1. Kasi tisambirenge za ungano wuli wa ŵanthu ŵa Ciuta, ndipo tikwenera kujifumba mafumbo wuli?

 “MILIRANI, mutumbike Yehova Ciuta winu muyirayira swii.” Na mazgu ghakucontha mtima agha, ŵanthu ŵa Ciuta ŵakale, ŵakawungana kuti ŵakolerane mu lurombo. Lurombo ulu, ndumoza lwa malurombo ghatali comene agho ghali kulembeka mu Baibolo. (Neh. 9:4, 5) Ŵanthu aŵa ŵakawungana mu Yerusalemu pa zuŵa la nambara 24 la mwezi wa Ciyuda wacinkhondi na ciŵiri, wa Tishri (Seputembala/Okutobala), mu 455 B.C.E. Apo tikuwona ivyo vikacitika pambere zuŵa lapadera ili lindafike, tijifumbe kuti: ‘Kasi nkhaluso wuli kawemi ako kakawovwira kuti vinthu vyende makora pa zuŵa ili? Kasi ni masambiro wuli ghanyake agho nkhusambirapo pa lurombo lwakunozgeka makora ulu?’—Sal. 141:2.

2. Kasi nchiyelezgero wuli ciwemi ico Ŵaisrayeli ŵakalongora ŵakati ŵawungana pamasinda pakuti ŵazengaso viliŵa vya Yerusalemu?

² Ungano uwo tazunura pacanya apa ukacitika pakati pajumpha mwezi umoza kufuma apo Ŵayuda ŵakamalizga kuzengaso viliŵa vya Yerusalemu. (Neh. 6:15) Ŵanthu ŵa Ciuta ŵakamalizga nchito iyi mu mazuŵa 52 pera, ndipo kufuma apo, ŵakamba kuŵika mahara pa kusoŵerwa kwawo kwauzimu. Ntheura, pa zuŵa lakwamba la mwezi uphya, wa Tishri, ŵakawungana mu bwalo kuti ŵapulikizge Ezra na Ŵalevi ŵanyake, ŵakuŵazga Dango la Ciuta mwakukwezga na kulilongosora. Ŵanthu wose ŵa mu mbumba, pamoza na “wose awo ŵakamanya kupulika na kumanyiska,” ŵakimilira na kupulikizga “kwamba namacerocero kufikira muhanya pakati.” Iwo nchiyelezgero ciwemi kwa tose mazuŵa ghano, ise tikuwungana mu Nyumba za Ufumu ziwemi. Ndipouli, kasi nyengo zinyake mukughanaghana vinthu vinyake uku muli pa maungano? Usange ni nthena, wonani ciyelezgero ca Ŵaisrayeli ŵa mu nyengo yakale ŵara, ŵeneawo ŵakapulikizga na kughanaghanirapo comene pa  ivyo ŵakapulika, mwakuti ŵakamba na kulira wuwo pakuwona kuti mtundu wawo ukatondeka kupulikira Dango la Ciuta.—Neh. 8:1-9.

3. Kasi Ŵaisrayeli ŵakapulikira ulongozgi wuli?

³ Ndipouli, iyi yikaŵa nyengo yakuti ŵazomelere pakweru zakwananga zawo yayi. Pakuti likaŵa zuŵa la ciphikiro, yikaŵa nyengo yakukondwera pakusopa Yehova. (Maŵa. 29:1) Ntheura Nehemiya ŵakaphalira ŵanthu kuti: “Lutani, muryenge vyakunona na kumwa vyakunong’omera, muŵatumireko mapande awo ŵalije kuŵanozgera kanthu; pakuti zuŵa lino ndituŵa kwa Yehova withu; mungaŵanga na citima, pakuti cimwemwe ca Yehova ndico nkhongono zinu.” Ŵanthu ŵakapulikira, ndipo zuŵa ili likaŵa zuŵa la “kusekelera comene.”—Neh. 8:10-12.

4. Kasi ŵawiskewo ŵa ŵanthu ŵakacita vici, ndipo kasi nchivici ico cikaŵa capadera pa Ciphikiro ca Misasa ici?

⁴ Pa zuŵa lakulondezgapo, ŵawiskeŵo ŵa ŵanthu ŵakawungana kuti ŵawone umo mtundu wose ungacitira kuti ulondezge comene Dango la Ciuta. Pakusanda Malemba, ŵakasanga kuti mwezi wa nambara 7, wa Tishri, ukaŵanga na Ciphikiro ca Misasa ico paumaliro pakaŵanga ungano wakupatulika. Ciphikiro ici cikambanga pa zuŵa la nambara 15 mpaka la nambara 22. Ntheura ŵakamba kunozgekera. Ciphikiro ca Misasa ici cikaŵa ciphikiro ico cikacitika makora comene kufuma waka mu mazuŵa gha Joshua, ndipo kukaŵa “kukondwera kukuru.” Cinthu capadera ico cikacitika pa ciphikiro ici, nkhuŵazgika kwa Dango la Ciuta, “zuŵa na zuŵa, kwamba zuŵa lakudanga kufikira zuŵa lakumalira.”—Neh. 8:13-18.

5. Kasi ŵanthu ŵa Ciuta ŵakacita vici pambere Ŵalevi ŵandalombe kwa Yehova?

⁵ Pakati pajumpha mazuŵa ghaŵiri, nyengo yikakwana yakuti Ŵaisrayeli ŵazomelere zakwananga zawo pakweru, zakuti ŵakatondeka kulondezga Dango la Ciuta. Ili likaŵa zuŵa lakukondwera yayi. M’malo mwake, ŵanthu ŵa Ciuta ŵakaziŵizga kurya ndipo ŵakavwara vigudulu kuŵa cimanyikwiro ca kulira. Apa napo Dango la Ciuta likaŵazgika ku ŵanthu kwa maora pafupifupi ghatatu kumulenji. Kumise, “ŵakazomera [zakwananga zawo] na kumulambira Yehova Ciuta wawo.” Kufuma apo, Ŵalevi ŵakalomba m’malo mwa ŵanthu lurombo ulo lukanozgeka makora. —Neh. 9:1-4.

6. Nchivici ico cikawovwira kuti lurombo lwa Ŵalevi luŵe lwakunozgeka makora, ndipo ici cikutisambizga vici?

⁶ Tikukayika yayi kuti Ŵalevi ŵakalomba makora cifukwa cakuti ŵakaŵazganga Dango la Ciuta mwakuwerezgawerezga. Kukwambilira kwa lurombo ulu, kukuzunulika milimo na mikhaliro ya Yehova pera. Kufuma apo, lurombo ulu lukuyowoya mwakuwerezgawerezga za ‘malusungu ghanandi’ gha Ciuta pamoza na kuzomera kuti Ŵaisrayeli ŵakeneranga yayi kupokera malusungu agha. (Neh. 9:18, 19, 27, 28, 31) Nase malurombo ghithu kwa Yehova, ghaŵenge  ghakulongosoka usange tikughanaghanirapo pa Mazgu gha Ciuta zuŵa lililose nga Mbalevi aŵa. Usange tikucita nthena ndikuti tikuzomerezga kuti Yehova wayowoyenge nase pambere tindapeleke lurombo.—Sal. 1:1, 2.

7. Kasi Ŵalevi ŵakapempha vici kwa Ciuta, ndipo ise tikusambirapo vici?

⁷ Mu lurombo ulu muli pempho limoza pera. Likusangika kuumaliro kwa vesi 32, ilo likuŵazgika kuti: “Ntheura sono, Ciuta withu, mukuru, wankhongono, Ciuta wakofya uyo wakusunga phangano na lusungu, visuzgo ivyo vyatiwira vileke kuŵa nga ni vipusu mu maso ghinu, ivyo vyatiwira ise na mathemba ghithu, na ŵakaronga ŵithu, na ŵapristi ŵithu na zinchimi zithu, na ŵadada ŵithu, na ŵanthu ŵinu wose, kwamba nyengo za mafumu gha Asiriya kufikira muhanya uno.” Ntheura, Ŵalevi ŵakapeleka ciyelezgero ciwemi comene kwa ise, ca kudankha kulumba na kuwonga Yehova pambere tindapemphe vinthu mu malurombo ghithu.

8, 9. (a) Kasi Ŵalevi ŵakamba lurombo lwawo na mazgu ghakuti wuli? (b) Kasi viwuru viŵiri vya kucanya ivyo Ŵalevi ŵakavizunura vikwenera kuti vikwimira vici?

⁸ Nangauli lurombo lwawo lukaŵa lwakunozgeka makora, Ŵalevi aŵa ŵakaŵa ŵakujiyuyura, ndipo ŵakawona kuti mazgu ghawo ghangalumba Yehova mwakufikapo yayi. Ntheura, lurombo lwawo lukwamba na mazgu ghakuciska ŵanthu ŵa Ciuta kuti ‘ŵatumbike zina [la Yehova] la ucindami ilo latumphuskika pacanya pa vitumbiko vilivyose na nchindi yiliyose.’—Neh. 9:5.

⁹ Lurombo ulu lukulutilira kuti: “Imwe ndimwe Yehova mwekha; mwalenga mtambo wa mitambo, na viwuru vyake vyose, na caru ca pasi na vyose ivyo vilimo zinyanja na vyose ivyo vilimo; ndipo mukuvisunga vyose; wumba wakucanya ukumulambirani Imwe.” (Neh. 9:6) Nadi, Yehova Ciuta wakalenga mtambo wose, uwo uli na vipingausiku vyambura mapendeko. Cinyake cakuzizwiska nchakuti wakalenga cinthu cilicose ico cili pa pulaneti lithu lakutowa ili ndiposo wakalilenga kuti liwovwire vyamoyo vyakupambanapambana kuti vilutilire kuŵa na umoyo. Vyamoyo ivi vikulutilira kubabana ndipo vikubabana mwakuyana na mitundu yawo. Ŵangelo ŵatuŵa ŵa Ciuta ŵakawonanga apo vyose ivi vikalengekanga, ndipo ŵangelo aŵa ŵakucemekaso kuti ciwuru panji ‘mpingo wa kucanya.’ (1 Mathe. 22:19; Job 38:4, 7) Kweniso, mwakujiyuyura ŵangelo ŵakucita khumbo la Ciuta mwa kuteŵetera ŵanthu ŵakwananga “awo ŵazamuhara ciponosko.” (Heb. 1:14) Ŵangelo ŵali kutilekera ciyelezgero ciwemi nadi ico cingatovwira apo tikuteŵetera Yehova mwakukolerana nga mbasilikari ŵakusambizgika makora.—1 Kor. 14:33, 40.

10. Kasi tikusambirapo vici pa umo Ciuta wakacitira vinthu na Abrahamu?

¹⁰ Kufuma apa, Ŵalevi ŵakayowoya vya umo  Ciuta wakacitira vinthu na Abramu, uyo ŵakaŵa na vyaka 99 ndipo wakaŵavya ŵana. Pakaŵa pa nyengo iyi apo Yehova wakasinthira zina lake kuti liŵe Abrahamu, kung’anamura “wiskewo wa mitundu yinandi.” (Gen. 17:1-6, 15, 16) Kweniso Ciuta wakalayizga Abrahamu kuti mphapu yake yizamuhara caru ca Kenani. Kanandi ŵanthu ŵakuluwa kufiska ivyo ŵalayizga. Yehova ndimo wakucitira yayi, nga umo lurombo lwa Ŵalevi lukuyowoyera, kuti: “Ndimwe Yehova, Ciuta mweneuyo wakamusankha Abramu na kumufumya ku Uri wa Ŵakalidi na kumupa zina lakuti Abrahamu; mukasanga mtima wake wa magomezgeka pamaso pinu, ndipo mukapangana naye phangano kupa mphapu yake caru ca Ŵakenani, . . . kucipeleka ku mphapu yake; ndipo mukafiska phangano cifukwa muli wakunyoloka.” (Neh. 9:7, 8) Mphanyi nase tafwilirapo kufiska ivyo tayowoya kuti tiyezge Ciuta withu wakunyoloka.—Mat. 5:37.

11, 12. Longosorani ng’anamuro la zina la Yehova na umo ng’anamuro ili likalongorekera mu ivyo wakacitira ŵana ŵa Abrahamu.

¹¹ Zina lakuti Yehova likung’anamura kuti “Wakupangiska Kuŵako,” ndipo likulongora kuti Ciuta wakucitapo kanthu kuti wafiske malayizgo ghake. Fundo iyi yikulongoreka makora mu ivyo Ciuta wakacitira ŵana ŵa Abrahamu apo ŵakaŵa ku wuzga ku Eguputo. Pa nyengo iyi, cikawonekanga cambura macitiko kuti mtundu wose ungafwatuka ku wuzga na kukhala mwawanangwa mu Caru ca Layizgano. Ndipouli, Ciuta wakati wacitapo kanthu, wakafiska layizgo lake. Apa wakalongora kuti ngwakwenelera nadi kucemeka na zina lapadera lakuti Yehova.

¹² Lurombo ulo luli kulembeka na Nehemiya lukuyowoya vya Yehova kuti: “Ndipo mukawona suzgo ya ŵasekuru ŵithu mu Eguputo, mukapulika kulira kwawo ku Nyanja Yiswesi, mukalongora vimanyikwiro na vyakuzizwiska pa Faro na pa ŵateŵeti ŵake wose, na pa ŵanthu wose ŵa caru cake, cifukwa mukamanya kuti ŵakaŵacitira mwakujikuzga; ntheura mukajibukiskira zina nga ni umo kuliri muhanya uno. Mukagaŵa nyanja panthazi pawo ntheura kuti ŵakenda pakati pa nyanja pa mtunda womizo; ndipo awo ŵakaŵasuzganga mukaŵaponya mu ndimba nga ni libwe mu maji ghakuzongoka.” Lurombo ulu lukulutilira ndipo lukuyowoyaso vinyake ivyo Yehova wakacitira ŵanthu ŵake, lukuti: “Mukathereska ŵenecaru panthazi pawo, Ŵakenani . . . Ndipo ŵakapoka mizi ya malinga na caru cakunona, nyumba zakuzura na vyuma, visimi vyakujimajima, minda ya mpheska na ya maolive, na makuni ghanandi gha vipasi; ntheura ŵakarya ŵakakhuta na kututuŵa, ndipo ŵakakondwa mu uwemi winu ukuru.”—Neh. 9:9-11, 24, 25.

13. Kasi Yehova wakaŵapa wuli Ŵaisrayeli vinthu ivyo ŵakakhumbikwiranga mwauzimu, kweni iwo ŵakacita wuli?

¹³ Pakaŵa vinthu vinyake vinandi ivyo Ciuta wakacita kuti wafiske khumbo lake. Mwaciyelezgero, Ŵaisrayeli ŵakati ŵafuma waka mu Eguputo, Yehova wakaŵapa ivyo ŵakakhumbikwiranga mwauzimu. Ŵalevi ŵakati mu lurombo lwawo: “Mukakhiraso pa lupiri lwa Sinayi, mukayowoya nawo muli kucanya, mukaŵapa maweruzgo ghakunyoloka na malango ghanenesko, maweruzgo na malango ghawemi.” (Neh. 9:13) Yehova wakayezgayezga kusambizga ŵanthu ŵake kuti ŵaŵe ŵakwenelera kumanyikwa na zina lake lituŵa pakuŵa ŵahaliri ŵa Caru ca Layizgano, kweni iwo ŵakasida vinthu viwemi ivyo ŵakasambira.—Ŵazgani Nehemiya 9:16-18.

14, 15. (a) Kasi Yehova wakaŵapwelelera wuli mwalusungu ŵanthu ŵake ŵakwananga? (b) Kasi tikusambirapo vici pa umo Ciuta wakacitira vinthu na mtundu wake?

¹⁴ Mu lurombo lwa Ŵalevi mukuzunulika zakwananga ziŵiri izo Ŵaisrayeli ŵakacita ŵati  ŵalayizga kuti ŵasungenge Dango la Ciuta pa Lupiri lwa Sinayi. Pa cifukwa ici, cikaŵa cakwenelera kuŵaleka waka kuti ŵafwe. Kweni lurombo lukulumba Yehova kuti: “Mu malusungu ghinu ghanandi mulije kuŵasida mu mapopa . . . Vilimika makumi ghanayi mukaŵalera . . . , ntheura kuti ŵakakavuka kanthu cara; vyakuvwara vyawo kuti vikakoloŵera nanga malundi ghawo kutupa cara.” (Neh. 9:18, 19, 21) Mazuŵa ghano napo, Yehova wakutipa vyose ivyo tikukhumbikwira kuti timuteŵetere mwakugomezgeka. Tileke kuŵa nga Mbaisrayeli masauzandi ghanandi awo ŵakafwira mu mapopa cifukwa ca kuleka kupulikira kweniso cifukwa ca kuŵavya cipulikano. Nakuti vinthu ivi “vikalembeka kuŵa cenjezgo kwa ise, taŵeneise maumaliro gha migonezi ghatizira.”—1 Kor. 10:1-11.

¹⁵ Cacitima nchakuti, Ŵaisrayeli ŵakati ŵahara Caru ca Layizgano, ŵakamba kusopa ŵaciuta ŵa Ŵakenani ivyo vikapangiska kuti ŵacitenge vinthu vyawakawaka ndiposo kupeleka sembe ŵana ŵawo. Ntheura Yehova wakazomerezga mitundu yinyake kuti yitambuzge mtundu wake wakusoleka. Para ŵapera, mwalusungu Yehova wakaŵagowokeranga na kuŵathaska ku ŵalwani ŵawo. Ivi vikacitikanga “nyengo zinandi.” (Ŵazgani Nehemiya 9:26-28, 31.) Ŵalevi ŵakazomerezga, ŵakati: “Vilimika vinandi mukaŵalekelera, mukaŵacitira ukaboni na mzimu winu mwa zinchimi zinu; kweni kuti ŵakategherezga cara. Kwa cifukwa ici mukaŵapeleka mu woko la ŵanthu ŵenecaru.”—Neh. 9:30.

16, 17. (a) Kasi vinthu vikaŵa wuli ku Ŵaisrayeli ŵakati ŵawerako ku wuzga? (b) Kasi Ŵaisrayeli ŵakazomerezga vici, ndipo ŵakalayizga kuti ŵacitenge vici?

¹⁶ Nanga mphamanyuma pakuti Ŵaisrayeli ŵawerako ku wuzga, ŵakalutilira kuleka kupulikira. Kasi cikacitika nchivici? Ŵalevi ŵakalutilira kulomba, ŵakati: “Wonani, tili ŵazga lero, na caru ico mukaŵapa ŵasekuru kuti ŵarye vipasi vyake na viwemi vyake, wonani, tili ŵazga mwa ico. Ndipo usambazi wa kupasa kwake ukuya ku mafumu agho mwaghimika pacanya pithu cifukwa ca mauheni ghithu . . . ndipo ise tili mu kusuzgika kukuru.”—Neh. 9:36, 37.

¹⁷ Kasi apa Ŵalevi ŵakang’anamuranga kuti Ciuta wakaŵa wambura urunji pakuzomerezga kuti iwo ŵasuzgike nthena? Yayi. Iwo ŵakati: “Muli murunji mu vyose ivyo vyatiwira, pakuti mwacita urunji, ise ndise tananga.” (Neh. 9:33) Lurombo lwakuyowoyeka mwakujiyuyura ulu lukamara na layizgo lakuti mtundu uwu uŵenge wakupulikira Dango la Ciuta kufuma apa kuya munthazi. (Ŵazgani Nehemiya 9:38; 10:29) Ndipo ŵakalemba layizgo lawo mu cikalata ico ŵalongozgi 84 ŵa Ŵayuda ŵakasayina.—Neh. 10:1-27.

18, 19. (a) Kasi tikukhumbikwira vici kuti tizakapone na kunjira mu caru ciphya ca Ciuta? (b) Kasi tikwenera kulutilira kulomba kuti vici, ndipo cifukwa wuli?

¹⁸ Tikukhumbikwira cilango cakufuma kwa Yehova kuti tiŵe ŵakwenelera kunjira mu caru ciphya caurunji. Mpositole Paulosi wakafumba kuti: “Ni mwana nju uyo wiske wakuleka kumulanga?” (Heb. 12:7) Tikulongora kuti tikukolerana na ulongozgi wa Ciuta mu umoyo withu para tikulutilira kumuteŵetera mwakugomezgeka na kuzomerezga kuti mzimu wake utiyenge. Kweniso usange tacita zakwananga zikuru, tili na cigomezgo cose kuti Yehova watigowokerenge usange tili ŵakupera nadi ndiposo para tikuzomera cilango mwakujiyuyura.

¹⁹ Sonosono apa, Yehova watuŵiskenge zina lake kuluska umo wakacitira apo wakaponoskanga Ŵaisrayeli ku Eguputo. (Ezek. 38:23) Kweniso nga umo ŵanthu ŵake ŵakale ŵakahalira Caru ca Layizgano, Ŵakhristu wose awo ŵalutilirenge kusopa Yehova mwakugomezgeka, ŵazamuhara caru ciphya ca Ciuta caurunji na kuŵa ŵamoyo kwamuyirayira. (2 Pet. 3:13) Pakuti tili na cilindizga ici, tilutilire kulomba kuti zina la ucindami la Ciuta lituŵiskike. Nkhani yakulondezgapo yizamulongosora vya lurombo lunyake ulo tikwenera kukolerana nalo kuti tisange vitumbiko vyakufuma kwa Ciuta sono ndiposo kwamuyirayira.