Tikaŵa Mpumpi—Sono Ndise Mberere!

Panyengo iyo Sakina na ine tikaŵa ŵasungwana ŵacoko, tikaŵa ŵazengezgani. Sakina wakaŵa wakututuŵa, kweni ine nkaŵa wakughanda. Kanandi tikatemwanga kwambana, kweni zuŵa limoza tikayambana kujumpa mazuŵa ghose. Kufuma pa zuŵa ilo kuya muntazi, tikaleka kuyowoyeskana na kutauzgana. Paumaliro pake, tose tikawukamo mu cikaya ici, ndipo tikamanyanga yayi uko waliyose wakanjilira.

Mu 1994, nkamba kusambira Baibolo na Ŵakaboni ŵa Yehova, ndipo pacoko-na-pacoko mikhaliro yane yikamba kusinta. Pakati pajumpa virimika vinayi, apo nkaŵa pa ungano wa dera ku Bujumbura, ku Burundi, mwamabuci nkakumana na Sakina. Nkakondwa cifukwa wakafika pa ungano uwu, kweni tikatauzgana mwawofi-wofi. Pamanyuma pake mu zuŵa leneliro, nkagomezga yayi apo nkawona Sakina wali mu gulu la ŵantu awo ŵakunozgekera kuya ku ubapatizo! Nkaro yake yikasinta comene. Iye wakaŵaso muntu wa mbembe nga ni kale cara. Mwee, nako kukaŵa kwakukondweska kuwona kuti wakarongora pakweru kujipereka kwake kwa Ciuta mwa kubapatizika!

Apo wakati wazuwuka mu maji, nkacimbira na kumuvumbatira ndipo nkamuphwepwerezga kuti: “Kasi ukukumbuka umo tikatimbirananga?” “Enya,” wakazgora mwanteura, “Nkukumbuka, kweni vira ni vyakale. Ndine muntu mupya mazuŵa ghano.”

Tose ndise ŵakukondwa kuti tasanga unenesko uwo watipangiska kuŵa ŵakukolerana ndipo wasinta mikhaliro yithu ya nga ni mpumpi ndipo taŵa nga ni mberere za Muliska Mukuru, Yehova Ciuta. Nadi, unenesko wa mu Baibolo ukusinta umoyo.