Baibolo Likusintha Umoyo wa Ŵanthu

Cifukwa wuli munthu munyake uyo wakamanyikwanga comene pa kwimba wakaleka kwimba na kwamba kuteŵetera mu cisopa? Nchivici cikapangiska cigeŵenga cinyake ico mweruzgi wakayowoya kuti cingasintha yayi kuti cisinthe na kuŵa munthu muwemi comene? Ŵazgani nkhani izi kuti musange mazgoro.

“Palije munthu uyo wangateŵetera nga ni muzga wa ŵeneco ŵaŵiri.”​—ANTOLINA ORDEN CASTILLO

CILIMIKA ICO WAKABABIKIRA: 1962

UKO WAKABABIKIRA: SPAIN

IVYO WAKACITANGA: WAKACITANGA SEŴERO NA KWIMBA

UMO NKHAŴIRA KALE: Nkhababikira mu muzi wa Tresjuncos mu cigaŵa ca La Mancha. Mu mbumba yithu tikaŵa ŵalimi. Amama ŵakaŵa Mukatolika ndipo adada ŵakaŵa Muprotesitanti. Adada ŵakanisambizga kuti nicindikenge Baibolo, ndipo kanandi nkhaŵawonanga ŵakuŵazga. Kweni amama ŵakanisambizga Cikatolika ndipo pa Sabata ŵakalutanga nane ku Misa.

Apo nkhaŵa na vilimika 15, nkhafumako kukaya na kuluta ku Madrid kukakhala na mukuru wane. Nkhakumbukanga comene ŵapapi ŵane kweni pamanyuma nkhazgoŵera umoyo wa mu tawuni. Apo nkhaŵa na vilimika 17 nkhasanga nchito yakwimba ku gulu linyake la ŵakwimba sumu zakucemeka opera ku Spain. Nkhasangwanga comene ndipo nkhaghanaghana kuti nicitenge seŵero. Nkhaleka kosi ya usekeletare, ndipo nkhamba kwimba na magulu ghakwimba ghakupambanapambana. Pa nyengo iyi nkhamba cibwezi na mudumbu wa munyane munyake. Nkhajiwonanga kuti nili na mwaŵi comene kuŵa pa nchito yiwemi, kuŵa na ndalama zinandi, ndiposo cibwezi.

Nkhamba kwenda na magulu gha ŵakwimba ghakupambanapambana mu caru cose ca Spain kweniso mu vyaru vinyake nga ni Colombia, Costa Rica, Ecuador, na Venezuela. Nkhimbangaso na magulu ghakupambanapambana ghakumanyikwa comene mu Madrid agho ghakaŵa mu gulu lakucemeka “Lamovida madrileña.” Nkhadangiliranga kwimba mu gulu linyake ndipo likamanyikwa comene.

Nchito iyo nkhagwiranga nkhayitemwa, kweni nkhatinkhanga comene nkharo yaukazuzi iyo yikacitikanga. Nkhaghanaghaniranga comene za kawonekero kane ndiposo kuti ŵanthu ŵalutilire kunihaya comene. Nkhayamba kucita wofi kurya cifukwa ca kopa kuti ningatutuŵa comene ndipo nkhayamba kughanda ndipo para narya nkhabokoleranga dala.

Nkhakhumbanga nipera kuti nicitenge seŵero. Pamanyuma, nkhazomerezgeka kukasambira kucita seŵero ku sukulu yakusambizga vya seŵero ku Madrid. Tikasambizgika kuti pakucita seŵero, munthu wakwenera kujipulika nga ni para ivyo wakucita vikucitika nadi ndipo vikucitikira iyo. Apo nkhayezganga kulondezga ulongozgi uwu, nkhawona  kuti nkhutondeka kujipulika nga ni para vinthu vikucitikira ine. Nkhawona kuti nkhughanaghanira vyane pera ndiposo nkhucita vinthu kufuma pasi pa mtima yayi.

UMO BAIBOLO LIKASINTHIRA UMOYO WANE: Nkhamanya kuti usange nkhukhumba kuŵa na nkharo yiwemi, nkhwenera kufwilirapo. Kweni nkhasoŵa pakwambira. Nkhaluta ku chalichi linyake ku Madrid ilo nyengo yinyake nkhalutako na ŵapapi ŵane. Nkhalomba kwa Ciuta mwakuzunura zina lake lakuti Yehova.

Nyengo yicoko yikati yajumphapo, Ŵakaboni ŵa Yehova ŵaŵiri ŵakiza ku nyumba kwane. Nkhanweka comene kudumbiskana nawo Baibolo, kweni nkhasuskangaso vinandi ivyo ŵakasambizganga. Esther, Kaboni uyo wakanisambizganga Baibolo, wakazikiranga nane comene. Iyo na mbumba yake ŵakanitemwanga comene ndipo ŵakaŵa nane na lusungu. Nkhamba kufika pa maungano gha Ŵakaboni ŵa Yehova ndipo mwaluŵiro nkhawona kuti nasanga unenesko uwo nkhapenjanga.

Nkhaŵa kuti namalizga waka masambiro gha kucita seŵero ndipo mwaŵi unandi ukanijulikira. Nkhapika cigaŵa mu seŵero ilo likenera kukacitikira ku malo ghakumanyikwa comene ghakucitirako seŵero ku Madrid. Kweniso nkhamanya kuti nkheneranga kuŵikapo mtima comene pa seŵero mwakuti nicite makora. Paumaliro nkhaghanaghana kuti nisange nchito yinyake iyo yinganipa mpata wa kuteŵetera Ciuta. Nkhawona kuti Yesu wakaneneska apo wakati: “Palije uyo wangateŵetera nga ni muzga wa ŵeneco ŵaŵiri; cifukwa panji watinkhenge yumoza na kutemwa munyake, panji wademelerenge kwa yumoza na kwelura munyake. Mungateŵetera nga mbazga ŵa Ciuta na Usambazi pa nyengo yimoza cara.” (Mateyu 6:24) Mwanalume uyo nkhakhala nayo pa cibwezi kwa vilimika 8 wakakolerana nane yayi, ntheura nkhasankha kumazga cibwezi. Kweni cikaŵa cipusu yayi kusintha vinthu vyose ivi.

UMO NASANGIRA CANDULO: Pa nyengo ya sono nkhugwira nchito ya maora ghacoko ya kusanguluska ŵacekuru. Kucita nthena kwanipa nyengo yinandi yakusambizgira Baibolo ŵanthu ŵa ciyowoyero ca Arabic awo ŵali uko nkhukhala. Nkhufwilirapo comene kusambira ciyowoyero ici, ndipo nkhusangwa kusambizga ŵanthu aŵa vinthu ivyo nasambira cifukwa mbakupokelera ŵalendo ndipo ŵakukhumba nadi kusambira vya Ciuta.

Apo nkhasambiranga vya seŵero nkhakhorwanga yayi na umoyo, kweni sono nkhukhorwa comene. Nkhuwona kuti Yehova wanovwira kuti niŵe munthu muwemi kweniso wakukondwa.

“Nalongora kuti mweruzgi wakateta.”​—PAUL KEVIN RUBERY

CILIMIKA ICO WAKABABIKIRA: 1954

UKO WAKABABIKIRA: ENGLAND

IVYO WAKACITANGA: WAKAŴA CIGEŴENGA

UMO NKHAŴIRA KALE: Nkhababikira ku Dudly, mu tawuni yinyake yikuru ku West Midlands. Kwamba pa wanici, Adada ŵakanizoŵezga kuti nitemwenge kuŵazga. Ŵakaniciskangaso kuti nidaŵirenge vilengiwa, nangauli ŵakayowoyanga kuti vikaŵako vyekha. Ŵakanisambizga kuti Ciuta kulije. Ndipouli, ŵapapi ŵane ŵakanitumizganga ku Sande sukulu ya chalichi la Methodist.

Apo nkhaŵa na vilimika 8, nkhawona ŵanyamata ŵanyake ŵakubuska boti ilo likaŵa pa  maji. Ŵapolisi ŵakiza, kweni cifukwa ca wofi nkhaŵaphalira yayi ivyo nkhawona. Ŵanyamata aŵa ŵakanofya kuti nileke kuyowoya. Mulandu ukabata ine ndipo nkhakwiya comene. Nkhamba kuwezgera mwa kuphwanya masukulu, machalichi, mafakitare, ndipo ivyo nkhananganga vikaŵa vya ndalama zinandi. Nkhati nafika vilimika 10, nkhamba kuswa nyumba na masitoro na kwiba katundu. Moto ukaninozgeranga comene ndipo nkhawochanga zinyumba na vinthu vinyake. Ŵasambizgi ku sukulu ŵakatenge ndine munthu wakusuzga comene.

Apo nkhaŵa na vilimika 12, nkhasanga buku linyake la vyamasenga ndipo nkhapanga thabwa la kuwukwira. Pakuti ŵapapi ŵane ŵakagomezganga kuti Ciuta kulije, ŵakawonanga kofya kulikose yayi kwa vyamizimu, nakuti ŵakaghanaghananga kuti kucita nthena kunivikilirenge kuti nileke kunjira mu masuzgo. Kweni kuzakafika pa nyengo iyo nkhalekera sukulu, nkhaŵa kuti natolekerapo kanandi waka ku khoti lakweruzgirako ŵana. Nkhanjira mu gulu la vigeŵenga ilo likametanga kulikuli ku mutu. Nkhayeghanga lezara ndiposo cheni la njinga kuti nipwetekerenge ŵanthu. Nkhasanga nchito kweni yikamara luŵiro cifukwa cakuti nkhajalirika mu jele kwa kanyengo. Nkhati nafumiskika, nkhambaso kuswa nyumba za ŵanthu ndipo nkhakoleka na kujalirikaso mu jele vilimika viŵiri. Mweruzgi wakati ine nizamusinthapo yayi ndiposo ndine wakofya mu cikaya.

Nkhati nafumiskika mu jele, nkhakumana na cibwezi cane cakale, Anita. Tikatorana, ndipo kwa kanyengo nkhaleka kwiba ndiposo kunanga vinthu. Kweni pakati pajumpha vilimika vicoko waka, nkhambaso mphuvya. Nkhambaso kuphwanya nyumba zakucitiramo bizinesi na kwiba sefa za ndalama. Nkhamba kumwa minkhwala yakutimbanizga wongo, kupapira phere, ndiposo kuyegha futi. Nkhakakikaso na kujalirika mu jele.

Anita wakamba kulwara maghanoghano cifukwa ca ivyo nkhacitanga. Dokotala wake wakamupa munkhwala kuti waleke kughanaghana comene, ndipo wakamuphalira kuti wanileke. Nkhacita mwaŵi kuti muwoli wane wakapulikira yayi ivyo dokotala wakamuphalira.

UMO BAIBOLO LIKASINTHIRA UMOYO WANE: Tikati tatorana waka, Anita wakasambira Baibolo na Ŵakaboni ŵa Yehova kwa kanyengo kacoko. Apo nkhaŵa mu jele kaumaliro, Ŵakaboni ŵa Yehova ŵakacezgaso na muwoli wane. Pa zuŵa lenelili, nkhaŵa kuti nalomba kwa Ciuta kuti, “Usange muliko, nilongorani kuti muliko nadi.”

Nkhati nafumiskika mu jele, nkhakumana na muliska wa Angilikani ndipo nkhamupempha kuti wanisambizgenge Baibolo pamoza na Anita. Wakatiphalira kuti watisambizgenge waka vigomezgo vyawo ndiposo lurombo.

Paumaliro nkhamba kuŵazga Baibolo. Nkhazizwa comene kusambira kuti Baibolo likukana kucita vyamizimu. (Duteronome 18:10-12) Pamanyuma, nkhasanga Gongwe la Mulinda ilo Ŵakaboni ŵa Yehova ŵakamulekera Anita pa zuŵa ilo nkhapempha Ciuta kuti wanovwire. Ivyo nkhaŵazga vikanipangiska kuti nikumane na Ŵakaboni.

Ŵabali ŵithu, ŵabwezi ŵithu, ndiposo vigeŵenga vinyane, ŵakakondwa yayi ŵakati ŵapulika kuti tikusambira Baibolo na Ŵakaboni ŵa Yehova. Ŵanji ŵakatenge Ŵakaboni ŵanigatiska mutu. Kweni kuyowoya unenesko, mutu wane ukaŵa wakugata pambere nindakumane na Ŵakaboni ndipo ukakhumbikwiranga kutozgeka. Nkhaŵa na nkharo ziheni comene, njuŵi yane yikagwiranga nchito yayi, ndipo padera pa vizgoŵi vinyake viheni, nkhakhweŵanga ndudu 60 pa zuŵa. Ŵakaboni awo ŵakatisambizganga Baibolo ndiposo awo tikasopanga nawo, ŵakaŵa ŵakuzikira comene ndiposo ŵalusungu. Mwapacokopacoko nkhaleka vizgoŵi vyane viheni.—2 Ŵakorinte 7:1.

UMO NASANGIRA CANDULO: Ine na Anita takhala mu nthengwa kwa vilimika 35. Yumoza mwa ŵana ŵithu ndiposo ŵazukuru ŵithu ŵaŵiri ŵakuteŵetera Yehova pamoza nase. Pasono, ine na Anita, tikumalira nyengo yinandi kovwira ŵanji kuti ŵasambire Baibolo.

Cifukwa ca kuteŵetera Yehova Ciuta, umoyo withu waŵa wacandulo ndiposo wang’anamuro. Mu cilimika ca 1970, mweruzgi wakaphalira khoti kuti ine nizamusinthapo yayi. Ndipouli, cifukwa ca kovwirika na Yehova ndiposo kulondezga ulongozgi wa mu Baibolo, nalongora kuti mweruzgi uyu wakateta.