Ŵaŵazgi Ŵithu Ŵakufumba Kuti . . .

Kasi Umoyo Wamuyirayira mu Paradiso Uzamuŵa Wambura Kunozga?

▪ Baibolo likutilayizga kuti tingazakakhala na umoyo wamuyirayira mu Paradiso pa caru capasi. (Salmo 37:29; Luka 23:43) Kasi kukhala umoyo wamuyirayira pa malo ghawemi kuzamuŵa kwambura kunozga?

Fumbo ili ndakuzirwa. Ŵakusanda vinthu ŵakuwona kuti munthu wangamba kwenjerwa, kusuzgika maghanoghano, panji kujiziyamo para umoyo ukumunozgera yayi. Awo ŵakuwona kuti umoyo ulije candulo panji awo nchito yawo yikuŵakondweska yayi, umoyo ukuŵanozgera yayi. Kasi awo ŵazamukhala mu Paradiso ŵazamuŵa na umoyo wambura ng’anamuro? Kasi ivyo ŵazamucita zuŵa na zuŵa vizamuŵakondanga?

Cakwamba, manyani kuti Yehova Ciuta, uyo ni Mweneco wa Baibolo, ndiyo wakupeleka umoyo wamuyirayira. (Yohane 3:16; 2 Timote 3:16) Mukhaliro ukuru wa Ciuta nchitemwa. (1 Yohane 4:8) Yehova wakutitemwa comene ndipo watipa vinthu vyose viwemi ivyo tikusangwa navyo sono.—Yakobe 1:17.

Mlengi withu wakumanya kuti tikwenera kugwira nchito yakukondweska mwakuti tiŵe ŵakukondwa. (Salmo 139:14-16; Mupharazgi 3:12) Mu Paradiso, ŵanthu ŵazamuŵa nga ni vidoli yayi. Nchito iyo ŵazamucitanga yizamuŵa yacandulo kwa iwo ndiposo ŵakutemweka ŵawo. (Yesaya 65:22-24) Usange muli na nchito yakukondweska, yakukhumba kufwilirapo, ndiposo yakuti mugwirenge nyengo zose, kasi umoyo ungaleka kumunozgerani?

Wonaniso kuti Yehova Ciuta wazamucita kusora ŵanthu awo ŵazamukhala mu Paradiso. Wakupeleka cawanangwa ca umoyo wamuyirayira kwa ŵekha awo ŵakuyezga Mwana wake Yesu pakucita vinthu. (Yohane 17:3) Apo Yesu wakaŵa pa caru capasi wakakondwanga kucita khumbo la Ŵawiske. Kwizira mu mazgu ndiposo vyakucita, Yesu wakasambizga ŵasambiri ŵake kuti munthu wakukondwa comene para wakupeleka kuluska kupokera. (Milimo 20:35) Mu paradiso, ŵanthu wose ŵazamulondezganga malango ghaŵiri ghakuru comene, agho ni kutemwa Ciuta na kutemwa ŵazengezgani. (Mateyu 22:36-40) Ghanaghanirani kuti mukukhala na ŵanthu awo mbalusungu, awo ŵakumutemwani ndiposo ŵakutemwa mulimo wawo. Kasi mukughanaghana kuti kukhala na ŵanthu ŵanthena kuzamuŵa kwakunozga yayi?

Kasi mu Paradiso tizamucitaso vici? Zuŵa lililose tizamusambiranga cinthu ciphya cakukhwaskana na Mlengi withu. Ŵakusanda vinthu ŵabowozga kale vinthu vyakuzizwiska ivyo Yehova wali kulenga. (Ŵaroma 1:20) Kweni mpaka sono, tikumanya vinthu vicoko comene ivyo Yehova wali kulenga. Vilimika vinandi ivyo vyajumpha, Yobu, uyo wakaŵa munthu wakugomezgeka, wakaghanaghanirapo vilengiwa vya Ciuta ivyo wakavimanyanga, ndipo mazgu agho wakayowoya ghacali ghaunenesko. Wakati: “Ivi nthuvigaŵa pera tucoko twa mendero ghake; ivyo tikuvipulika vya Iye nvicoko waka! Kweni kundindima kwa nkhongono zake wangakumanya ndi njani?”—Job 26:14.

Nanga ni para tingakhala kwamuyirayira, tizamumanyapo vyose yayi vyakukhwaskana na Yehova Ciuta ndiposo milimo yake. Baibolo likuyowoya kuti Ciuta waŵika khumbo la kukhala kwamuyirayira mu mitima yithu. Kweni likuyowoyaso kuti ‘tizamumanyapo yayi mulimo wakucitika na Ciuta kwamba ku jando kufikira ku umaliro.’ (Mupharazgi 3:10, 11) Kasi mukughanaghana kuti umoyo uzamuŵa wakunozga yayi apo muzamusambira vinthu viphya vyakukhwaskana na Mlengi winu?

Nanga ni sono, ŵanthu awo ŵakutangwanika na mulimo wa kovwira ŵanyawo ndiposo kucindika Yehova ŵakuwona kuti umoyo ngwakunozga. Tingaŵa ŵakusimikizga kuti para tikulutilira kuŵa ŵakutangwanika na milimo iyi, umoyo uzamulekapo yayi kutinozgera nanga tingakhala kwamuyirayira.

[Kulongosora Vithuzithuzi pa peji 27]

Caru: Image Science and Analysis Laboratory, NASA-Johnson Space Center; Cipingausiku: The Hubble Heritage Team (AURA/STScI/NASA)