Kasi Mukwenera Kusankha Cisopo Wuli?

‘VISOPO vinandi ni nthowa waka izo zikuluta ku malo ghamoza. Nakuŵanako, asi Ciuta njumoza?’ Ŵanandi ndimo ŵakughanaghanira, ŵakuti nangauli kuŵa na cisopo nchinthu cakuzirwa, kweni vilije kanthu nanga munthu wasankhe bweka cisopo.

Pakwamba, fundo iyi yingawoneka nga njakupulikikwa, pakuti Ciuta Wankhongonozose njumoza nadi. (Yesaya 44:6; Yohane 17:3; 1 Ŵakorinte 8:5, 6) Kweni tingaluwanga yayi kuti visopo vinandi ivyo vikuti vikuteŵetera Ciuta waunenesko vikupambana na kususkana. Vikupambana comene mu milimo, vigomezgo, visambizgo na malango. Mphambano njikuru comene mwakuti awo ŵali mu cisopo cinyake ŵakutondeka kupulikiska ivyo ŵanyawo ŵakusambizga panji kugomezga.

Pa nkhani ya kusopa, Yesu wakati: “Ciuta ndi mzimu: ndipo awo ŵakumusopa ŵakwenera kusopa mu mzimu na mu unenesko.” (Yohane 4:24) Kasi kusopa Ciuta mu unenesko cikung’anamura kuŵa na visambizgo vyakupambana vyakukhwaskana na Ciuta, khumbo lake, na umo wakukhumbira kuti ŵanthu ŵamusoperenge? Kasi nchamahara kugomezga kuti Ciuta Wankhongonozose wakupwelerako yayi umo tikumusopera?

Ŵakhristu Ŵaunenesko, Kale na Lero

Kale, Ŵakhristu nyengo zinyake ŵakapambananga maghanoghano pa vinthu vinyake. Ciyelezgero ncha ŵanthu ŵa mu Korinte, awo mpositole Paulosi wakati: “Twa imwe twaphalika kwa ine, mwa ŵabali, na awo mba ku Klowe, kuti zilimo mphindano mwa imwe. Ceneici nkhunena kuti yose wa imwe wakuti, ine ndili wa Paulosi; ine ndili wa Apolo; ine ndili wa Kefase: ine ndili wa Khristu.”—1 Ŵakorinte 1:11, 12.

Kasi Paulosi wakawona kuti kupambana maghanoghano nkhanthu kacoko waka? Kasi waliyose payekha wakalondezganga nthowa yake kuti waponoskeke? Napacoko pose! Paulosi wakati: ‘Nkhumuŵeyani, mwa ŵabali, mu zina la Fumu yithu Yesu Khristu, kuti imwe mose muyowoye cakuyana, nakuti muŵavye mphatukano mwa imwe; kweni kuti muŵe ŵakongorekwa mu mtima wakuyana na mu keruzgiro kakuyana.’—1 Ŵakorinte 1:10.

Mbunenesko kuti vingacitika yayi kucicizga ŵanthu kuti ŵaŵe na vigomezgo vyakuyana. Ŵanthu ŵakwenera kusanda na kuwamo ŵekha mu unenesko. Pa cifukwa ici, ipo nthowa yiwemi nkhusambira Mazgu gha Ciuta na kuŵikapo mtima kulondezga  ivyo tasambira mwakuti paŵe kukolerana nga umo Paulosi wakayowoyera. Kasi kukolerana uku kungaŵapo? Nga umo tawonera, nyengo zose Ciuta wakucitira vinthu ŵanthu wose pa gulu. Kasi nchipusu kulimanya gulu ili lero?

Uwemi wa Kuwungana na Gulu Lakwenelera

Panyengo yinyake Davide wakafumba kuti: “A Yehova, kasi ndinjani wangakhala mu hema linu? Ndinjani wangakhala mu phiri linu lakupatulika?” Ili ni fumbo liwemi lakuti tighanaghanirepo. Davide wakazgora, wakati: ‘Mweneuyo wakwenda [mwakunyoloka] na kucita urunji, uyo wakuyowoya unenesko mu mtima wake.’ (Salmo 15:1, 2) Kusambira na kulimanya makora Baibolo kukovwira kuti munthu waŵanike cisopo ico cikukwaniska ivyo Ciuta wakukhumba. Pakuwungana na gulu ilo, munthu wangakhozgeka na ŵanthu awo ŵakusopa Ciuta mwakukolerana—mu “mzimu na mu unenesko.”

Ŵakaboni ŵa Yehova ŵalongora kuti nchipusu kuŵa na vigomezgo na vyakucita vyakuyana nangauli ŵakukhala mu caru ico nchakugaŵikana. Pakati pawo pali ŵanthu awo ŵali kufuma mu mafuko na machalichi ghakupambanapambana. Ŵanyake awo Mbakaboni, pakwamba ŵakagomezganga yayi kuti Ciuta waliko. Paliso ŵanyake awo pakwamba ŵakaŵikangako mahara yayi ku cisopo. Ŵanthu wose aŵa sono mbakukolerana mu cisopo—cinthu ico cikucitika yayi kulikose.

Mazgu gha Ciuta, Baibolo, ghakovwira kuti paŵe kukolerana. Ŵakaboni ŵa Yehova ŵakumanya kuti ŵangacicizga ŵanthu yayi pa nkhani iyi. Kweni ŵakuciska ŵanyawo kuti ŵamanye Baibolo mwakuti cose ico ŵasankhenge pa nkhani ya kusopa cifumirenge mu Baibolo. Pakucita nthena, ŵanthu ŵanandi ŵangasanga viwemi pakusopa Ciuta “mu mzimu na mu unenesko.”

Lero pali mikhaliro yinandi yiheni iyo yingatipweteka na kutipuluska. Ipo nchakuzirwa kusankha makora gulu ilo tikwenera kwenda nalo. Baibolo likuti: “Uyo wakwenda na ŵavinjeru naye tiwaŵe wavinjeru, kweni mulongozgani wa vindere tiwapwetekekenge.” (Zintharika 13:20; 1 Ŵakorinte 15:33) Nchivikiliro kuwungana na ŵanthu awo ŵakusopa Ciuta mu unenesko. Baibolo likutikumbuska kuti: “Tighanaghanirane na kukhuŵilizgirana ku kutemwa na ku milimo yiwemi. Kuleka kongana cara, nga ndi umo kaliri kaluso ka ŵanji, kweni kuciskana; ndipo comenecomene apo mukuwona zuŵa likuneng’enera.” (Ŵahebere 10:24, 25) Nchinthu ciwemi comene para ŵabwezi ŵanadi, ŵabali na ŵadumbu ŵauzimu ŵakovwirana kuti ŵafiske milimo yawo kwa Ciuta!

Ottmar wakukhozgera fundo iyi. Wakakulira mu mbumba ya Ŵakatolika ku Germany, kweni wakaleka kulutako ku chalichi. Iyo wakuti: “Nyengo zose apo nkhalutanga ku chalichi, nkhawelangako waka khwatukhwatu nga umo nkhalutiranga.” Kweni wakaŵa na cipulikano nipera mwa Ciuta. Pamanyuma, wakasangana na Ŵakaboni ŵa Yehova, wakakhorwa kuti iwo mbateŵeti ŵaunenesko ŵa Ciuta. Wakawona kuti nchiwemi kuwungana nawo. Sono wakuti: “Nkhukolerana na gulu la pa caru cose ndipo nili na mtende mu mtima na mu maghanoghano. Nkhovwirika comene kuti nimanye makora Baibolo. Ici nchinthu cakuzirwa nkhanira kwa ine.”

Nchemo kwa Awo Ŵakupenja Unenesko

Ŵanthu awo mbakukolerana pa gulu, ndiwo ŵakucita makora nchito yikuru kuluska awo waliyose wakucita vyake ivyo wakhumba. Mwaciyelezgero, apo Yesu wakalayiranga ŵalondezgi ŵake wakati: ‘Lutaninge mukasambizge mitundu yose, mukaŵabapatize mu zina la Ŵawiske na la Mwana na la mzimu utuŵa, muŵasambizge kukoreska vyose  ivyo ndamulangulirani.’ (Mateyu 28:19, 20) Kasi nchito iyi yikatenge yicitikenge wuli usange paŵavyenge ulongozgi panji kukolerana? Kasi munthu wakatenge wapulikirenge wuli ulongozgi uwu wa mu Malemba usange wateŵeterenge Ciuta kwambura ŵanyake?

Cilimika camara, Ŵakaboni ŵa Yehova pa caru cose ŵakagaŵira ŵanthu mabuku, tumabuku, na mabrosha ghakusambizgira Baibolo ghakukwana 91,933,280. Kweniso ŵakagaŵira magazini 697,603,247, ŵakapharazgira ŵanthu ŵanandi comene Mazgu gha Ciuta mu vyaru 235. Uwu mbukaboni ukuru wakuti ŵanthu awo mbakukolerana na kupulikana ŵakucita nchito yikuru kuluska awo ŵakuwayawaya.

Padera pa kugaŵira ŵanthu mabuku, Ŵakaboni ŵa Yehova ŵakusambizga ŵanthu Baibolo kwawanangwa, kuŵawovwira kuti ŵamanye makora ivyo Ciuta wakukhumba. Cilimika camara, tiyowoye kuti sabata yiliyose, ŵakasambiranga Baibolo na ŵanthu ŵakukwana 5,726,509. Masambiro gha Baibolo ghawovwira ŵanandi kuti ŵasankhe makora pa nkhani ya kusopa. Mukucemeka kuti musambire malango gha Ciuta agho ghali mu Baibolo na kujisankhira mwekha.—Ŵaefeso 4:13; Ŵafilipi 1:9; 1 Timote 6:20; 2 Petros 3:18.

Usange mukukhumba kukondweska Ciuta, ipo kukolerana na cisopo nchinthu cakuzirwa—kweni na cisopo bweka yayi. Mukwenera kuyaniska cisopo ico mwasankha na ivyo mwasambira mu Baibolo, kugomezga waka visambizgo vilivyose yayi panji ivyo mukupulika. (Zintharika 16:25) Manyani ivyo cisopo caunenesko cikukhumba. Yaniskani na ivyo mukugomezga. Ndipo sankhani mwakwenelera.—Duteronome 30:19.

[Vithuzithuzi pa peji 7]

Ŵakaboni ŵa Yehova mbakukolerana mu caru cakugaŵikana