Kalata Yakufuma ku Madagascar

Cikapulikikwanga nga ni Sumu Yakunozga

INE na mfumu wane tikaŵa paulendo wa kukacita umishonale ku cirwa ca Madagascar. Tikalayirana na ŵabali ŵithu ndiposo ŵabwezi na kujikhwimiska ndipo tikaŵa na cigomezgo kuti Yehova watipa mulimo uwo wakuwona kuti ngwakwenelera kwa ise.

Tizamuluwapo yayi apo tikaluta kakwamba ku maungano gha mpingo ku Madagascar. Mbali uyo wakacitiskanga Gongwe la Mulinda para wakuyowoya wakapulikikwanga nga wakwimbiska sumu. Tikapulikangapo tucoko comene mwakuti para ŵanthu ŵakuyowoya tikapulikanga nga ŵakwimba sumu yakunozga. Pakatora nyengo kuti tiyambe kupulika ivyo vikuyowoyeka.

Apo kakaŵa kakwamba kupulikiska fumbo lakusazgirapo ilo wakucitiska Gongwe la Mulinda wakafumba, nkhacemerezga zgoro uku wandaniwuske. Awo nkhakhala nawo pafupi ŵakapulika ndipo seko zikanikora comene mwakuti nkhajara ku mulomo kuti nileke kuŵapomera congo. Soni zikanikora kweni nkhaŵaso wakukondwa kuti napulikapo ivyo vyayowoyeka.

M’malo mwakuti ine ndine novwirenge ŵanji mu uteŵeti, nkhawonanga nga kuti ine ndine nkhucita kovwirika. Ŵabali na ŵadumbu ŵakanovwira makoramakora umo ningayowoyera mazgu ghakupulikikwa para nkhupharazgira ŵanthu. Ŵakanisambizga mazgu agho ningayowoya ndiposo malemba agho ningaŵazga.

Nkhukumbuka zuŵa linyake apo nkhapharazganga, mwana munyake wakacemerezga kuti “Vazaha! Vazaha!” Mazgu agha ndigho ŵanthu awo ŵakuyowoya ciyowoyero ca Malagasy ŵakutemwa kuyowoya para ŵakunena munthu wa ku caru cinyake. Tikaphinda cifukwa ca kopa kuti ŵana ŵanyake ŵangizirapo na kutinenaso. Msepuka munyake wakamukalipira mwana uyu. Msepuka uyu wakamuphalira kuti “kumunena yayi mwanakazi uyu, wakuyowoya ciyowoyero cithu.” Mudumbu uyo nkhaŵa nayo wakanilongosolera ivyo ŵasepuka aŵa ŵakadumbiskananga cifukwa ine nkhatorangapo kalikose yayi cifukwa ŵakayowoyanga luŵiroluŵiro. Ndipouli, nkhaŵa wakukondwa kuti nambapo kupulika tunyake. Nyengo yikati yajumphapo, ku Madagascar kukamba kuŵa kukwithu.

Kanandi para phukwa lanikora ŵana ŵakizanga na kunikora pa woko ndipo ŵakawonekanga  ŵakukondwa comene kuŵa nane nangauli nkhatondekanga kudumbiskana nawo. Ŵana mu mpingo nchawanangwa nadi cakufuma kwa Yehova. Kamudumbu kanyake, zina lake Hasina ndiko kakuning’anamulira ivyo ŵanthu ŵakuyowoya. Para palije uyo wakupulika ivyo nkhuyowoya, iko kakuwoneka kuti kakunipulika. Kanandi ndiko kakuniwombora para ŵanyane mu mpingo ŵakutondeka kupulika ivyo nkhuyowoya. Kakuŵalongosolera ico nkhung’anamura.

Ine na mfumu wane tikaŵa mu mpingo uwo ukaŵa pafupi kugaŵika. Ntheura ŵabali na ŵadumbu awo ŵakasambizganga Baibolo ŵanthu ŵanyake ŵakeneranga kulekera ŵanyawo ŵanthu aŵa usange ŵakukhala mu cigaŵa ca mpingo uphya. Mudumbu munyake wakaniciska kuti nisambirenge Baibolo na munthu munyake uyo wakasambiranga nayo. Nkhawopa ndipo nkhakana mwakuwerezgawerezga kuti ningakwaniska yayi, kweni wakakosera. Wakanikhozga kuti Yehova wanovwirenge ndipo nikwaniskenge. Wakanilaŵiska mwacitemwa na kuniphalira mu mazgu ghapusu kupulika kuti sonosono apa nambenge kusambizga ŵanthu Baibolo umo nkhukhumbira. Mazgu agha ghakanikhozga comene.

Munthu uyu wakucita makora comene kufuma apo nkhambira kusambira nayo Baibolo. Zuŵa linyake apo nkhaŵa kuwaro, nkhapulika kuti wakunicema. Iyo pamoza na mfumu wake ŵakaŵa paulendo wa kukalembeska nthengwa. Mfumu wake nayo wali kwamba kusambira Baibolo, ndipo pali vinthu vinyake vyauzimu ivyo ŵakukhumba kufiska, nga nkhubapatizika. Ici cikunipa cimwemwe nangauli nkhumanya kuti Yehova ndiyo wakuguza ŵanthu kuti ŵamumanye, ndise yayi.

Tasambira vinandi mu mulimo withu uphya uwu. Nangauli tikuŵasoŵa ŵabali na ŵabwezi ŵithu awo tikaŵaleka kukaya, kweni tikujipulika nga ni para ŵanji ŵa iwo tili nawo kuno. Kanandi tikuŵaphalira ŵabali na ŵadumbu za ŵabali na ŵabwezi ŵithu, ndipo sono nawo ŵakutifumba za iwo, ndiposo umo umoyo wawo uliri. Tikulindilira mwakunweka nyengo iyo mbumba iyo tili nayo kuno na iyo tikayileka zizamukumana.

Para ŵanthu ŵakuyowoya nicali kuŵapulika nga ŵakwimba. Kweni sono nkhupulikako ivyo ŵakuyowoya. Nkhulindilira nyengo iyo nane nizamwimba makora sumu iyi nga umo ŵanyane ŵakwimbira, m’malo mwa kwimba mwakugotagota. Yesu wakati: “Kwenjerwa cara napacoko vya zuŵa lakulondezgapo, cifukwa zuŵa lakulondezgapo liŵenge na vyenjezgo vyake na vyake.” (Mateyu 6:34) Ntheura tisambirenge “cuni” panji kuti lizgu limoza pa nyengo yimoza. Panyengo yasono nilutilirenge kuthya khutu, kuŵikapo mtima na maghanoghano kuti niteŵetere na ŵabali na ŵadumbu ŵithu ŵacitemwa ndiposo ŵakuzika ŵa kuno ku Madagascar.

[Cithuzithuzi pa peji 25]

Nkhupharazga na Hasina