MU 1870, gulu la ŵanthu ŵachoko waka ku Pittsburgh (Allegheny), Pennsylvania, U.S.A., ŵakamba kupenjerezga ivyo Malemba ghakusambizga. Charles Taze Russell wakadangilira gulu ili, ndipo likakhumbanga kumanya makora vya sembe yakuwombora ya Yesu. Ŵakamanya kuti sembe ya Yesu njakuzirwa kuti khumbo la Yehova lifiskike. Ŵakakondwa kumanya kuti sembe iyi njakuzirwa kuti ŵanthu ŵazakapone, nanga ni awo ŵandapulikepo vya Yesu. Ntheura ŵakamba kukumbukira nyifwa ya Yesu chaka chilichose.—1 Kor. 11:23-26.

Mu magazini ya Zion’s Watch Tower, mubali Russell wakalembangamo kuti sembe yakuwombora ya Yesu mbukaboni wakuti Chiuta wakutitemwa. Magazini iyi yikalongosoranga kuti nyengo ya kukumbukira nyifwa ya Khristu, ni “nyengo yapadera chomene.” Magazini iyi yikatenge Ŵasambiri ŵa Baibolo ŵakwenera kukumbukira nyifwa ya Yesu kwali ŵali ku Pittsburgh panji ku malo ghanyake. Kweniso ŵakeneranga kuchita Chikumbusko kwali pali ŵanthu ŵaŵiri panji ŵatatu, chikuru ŵali na chipulikano mwa Fumu.

Chaka chilichose ŵanthu ŵanandi ŵakalutanga ku Pittsburgh kuti ŵakaŵepo pa Chikumbusko. Pa tumapepara twakuchemera ŵanthu ku Chikumbusko ŵakalembapo kuti, “Tamupokelerani na mawoko ghaŵiri.” Ŵasambiri ŵa Baibolo ŵa ku Pittsburgh ŵakapokeleranga makora ŵanthu awo ŵakafumanga kutali. Mu 1886, Ŵasambiri ŵa Baibolo ŵakaŵa na ungano ukuru mu nyengo ya Chikumbusko. Magazini ya Zion’s Watch Tower yikati wose awo ŵakutemwa Yesu, unenesko na ŵabali ŵawo, mbakupokelereka ku ungano uwu.

Ŵasambiri ŵa Baibolo ku Pittsburgh ŵakachitanga ungano ukuru uwo ukatoranga mazuŵa ghanandi mu nyengo ya Chikumbusko. Ŵasambiri ŵa Baibolo ŵakamba kuŵa ŵanandi. Pa Chikumbusko pakizanga ŵanthu ŵanandi, ndipo ŵakachitiranga ku malo ghakupambanapambana. Ray Bopp wa mu mpingo wa Chicago wakati m’ma 1910 ŵanthu ŵanandi ŵakalyanga vimanyikwiro pa Chikumbusko, ntheura para ŵamba kwendeska vimanyikwiro, ŵakamalizganga luŵiro yayi.

Kasi ŵakatoranga vichi kuŵa vimanyikwiro? Ŵasambiri ŵa Baibolo ŵakamanyanga kuti Yesu wakagwiliskira ntchito vinyo pa Mugonero wa Fumu. Kweni magazini ya Watch Tower yikazomerezga kuti ŵagwiliskirenge ntchito juwisi wakufuma ku vipasi. Ŵakachita ivi kuti awo “mbatechitechi” ŵaleke kuyezgeka. Kweni ŵanyake ŵakamwanga “vinyo.” Pamasinda Ŵasambiri ŵa Baibolo ŵakamanya kuti vinyo liswesi ndilo ndakwenelera kwimira ndopa za Yesu.

Ŵanthu ŵanyake ŵakachitanga vinthu mwakutalulira pakukumbukira nyifwa ya Yesu. Mu mipingo yinyake, pa nyengo ya Chikumbusko ŵanthu ŵakaŵanga na chitima chakujumphizga. Buku Lachingelezi  ilo likafuma mu 1934 la mutu wakuti Yehova, likati pakukumbukira nyifwa ya Yesu tikwenera kuŵa na “chitima” yayi kweni tikwenera “kukondwa” pakuti Yesu wali kwamba kuwusa kuchanya mu 1914.

Mu 1935, ŵakasintha umo ŵakachitiranga pa kukumbukira Nyifwa ya Yesu. Ŵakapulikiska mazgu gha pa Uvumbuzi 7:9, ghakuti “mzinda ukuru.” Pakwamba ŵakaghanaghananga kuti ŵa “mzinda ukuru,” Mbakhristu awo ŵakateŵeteranga Chiuta kwambura mwamphu. Kweni pamanyuma ŵakamanya kuti aŵa mbateŵeti ŵakugomezgeka awo ŵazamukhala kwamuyirayira mu paradiso pa charu chapasi. Russell Poggensee, wakapulikiska fundo iyi. Iyo wakati: “Yehova wandanisankhe na mzimu wake kuti niŵe mu gulu la ŵanthu awo ŵazamuluta kuchanya.” Mbale uyu pamoza na ŵanyake ŵanandi ŵakugomezgeka ŵakaleka kurya vimanyikwiro, kweni ŵakaleka yayi kusangikapo pa Chikumbusko chaka chilichose.

Mu “nyengo yapadera chomene” iyi, Ŵasambiri ŵa Baibolo ŵakachitanga upharazgi wapadera wakuchemera ŵanthu ku Chikumbusko. Iyi yikaŵa nthowa yiwemi yakulongolera kuti ŵakuwonga sembe yakuwombora ya Yesu. Ŵasambiri ŵa Baibolo ŵanyake ŵakapharazganga yayi, kweni iwo ŵakalutanga ku Chikumbusko pera kuti ŵakarye waka vimanyikwiro. Mu 1932, Uteŵeti Withu wa Ufumu ukaŵachiska kuti ŵapharazgenge makani ghawemi gha Ufumu. Mu 1934, Uteŵeti Withu wa Ufumu ukati pakukhumbikwa ŵanthu 1,000 kuti ŵajipeleke kuzakachita upharazgi wapadera mu nyengo ya Chikumbusko. Kweniso ukati ŵakuphakazgika ŵangaŵa ŵakukondwa chomene usange ŵakupharazga Ufumu. Kweniso awo ŵazamukhala pa charu chapasi ŵangaŵa ŵakukondwa chomene usange nawo ŵakupharazga vya Ufumu. *

Ŵakaboni ŵa Yehova ŵakuwona kuti zuŵa la Chikumbusko ndapadera chomene. Nanga vingasuzga wuli pa zuŵa ili ŵakuyezgayezga kuti ŵakasangikepo. Mu 1930, Pearl English na mudumbu wake Ora, ŵakenda mtunda wa makilomita 80 kuti ŵakasangike pa Chikumbusko. Mubali Harold King wakaŵa mishonale ndipo ŵakamujalira mu jele. Apo wakaŵa mu jele wakalemba sumu na ndakatulo zakuyowoya vya Chikumbusko. Kweniso wakanozga vimanyikwiro vya pa Chikumbusko kufuma ku ufu wa mpunga na ufu wakuphikira makeke. Mu vyaru vinyake ku Eastern Europe, Central America na muno mu Africa mukaŵanga nkhondo kweniso ŵakakanizganga ntchito ya Ŵakaboni ŵa Yehova. Ndipouli, ŵabali na ŵadumbu ŵakachitanga Chikumbusko. Nyengo zose tikuwungana kuti tichindike Yehova Chiuta na Yesu Khristu pa nyengo yapadera ya kukumbukira nyifwa ya Yesu.