1. Kasi chilengiwa chikulongora wuli kuti Yehova ngwakupa?

NANGA ni apo Yehova wakaŵa yekha na yekha pambere wandambe kulenga vinthu, wakajighanaghaniranga yekha yayi. Kweni wakapeleka chawanangwa cha umoyo ku vilengiwa vyake, vyauzimu na ŵanthu. Yehova uyo ni “Chiuta wakukondwa,” wakupeleka vinthu viwemi. (1 Tim. 1:11; Yak. 1:17) Pakuti wakukhumba kuti nase tiŵenge ŵakukondwa, wakutisambizga kuti tiŵe ŵakupa.—Rom. 1:20.

2, 3. (a) Chifukwa wuli tikuŵa ŵakukondwa para tikupeleka? (b) Kasi tiwonenge vichi mu nkhani iyi?

² Chiuta wakalenga munthu mu chikozgo chake. (Gen. 1:27) Ichi chikulongora kuti wakatilenga kuti tiŵe na mikhaliro yake. Ntheura kuti tiŵe ŵakukondwa na ŵakukhorwa, tikwenera kumuyezga Yehova pakuŵa ŵakunweka na ŵanji ndiposo ŵakupa. (Fil. 2:3, 4; Yak. 1:5) Chifukwa wuli? Chifukwa ntchakuti ndimo Yehova wali kutilengera taŵanthu. Nangauli tili ŵambura kufikapo, tingaŵa ŵakupeleka nga ni Yehova.

³ Baibolo likutiphalira umo tingaŵira ŵakupa. Tiyeni tiwone ivyo Malemba ghakusambizga pa nkhani iyi. Tiwonenge chifukwa icho  Chiuta wakuŵira wakukondwa para tikupeleka, kweniso umo kupeleka kungatovwilira kuti tifiske mulimo uwo Chiuta watipa. Tiwonengeso chifukwa icho tikuŵira ŵakukondwa para tikupeleka, ndiposo chifukwa icho tikwenera kulutilira kuŵa ŵakupa.

4, 5. Kasi ni vyakuwonerapo wuli ivyo Yehova na Yesu ŵali kulongora pa nkhani ya kupa?

⁴ Yehova wakukhumba kuti ŵanthu ŵake ŵamuyezge. Ntheura wakukondwa para tili ŵakupa. (Efe. 5:1) Para tikuwona umo tili kulengekera ndiposo kutowa kwa chilengiwa, vikulongolerathu kuti Chiuta wakukhumba kuti taŵanthu tiŵenge ŵakukondwa. (Sal. 104:24; 139:13-16) Ntheura tikumuchindika para tikufwilirapo kovwira ŵanji kuŵa ŵakukondwa.

⁵ Ŵakhristu ŵaunenesko ŵakuyezga Khristu. Iyo wakatilekera chakuwonerapo chiwemi cha umo ŵanthu ŵangaŵira ŵakupa. Yesu wakati: “Nga umo Mwana wa munthu wakizira kuzakateŵetereka chara, kweni kuteŵetera na kupeleka umoyo wake kuŵa chiwombolero cha ŵanandi.” (Mat. 20:28) Ntheura, mpositole Paulosi wakachiska Ŵakhristu kuti: “Muŵenge na maghanoghano agha, agho Khristu Yesu nayo wakaŵa nagho . . . Wakajikhutura na kuŵa nga muzga ndipo wakayana na ŵanthu.” (Fil. 2:5, 7) Waliyose wangachita makora kujifumba kuti, ‘Kasi ningayezga Yesu mwakugomezgeka kujumpha umo nkhuchitira kale?’—Ŵerengani 1 Petrosi 2:21.

6. Kasi ni sambiro wuli ilo Yesu wakutisambizga mu ntharika ya Musamariya muwemi? (Wonani chithuzi chakwamba.)

⁶ Yehova wangakondwa nase para tikumuyezga iyo na Khristu, ntheura tikwenera kunweka na ŵanji ndiposo kupenja nthowa za umo tingaŵawovwilira pa ivyo ŵakusoŵerwa. Mu ntharika ya Musamariya muwemi, Yesu wakayowoya mwakupulikikwa makora kuti wakukhazga ŵalondezgi ŵake kuti ŵawovwirenge ŵanyawo, nanga ni awo ŵakupambana nawo fuko panji mtundu. (Ŵerengani Luka 10:29-37.) Kasi mukukumbuka fumbo ilo likapangiska Yesu kuti wayowoye ntharika ya Musamariya muwemi? Muyuda wakafumba kuti: “Kasi mzengezgani wane ni njani?” Zgoro la Yesu likulongora kuti tikwenera kuŵa ŵakupa nga ni Musamariya usange tikukhumba kuti Chiuta wakondwenge nase.

7. Kasi kuŵa wakujighanaghanira wekha panji wambura kujighanaghanira wekha vikukolerana wuli na nkhani iyo yikambika mu munda wa Edeni?

⁷ Ŵakhristu ŵali na vifukwa viwemi vinandi vyakuŵira ŵakupa. Mwachiyelezgero, mukhaliro uwu ukukolerana na nkhani iyo Satana wakambiska mu munda wa Edeni. Kasi ukukolerana wuli? Satana wakati Adamu na Eva, kusazgapo ŵanthu wose, ŵangaŵa ŵakukondwa para ŵangajighanaghanira ŵekha ndiposo kudangizga vyakukhumba vyawo m’malo mwa kupulikira Chiuta. Eva wakachita vinthu mwakujighanaghanira yekha kuti wayane na Chiuta. Adamu wakalongora kuti wakujighanaghanira yekha pakuchita vinthu kuti wakondweske Eva. (Gen. 3:4-6) Kweni ivyo ŵakasankha vikaŵa viwemi yayi. Munthu wangaŵa wakukondwa yayi para ngwakujighanaghanira yekha. Para tili ŵakupa, tikulongora kuti tikugomezga kuti nthowa za Chiuta ni ziwemi chomene.

8. Chifukwa wuli ŵanthu ŵakwamba ŵakeneranga kughanaghanira ŵanji?

⁸ Nangauli ŵanthu ŵakwamba ŵakaŵa kuti ŵachali ŵekha mu munda wa Edeni, Chiuta wakaŵapa ulongozgi uwo mphanyi ukaŵawovwira kughanaghanira ŵanji. Yehova wakatumbika Adamu na Eva ndipo wakaŵachiska kuti ŵababane, ŵazuzge charu, na kuchithereska. (Gen. 1:28) Mlengi wakakhumbanga kuti  ŵanthu ŵaŵe ŵakukondwa. Mphanyi ŵapapi ŵithu ŵakwamba nawo ŵakaghanaghanira ŵana awo ŵababenge kuti ŵazakaŵe ŵakukondwa. Ŵana ŵa Adamu ŵakatenge ŵasanuzgenge charu chose chapasi kuŵa Paradiso. Pakakhumbikwiranga kukolerana kuti mbumba yose ya Adamu yifiske mulimo ukuru uwu.

9. Chifukwa wuli ŵanthu ŵasanuzgenge Paradiso ŵakatenge ŵaŵenge ŵakukondwa?

⁹ Ŵanalume na ŵanakazi ŵakufikapo ŵasanuzgenge Paradiso mphanyi ŵakalongora kuti ŵakukolerana na Yehova kuti wafiske khumbo lake, ntheura ŵakatenge ŵanjirenge mu chipumulo chake. (Heb. 4:11) Ghanaghanirani waka umo mulimo uwu ukatenge uŵirenge wakukhorweska ndiposo wakukondweska. Ŵanthu ŵakwamba ŵaghanaghanirenge ŵanji ŵakatenge ŵatumbikikenge chomene kweniso kuŵa ŵakukhorwa.

10, 11. Kasi tingachita wuli kuti tifiske mulimo wa kupharazga na kuzgora ŵanthu kuŵa ŵasambiri?

¹⁰ Mazuŵa ghano, Yehova waŵapa ŵanthu ŵake mulimo wa kupharazga na kuzgora ŵanthu kuŵa ŵasambiri. Kuti tifiske mulimo uwu, tikwenera kughanaghanira chomene ŵanji. Tingalutilira kuchita mulimo uwu pekha usange tili na maghanoghano ghawemi. Tikwenera kutemwa Chiuta na ŵazengezgani ŵithu.

¹¹ Mu nyengo ya Ŵakhristu ŵakwambilira, Paulosi wakati iyo na Ŵakhristu ŵanyake, ‘mbantchito ŵanyake na Chiuta’ chifukwa cha mulimo wawo wakupanda na kuthilira mbuto zaunenesko za Ufumu. (1 Kor. 3:6, 9) Mazuŵa ghano, nase tingaŵa “ŵantchito ŵanyake na Chiuta” para tikupeleka nyengo yithu, vinthu vithu, na nkhongono zithu pa mulimo wa kupharazga. Uwu ni mwaŵi wapadera chomene.

12, 13. Kasi mungati ni vitumbiko wuli ivyo munthu wakusanga para wakuchita mulimo wa kuzgora ŵanthu kuŵa ŵasambiri?

¹² Para tikupeleka nyengo yithu na nkhongono zithu pa mulimo wa kupharazga na kuzgora ŵanthu kuŵa ŵasambiri tiŵenge ŵachimwemwe. Ŵanandi awo ŵaŵa na mwaŵi wakuchitiska masambiro gha Baibolo agho ghakukura mwauzimu ŵamuphaliraninge vinthu vyakukondweska. Munthu wakuŵa wakukondwa chomene para wakuwona kuti munthu uyo wakusambira Baibolo wakupulikiska unenesko, wakukura mu chipulikano, wakusintha mikhaliro yake, na kwamba kuphalirako ŵanji unenesko. Yesu nayo wakakondwa chomene apo ŵasambiri 70 awo wakaŵatuma kukapharazga “ŵakawerako na chimwemwe” chifukwa cha viwemi ivyo vikachitika.—Luka 10:17-21.

¹³ Ŵapharazgi pa charu chose ŵakukondwa para ŵakuwona uthenga wa ufumu ukovwira ŵanthu kusintha umoyo wawo. Wonani ivyo vikachitikira Anna, mudumbu muwukirano, uyo wakasazgirako uteŵeti wake pakusamira ku chigaŵa cha Eastern Europe uko kukukhumbikwira ŵapharazgi ŵanandi. * Wakalemba kuti: “Kuno mipata njinandi ya kusambizgira ŵanthu  Baibolo, ndipo ichi chikunikondweska chomene. Uteŵeti ukunipa chimwemwe chikuru chomene. Para nafika pa nyumba, nkhuŵavya nyengo ya kujighanaghanira nekha kweni nkhughanaghanira ŵanthu awo nkhusambira nawo. Nkhughanaghanira masuzgo agho ŵakukumana nagho na ivyo ŵakwenjerwa navyo. Nkhupenjerezga nthowa za umo ningaŵakhozgera na kuŵawovwira. Ndipo nakhorwa nadi kuti ‘uyo wakupeleka wakukondwa chomene kuluska uyo wakupokera.’”—Mil. 20:35.

14. Nanga ni para ŵanthu ŵachoko ŵakutegherezga uthenga uwemi, kasi tingachita wuli kuti tikondwenge na uteŵeti withu?

¹⁴ Tiŵenge ŵakukondwa para tilutilirenge kupharazgira ŵanthu uthenga uwemi nanga ni para ŵakukana kutegherezga. Nakuti mulimo withu mazuŵa ghano ukuyana waka na wa ntchimi Ezekiyeli, uyo Yehova wakamuphalira kuti: “Ukayowoye mazgu ghane kwa iwo, kwali ŵamutegherezga panji yayi.” (Ezek. 2:7; Yes. 43:10) Nanga ŵanthu ŵanyake ŵangakana kutegherezga, Yehova wakuwonga ivyo tikuyezgayezga kuchita. (Ŵerengani Ŵahebere 6:10.) Mupharazgi munyake wakalongora chiyelezgero chiwemi chomene pa nkhani iyi. Wakalemba vyakukhwaskana na uteŵeti wake kuti, “Tapanda, tathilira, na kulomba kulindizga kuti Yehova wakuzgenge.”—1 Kor. 3:6.

15. Kasi tikwenera kuŵa ŵakupa para ŵanthu ŵakutiwonga pera? Longosorani.

¹⁵ Yesu wakukhumba tiŵe na mtima wakupa kuti tiŵenge ŵakukondwa. Ŵanthu ŵanandi ŵakutemwa munthu uyo wali na mtima wakupa. Yesu wakachiska kuti: “Mupelekenge, ndipo ŵanthu ŵamupaninge. Ŵazamukhutulira mu thumba la munjilira winu mweso uwemi, wakusindilika, wakusunkhunyika, na wakufuluka. Pakuti mweso uwo mukupimira ŵanyinu, ndiwo ŵazamumupimiranipo.” (Luka 6:38) Mbunenesko kuti ni wose yayi awo ŵakuwonga chifukwa cha mtima withu wa kupa, kweni para ŵanyake ŵamba kuwonga, ŵangawovwiraso ŵanyawo kuti ŵawongenge. Ntheura mupelekenge kwali ŵanthu ŵakuwoneka kuti ŵakuwonga panji yayi. Mukumanya yayi viwemi ivyo vingaŵapo nanga munthu mungamuchitira chinthu chimoza chiwemi.

16. Kasi ntchivichi icho chingatichiska kuti tiŵe na mtima wakupa?

 ¹⁶ Ŵanthu awo ŵakupeleka na mtima wose ŵakukhazga kuti ŵanji ŵaŵawezgerenge chinthu chinyake yayi. Yesu wakaŵa na fundo iyi mu maghanoghano apo wakasambizganga. Iyo wakati: “Kweni para wanozga chiphikiro, chema ŵakavu, ŵakulemara, ŵakupendera, na ŵachibulumutira. Uzamuŵa wakukondwa, chifukwa ŵalije kanthu kakukuwezgerapo.” (Luka 14:13, 14) Munthu munyake uyo wakalembako Baibolo wakati: “Munthu wa mtima wa kupa watumbikikenge.” Munyake wakati: “Ngwakukondwa yose uyo wakughanaghanira munthu wakuyuyuka.” (Zinth. 22:9; Sal. 41:1) Nadi, tikwenera kuŵa ŵakupa chifukwa tikuŵa ŵakukondwa para tikovwira ŵanji.

17. Kasi nkhupeleka wuli uko kungatovwira kuti tiŵe ŵakukondwa?

¹⁷ Apo Paulosi wakakora mazgu gha Yesu ghakuti “uyo wakupeleka wakukondwa chomene kuluska uyo wakupokera,” wakang’anamuranga kuti tipanenge waka vinthu vyakuthupi pera yayi kweni wakang’anamurangaso kuti tikhozgenge ŵanyithu, kuŵapa ulongozgi na kovwira awo ŵakukhumbikwira vinthu ivi. (Mil. 20:31-35) Kwizira mu mazgu na vyakuchita, mpositole uyu wakutisambizga kuti tipelekenge nyengo yithu, nkhongono, chitemwa chithu na kughanaghanira ŵanji.

18. Kasi nkhwantha zinandi zayowoya vichi pa nkhani ya munthu uyo wali na mtima wakupa?

¹⁸ Ŵavyakusandasanda nawo ŵawona kuti para munthu wakupa wakuŵa wakukondwa. Nkhani yinyake yikati, “ŵanthu ŵakukondwa chomene para ŵakuchitira ŵanyawo vinthu viwemi.” Ŵakusanda ŵakuyowoya kuti para tikovwira ŵanji tikuwona kuti umoyo withu ngwachandulo. Lekani kanandi nkhwantha zikuchiska ŵanthu kuti ŵajipelekenge pa milimo yinyake kuti ŵaŵe ŵakukondwa na kuŵa na umoyo uwemi. Ivyo ŵakusanda ŵasanga tikuzizwa navyo yayi, chifukwa Mlengi withu wachitemwa, Yehova, wakutiphalira kuti para munthu wakupeleka wakuŵa wakukondwa.—2 Tim. 3:16, 17.

19, 20. Kasi muli na vifukwa wuli vyakuŵira na mtima wakupeleka?

¹⁹ Chingaŵa chakusuzga chomene kuti tilutilire kuŵa ŵakupa para tikukhala na ŵanthu awo ŵakujighanaghanira waka ŵekha. Kweni Yesu wakati malango ghakuru ghaŵiri ngakuti tikwenera kutemwa Yehova na mtima withu wose, umoyo withu wose, maghanoghano ghithu ghose, na nkhongono zithu zose ndiposo titemwenge mzengezgani withu umo tikujitemwera taŵene. (Mrk. 12:28-31) Nga umo tawonera mu nkhani iyi, awo ŵakutemwa Yehova ŵakumuyezga. Yehova ngwakupa, ndipo Yesu nayo ndimo waliri. Ndipo ŵakutichiska kuti nase ndimo tichitirenge chifukwa para tachita nthena tiŵenge ŵakukondwa chomene. Para tikuyezgayezga kuŵa na mtima wakupeleka kwa Chiuta na ku ŵazengezgani ŵithu, tipelekenge uchindami kwa Yehova kweniso ise na ŵanyithu tisangenge chandulo.

²⁰ Tikukayika yayi kuti mukujipeleka kale pakovwira ŵanji, chomenechomene Ŵakaboni ŵanyinu. (Gal. 6:10) Para mulutilirenge kuchita nthena, ŵanthu ŵamutemwaninge na kumuwongani, ndipo muŵenge ŵakukondwa. Lemba la Zintharika 11:25 likuti: “Uyo wakupa mwawanangwa vimwenderenge makora, ndipo uyo wakusamphuska ŵanji, nayo wasamphuskikenge.” Para tikuŵa na mtima wambura kujighanaghanira tekha, walusungu, ndiposo wakupa, tikusanga vyandulo vinandi. Mtima uwu tingawulongora mu nthowa zinandi kweniso pa vyakuchitika vinandi pa umoyo withu Wachikhristu ndiposo mu uteŵeti withu. Ivi ndivyo tisambirenge mu nkhani yakulondezgapo.