Gomezgani Yehova Apo Umaliro Ukuneng’enera

“Gomezgani Yehova muyirayira.”—YES. 26:4.

1. Kasi pali mphambano wuli pakati pa ŵateŵeti ŵa Ciuta na ŵanthu ŵanyake?

TIKUKHALA mu caru ico ŵanthu ŵanandi ŵakumanya yayi uyo ŵangagomezga panji ico ŵangagomezga, mutepanji cifukwa cakuti kanandi ŵakukhuŵazgika. Kweni ndimo viliri yayi ku ŵateŵeti ŵa Yehova. Pakuti ŵakulongozgeka na vinjeru vya Ciuta, ŵakugomezga caru ici yayi nesi “ŵakaronga” ŵake. (Sal. 146:3) M’malo mwake, ŵakuŵika umoyo wawo wose mu mawoko gha Yehova, cifukwa ŵakumanya kuti wakuŵatemwa ndipo nyengo zose wakufiska Mazgu ghake.—Rom. 3:4; 8:38, 39.

2. Kasi Joshua wakalongora wuli kuti Ciuta ngwakugomezgeka?

² Joshua wakakhorwa kuti Ciuta ngwakugomezgeka. Apo wakaŵa pafupi kufwa, wakaphalira Ŵaisrayeli kuti: “Mukumanya mu mitima yinu yose na miyoyo yinu yose, kuti palive kutondeka kanthu pa viwemi vyose ivyo Yehova Ciuta winu wakayowoya namwe; vyose vyafiskika kwa imwe.”—Josh. 23:14.

3. Kasi zina la Ciuta likuvumburaci za iyo?

³ Yehova wakufiska ivyo walayizga cifukwa cakuti wakutemwa ŵateŵeti ŵake kweniso comene cifukwa ca zina lake. (Ex. 3:14; 1 Sam. 12:22) Pakuyowoya za zina la Ciuta, mazgu  ghakwamba mu Baibolo lakung’anamurika na J. B. Rotherham ghakuti, zina la Ciuta likung’anamura kuti wangaŵa cilicose kuti wafiske ivyo walayizga. Para tikupulika zina lake tikukumbuka kuti nyengo zose wakucita ico wayowoya. Wangacita cilicose ico wakukhumba pa nyengo yiliyose ndiposo palipose. Palije ico cingamutonda. Nyengo zose Ciuta wacitenge vinthu mwakuyana na zina lake.—The Emphasized Bible.

4. (a) Kasi lemba la Yesaya 26:4 likuticiska kucitaci? (b) Kasi tidumbiskanenge vici mu nkhani iyi?

⁴ Jifumbani kuti: ‘Kasi nkhumumanya makora Yehova mwakuti nkhumugomezga comene? Kasi nilije wofi wa ivyo vicitikenge munthazi cifukwa cakuti nkhumanya kuti Ciuta ndiyo wali na mazaza pa vyose?’ Lemba la Yesaya 26:4 likuti: “Gomezgani Yehova muyirayira, cifukwa Yehova Ciuta ndi jalawe lamtatakuya.” Mazuŵa ghano Ciuta wakunjilirapo mwamunthondwe yayi pa masuzgo gha ŵanthu nga umo wakacitiranga kale. Ndipouli, pakuti ni “jalawe lamtatakuya,” tingamugomezga “muyirayira.” Kasi Ciuta withu wakugomezgeka wakovwira wuli awo ŵakumusopa mazuŵa ghano? Tiyeni tiwone nthowa zitatu izo wakutovwilira. Wakutikhozga para tikumulomba kuti watovwire kutonda viyezgo. Wakutovwira para takumana na ŵanthu ŵambura kunweka panji awo ŵakutisuska. Ndiposo wakutikhozga para tikwenjerwa comene. Apo tikusanda vigaŵa ivi, wonani umo mungacitira kuti mukhozge cigomezgo cinu mwa Yehova.

Para Mukuyezgeka Kucita Viheni

5. Pa nkhani ya kugomezga Ciuta, kasi suzgo likuru lingaŵa mpha?

⁵ Nchipusu kugomezga Yehova pa vinthu ivyo tikunweka navyo nga ni layizgo la Paradiso na kuwuka kwa ŵakufwa. Kweni pa nkhani ya kupulikira malango ghake, cingaŵa cakusuzga comene kumugomezga, kukhorwa na mtima withu wose kuti kujilambika ku fundo zake nkhuwemi ndipo kutovwirenge kuti tikondwenge comene. Themba Solomoni likalemba kuti: “Tamira mwa Yehova na mtima wako wose, ungeghamanga ku umanyi wako wekha. Mu mendero ghako ghose umuzomere Iye, ndipo tiwanyoloskenge nthowa zako.” (Zinth. 3:5, 6) Wonani kuti Solomoni wakayowoya za “mendero” ghithu na “nthowa” zithu. Mazgu agha ghakulongora kuti padera pa kugomezga ivyo Ciuta watilayizga, umoyo withu wose ukwenera kulongora kuti tikumugomezga. Kasi tingalongora wuli kuti tikumugomezga para tikuyezgeka?

6. Kasi tingacita wuli kuti tikanisiske maghanoghano ghaheni?

⁶ Kukana viheni kukwambira mu maghanoghano. (Ŵazgani Ŵaroma 8:5; Ŵaefeso 2:3.) Ipo kasi mungacita wuli kuti mukanisiske maghanoghano ghaheni? Wonani nthowa zinkhondi izi: 1. Lombani kwa Ciuta kuti wamovwirani. (Mat. 6:9, 13) 2. Ghanaghanirani za ŵanthu awo ŵakuzunulika mu Baibolo awo ŵakatondeka kupulikira Yehova na awo ŵakamupulikira. Pamanyuma sandani ivyo vikaŵacitikira. * (1 Kor. 10:8-11)  3. Ghanaghanirani umo imwe panji ŵakutemweka ŵinu ŵangasuzgikira maghanoghano para mungacita kwananga. 4. Ghanaghanirani umo Ciuta wangajipulikira para yumoza wa ŵateŵeti ŵake wacita kwananga kukuru. (Ŵazgani Salmo 78:40, 41.) 5. Ghanaghanirani umo Yehova wakukondwera para wakuwona muteŵeti wake wakukana vinthu viheni ndipo wakucita ico nchiwemi, kwali wali pawumba panji kwa yekha. (Sal. 15:1, 2; Zinth. 27:11) Namwe mungalongora kuti mukugomezga Yehova.

Para Ŵakunweka Yayi Panji Kususka

7. Kasi Yeremiya wakakumana na viyezgo wuli, ndipo nyengo zinyake wakajipulikanga wuli?

⁷ Ŵabali ŵithu ŵanandi ŵakuteŵetera ku vigaŵa vyakusuzga comene. Nchimi Yeremiya nayo yikateŵeteranga ku malo ghanthena, mu nyengo iyo ufumu wa Yuda ukaŵa pafupi kuparanyika. Zuŵa lililose wakayezgekanga cifukwa ca kupharazga uthenga wa ceruzgo ca Ciuta. Pa nyengo yinyake, mulembi wake wakugomezgeka Baruki wakamba kudandawura kuti wakuvuka. (Yer. 45:2, 3) Kasi Yeremiya wakagongoweskeka? Nyengo yinyake wakatayapo mtima, ndipo wakati: “Litembeke zuŵa ilo nkhababiwiramo! . . . Nkhafumiraci mu nthumbo kuwona suzgo na citima, mwakuti mazuŵa ghane ghamarizgike na soni?”—Yer. 20:14, 15, 18.

8, 9. Mwakuyana na Yeremiya 17:7, 8 na Salmo 1:1-3, kasi tikwenera kucitaci kuti tilutilire kupambika cipambi ciwemi?

⁸ Ndipouli, Yeremiya wakagongowa yayi. Wakalutilira kugomezga Yehova. Cifukwa ca kucita nthena, wakawona kufiska kwa mazgu gha Yehova agho ghali pa Yeremiya 17:7, 8, ghakuti: “Ngwakutumbikika munthu uyo wakugomezga mwa Yehova, mweneuyo cigomezgo cake ndi Yehova. Wali nga ndi khuni lakupandika mu mumphepete mwa maji, ilo likutambalira misisi yake mu mlonga, kuti lopenge cara nyengo ya cithukivu, pakuti mahamba ghake ghati ghaŵe biliŵiri, ndipo kuti lipwelerengeko cara mu cilimika ca cilara, cifukwa kuti likuleka kupambika vipasi cara.”

⁹ Nga ni khuni lakubiliŵira ilo ‘lapandika mu mphepete mwa maji,’ Yeremiya ‘wakalekapo cara kupambika vipambi.’ Wakakana kupuluskika na ŵakugoska. M’malo mwake, wakademelera kwa Yehova uyo nchisimi ca “maji” gha umoyo, ndipo wakapulikira cilicose ico Yehova wakamuphalira. (Ŵazgani Salmo 1:1-3; Yer. 20:9) Yeremiya wali kutilekera ciyelezgero ciwemi, comenecomene ise tikuteŵetera Ciuta mu vigaŵa vyakusuzga. Usange namwe mukuteŵetera mu cigaŵa cakusuzga, lutilirani kugomezga comene Yehova, ndipo wamovwiraninge kuti muzizipizge apo mukupharazga “pakweru zina lake.”—Heb. 13:15.

10. Kasi tasanga vitumbiko wuli, ndipo tikwenera kujifumba fumbo wuli?

¹⁰ Yehova watipa vinthu vinandi vyauzimu kuti vitovwire kuzizipizga masuzgo agho tikukumana nagho mu mazuŵa ghaumaliro agha. Mwaciyelezgero, watipa Baibolo ilo pasono likung’anamulika makora mu viyowoyero vinandi. Kwizira mwa muzga wakugomezgeka na wakucenjera, wakupeleka cakurya cinandi cauzimu pa nyengo yakwenelera. Watipaso ŵabwezi ŵanandi comene awo tikukumana nawo pa maungano gha mpingo na maungano gha dera. Kasi imwe mukupokelera na mtima wose vinthu ivi? Wose awo ŵakucita nthena “tiŵimbenge na mitima yacimwemwe.” Kweni awo ŵakutondeka kupulikira Ciuta tiŵalirenge “cifukwa ca kuŵinya mtima, na kubangura cifukwa ca kukweŵeka kwa mzimu.”—Yes. 65:13, 14.

Para Mukwenjerwa

11, 12. Pakuwona masuzgo agho ghali mu caru, kasi nchivici camahara ico tingacita?

¹¹ Nga umo ucimi ukayowoyera, ŵanthu mazuŵa ghano ŵakukumana na masuzgo agho ghali nga ni mlonga uwo ukututuka. (Mat. 24:6-8; Uvu. 12:12) Kanandi para mlonga ukututuka, ŵanthu awo ŵakukhala mu mphepete ŵakucimbilira pa malo agho ŵakuwona  kuti ngakukwera. Mwakuyana waka, apo masuzgo ghakusazgikira, ŵanthu ŵanandi ŵakuwona kuti ŵangavikilirika na vinthu nga ni ndalama, ŵandyali, mawupu gha visopa, ndiposo ivyo ŵasayansi ŵakupanga. Kweni pa vinthu ivi palije ico cingapeleka civikiliro canadi. (Yer. 17:5, 6) Ŵateŵeti ŵa Yehova ŵali na civikiliro canadi ico ni “jalawe lamtatakuya.” (Yes. 26:4) Wamasalmo wakati: “[Yehova] ndiye jalawe lane na ciponosko cane; linga lane.” (Ŵazgani Salmo 62:6-9.) Kasi jalawe ili tikulipanga wuli kuŵa ciphokwero cithu?

¹² Tikudemelera kwa Yehova para tikupulikira Mazgu ghake agho kanandi ghakupambana na vinjeru vya ŵanthu. (Sal. 73:23, 24) Mwaciyelezgero, ŵanthu awo ŵakwendera vinjeru vya caru ŵangati: ‘Umoyo ngwenewuwu pera, ntheura sangwiranithu.’ ‘Penjani nchito yiwemi.’ ‘Pangani ndalama zinandi.’ ‘Gulani ici na ico.’ ‘Yendani mu caru na kusangwa.’ Kweni vinjeru vyakufuma kwa Ciuta vili na ulongozgi uwu: “Awo ŵakugwiliskira nchito caru [ŵaŵe] nga ni awo ŵakucigwiliskira nchito mwakufikapo cara; cifukwa vyakucitika vya caru ici vikusintha.” (1 Kor. 7:31) Yesu nayo wakuticiska kuti nyengo zose tiŵikenge vinthu vya Ufumu pa malo ghakwamba ndipo para tacita nthena ndikuti ‘tajiŵikira usambazi kucanya,’ uko ukusungika nadi.—Mat. 6:19, 20.

13. Para tikughanaghanira lemba la 1 Yohane 2:15-17, kasi tikwenera kujifumba mafumbo wuli?

¹³ Kasi umo mukuwonera “caru” na “vinthu ivyo vili mu caru” mukulongora kuti mukugomezga comene Ciuta? (1 Yoh. 2:15-17) Kasi usambazi wauzimu ndiposo uteŵeti ni vyakuzirwa comene kwa imwe kuluska vinthu vya mu caru? (Fil. 3:8) Kasi mukuyezgayezga kuŵa na ‘jiso lakulata pa cimoza’? (Mat. 6:22) Kumbukani kuti Ciuta wakukhumba kuti mucitenge vinthu mwamahara, comenecomene para muli na mbumba. (1 Tim. 5:8) Kweniso wakukhumba kuti ŵateŵeti ŵake ŵamugomezgenge comene, m’malo mwa kugomezga caru ca Satana ico cili pafupi kuparanyika.—Heb. 13:5.

14-16. Kasi ŵanji ŵandula wuli cifukwa ca kuŵa na ‘jiso lakulata pa cimoza’ na kulutilira kuŵika vinthu vya Ufumu pa malo ghakwamba?

¹⁴ Wonani ivyo Richard na muwoli wake Ruth ŵakacita. Iwo ŵali na ŵana ŵatatu. Richard wakati: “Mtima wane ukaniphaliranga kuti ningamucitira vinandi Yehova. Nkhaŵa na cilicose kweni nkhawonanga kuti Ciuta nkhumupa waka makombo. Nkhati nalomba, na kughanaghanirapo, ine na muwoli wane tikakolerana kuti nipemphe abwana kuti nigwirenge nchito kwa mazuŵa ghanayi mu sabata, nangauli mu caru cithu cuma cikendanga makora yayi. Ŵakanizomerezga ndipo pakati pajumpha mwezi umoza nkhamba kugwira nchito mazuŵa ghanayi pa sabata.” Kasi Richard wakajipulika wuli?

¹⁵ Richard wakati: “Nangauli sono nkhupokera ndalama zicoko kuluska pakwamba, kweni nkhuŵa na mazuŵa 50 pa cilimika agho nkhuŵira lumoza na mbumba yane na kusambizga ŵana ŵane. Nkhupharazga nyengo yitali, nili na masambiro ghanandi, ndiposo nkhucita vinandi mu mpingo. Ruth wakucitako upayiniya wakanyengo cifukwa cakuti kanandi ine nkhuŵa pa nyumba kulera ŵana.  Naŵikapo mtima kuti nilutilire kucita nthena umo ningafiskira.”

¹⁶ Roy na muwoli wake Petina apo ŵakaŵa ŵacali kulera mwana wawo msungwana, ŵakacepeska mazuŵa ghakugwilira nchito yawo yakulembeka mwakuti ŵaciteko uteŵeti wanyengozose. Roy wakati: “Nkhugwira nchito mazuŵa ghatatu pa sabata, ndipo Petina wakugwira nchito mazuŵa ghaŵiri. Kweniso tili kusamira mu nyumba yicoko, iyo tikusuzgika yayi kuyipwelelera. Pambere tindambe kubaba, tikacitanga upayiniya, kweni khumbo la kucita upayiniya likamara yayi. Ntheura, ŵana ŵithu ŵakati ŵakura tikambaso uteŵeti wanyengozose. Palije ndalama izo tingaziyaniska na vitumbiko ivyo tasanga.”

“Mtende wa Ciuta” Usungilire Mtima Winu

17. Pa nkhani ya vyenjezgo, kasi Malemba ghakutipembuzga wuli?

¹⁷ Palije uyo wakumanya ivyo vimucitikirenge namacero, cifukwa “nyengo na mwaŵi” panji kuti vinthu vyamabuci vikuwira tose. (Muph. 9:11) Kweni vyenjezgo vya zuŵa la macero vileke kutipoka mtende withu wa mu mtima uwo tili nawo sono, nga umo ŵakucitira awo ŵalije cipulikano mwa Ciuta. (Mat. 6:34) Mpositole Paulosi wakati: “Mungenjerwanga cara na kanthu kalikose, kweni mu vinthu vyose, mu lurombo na ŵeyelero pamoza na kuwonga, madando ghinu ghamanyikwe kwa Ciuta, ndipo mtende wa Ciuta uwo ukuluska ghanoghano lililose, usungilirenge mitima yinu na maghanoghano ghinu.”—Fil. 4:6, 7.

18, 19. Kasi Ciuta wakutipembuzga wuli? Yowoyani ciyelezgero.

¹⁸ Ŵabali na ŵadumbu ŵanandi awo ŵakusuzgika ŵakuŵa na mtende wa mu mtima wakufuma kwa Yehova. Mudumbu munyake wakati: “Dokotala wakanofyanga kuti nizomere kupokera ndopa. Wakatemwanga kuyowoya kuti, ‘Mbucindere wuli uwu wakukana ndopa?’ Pamanyuma, nkhalomba mu mtima kwa Yehova ndipo nkhaŵa na mtende. Nkhajiwona kuti ndine wakukhora nga ni libwe. Nangauli nkhaŵa wakunyotwa cifukwa cakuti ndopa zikaŵa zicoko, kweni nkhalongosora makora cifukwa ca mu Malemba ico nkhukanira ndopa.”

¹⁹ Nyengo zinyake Ciuta wakupeleka wovwiri kwizira mwa Mkhristu munyithu panji kwizira mu cakurya cauzimu ca pa nyengo yakwenelera. Mutepanji muli kupulikapo mbali panji mudumbu wakuti: “Nkhani iyi yiza pa nyengo yake. Yalembekera waka ine!” Kwali tingaŵa na masuzgo wuli, Yehova watilongorenge citemwa usange tikumugomezga. Nakuti ndise “mberere” zake, ndipo iyo waŵika zina lake pa ise.—Sal. 100:3; Yoh. 10:16; Mil. 15:14, 17.

20. Cifukwa wuli ŵateŵeti ŵa Yehova ŵakhalenge mwakufwasa apo caru ca Satana cili pafupi kuparanyika?

²⁰ Cinthu cilicose ca mu caru ca Satana ico ŵanthu ŵakugomezga, cizamuparanyika pa “zuŵa la mbembe la Yehova” ilo laneng’enera. Golide, siliva na vinthu vinyake ivyo ŵakuviwona kuti ni vyakuzirwa vizamuŵavikilirapo yayi. (Zef. 1:18; Zinth. 11:4) “Jalawe lamtatakuya” lekha ndilo lizamuŵa ciphokwero cithu. (Yes. 26:4) Ntheura, tiyeni tilongore kuti tikugomezga comene Yehova mwa kwenda mu nthowa zake zaurunji, kupharazga uthenga wa Ufumu nangauli tikusangana na ŵanthu ŵambura kunweka panji ŵakususka, ndiposo kukunkhuzgira vyenjezgo vithu vyose pa iyo. Para tikucita vinthu ivi ‘tikhalenge mwakufwasa; tiŵenge na mtende, kwambura kopa viheni.’—Zinth. 1:33.

[Mazgu ghamusi]

Kasi Mungalongosora?

Kasi tingalongora wuli kuti tikugomezga Ciuta

• para tikuyezgeka kucita viheni?

• para ŵanthu ŵakunweka yayi panji kutisuska?

• para tikwenjerwa?

[Mafumbo]

[Cithuzithuzi pa peji 13]

Tikukondwa para tikupulikira malango gha Ciuta

[Cithuzithuzi pa peji 15]

‘Yehova ni Jalawe lamtatakuya’