“Sendererani kwa Ciuta, Ndipo Iyo Wati Wasenderere kwa Imwe”

Pambere na Panyuma Pake Wakasanga Nkongono Kuti Wasinte

SANDRA, mwanakazi wa ku Mexico, wakati ngwakusolokera mu nyumba yakwawo. Cifukwa ca kutinkika, wakakura makora yayi pa usungwana wake. Iye wakuti: “Nkakura umwali uku nili na maghanoghano ghakuti nili wambura kuzirwa, nakuti nkamanyanga yayi ico nkaŵira wamoyo.”

Apo wakaŵa ku sekondale, Sandra wakayamba kumwa moŵa uwo awiske ŵakaŵanga nawo mu nyumba. Pamanyuma pake wakagulanga mabotolo ghake gha moŵa ndipo wakazgoka muroŵevu. Iye wakuti: “Nkawonanga kuti pakaŵavya cifukwa ca kuŵira wamoyo.” Cifukwa ca kuhangayika, Sandra wakayamba kugwiriskira ncito minkhwara yakutimbanizga wongo. Iye wakuti: “Cekha ico cikanovwiranga kuruwa masuzgo ghane ni vintu ivyo nkayeghanga mu cikwama cane: botolo la moŵa, mapilisi ghakuroŵezga panji chamba.”

Apo Sandra wakamalizganga masambiro ghake gha udokotala, wakaŵa kuti ni muroŵevu wakumara ncito. Wakayezga kujikoma. Kweni wakapona.

Sandra wakapenja covwiro cauzimu ndiposo ca maghanoghano mu visopo vinandi, kweni wakawelapo waka. Cifukwa cakuti wakaŵavya cilindizga cilicose na kusoŵa cakucita, mwakuwerezga-werezga wakacemerezga kwa Ciuta kuti: “Kasi mulinku? Ncifukwa wuli mukureka kunovwira? Maghanoghano ghakuti ngwambura kuzirwa ghakafika paheni comene apo yumoza wa Ŵakaboni ŵa Yehova wakayowoya nayo. Sambiro la Baibolo likayambika. Sandra wakakhwaskika comene wakati wasambira kuti “Yehova wali pafupi na awo mbakupyoka mtima.”—Salmo 34:18.

Musambizgi wake wa Baibolo wakamovwira Sandra kupulikiska kuti Yehova Ciuta wakumanya kuti tikutondeka kucita makora cifukwa tiri kuhara kwananga na kureka kufikapo pa urunji cifukwa ca Adamu. Wakamanya kuti Ciuta wakupulikiska kuti tingakwaniska yayi kurondezga urunji makoraghene. (Salmo 51:5; Ŵaroma 3:23; 5:12, 18) Wakakondwa kumanya kuti maso gha Yehova ghakuŵa pa ivyo tikubuda yayi, ndiposo wakulindizga kuti ticitenge vinandi vyakujumpa nkongono zithu yayi. Wamasalmo wakalemba kuti: “Usange imwe, A Yehova, muŵanikenge maubendezi, kasi ndinjani wangima?—Salmo 130:3.

Unenesko wakuzirwa wa mu Baibolo uwo ukazikiska mtima wa Sandra ukaŵa wa sembe ya Yesu Kristu. Kwizira mu sembe, mwalusungu, Yehova wakupereka mwaŵi kuti ŵantu ŵazgoke ŵarunji, nangauli ŵakubuda. (1 Yohane 2:2; 4:9, 10) Enya, tingaŵa na mwaŵi wa “kugowokereka kwa [zakwananga zithu, NW].”—Ŵaefeso 1:7.

Sandra wakatorapo masambiro ghakuzirwa pa ciyerezgero ca mpostole Paulos. Paulos wakawonga comene Ciuta cifukwa ca lusungu lwake pakumugowokera kwananga uko wakacita na kumovwira pakulimbana na mikhaliro yakale. (Ŵaroma 7:15-25; 1 Ŵakorinte 15:9, 10) Paulos wakanyolorera umoyo wake, ‘wakadufyura thupi lake, na kulitorera mu wuzga’ mwakuti warutilire kukhala mwakuyana  na khumbo la Ciuta. (1 Ŵakorinte 9:27) Wakazomerezga yayi kuti makhumbiro ghake ghaheni ghamuzgore muzga.

Sandra wakazingizgika na mikhaliro yiheni, kweni wakarutilira kuyikanizga. Ŵakaromba kwa Yehova na mtima wose kuti wamovwire kuyimazga na kuromba lusungu lwake. (Salmo 55:22; Yakobe 4:8) Cifukwa ca kumanya kuti Yehova wakumutemwa, Sandra wakasinta umoyo wake. Iye wakuti: “Nkusanga cimwemwe cifukwa ca kusambizga ŵanji Baibolo mu uteŵeti wakukhazikika.” Sandra wakaŵa na mwaŵi wa kovwira mukuru wake na munung’una wake kumanya Yehova. Uku ‘wakucita ico nciweme,’ wakujiperekaso kugwiriskira ncito maluso ghake gha udokotala pa maungano gha Ŵakaboni ŵa Yehova.—Ŵagalatiya 6:10.

Wuli pakuyowoya za uroŵevu wa Sandra? Iye wakuyowoya na cigomezgo cose kuti: “Njuŵi yane njituŵa. Nili kurekerathu kumwa, kukhweŵa panji kugwiriskira ncito munkhwara wakutimbanizga wongo. Nkuvikhumba yayi. Nili kusanga ico nkapenjanga.”

[Mazgu Ghakukhozgera pa peji  9]

“Nili kusanga ico nkapenjanga.”

[Bokosi pa peji 9]

Fundo za m’Baibolo Zikovwira

Fundo zakurondezgapo izi za m’Baibolo zawovwira ŵanandi kuti ŵareke maluso ghaukazuzi:

“Tijitozge ku ukazuzi wose wa thupi na wa mzimu, ndipo tifiske utuŵa mu wofi wa Ciuta.” (2 Ŵakorinte 7:1) Ciuta wakutumbika awo ŵajitozga ku ukazuzi, na kukana maluso ghawakawaka.

“Kumopa Yehova ndiko kutinka uheni.” (Zintharika 8:13) Kopa Ciuta kukovwira muntu kureka vizgoŵi viheni, kusazgapo kugwiriskira ncito minkhwara mwambura kwenelera. Padera pa kukondweska Yehova, muntu uyo wasinta wakuvikilirika ku ntenda zakofya.

“[Ŵajilambike ku] ŵeruzgi na ŵa mazaza, ndipo ŵaŵapulikirenge.” (Tito 3:1) Mu vigaŵa vinandi, kusangika na munkhwara wamtundu unyake, panji kuwugwiriskira ncito nkuswa dango. Ŵakristu ŵaunenesko ŵakusangika panji kugwiriskira ncito yayi minkhwara yakukanizgika.