NKHANI YAKUSAMBIRA 37
SUMU 118 “Mutisazgireko Chipulikano”
Kalata Iyo Yingatovwira Kuzizipizga M’paka Paumaliro
“Tikukoleska chigomezgo icho tikaŵa nacho pakwamba m’paka kuumaliro.”—HEB. 3:14.
FUNDO YIKURU
Nkhani iyi yitovwirenge kuwona fundo zakuzirwa izo zili mu kalata yakuluta ku Ŵahebere, izo zingatovwira kuzizipizga mwakugomezgeka m’paka paumaliro wa charu ichi.
1-2. (a) Kasi vinthu vikaŵa wuli mu Yudeya apo mpositole Paulosi wakalemberanga kalata Ŵahebere? (b) Chifukwa wuli kalata iyi yikaŵa ya panyengo yake?
ŴAKHRISTU Ŵachihebere awo ŵakakhalanga mu Yerusalemu na Yudeya ŵakakumana na masuzgo ghakuru chomene pamanyuma pakuti Yesu wafwa. Mpingo Wachikhristu ukati wapangika waka, Ŵakhristu ŵakamba kutambuzgika chomene. (Mil. 8:1) Kufuma apo, pati pajumpha vyaka 20, ŵalondezgi ŵa Khristu ŵakasanganaso na suzgo likuru la vyachuma, ilo panji likambika chifukwa cha njara iyo yikawa mu charu. (Mil. 11:27-30) Ndipouli, cha mu 61 C.E., Ŵakhristu ŵakaŵako pa mtende para tingayaniska na suzgo iyo ŵakaŵa kuti ŵasanganenge nayo munthazi. Panyengo iyi, ŵakapokera kalata kufuma kwa mpositole Paulosi, ndipo kalata iyi yikaŵa nadi ya panyengo yake.
2 Kalata iyi yikaŵa ya panyengo yake chifukwa mtende uwo Ŵakhristu ŵakaŵa nawo panyengo iyi ukaŵa wambura kukhaliska. Paulosi wakaŵapa ulongozgi wakovwira uwo ukaŵa kuti uŵawovwirenge Ŵakhristu aŵa kuzizipizga nthambuzgo iyo ŵakaŵa pafupi kukumana nayo. Uchimi uwo Yesu wakayowoyerathu wakuti Yerusalemu wazamuparanyika ukaŵa pafupi kufiskika. (Luka 21:20) Mbunenesko kuti pakaŵavya uyo wakamanyanga nyengo yenecho ya pharanyiko ili, nanga ni Paulosi nesi Ŵakhristu ŵa mu Yudeya. Ndipouli, Ŵakhristu aŵa ŵakaŵa na mwaŵi wa kugwiliskira ntchito ulongozgi uwu pakunozgekera pharanyiko ili. Ŵakeneranga kukhozga chipulikano chawo kweniso kuŵa na mukhaliro wa kuzizipizga.—Heb. 10:25; 12:1, 2.
3. Chifukwa wuli buku la Ŵahebere ndakukhumbikwa chomene ku Ŵakhristu mazuŵa ghano?
3 Nase tili pafupi kukumana na suzgo yikuru chomene kuluska iyo Ŵakhristu Ŵachihebere ŵakakumana nayo. (Mat. 24:21; Chivu. 16:14, 16) Ipo sono tiyeni tiwone ulongozgi wakovwira uwo Yehova wakapa Ŵakhristu aŵa, uwo nase ungatovwira.
‘MULIMBIKIRE KUTI MUŴE ŴAKUKHWIMA’
4. Kasi Ŵayuda awo ŵakazgoka Ŵakhristu ŵakasangana na masuzgo wuli? (Wonaniso chithuzi.)
4 Ŵakhristu Ŵachiyuda ŵakakumana na suzgo likuru chomene. Panyengo yinyake, Ŵayuda ŵakaŵa ŵanthu ŵakusoleka na Yehova. Ndipo Yerusalemu ukaŵa mpando wa pa charu chapasi wa Ufumu wa Chiuta ndipo tempile ndilo likaŵa chinyina cha kusopa kwaunenesko. Ŵayuda wose ŵakugomezgeka ŵakalondezganga Dango la Mozesi na malango agho ŵalongozgi ŵawo ŵakaŵasambizganga. Ŵakaŵa na malango agho ŵakenderanga pa nkhani ya vyakurya, ukotoli, kweniso umo ŵakwenera kuchitira vinthu na ŵanthu ŵamitundu yinyake. Ndipouli, Yehova wakazomerangaso yayi sembe za Ŵayuda pamanyuma pa nyifwa ya Yesu. Ili likaŵa suzgo likuru chomene ku Ŵakhristu Ŵachiyuda awo ŵakazgoŵera kulondezga Dango la Mozesi. (Heb. 10:1, 4, 10) Nanga Mbakhristu ŵakukhwima mwauzimu, nga mpositole Petrosi, nawo vikaŵasuzganga kuti ŵasinthe. (Mil. 10:9-14; Gal. 2:11-14) Chifukwa chakuti sono ŵakaŵa na vigomezgo viphya, Ŵakhristu aŵa ŵakatambuzgikanga na ŵalongozgi ŵa chisopa cha Chiyuda.
Ŵakhristu ŵakakhumbikwiranga kukoleska unenesko, na kukana visambizgo vyautesi vya chisopa cha Ŵayuda (Wonani ndime 4-5)
5. Kasi Ŵakhristu ŵakeneranga kuŵa maso na vichi?
5 Ŵakhristu Ŵachihebere ŵakasuskikanga na magulu ghaŵiri gha ŵanthu. Chakwamba, pakaŵa ŵalongozgi ŵanyake ŵa chisopa cha Chiyuda awo ŵakaŵawonanga Ŵakhristu aŵa nga kuti mbanthu ŵakugaluka. Kweniso Ŵakhristu ŵanyake ŵakatenge ŵalondezgi ŵa Khristu ŵakwenera kulutilira kuchitako vinthu vyakupambanapambana vya mu Dango la Mozesi. Panji ŵakayowoyanga nthena kuti ŵaleke kutambuzgika. (Gal. 6:12) Kasi ntchivichi chikatenge chovwirenge Ŵakhristu ŵakugomezgeka kulutilira kukoleska unenesko?
6. Kasi Paulosi wakaŵachiska vichi Ŵakhristu ŵanyake? (Ŵahebere 5:14–6:1)
6 Mu kalata yake iyo wakalembera Ŵahebere, Paulosi wakachiska Ŵakhristu ŵanyake kuti ŵasambirenge Mazgu gha Chiuta na kughanaghanirapo chomene. (Ŵazgani Ŵahebere 5:14–6:1.) Pakugwiliskira ntchito Malemba Ghachihebere, Paulosi wakalongosolera ŵabali aŵa chifukwa icho nthowa iyo Ŵakhristu ŵakusopera yiliri yapachanya chomene kuluska iyo Ŵayuda ŵakusopera. a Paulosi wakamanya kuti para Ŵakhristu aŵa ŵangamanya vinandi na kupulikiska makora unenesko, vingaŵawovwira kuti ŵaŵanikenge na kukana visambizgo vyautesi ivyo vingaŵapuluska.
7. Kasi mazuŵa ghano tikusangana na masuzgo wuli?
7 Nga Mbakhristu Ŵachihebere, nase tikusangana na ŵanthu awo ŵakuthandazga nkhani izo zikususkana na fundo zaurunji za Yehova. Kanandi ŵakususka ŵakukolerana navyo yayi vigomezgo vithu pa nkhani ya kugonana, ŵakuti ndise ŵakukhwimiska vinthu. Nakuti kaghanaghaniro ka ŵanthu kakuhenipirahenipira ndipo kakutalikirana chomene na umo Chiuta wakuwonera vinthu. (Zinth. 17:15) Ntheura ntchakuzirwa chomene kumanya kaghanaghaniro kaheni na kukagega. Tikwenera yayi kuzomerezga kuti ŵakususka ŵatigongoweske na kutipangiska kuleka kuteŵetera Yehova.—Heb. 13:9.
8. Kasi tingachita wuli kuti tiŵe Mkhristu wakukhwima mwauzimu?
8 Tingachita makora kulondezga ulongozgi uwo Paulosi wakapeleka ku Ŵakhristu Ŵachihebere, wakuti tilimbikire mwakuti tiŵe ŵakukhwima mwauzimu. Ichi chikung’anamura kuti tikwenera kusambira mwakupwelelera chomene Baibolo mwakuti timumanye makora Yehova kweniso maghanoghano ghake. Tikwenera kuchita ivi nanga mphamanyuma pakuti tajipeleka na kubatizika. Vilije kanthu kuti takhala mu unenesko kwanyengo yitali wuli, tose tikwenera kuŵazga na kusambira Mazgu gha Chiuta nyengo zose. (Sal. 1:2) Kuŵa na ndondomeko yiwemi yakusambira patekha kutovwirenge kukhozga chipulikano chithu; mukhaliro uwo Paulosi wakadidimizga chomene mu kalata yake ya ku Ŵahebere.—Heb. 11:1, 6.
‘MUŴE NA CHIPULIKANO CHAKUSUNGILIRA UMOYO WINU’
9. Chifukwa wuli Ŵakhristu Ŵachihebere ŵakakhumbikwiranga chipulikano chakukhora?
9 Ŵakhristu Ŵachihebere ŵakakhumbikwiranga chipulikano chakukhora kuti ŵapone pa suzgo yikuru iyo yikaŵa kuti yiwenge mu Yudeya. (Heb. 10:37-39) Yesu wakaŵachenjezgerathu ŵalondezgi ŵake kuti para ŵawona Yerusalemu wakuzingilizgika na ŵankhondo, ŵakwenera kuchimbilira ku mapiri. Ulongozgi wake ukalutanga ku Ŵakhristu wose, kwali ŵakakhalanga mu msumba uwu panji mu Yudeya. (Luka 21:20-24) Panyengo iyo, ŵanthu para ŵawukilika na ŵalwani ŵakachimbiliranga mu msumba uwo ukaŵanga na linga nga umo ukaŵira Yerusalemu. Ntheura chikaŵa chambura kupulikikwa kuchimbilira ku mapiri ndipo pakakhumbikwiranga chipulikano chakukhora chomene.
10. Kasi chipulikano chakukhora chingachiska Ŵakhristu kuchitachi? (Ŵahebere 13:17)
10 Ŵakhristu Ŵachihebere ŵakakhumbikwirangaso kuŵagomezga chomene awo Yesu wakaŵagwiliskiranga ntchito pakulongozga mpingo. Awo ŵakalongozganga ŵakwenera kuti ŵakapelekanga ulongozgi wakudunjika kuti wovwire wose mu mpingo kulondezga ulongozgi wa Yesu pa nyengo yakwenelera kweniso munthowa yiwemi. (Ŵazgani Ŵahebere 13:17.) Lizgu la Chigiriki ilo lili kugwiliskirika ntchito pa Ŵahebere 13:17 lakuti ‘kupulikira’ likung’anamura kuti munthu wakuchiskika kupulikira chifukwa chakuti wakumugomezga munthu uyo wakumupa ulongozgi. Ivi vikusazgapo vinandi padera pa kupulikira munthu chifukwa chakuti waka wali na mazaza kupeleka ulongozgi. Ntheura Ŵakhristu Ŵachihebere ŵakakhumbikwiranga kusambira kuŵagomezga awo ŵakalongozganga pambere suzgo yindafike. Usange pa nyengo ya mtende Ŵakhristu ŵakapulikiranga ulongozgi wakufuma ku awo ŵakalongozganga, chikate chiŵaŵirenge chipusu kupulikira pa nyengo ya suzgo.
11. Chifukwa wuli ntchakuzirwa chomene kuti Ŵakhristu ŵaŵe na chipulikano chakukhora?
11 Mazuŵa ghano napo tikukhumbikwira kuŵa na chipulikano nga umo vikaŵira na Ŵakhristu Ŵachihebere. Tikukhala mu nyengo iyo ŵanthu ŵanandi ŵakutigoska kweniso ŵakukana uthenga wa mu Baibolo wakuti umaliro wa charu ichi waneng’enera. (2 Pet. 3:3, 4) Nangauli Baibolo likuvumbura vinthu vinandi pa nkhani ya ivyo vizamuchitika pa nyengo ya suzgo yikuru, kweni pali vinandi ivyo tikumanya yayi. Tikwenera kuŵa na chipulikano chakukhora kuti tigomezge kuti umaliro wa charu ichi wizenge pa nyengo yakwenelera kweniso kuti Yehova wazamutivikilira pa nyengo iyi.—Hab. 2:3.
12. Kasi ntchivichi chizamutovwira kupona pa suzgo yikuru?
12 Tikweneraso kuŵa na chipulikano na kugomezga nthowa iyo Yehova wakugwiliskira ntchito mazuŵa ghano kutilongozga. Iyo wakugwiliskira ntchito “muzga wakugomezgeka na wavinjeru.” (Mat. 24:45) Para suzgo yikuru yazakamba, tingazakapokera ulongozgi wakudunjika uwo ungazakatiponoska, nga umo vikaŵira na Ŵakhristu Ŵachihebere apo ŵasilikari Ŵachiroma ŵakazingilizga msumba. Sono ndiyo nyengo yakuti tisambire kugomezga chomene ulongozgi uwo tikupokera kufuma ku awo ŵakulongozga mu gulu la Yehova. Tileke kukhazga kuti pa suzgo yikuru ndipo tizamupulikira ulongozgi wawo usange pasono vikutisuzga kulondezga.
13. Chifukwa wuli ulongozgi wa pa Ŵahebere 13:5 ukaŵa wakukhumbikwa?
13 Apo ŵakalindiliranga chimanyikwiro chakuti ŵachimbire, Ŵakhristu Ŵachihebere ŵakakhumbikwiranga kuŵa na umoyo wambura kukhumba vinandi, kweniso wambura “kutemwa ndalama.” (Ŵazgani Ŵahebere 13:5.) Ŵanyake mwa iwo ŵakaŵa kuti ŵakumanapo na suzgo la njara kweniso ukavu. (Heb. 10:32-34) Nangauli pakwamba ŵakaŵa ŵakukhumbisiska kuzizipizga masuzgo chifukwa cha makani ghawemi, kweni ŵanyake ŵakwenera kuti ŵakamba kuwona kuti usambazi ndiwo ngwakukhumbikwa chomene kuti ŵaŵe ŵakuvikilirika. Kweni ndalama zikatenge ziŵavikilirenge yayi pa nyengo iyo Yerusalemu wakaparanyikanga. (Yak. 5:3) Nakuti wose awo ŵakatemwanga chomene vinthu vyakuthupi chikwenera kuti chikaŵaŵira chakusuzga chomene kuchimbira na kuleka nyumba na katundu wawo munandi.
14. Kasi chipulikano chakukhora chingakhwaska wuli umo tikusankhira pa nkhani ya vinthu vyakuthupi mazuŵa ghano?
14 Usange tili na chipulikano chakukhora tigomezgenge kuti umaliro wa charu chiheni ichi uli pafupi chomene, ndipo tigegenge kuŵa na mtima wakutemwa chomene vinthu vyakuthupi. Pa nyengo ya suzgo yikuru, ndalama zizamuŵavya ntchito ndipo Baibolo likuti ŵanthu “ŵazamutaya siliva lawo mu misewu,” chifukwa ŵazamumanya kuti “siliva panji golide lawo vizamuŵaponoska yayi mu zuŵa la ukali ukuru wa Yehova.” (Ezek. 7:19) M’malo mwa kuŵika mtima pa kujiwunjikira usambazi, tikwenera kusankha vinthu ivyo vingatovwira kuti tiŵe na umoyo wambura kukhumba vinandi uku tikupwelelera mbumba zithu na kuteŵetera Yehova. Ivi vikusazgapo kugega kunjira mu ngongoli zambura kwenelera panji kumalira nyengo yithu yinandi kupwelelera vinthu vyakuthupi ivyo tili navyo. Tikweneraso kuŵa maso kuti tileke kutemwa chomene vinthu vithu ivyo tili navyo. (Mat. 6:19, 24) Chipulikano chithu chingayezgeka pa nkhani ya vinthu vyakuthupi kweniso vinyake apo tikulindilira umaliro kuti wize.
“MUKUKHUMBIKWIRA KUZIZIPIZGA”
15. Chifukwa wuli Ŵakhristu Ŵachihebere ŵakakhumbikwiranga chomene kuzizipizga?
15 Ŵakhristu Ŵachihebere ŵakakhumbikwiranga kuzizipizga apo vinthu vikahenipirangahenipiranga mu Yudeya. (Heb. 10:36) Nangauli Ŵakhristu ŵanyake Ŵachihebere ŵakasanganapo na nthambuzgo yikuru, kweni ŵanandi ŵakazgoka Ŵakhristu pa nyengo ya mtende. Paulosi wakayowoya kuti nangauli ŵakaŵa kuti ŵazizipizgapo masuzgo ghakuru, kweni ŵakaŵa kuti ŵandasuzgikepo nga ni Yesu, kufika na pa kukomeka wuwo. (Heb. 12:4) Ndipouli, apo Chikhristu chikathandazgikanga, Ŵayuda awo ŵakasuskanga ŵakaŵangaso ŵakali chomene na ŵankhaza. Vyaka vichoko waka kumanyuma, Paulosi apo wakawonekera mu Yerusalemu, kukawuka chivulupi. Ŵayuda ŵakujumpha 40 “ŵakajilapizga, ŵakayowoya kuti ŵaryenge chara nesi kumwa m’paka ŵamukome dankha Paulosi.” (Mil. 22:22; 23:12-14) Nangauli Ŵakhristu aŵa ŵakatinkhikanga kweniso kutambuzgika, kweni ŵakakhumbikwiranga kuwungana pamoza kuti ŵasope, ŵapharazge makani ghawemi, kweniso kulutilira kuŵa na chipulikano chakukhora.
16. Kasi kalata yakuluta ku Ŵahebere yingatovwira wuli kuti tiwonenge mwakwenelera nthambuzgo? (Ŵahebere 12:7)
16 Kasi ntchivichi chikate chiwovwirenge Ŵakhristu Ŵachihebere kuzizipizga apo ŵakasuskikanga? Paulosi wakamanya kuti ŵakakhumbikwiranga kuwona mwakwenelera viyezgo vyawo. Ntheura wakalongosora kuti Chiuta wangazomerezga kuti Ŵakhristu ŵasangane na masuzgo mwakuti waŵasambizge chinthu chinyake. (Ŵazgani Ŵahebere 12:7.) Ŵangasambirapo mikhaliro Yachikhristu na kwengeka. Chikate chiŵenge chipusu ku Ŵakhristu Ŵachihebere aŵa kuzizipizga viyezgo para ŵaghanaghanira viwemi ivyo vikuŵapo para ŵachita nthena.—Heb. 12:11.
17. Kasi Paulosi wakasambira vichi pa nkhani ya kuzizipizga?
17 Paulosi wakachiska Ŵakhristu Ŵachihebere kuti ŵaŵikepo chomene mtima kuzizipizga viyezgo. Nakuti Paulosi wakaŵa wakwenelera kuŵalembera ulongozgi pa nkhani iyi. Pakuti nayo pakwamba wakatambuzganga Ŵakhristu, wakamanyanga makora umo ŵakutambuzgikira. Wakamanyangaso umo munthu wangazizipizgira nthambuzgo. Nakuti wakakumana na masuzgo ghakupambanapambana wati waŵa Mkhristu. (2 Kor. 11:23-25) Ntheura Paulosi wakamanyanga makora ivyo vikukhumbikwa kuti munthu wazizipizge. Wakakumbuska Ŵakhristu aŵa kuti apo ŵakuzizipizga viyezgo, ŵakwenera yayi kujithemba m’malo mwake ŵathembenge Yehova. Ivi ndivyo vikawovwira Paulosi kuti waŵe na chikanga mwakuti wakayowoya kuti: “Yehova ni movwiri wane, nopenge chara.”—Heb. 13:6.
18. Kasi ntchivichi chichitikirenge waliyose wa ise munthazi, ndipo tikwenera kuchitachi pasono?
18 Ŵabali ŵithu ŵanyake pasono nthena ŵakutambuzgika. Tingaŵawovwira mwa kuŵalombera kweniso nyengo zinyake tingaŵapa vyakukhumbikwira. (Heb. 10:33) Ndipouli, Baibolo likuyowoya mwakupulikikwa kuti “wose awo ŵakukhumba kusopa Chiuta mwakujipeleka mwakulondezga Khristu Yesu, nawo ŵatambuzgikenge.” (2 Tim. 3:12) Pa chifukwa ichi tose tikwenera kunozgekelerathu vinthu ivyo vikwiza munthazi. Ntheura tiyeni tilutilire kuthemba chomene Yehova, ndipo tiŵe na chigomezgo chose kuti watovwirenge kuzizipizga chiyezgo chilichose icho tingasangana nacho. Pa nyengo yakwenelera, Yehova wazamupumuzga ŵasopi ŵake wose ŵakugomezgeka.—2 Tes. 1:7, 8.
19. Kasi tingachita wuli kuti tinozgekere suzgo yikuru? (Wonaniso chithuzi.)
19 Tikukayika yayi kuti kalata iyo Paulosi wakalembera Ŵahebere yikawovwira Ŵakhristu ŵakwambilira aŵa kunozgekera suzgo iyo ŵakaŵa kuti ŵakumanenge nayo. Paulosi wakachiska ŵabali ŵake kuti ŵamanye vinandi na kupulikiska makora Malemba. Kuchita nthena kukatenge kuŵawovwirenge kuŵanika na kukana visambizgo ivyo vikate vilopweskenge chipulikano chawo. Wakaŵachiska kuti ŵakhozge chipulikano chawo mwakuti chiŵawovwire kulondezga luŵiro ulongozgi wa Yesu na wa awo ŵakulongozga mu mpingo. Ndipo wakawovwira Ŵakhristu kuzizipizga viyezgo mwa kuwona kuti ni mwaŵi wakuti ŵasambizgike na Adada ŵawo ŵachitemwa. Mphanyi nase talondezga ulongozgi uwu, ndipo para tichitenge nthena tizizipizgenge mwakugomezgeka m’paka paumaliro.—Heb. 3:14.
Ŵakhristu ŵakugomezgeka ŵakatumbikika chifukwa cha kuzizipizga kwawo. Pamanyuma pakuti ŵachimbira mu Yudeya, ŵakalutilira kuwungana pamoza. Kasi tikusambirapo vichi apa? (Wonani ndime 19)
SUMU 126 Muŵe Maso, Tchinthani, Muŵe Ŵankhongono
a Mu chaputara chakwamba pera, Paulosi wakakora Malemba Ghachihebere maulendo 7 kuti walongore kuti nthowa iyo Ŵakhristu ŵakusopera njapachanya chomene kuluska ya Ŵayuda.—Heb. 1:5-13.
