1. Kasi ni nkhani wuli yakuzirwa iyo Yesu wakadumbiskana na ŵasambiri ŵake pa usiku waumaliro?

PA USIKU waumaliro na ŵasambiri ŵake, Yesu wakazunura chitemwa maulendo pafupifupi 30. Iyo wakaphalira ŵasambiri ŵake kuti “mutemwanenge.” (Yoh. 15:12, 17) Wakati chitemwa ndicho chizamuŵa chimanyikwiro chakuti mbasambiri ŵake. (Yoh. 13:34, 35) Chitemwa ichi ntchapamulomo waka yayi. Yesu wakayowoyanga za chitemwa chakujipata. Iyo wakati: “Palije uyo wali na chitemwa chikuru kuluska ichi, chakuti munthu wapeleke umoyo wake chifukwa cha ŵabwezi ŵake. Imwe muli ŵabwezi ŵane usange mukuchita ivyo nkhumuphalirani.”—Yoh. 15:13, 14.

2. (a) Kasi pakati pa ŵanthu ŵa Yehova tikusangapo vichi? (b) Kasi tizgorenge mafumbo wuli mu nkhani iyi?

² Ŵateŵeti ŵa Yehova mazuŵa ghano ŵakumanyikwa chifukwa chakuti ŵakulongorana chitemwa chakujipata, kweniso ŵakukolerana chomene. (1 Yoh. 3:10, 11) Tili ŵakukondwa chomene kuti chitemwa icho Khristu wakaŵa nacho chiliso pakati pa ŵateŵeti ŵa Yehova nangauli ŵakupambana charu icho ŵakufumira, fuko, chiyowoyero, kweniso uko ŵakukulira. Kweni nyengo zinyake tingajifumba kuti: ‘Chifukwa wuli chitemwa ntchakukhumbikwa chomene  mazuŵa ghano? Kasi Yehova na Yesu ŵakutizenga wuli mu chitemwa? Kasi waliyose payekha wangalongora wuli chitemwa chakuyana na cha Khristu icho “chikuzenga”?’—1 Kor. 8:1.

3. Kasi ŵanthu ŵakhwaskika wuli na ‘nyengo zakusuzga’ izi?

³ Pakuti umoyo ‘ngwakuzura na masuzgo na vitima,’ ŵanandi mu ‘nyengo zakusuzga’ izi ŵakusuzgika chomene maghanoghano. (Sal. 90:10; 2 Tim. 3:1-5) Ŵanthu ŵanandi ŵakughanaghana vya kujikoma waka. Malipoti ghakulongora kuti ŵanthu ŵakujumpha 800,000 ŵakujikoma chaka chilichose. Ndipo pa masekondi 40 ghali ghose pakufwa munthu yumoza. Chachitima ntchakuti, na Ŵakhristu ŵanyake wuwo ŵali kuŵapo na maghanoghano agha ndipo ŵali kujikoma.

4. Zunurani ŵanthu ŵa mu Baibolo awo ŵakakhumbanga kujikoma.

⁴ Mu nyengo yakale, ŵateŵeti ŵanyake ŵakugomezgeka ŵa Chiuta ŵakasuzgika chomene maghanoghano chifukwa cha masuzgo agho ŵakakumana nagho, ndipo ŵakakhumbanga kuti ŵafwe waka. Mwachiyelezgero, chifukwa cha vyakuŵinya, Yobu wakayowoya kuti: “Nkhutinkha umoyo wane, nkhukhumba yayi kukhalilira wamoyo.” (Yobu 7:16; 14:13) Yona nayo wakakhuŵara chomene vinthu vikati vyasintha pa uteŵeti wake, ndipo wakati: “Sono nkhumuŵeyani, A Yehova, wuskanimo umoyo wane mwa ine, pakuti ntchiwemi nifwe kuluska kuŵa wamoyo.” (Yona 4:3) Kweniso, pa nyengo yinyake ntchimi Eliya yikakhwaskika chomene na suzgo lake mwakuti yikapempha kuti yifwe waka. Yikati: “Mbwenu! A Yehova, uwuskanimo sono umoyo wane.” (1 Mathe. 19:4) Nangauli ŵanthu aŵa ŵakajipulikapo nthena, kweni Yehova wakaŵazirwiskanga ŵateŵeti ŵake ŵakugomezgeka aŵa, ndipo wakakhumbanga kuti ŵalutilire kuŵa ŵamoyo. M’malo mwa kuŵaleka waka chifukwa cha umo ŵakajipulikiranga, wakaŵawovwira kuti ŵatonde maghanoghano ghawo gha kukhumba kujikoma, ndipo wakaŵazenga mu chitemwa mwakuti ŵalutilire kumuteŵetera mwakugomezgeka.

5. Chifukwa wuli ŵabali na ŵadumbu ŵakukhumbikwira chitemwa, chomenechomene sono?

⁵ Nanga ni para ŵabali na ŵadumbu ŵalije maghanoghano ghakukhumba kujikoma, kweni ŵanandi mazuŵa ghano ŵakulimbana na masuzgo ghakuru ndipo ŵakukhumbikwira kuzengeka mu chitemwa. Ŵanji ŵakuzizipizga para ŵanthu ŵakuŵasuzga kweniso kuŵaseka. Ŵanyake ŵakuŵanena ku ntchito kweniso kuŵakandilizgira pasi. Ŵanyake ŵakuvuka chifukwa cha kugwira ntchito maora ghanandi panji kuti ŵamalizge pa nyengo iyo ŵaŵaphalira. Kweniso ŵanyake ŵakulimbana na masuzgo gha pa banja agho ghakuŵamara nkhongono, chomenechomene awo ŵali kutorana na munthu wambura kugomezga ndipo wakuŵanyoza. Chifukwa cha masuzgo agha ndiposo ghanyake, ŵanandi mu mpingo ŵakusuzgika maghanoghano. Kasi ninjani uyo wangawovwira ŵanthu aŵa?

6. Kasi Yehova wakuŵazenga wuli ŵateŵeti ŵake mu chitemwa?

⁶ Yehova wakuzenga awo ŵakumusopa ndipo wakuŵasimikizgira kuti wakuŵatemwa. Ŵaisrayeli ŵakugomezgeka ŵakwenera kuti ŵakakhozgeka chomene apo Yehova wakaŵaphalira kuti: “Pakuti waŵa wakuzirwa mu maso ghane, ukachindikika, ndipo ine nakutemwa. . . . Ungawopanga chara, pakuti ine nili nawe.” (Yes. 43:4, 5) Pakuŵa yumoza wa ŵateŵeti wa Yehova, namwe mungasimikizga kuti Yehova wakumutemwani chomene. * Mazgu gha Chiuta ghakulayizga awo ŵakusopa mu unenesko kuti: “Pakuti ngwankhongono, wakuthaskenge.  Wazamuzaya na chimwemwe chikuru chifukwa cha iwe.”—Zef. 3:16, 17.

7. Kasi chitemwa cha Yehova na cha mama uyo wakonkheska mwana chikuyana mu nthowa wuli? (Wonani chithuzi chakwamba.)

⁷ Yehova wakulayizga ŵateŵeti ŵake kuti nanga ŵangakumana na viyezgo wuli, iyo waŵakhozgenge na kuŵapembuzga. Iyo wakuti: “Muwonkhenge na kuyegheka mu mbeyeka, ndipo mulelekerenge pa makongono. Nga ni mama uyo wakupembuzga mwana wake, ndimo ine nimupembuzgiraninge.” (Yes. 66:12, 13) Fundo iyi njakupembuzga chomene. Mama wachitemwa wayegha mwana wake mu mbeyeka panji kuti pa jeka, panji wakumuŵika pa makongono ghake. Nga umo mama wakuchitira, Yehova nayo wakulongora kuti wakuŵatemwa chomene ŵasopi ŵake ŵaunenesko. Kukayika yayi kuti ndimwe ŵakuzirwa chomene kwa Yehova.—Yer. 31:3.

8, 9. Kasi chitemwa cha Yesu chingatikhozga wuli?

⁸ Ŵakhristu ŵaunenesko ŵaliso na chifukwa chinyake chakugomezgera kuti Chiuta wakuŵatemwa. Baibolo likuti: “Wakachitemwa chomene charu, lekani wakapeleka Mwana wake wapadera, kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.” (Yoh. 3:16) Yesu nayo wakalongora chitemwa pakupeleka umoyo wake chifukwa cha ise. Ndipo chitemwa ichi chikutikhozga chomene. Mazgu gha Chiuta ghakutilayizga kuti nanga ni ‘suzgo panji vyakuŵinya, vingatipatura yayi ku chitemwa cha Khristu.’—Rom. 8:35, 38, 39.

⁹ Para takumana na masuzgo agho ghangatimara nkhongono, kutitimbanizga maghanoghano panji kutilopweska mwauzimu, chitemwa cha Khristu icho chikutichichizga chingatipa nkhongono kuti tizizipizge. (Ŵerengani 2 Ŵakorinte 5:14, 15.) Chitemwa cha Yesu chili na nkhongono kutikhozga na kutichiska kuti tileke kuthera, nanga tingakumana na viyezgo nga ni masoka, kutambuzgika, kukhuŵara, panji kwenjerwa.

10, 11. Kasi ninjani wali na udindo wa kuzenga ŵabali awo mbakulopwa? Longosorani.

¹⁰ Nthowa yimoza iyo Yehova wakutizengera mu chitemwa nkhwizira mu mpingo Wachikhristu. Nase tingalongora kuti tikutemwa Yehova para tikuzenga ŵabali na ŵadumbu ŵithu mu chitemwa. Tikuchita ivi para tikuŵawovwira mwauzimu kweniso mu maghanoghano. (1 Yoh. 4:19-21) Mpositole Paulosi wakachiska  Ŵakhristu kuti: “Lutilirani kukhwimiskana na kuzengana, nga umo mukuchitira kale.” (1 Tes. 5:11) Nadi, wose mu mpingo, ŵangayezga Yehova na Yesu pakupembuzga na kuzenga ŵabali na ŵadumbu. Mbalara pera yayi.—Ŵerengani Ŵaroma 15:1, 2.

¹¹ Ŵanyake mu mpingo awo ŵakusuzgika maghanoghano ŵangakhumbikwira wovwiri wapadera ku chipatala. (Luka 5:31) Ŵalara na ŵanyake mu mpingo ŵakukumbuka kuti ŵali kusambizgika vya chipatala yayi. Nangauli vili nthena, kweni ŵangawovwirapo chomene na ‘kupembuzga awo ŵakusuzgika maghanoghano, kukhozga ŵakulopwa, na kulongora kuzikira ku wose.’ (1 Ŵatesalonika 5:14) Ŵakhristu wose ŵakwenera kutemwana chomene, kuzikira, kweniso kuyowoya mwakupembuzga kuti ŵazenge awo mbakulopwa. Kasi namwe mukupembuzga na kukhozga ŵanyinu? Para tamanya umo tingachitira pakovwira ŵanji viwovwirenge chomene.

12. Kasi mpingo ukamuzenga wuli munthu munyake?

¹² Kasi chitemwa chithu chingazenga wuli awo ŵakusuzgika chomene maghanoghano? Mudumbu munyake ku Europe wakati, “Nyengo zinyake nkhuŵa na maghanoghano ghakuti nijikome waka. Kweni nili na wovwiri wakwenelera. Mpingo uwo nilimo ukaponoska umoyo wane. Ŵabali na ŵadumbu nyengo zose ŵakunilongora chitemwa kweniso ŵakunikhozga. Nangauli mbachoko awo ŵakumanya kuti nkhusuzgika maghanoghano, kweni nyengo zose mpingo ukunovwira. Banja linyake lili nga ni ŵapapi ŵane mwauzimu. Likunipwelelera chomene, ndipo likuŵa nane nyengo zose.” Mbunenesko kuti ni wose yayi awo ŵangawovwirapo mwakuyana. Kweni waliyose wangachitapo kanthu kuti wawovwire ŵabali na ŵadumbu awo ŵakusuzgika maghanoghano. *

13. Kasi chikukhumbikwa ntchivichi para tikukhumba kuzenga ŵanji?

¹³ Muŵe mutegherezgi muwemi. (Yak. 1:19) Para tikutegherezga mwalusungu tikulongora kuti tili na chitemwa. Mungafumba mafumbo mwaluso ndiposo mwalusungu kuti mumanye maghanoghano gha munthu uyo wakusuzgika maghanoghano. Para muchitenge nthena mulongorenge kuti mukumulengera lusungu ndipo mumuzengenge muteŵeti munyinu. Chisko chinu chilongore kuti mukumutemwa kufumira pasi pa mtima. Para Mkhristu munyinu wakukhumba kumulongosolerani vinandi, zikirani ndipo jikorani kuti muleke kumudumulizga. Para mumutegherezgenge mwakuzikira, mumanyenge umo wakujipulikira. Ivi vingawovwira kuti mubali panji mudumbu uyo wakusuzgika maghanoghano wamugomezgani chomene ndipo wamutegherezganinge apo mukuyezga kumuzenga. Para mukulongora kuti mukughanaghanira ŵanji kweniso mukuŵatemwa, ŵapembuzgikenge chomene.

14. Chifukwa wuli tikwenera kugega kuyowoya mazgu ghambura kukhozga kwa awo ŵakusuzgika maghanoghano?

¹⁴ Gegani kuyowoya mazgu ghambura kukhozga. Para tikuyowoya mazgu ghambura kukhozga kwa uyo wakusuzgika maghanoghano ndikuti tikumusazgirako waka maghanoghano ghanandi ndipo wangategherezga yayi apo tikumuzenga mu chitemwa. “Kayowoyero kawakawaka kali nga nkhulasa kwa lupanga, kweni lulimi lwa wavinjeru lukuchizga.” (Zinth. 12:18) Mwakawiro, tikukhumbira dala yayi ‘kumulasa’ na mazgu uyo wakusuzgika maghanoghano. Nanga ‘tingamulasira’ dala yayi, kweni vikuŵinya nipera. Kuti tizenge ŵanji mu chitemwa na kuŵakhozga, tikwenera kuŵalongora lusungu, kweniso para ntchamachitiko, tijipulikenge nga umo iwo ŵakujipulikira.—Mat. 7:12.

15. Kasi tingagwiliskira ntchito vichi kuti tizenge ŵanji mu chitemwa?

 ¹⁵ Pembuzgani ŵanji na Mazgu gha Chiuta. (Ŵerengani Ŵaroma 15:4, 5.) Malemba ghatuŵa ngakovwira chomene pa kupembuzga na kusanguluska ŵanji. Baibolo ndakufuma kwa “Chiuta uyo wakutisanguluska na kutipa nkhongono zakuzizipizgira.” Padera pa malemba ghakupembuzga, tiliso na mabuku ghakusambilira Baibolo agho gulu latipa. Tingagwiliskira ntchito Watch Tower Publications Index ndiposo Buku Lakupenjera Nkhani la Ŵakaboni ŵa Yehova. Mabuku agha ghangatovwira kuti tisange fundo za mu Malemba izo zingatovwira kuti tikhozge ŵanthu awo ŵakusangana na masuzgo ghakupambanapambana. Kweniso ghangatovwira kuti tikhozgenge ŵanji mwalusungu ndiposo mwachitemwa.

16. Kasi tikwenera kulongora mikhaliro wuli para tikukhozga Mkhristu uyo wakusuzgika maghanoghano?

¹⁶ Muŵe ŵalusungu ndiposo ŵakuzikira. Ivi ni vyakuzirwa chomene para tikukhumba kulongora chitemwa chambura kujighanaghanira tekha para tikukhozga na kuzenga ŵanji. Yehova ni “Dada wa mtima walusungu na Chiuta wa chisangulusko chose,” ndipo “ngwalusungu” ku ŵateŵeti ŵake. (Ŵerengani 2 Ŵakorinte 1:3-6; Luka 1:78; Rom. 15:13) Paulosi ntchakuwonerapo chiwemi pa nkhani iyi. Wakalemba kuti: “Tikaŵa ŵakuzika pakati pinu, nga umo mama wakonkheska wakuchitira pakupwelelera ŵana ŵake. Ntheura pakumutemwani chomene, tikakhumbisiska kumupani waka makani ghawemi gha Chiuta yayi, kweniso umoyo withu, chifukwa tikamutemwani chomene.” (1 Tes. 2:7, 8) Para tikulongora lusungu nga ni Chiuta, tingawovwira kuti lurombo lwa uyo wakusuzgika maghanoghano luzgoreke.

17. Kasi para tikuwona ŵabali mwakwenelera vingawovwira wuli kuti ŵazengeke mu chitemwa?

¹⁷ Lekani kukhazga kuti ŵabali ŵinu ŵachitenge vinthu mwaurunji pera. Muŵawonenge mwakwenelera ŵabali na ŵadumbu. Para mukukhazga kuti ŵabali ŵachitenge vinthu mwaurunji pera mukhuŵarenge. (Muph. 7:21, 22) Kumbukani kuti Yehova wakuwona vinthu mwakwenelera ndipo wakukhazga vinandi yayi ku ŵateŵeti ŵake. Para tingamuyezga, tiŵenge ŵakunozgeka kusulako waka maubudi gha ŵanji. (Efe. 4:2, 32) M’malo mwa kuŵapa maghanoghano ghakuti ŵakuchita vinandi yayi, tikwenera kuŵawonga pa viwemi ivyo ŵakuchita. Ichi chingaŵakhozga. Para tiŵawongenge kufumira pasi pa mtima, ŵazengekenge mu chitemwa ndipo ŵaŵenge na “chifukwa chakukondwera” apo ŵakuchita uteŵeti wakupatulika. Kuchita nthena nkhwakovwira chomene m’malo mwa kuŵayaniska na ŵanji.—Gal. 6:4.

18. Chifukwa wuli tikukhumba kuzenga ŵanji mu chitemwa?

¹⁸ Muteŵeti waliyose ngwakuzirwa chomene kwa Yehova kweniso kwa Yesu uyo wakapeleka umoyo wake chifukwa cha ise. (Gal. 2:20) Tikuŵatemwa chomene ŵabali na ŵadumbu ŵithu. Ndipo tikukhumba kuŵalongora lusungu na chitemwa. Kuti tikhozgenge ŵanji, “tiyeni tilondezge vinthu vyakovwira kuti paŵe mtende na vinthu vyakuzenga kwa yumoza na munyake.” (Rom. 14:19) Tose tikulindilira nyengo iyo tizamuŵa mu Paradiso. Pa nyengo iyo, pazamuŵavya icho chizamutipangiska kuti tilopwe. Kuzamuŵavya kulwara, nkhondo, nyifwa yakufuma kwa Adamu, kutambuzgika, masuzgo gha mu banja, ndiposo kukhuŵara. Para vyaka 1,000 vyajumpha, ŵanthu wose ŵazamuŵa ŵakufikapo. Awo ŵazamujumpha pa chiyezgo chaumaliro, ŵazamuŵa ŵana ŵa Yehova Chiuta ndipo ŵazamuŵa na “wanangwa wauchindami wa ŵana ŵa Chiuta.” (Rom. 8:21) Tiyeni tose tilutilire kulongora chitemwa icho chikuzenga na kovwirana yumoza na munyake kuti tizakanjire mu charu chiphya.