Mafumbo Ghakufumira ku Ŵaŵazgi

Kasi ncakuzomerezgeka kuti muteŵeti Wacikristu wayowoye nkani ya nyifwa usange muntu wacita kujikoma?

Muteŵeti Wacikristu waliyose wakwenera kupanga yekha cakusanka, usange na njuŵi yiweme wangakayowoya nkani pa nyifwa ya muntu uyo wakuwoneka kuti wacita kujikoma. Peneapo wakupanga cakusanka ici, wakwenera kughanaghanira mafumbo agha: Kasi ni mwauli umo Yehova wakuwonera kujikoma? Kasi muntu uyo wacita kujikoma nadi? Kasi wajikoma cifukwa ca kutimbanizgika maghanoghano? Ni mwauli umo ŵantu ŵa mu cikaya ico ŵakuwonera kujikoma?

Nga Mbakristu, tikukhumba kucita vintu mwakuyana na umo Yehova wakuwonera kujikoma. Kwa Yehova, umoyo wa muntu ngwakuzirwa comene ndipo ngwakupatulika. (Genesis 9:5; Salmo 36:9) Kujikoma mwadala ncintu ico Yehova wakucitinka. (Exodus 20:13; 1 Yohane 3:15) Kasi ici cikung’anamura kuti mbuheni kuyowoya nkani ya nyifwa para muntu wacita kujikoma?

Aghanaghanirani ico cikacitikira Sauli Themba la Israyeli. Wakati wamanya kuti waponenge yayi pa nkondo yake yaumaliro na Ŵafilisiti, “wakatora lupanga yeka, na kuwa pa songo lake” cifukwa wakakhumba yayi kuti ŵarwani ŵake ŵamuyuzge. Ŵafilisiti ŵakati ŵasanga citanda cake, ŵakacikhomerera ku ciwumba ca msumba wa Bethshan. Ŵantu ŵa ku Jabesh-gilead ŵakati ŵapulika ivyo Ŵafilisiti ŵakacitira Sauli, ŵakafumyapo citanda pa ciwumba na kuciwotca. Ŵakatora viwangwa vyake na kuvijimira pasi. Ŵakaziŵizga kurya kwa mazuŵa ghankonde na ghaŵiri, uwo ukaŵa mutheto wa citengero pakati pa Ŵaisrayeli. (1 Samuel 31:4, 8-13; Genesis 50:10) Davide, wakuphakazgika wa Yehova, wakati wapulika ivyo ŵantu ŵa ku Jabesh-gilead ŵakacita, wakati: “Mutumbikike na Yehova cifukwa mukarongora lusungu ulu kwa sekuru winu na kumusunga. Sono Yehova warongore lusungu na nenesko kwa imwe.” (2 Samuel 2:5, 6) Baibolo likuyowoyapo yayi kuti ŵantu ŵa ku Jabesh-gilead ŵakalangika cifukwa ca kusunga Themba Sauli. Yerezgerani ici na ico cikacitikira awo ŵakaleka kusungika cifukwa ca uheni wawo. (Yeremiya 25:32, 33) Muteŵeti Wacikristu wakwenera kughanaghanira nkani yakukhwaskana na Sauli iyi kuti wawone usange wangakayowoya nkani ya nyifwa ya muntu uyo wajikoma.

Muteŵeti wa Ciuta wakweneraso kughanaghanira za cilato ca nkani ya nyifwa. Mwakupambana na ŵantu awo ŵakugomezga kuti umoyo ukufwa cara, Ŵakaboni ŵa Yehova ŵakucita mutheto wa nyifwa na maghanoghano ghakuti muntu uyo wafwa waruta ku caru cinyake cara. Nkani ya nyifwa kuti yikudumbika cifukwa ca muntu uyo wafwa cara, m’malo mwake, cilato cikuru cikuŵa kupembuzga ŵabali ŵa uyo wapotera na kurongora ukaboni wakukhwaskana na mukhaliro wa ŵakufwa kwa awo ŵiza pa nyifwa. (Mupharazgi 9:5, 10; 2 Ŵakorinte 1:3-5) Cilato cinyake cakuzirwa ca nkani ya nyifwa nkovwira ŵategherezgi wose kuti ŵaranguruke pa kufupika kwa umoyo. (Mupharazgi 7:2) Kasi vilato ivi vingafiskika para nkani yingayowoyeka pa nyifwa ya muntu uyo wacita kujikoma?

Ŵantu ŵanyake ŵangaghanaghana kuti muntu uyo wakajikomera dala, wakamanya kuti wakunangira Yehova. Kweni kasi pali ukaboni wakuti wakajikoma nadi mwadala? Kasi wakacita waka mwamabuci? Ŵantu ŵanyake awo ŵakukhumba kujikoma ŵakuleka ndipo ŵakujicitira citima cifukwa ca ivyo wakakhumbanga kucita. Para wafwa muntu wangarapa yayi.

Cintu cinyake ico muteŵeti Wacikristu wakwenera kughanaghanira ni kutimbanizgika maghanoghano, ico cikupangiska kuti ŵantu ŵanandi ŵajikome. Mwakuyana na kafukufuku munyake,  ŵantu 90 pa ŵantu 100 ŵaliwose awo ŵakujikoma ŵakuŵa na suzgo ya maghanoghano. Kasi Yehova wazamuŵagowokera ŵantu awo ŵakujikoma cifukwa ca kuŵa mu mukhaliro uwu? Tikumanya yayi kwali muntu uyo wapotera wakacita kwananga kwambura kugowokereka pamaso pa Yehova panji cara. Muteŵeti Wacikristu wakwenera kughanaghanira za mukhaliro na matenda agho muntu uyo wafwa wakaŵa nagho peneapo wakughanaghanira za kuyowoya nkani ya nyifwa ya muntu uyo wajikoma.

Paliso cintu cinyake ico muteŵeti Ŵacikristu wakwenera kughanaghanira: Ni mwauli umo ŵantu ŵa mu cikaya ico ŵakuwonera kujikoma? Ŵarara ndiwo ŵakwenera kughanaghanira comene nkani iyi cifukwa ŵakukhumba kuti mpingo wa Ŵakaboni ŵa Yehova wa kumalo uko uŵe na lumbiri luweme. Mwakukolerana na umo ŵantu ŵa kumalo uko ŵakuwonera kujikoma, ndiposo mwakukolerana na cifukwa ico muntu wakajikomera, ŵarara ŵangakana kuyowoya nkani ya nyifwa panji kukana kuti yikayowoyekere mu Nyumba ya Ufumu.

Ndipouli, usange muteŵeti Wacikristu wapempeka kuti wakayowoye nkani ya nyifwa, wangacita ici pa iye yekha, nga ni mwimiliri wa mpingo cara. Usange wazomera kuti wamuyowoya, wakwenera kuwoneseska kuti wakuyowoyapo kalikose yayi kakukhwaskana na ciwuka. Cilindizga cilicose ca ŵantu ŵakufwa cili mu mawoko gha Yehova, ndipo palije uyo wangamanya kuti muntu wazamuwuka panji cara. Muteŵeti Wacikristu wakwenera kurongosora vyekha ivyo Baibolo likuyowoya vyakukhwaskana na nyifwa na kupereka cipembuzgo kwa ŵabali ŵa uyo wafwa.