ANITA * wakati wabatizika, mfumu wake wakamba kumususka chomene. Anita wakati: “Wakanikanizganga kuluta ku maungano kweniso kuzunura zina la Chiuta. Usange nazunura waka kuti Yehova, mfumu wane wakakwiyanga chomene.”

Chikaŵa chakusuzga chomene kuti Anita wasambizge ŵana ŵake kuti ŵamanye Yehova. Iyo wakati: “Nkhakanizika kusopa Yehova. Nkhatondekanga kusambira na ŵana ŵane panji kuluta nawo ku maungano.”

Nase tingakumana na viyezgo vyakupambanapambana. Ŵabali ŵithu ŵangatitinkha chifukwa ndise Ŵakaboni, tingalwara matenda ghakuru, mubali withu wangafwa panji kuleka kusopa Yehova. Kasi ntchivichi icho chingatovwira kuti tilutilire kugomezgeka kwa Yehova?

Kasi tingachita wuli para tikuyezgeka? Mpositole Paulosi wakati: “Mukukhumbikwira kuzizipizga.” (Heb. 10:36) Kasi ni vichi ivyo vingatovwira kuzizipizga?

Para tikulomba kwa Yehova tisangenge nkhongono zakuzizipizgira. Wonani ivyo vikachitikira Ana. Wakati wakhala panthengwa vyaka 30, mfumu wake wakafwa mwamabuchi. Iyo wakati: “Mfumu wane wakafwira ku ntchito. Wakafwa na vyaka 52.”

Kasi ntchivichi chikawovwira Ana kuti wazizipizge? Wakalutanga nipera ku ntchito. Ndipo ntchito yake yikakhumbanga kuti waŵikengepo maghanoghano ghake ghose. Ichi chikamovwira kuti chitima chichepeko nangauli chikamalirathu yayi. Ana wakati: “Nkhalomba na kuŵeyelera Yehova kuti wanovwire kuzizipizga.” Kasi Yehova wakazgora lurombo lwake? Enya. Iyo wakati: ‘Mtende wa Chiuta ukanovwira kuti nijipulikenge makora ndipo maghanoghano ghane ghakamba kukhazikika. Nkhugomezga kuti Yehova wazamuwuska mfumu wane.’—Fil. 4:6, 7.

Yehova uyo ‘wakupulika malurombo,’ wakulayizga ŵateŵeti ŵake kuti waŵawovwirenge kuti ŵalutilire kugomezgeka. (Sal. 65:2) Fundo iyi njakukhozga chomene. Nase yingatovwira kuti tilutilire kuzizipizga mazuŵa ghano.

Yehova wakovwiraso ŵateŵeti ŵake kwizira mu mpingo. Ŵabali na ŵadumbu ŵa ku Tesalonika ŵakati ŵakumana na nthambuzgo yikuru, Paulosi wakaŵachiska kuti, ‘lutilirani kukhwimiskana na kuzengana, nga umo mukuchitira kale.’ (1 Tes. 2:14; 5:11) Maungano ghakapangiska kuti Ŵakhristu aŵa ŵatemwanenge chomene ndipo ŵakawovwirananga. Ntheura ŵakazizipizga nthambuzgo. Nase maungano ghakutovwira kuti tizizipizge masuzgo.

Usange tikuŵatemwa ŵabali na ŵadumbu ŵithu, tiyowoyenge “vinthu vyakuzenga kwa yumoza na munyake.” (Rom. 14:19) Ichi chitovwirenge chomene para takumana na masuzgo. Paulosi wakakumana na masuzgo ghanandi, kweni Yehova wakamupa nkhongono kuti wazizipizge. Nyengo zinyake wakamukhozganga kwizira mu ŵabali na ŵadumbu mu mpingo. Mwachiyelezgero, apo Paulosi wakalembera kalata ŵabali na ŵadumbu ŵa ku Kolose, wakaŵalumba chifukwa chakuti ŵakamovwira. Iyo wakati: ‘Ŵazgoka chakukhozga kwa ine.’ (Kol. 4:10, 11) Ŵabali na ŵadumbu ŵakamovwira na kumupembuzga Paulosi chifukwa ŵakamutemwanga. Panji namwe ŵabali na ŵadumbu ŵali kumukhozganipo na kumovwirani.

Yehova wali kuŵika ŵalara mu mpingo kuti ŵatovwirenge. Ŵalara ŵali nga ni ‘malo ghakubisamamo mphepo na kudinganyamo chimphupulu, nga ni milonga mu malo gha chinkhamwa na mfwiri wa chijalawe mu charu chakuvuska.’ (Yes. 32:2) Fundo iyi njakukhozga nadi. Kasi mukuŵaphalira ŵalara para vyamusuzgani? Ŵalara ŵangamovwirani kuti muzizipizge.

Ŵalara ŵangamazga masuzgo ghithu mwamunthondwe yayi chifukwa nawo mbakwananga. (Mil. 14:15) Kweni malurombo ghawo ghangatovwira chomene. (Yak. 5:14, 15) Mubali munyake ku Italy wali na nthenda yakomizga misipa. Wasuzgika na nthenda iyi nyengo yitali. Iyo wakati: “Ŵalara ŵakunitemwa chomene ndipo ŵakuniyendera pafupipafupi. Ivi vyanovwira kuti nizizipizge.” Yehova wakutitemwa chomene lekani wali kutipa ŵalara. Ntheura mukwenera kufwatuka kuphalira ŵalara masuzgo ghinu.

Paliso vinyake ivyo vingatovwira kuti tizizipizge. Tikwenera kulutilira kuchita vyauzimu. John wa vyaka 39, wakaŵa na nthenda ya kansa. Iyo wakati: “Nkhadandawura chomene chifukwa nthenda iyi yikanikora nichali mwana.” Pa nyengo iyi wakaŵa na mwana wa vyaka vitatu. Iyo wakati: “Muwoli wane wakatangwanikanga chomene. Wakapweleleranga mwana, kweniso wakanipelekezganga ku chipatala.” Kweni munkhwala uwo wakamwanga ukamupanga mselu na kumugulura nkhongono. Nyengo zose wakaŵanga wakuvuka. Kweniso pa nyengo iyi, adada ŵake ŵakaŵa kuti mbalwari ndipo ŵakakhumbikwiranga wovwiri.

Kasi John na mbumba yake ŵakazizipizga wuli masuzgo agha? John wakati: “Nangauli nkhaŵavya nkhongono kweni tikalekapo yayi kuchita vinthu vyauzimu mu mbumba yithu. Tikalutanga ku maungano ghose, ku upharazgi, ndiposo nyengo zose tikasoperanga pamoza nga mbumba.” John wakazizipizga masuzgo chifukwa chakuti wakalutilira kuchita vinthu vyauzimu. Kasi John wakuti wuli ku wose awo ŵakukumana na masuzgo? Iyo wakati: “Pakwamba ukusuzgika chomene maghanoghano. Ndipouli, Yehova wakutitemwa ndipo wakutipa nkhongono kuti tizizipizge.” Namwe Yehova wangamukhozgani.

Yehova wangatovwira kuti tilutilire kuzizipizga masuzgo, sono na munthazi wuwo. Ntheura tiyeni timuphalire masuzgo ghithu mu lurombo. Tikwenera kuwungana na kuŵa paubwezi na ŵabali na ŵadumbu mu mpingo, kuŵaphalira ŵalara masuzgo ghithu na kulutilira kuchita vinthu vyauzimu. Para tikuchita nthena, tizamuzomerezga nadi mazgu gha Paulosi ghakuti: “Mukukhumbikwira kuzizipizga.”