo vinthu vikuŵira para ŵapapi ŵapatana ndipo vikaniŵinya comene. Ŵakati ŵapatana, adada na mudumbu wane mulara ŵakakakhala ku Troitsk, apo ine na amama tikasamira ku Chelyabinsk. Nyengo yikati yajumphapo amama ŵakatengwaso kunyake. Adada aŵa ŵakaŵa ŵaloŵevu comene ndipo kanandi ŵakatimbanga amama na ine wuwo.

Mu 1993, mudumbu wane mulara wakabira mu maji na kufwa. Ngozi iyi yikahangayiska comene mbumba yithu. Amama ŵakamba kumwa comene phere kuti ŵaluweko nyifwa iyi, ndipo nawo pamoza na adada ŵakamba kunisuzga. Nkhamba kupenjapenja umoyo uwemi. Nkhakhumbanga comene kutemweka. Nkhamba kuluta ku machalichi ghakupambanapambana kuti nkhapembuzgikeko, kweni nkhapembuzgikanga yayi.

UMO BAIBOLO LIKASINTHIRA UMOYO WANE: Apo nkhaŵa na vilimika 13, munyane uyo tikaŵa kilasi limoza wakaniphalirangako nkhani za mu Baibolo. Munyane uyu wakaŵa yumoza wa Ŵakaboni ŵa Yehova. Nkhakondwanga comene kupulikizga nkhani za ŵanthu awo ŵakuzunulika mu Baibolo nga ni Nowa na Yobu. Ŵanthu aŵa ŵakateŵeteranga Ciuta nangauli ŵakakumananga na masuzgo ghakofya. Mwaluŵiro nkhamba kusambira Baibolo na Ŵakaboni ŵa Yehova na kuluta ku maungano ghawo.

Cifukwa ca kusambira Baibolo, nkhajulika ku maso kuti nimanye unenesko uwo likusambizga. Nkhakondwa comene nkhati nasambira kuti Ciuta wali na zina. (Salmo 83:18) Nkhakondwaso comene kuwona umo Baibolo likayowoyerathu ivyo vizamucitika mu “mazuŵa ghaumaliro.” (2 Timote 3:1-5) Nkhasangwa kusambira za cilindizga cakuti ŵakufwa ŵazamuwuka. Ghanaghanirani waka. Nizamuwonanaso na mudumbu wane.—Yohane 5:28, 29.

 Ndipouli, ni wose yayi awo ŵakakondwanga na ivyo nkhasambiranga. Amama na adada ŵaciŵiri aŵa ŵakatinkhanga comene Ŵakaboni ŵa Yehova. Ŵakayezga kunicicizga kuti nileke kusambira Baibolo. Kweni ivyo nkhasambiranga nkhavitemwanga comene, ndipo nkhaŵikapo mtima kuti nilekenge yayi kusambira.

Cikaŵa cipusu yayi kuzizipizga apo ŵapapi ŵane ŵakanisuskanga. Cinthu cinyake cakucitiska citima nchakuti mudumbu wane mucoko uyo nkhalutanga nayo ku maungano gha Ŵakaboni ŵa Yehova nayo wakabira mu maji na kufwa. Kweni Ŵakaboni ŵa Yehova ŵakaŵa nane pafupi. Kwa iwo nkhasangangako citemwa ico nkhadokeranga kwamba kale comene. Nkhamanya kuti cisopa cawo ndico cikwenera kuti nchaunenesko. Mu 1996, nkhabapatizika na kuŵa yumoza wa Ŵakaboni ŵa Yehova.

UMO NASANGIRA CANDULO: Kwa vilimika vinkhondi na cimoza, nakhala mu nthengwa na mfumu wane Dmitry uyo ni muwemi comene. Tose taŵaŵiri tikuteŵetera pa ofesi ya Ŵakaboni ŵa Yehova ku St Petersburg. Nyengo yikati yajumphapo, ŵapapi ŵane ŵakaleka kususka comene ivyo nkhugomezga.

Nkhuwonga comene kuti namumanya Yehova. Kuteŵetera Yehova kwanovwira kuti umoyo wane uŵe wacandulo.

“Nkhajifumbanga mafumbo ghanandi.”—RAUDEL RODRÍGUEZ RODRÍGUEZ

CILIMIKA ICO WAKABABIKIRA: 1959

UKO WAKABABIKIRA: CUBA

IVYO WAKACITANGA: WAKAGALUKIRA BOMA

UMO NKHAŴIRA KALE: Nkhababikira mu msumba wa Havana ku Cuba. Nkhakulira ku cigaŵa cikavu, uko ŵanthu ŵakatemwanga comene kutimbana mu misewu. Apo nkhakulanga nkhamba kutemwa comene maseŵero ghakutimbana na kuwiskirana pasi na maseŵero ghanyake ghankhaza.

Ku sukulu nkhaŵa na mahara ndipo ŵapapi ŵane ŵakaniciskanga kuti nizakalute ku yunivesite. Apo nkhaŵa ku yunivesite, nkhamba kuwona kuti vinthu vikwenda  makora yayi pa nkhani ya ndyali mu caru cithu ndipo vikwenera kusintha. Nkhagalukira boma. Ine na munyane uyo tikaŵa kilasi limoza tikawukira wapolisi na cilato cakuti timupoke futi. Tikalimbana comene mwakuti wapolisi uyu wakapwetekeka comene ku mutu. Ine na munyane tikajalirika mu jele ndipo ŵakalangura kuti tikomeke mwakucita kutilasa na futi. Nkhaŵa na vilimika 20 pera, kweni pa nyengo iyi nkhaŵa pafupi kukomeka.

Mu cipinda cane ca mu jele, nkhayezgeleranga umo nizamucitira pambere ŵandanilase na futi. Nkhakhumbanga yayi kulongora kuti nili na wofi. Kweni pa nyengo yeneyiyi, nkhajifumbanga mafumbo ghanandi. Nkhajifumbanga kuti: ‘Cifukwa wuli urunji ukusoŵa comene mu caru? Kasi vinthu viŵenge nthena nyengo zose?’

UMO BAIBOLO LIKASINTHIRA UMOYO WANE: Nyengo yikati yajumphapo cilango cakuti tikomeke cikasinthika, ndipo tikalangurika kuti tikhale mu jele vilimika 30. Pakaŵa pa nyengo iyi apo nkhakumana na Ŵakaboni ŵa Yehova awo ŵakajalirika mu jele cifukwa ca vigomezgo vyawo vya cisopa. Nkhatoleka mtima kuwona umo Ŵakaboni ŵakaŵira ŵacikanga kweniso ŵamtende. Nangauli ŵakajalirika mu jele kwambura cifukwa, kweni ŵakakwiyanga yayi nesi kukalipa.

Ŵakaboni ŵakanisambizga kuti Ciuta wanozgera ŵanthu vinthu viwemi. Ŵakanilongora mu Baibolo kuti Ciuta wazamusintha caru ici kuŵa paradiso, ndipo muzamuŵa kuswa malango yayi nesi vinthu vyambura urunji. Ŵakanisambizga kuti caru cizamuŵa na ŵanthu ŵawemi pera, awo ŵazamuŵa na mwaŵi wa kuzakakhala na umoyo kwamuyirayira.—Salmo 37:29.

Nkhasangwanga na ivyo nkhasambiranga ku Ŵakaboni, kweni nkharo yane yikapambananga comene na yawo. Nkhaghanaghananga kuti ningakwaniska yayi kuleka kunjilirapo pa vya ndyali panji kuleka kuwezgera. Ntheura nkhaghanaghana kuti niŵazgenge panekha Baibolo. Nkhati namalizga kuŵazga, nkhawona kuti Ŵakaboni ŵa Yehova pera ndiwo ŵakucita vinthu nga umo ŵakacitiranga Ŵakhristu ŵakwambilira.

Cifukwa ca kusambira Baibolo, nkhamanya kuti nkhwenera kusintha vinthu vinandi pa umoyo wane. Mwaciyelezgero, nkheneranga kusintha kayowoyero, cifukwa nkhatemwanga comene kuyowoya mazgu ghakutuka. Nkhenerangaso kuleka kukhweŵa na kuleka kunjilirapo pa vya ndyali. Cikaŵa cipusu yayi kuti nisinthe vinthu ivi, kweni Yehova wakanovwira ndipo mwapacokopacoko nkhamba kusintha.

Kweni vikanisuzga comene kuti nileke kukwiya luŵiro. Mpaka sono nicali kulomba kuti nijikorenge pa nkhani iyi. Nawovwirika comene na mavesi gha mu Baibolo nga ni Zintharika 16:32 ilo likuti: “Uyo wakuziwulika kukalipa ndi muwemi kwakuluska cinkhara, ndipo uyo wakuwusa mzimu wake kwakuluska uyo wapoka muzi.”

Mu 1991, nkhabapatizika na kuŵa yumoza wa Ŵakaboni ŵa Yehova. Nkhabapatizikira mu cibafa ca ku jele. Cilimika cakulondezgapo, taŵakayidi ŵanyake ŵakatifumiska na kutituma ku Spain cifukwa ndiko kukaŵa ŵabali ŵithu. Nkhati nafika waka ku Spain, nkhamba kuluta ku maungano gha Ŵakaboni ŵa Yehova. Ŵakaboni ŵakanipokelera nga kuti nakhala nawo kwa vilimika vinandi, ndipo ŵakanovwira comene apo nkhamba umoyo uphya ku Spain.

UMO NASANGIRA CANDULO: Sono nkhukondwa kuteŵetera Ciuta pamoza na muwoli wane na ŵana ŵane ŵasungwana. Sono nkhumalira nyengo yinandi kovwira ŵanji kuti ŵasambire Baibolo. Nyengo zinyake nkhughanaghanira vyakumanyuma. Apo nkhaŵa munyamata, nkhaŵa pafupi kukomeka, kweni nkhuwonga kuti nasanga vyandulo vinandi kufuma nyengo iyo. Nili wamoyo, kweniso nkhulindilira vinthu viwemi kunthazi. Nkhulindilira mwakunweka Paradiso uyo walayizgika, umo muzamuŵa urunji ndipo “nyifwa yizamuŵakoso cara.”—Uvumbuzi 21:3, 4.

[Mazgu Ghakukhozgera pa peji 19]

“Nkhakondwa comene nkhati nasambira kuti Ciuta wali na zina”

[Cithuzithuzi pa peji 20]

Ine na mfumu wane tikupharazgira munthu wakumangwa makutu