Sambizgani Ŵana Ŵinu

Ŵakacemekanga “Ŵana ŵa Kududumira”

PARA civula cikuru cili pafupi kulokwa, nyengo zinyake ungapulika leza wakududumira. Kasi uli kopapo kududumira uku?— a Kweni Yesu wakati ŵasambiri ŵake ŵaŵiri ni “Ŵana ŵa Kududumira.” Tiye tiwone cifukwa ico wakaŵathyira zina ili.

Ŵasambiri ŵa Yesu aŵa ŵakaŵa Yakobe na Yohane. Ŵasambiri aŵa ŵakaŵa paukuru na paunung’una ndipo ŵakaŵa ŵana ŵa Zebediya na muwoli wake Salome. Salome wakwenera kuti wakaŵa munung’una wa Mariya, mama wa Yesu. Ntheura Yesu, Yakobe, na Yohane pakaŵa paubali ndipo ŵakwenera kuti ŵakatemwananga comene apo ŵakakuranga.

Zebediya wakaŵa mulovi, ndipo Yakobe na Yohane nawo ŵakaŵa ŵalovi. Yakobe na Yohane ŵakaŵa ŵamoza mwa ŵanthu ŵakwamba awo Yesu wakaŵasankha kuŵa ŵasambiri ŵake. Wakati waŵacema waka, nyengo yeneyiyo ŵakaleka ulovi ndipo ŵakamulondezga. Pamanyuma Yesu wakasankhapo ŵanthu 12 pa awo ŵakamulondezganga, kuŵa ŵapositole ŵake. Yakobe na Yohane ŵakaŵa ŵamoza ŵake.

Kukati kwakhala myezi yicoko waka kuti Yesu wakomeke, iyo na ŵapositole ŵake ŵakajumphanga ku cigaŵa cinyake ca mapiri ku Samariya. Kukaŵa kuti kwamba kufipa ndipo ŵakavuka comene. Kweni Ŵasamariya ŵakati ŵakukhumba yayi kuti Yesu na ŵapositole ŵake ŵagone mu msumba wawo. Kasi ukumanya cifukwa cake?— Tiye tiwone.

Yesu na ŵapositole ŵake ŵakaŵa Ŵayuda, ndipo Ŵayuda ŵanandi ŵakayuyuranga Ŵasamariya. Kweni Yesu ndimo wakacitiranga yayi. Iyo wakaŵalongoranga lusungu, ndipo Yakobe na Yohane ŵakeneranga kucita mwakuyana waka. Kweni ŵasambiri ŵaŵiri aŵa ŵakakwiya cifukwa cakuti Ŵasamariya  ŵakaŵapokelera yayi, ndipo ŵakafumba Yesu kuti: ‘Kasi mukukhumba kuti tiphalire moto wize kufuma kucanya na kuŵakoma?’ Kasi ukughanaghana kuti Yesu wakazgoraci?— Wakaŵasuska cifukwa ca kuyowoya mazgu ghaheni agha. Yakobe na Yohane ŵakeneranga kusambira vinandi pa nkhani ya lusungu.

Suzgo linyake likuru ilo Yakobe na Yohane ŵakaŵa nalo ndakuti ŵakakhumbanga kuŵa pa malo ghakwamba, kuŵa ŵakuzirwa kuluska wose. Apo Yesu wakaŵa pafupi kukomeka, ŵakatuma amama ŵawo kuti ŵakaphalire Yesu kuti: “Mulangure kuti ŵana ŵane ŵaŵiri aŵa ŵazakakhale, yumoza ku woko linu lamalyero na munyake kumazere kwinu, mu ufumu winu.” Apo ŵapositole ŵanyake khumi ŵakapulika ivyo Yakobe na Yohane ŵakacita, ŵakakwiya comene. Kasi nawe ungakwiya?—

Panji nawe ungakwiya. Vikutikwiyiska para munthu munyake wakujiŵikamo panji kujilongora nga nkhwakuzirwa comene. Pamanyuma, Yakobe na Yohane ŵakamanya kuti ŵakabudanga kweniso kuti ŵakaŵa ŵambura lusungu, ntheura ŵakasintha. Ŵakazgoka ŵapositole ŵacitemwa ndiposo ŵalusungu. Kasi tingasambirapo vici?—

Sambiro ilo tingasambira kwa Yesu ndakuti nase ticitirenge lusungu ŵanyithu. Yesu wakalongoranga mtima uwemi ku ŵanthu wose, kwali mbanalume, ŵanakazi, ndiposo ŵana. Kasi nyengo zose uyezgeyezgenge kukumbuka nkharo yiwemi iyo Yesu wakalongoranga na kuyilondezga?—

Ŵazga mu Baibolo Lako

Mariko 3:17

Mateyu 27:55, 56; Mariko 15:40, 41

Mateyu 4:18-22

Yohane 4:4-15, 21-26; Luka 9:51-55

Mateyu 20:20-24; Mariko 10:35-37, 41

[Mazgu ghamusi]