Chifukwa wuli taŵanthu tikukhumba kukhala kwamuyirayira? Baibolo likutiphalira kuti Chiuta wali kuŵika khumbo ili mu mtima withu. (Mupharazgi 3:11) Baibolo likutiphaliraso kuti “Chiuta ntchitemwa.” (1 Yohane 4:8) Kasi ntchakupulikikwa kuti Chiuta uyo ngwachitemwa waŵike khumbo mwa ise lakuti tikhalenge kwamuyirayira na kutondeka kulifiska? Yayi.

Palije munthu uyo wangakhumba kufwa. Nakuti Baibolo likuti nyifwa ni “mulwani” withu. (1 Ŵakorinte 15:26) Ku ŵanji nyifwa yikwiza luŵiro, apo ku ŵanyake yayi. Kweni palije uyo wangayigwentha. Ŵanthu ŵanandi ŵakopa para ŵakughanaghana kuti nawo ŵafwenge. Kasi mulwani uyu wangazakafumiskikapo nadi?

Kasi mungazizwa para mungapulika kuti ni khumbo la Chiuta yayi kuti taŵanthu tifwenge? Buku la Genizesi lili na ukaboni wakuti Chiuta wakakhumbanga kuti taŵanthu tikhalenge kwamuyirayira pa charu chapasi. Yehova Chiuta wakaŵikapo mtima pakulenga charu chapasi kuti chiŵe chiwemi kukhalapo ŵanthu. Wakalenga munthu wakwamba Adamu, na kumuŵika mu paradiso panji kuti mu munda wa Edeni. Pamanyuma, “Chiuta wakawona kuti vyose ivyo wakapanga vikaŵa viwemi chomene.”—Genizesi 1:26, 31.

Adamu wakalengeka mu chikozgo cha Chiuta, ndipo wakaŵa wakufikapo. (Dotoronome 32:4) Mwanakazi  wa Adamu, Eva, nayo wakaŵa wakufikapo. Yehova wakati kwa iwo: “Babanani, mwandane muzuzge charu chapasi na kuchithereska. Muŵe na mazaza pa somba zamunyanja, pa vyamoyo ivyo vikuduka mudera, na pa vyamoyo vyose ivyo vikwenda pa charu chapasi.”—Genizesi 1:28.

Pakeneranga kutora nyengo kuti Adamu na Eva ŵazuzge charu chapasi kuti chose chiŵe paradiso. Eva mphanyi wakalutilira kubaba ŵana, ŵana ŵake nawo mphanyi ŵakababanga ŵana m’paka charu chose chapasi chizure nga umo Chiuta wakakhumbiranga. (Yesaya 45:18) Kasi ntchakupulikikwa kuti Yehova wapeleke ntchito iyi kwa Adamu na Eva uku iyo wakumanya kuti ŵawonenge waka ŵana ŵawo panji ŵazukuru ŵawo paumaliro na kufwa?

Ghanaghaniraniso ntchito yakulamulira vinyama iyo wakaŵapa. Chiuta wakaphalira Adamu kuti wathye vinyama mazina, ndipo ivi vikeneranga kutora nyengo yitali. (Genizesi 2:19) Kuti Adamu walamulire makora vinyama wakeneranga kuvimanya makora kweniso wakeneranga kumanya umo wangavipwelelelera. Ivi vikeneranga kutora nyengo yitali.

Pakuphalira Adamu na Eva kuti ŵazuzge charu na kulamulira vinyama, Chiuta wakakhumbanga kuti ŵakhalenge kwamuyirayira. Nakuti Adamu wakakhalako kwakanyengo katali.

Baibolo likulongora kuti kale ŵanthu ŵakakhalanga nyengo yitali kuluska mazuŵa ghano. Likuti: “Mazuŵa ghose gha umoyo wa Adamu ghakaŵa vyaka 930.” Ndipo likuyowoyaso za ŵanalume ŵanyake 6 awo ŵakakhala na umoyo vyaka vyakujumpha 900. Ŵanthu aŵa ni Seti, Enoshi, Kenani, Yaredi, Metusela, na Nowa. Wose aŵa ŵakaŵako pambere Chigumula cha mu nyengo ya Nowa chindachitike. Nowa wakaŵa na vyaka 600 apo Chigumula chikachitikanga. (Genizesi 5:5-27; 7:6; 9:29) Chifukwa wuli ŵanthu ŵakakhalanga nyengo yitali nthena?

Ŵanalume wose aŵa ŵakaŵako kufupi na nyengo iyo ŵanthu ŵakaŵa ŵakufikapo. Panji lekani ŵakakhalako umoyo utali. Kweni kasi pali kukolerana wuli pakati pa kuŵa wakufikapo na kukhala umoyo utali? Ndipo kasi nyifwa yizamuthereskeka wuli? Kuti tisange mazgoro gha mafumbo agha, tikwenera kumanya dankha icho chikupangiska kuti taŵanthu tichekulenge na kufwa.