1. Chifukwa wuli Yesu wakachema ŵalovi ŵanayi, ndipo ŵakachita wuli?

MSAMBIRI Petrosi, Andireya, Yakobe na Yohane ŵakachitanga ulovi. Ŵakwenera kuti ŵakazizwa chomene apo Yesu wakati: “Nilondezgani, ndipo nimuzgoraninge ŵalovi ŵa ŵanthu.” * Kasi ŵakachita wuli? Baibolo likuti: “Nyengo yeneyiyo, ŵakasida mikwawu yawo na kumulondezga.” (Mat. 4:18-22) Umoyo wawo wose ukasintha chifukwa cha ivyo ŵakasankha apa. M’malo mwakuti ŵakolenge somba zeneko, ‘ŵakakoranga ŵanthu.’ (Luka 5:10) Mazuŵa ghano napo, Yesu wakuchema ŵanthu ŵa mitima yiwemi awo ŵakutemwa unenesko. (Mat. 28:19, 20) Kasi mwazomera ntchemo ya Yesu yakuti muŵe ŵalovi ŵa ŵanthu?

2. Chifukwa wuli tikwenera kughanaghanirapo dankha pambere tindaŵe ŵalovi ŵa ŵanthu, ndipo chingatovwira ntchivichi?

² Panyake pajumpha nyengo kufuma apo mukambira kusambira Baibolo ndipo mwasintha vinyake pa umoyo winu. Para vili nthena, mukwenera kusankha usange muŵenge mupharazgi wa makani ghawemi. Kweni para mukukayika, kugongowa yayi. Nyengo zinyake mukukayika chifukwa chakuti mukumanya kuzirwa kwa ivyo musankhenge. Mbunenesko kuti Baibolo likuti Petrosi na ŵanyake ŵakaleka mikwawu yawo nyengo “yeneyiyo,” kweni ŵakaghanaghanirapo dankha pambere ŵandachite ivi. Pakaŵa kuti pajumpha myezi 6 kufuma apo ŵakamanyira kuti Yesu ni Mesiya. (Yoh. 1:35-42) Mwakuyana waka, panji namwe  mwasambira vinandi vyakukhwaskana na Yehova na Yesu ndipo mukukhumba kulutilira kukura mwauzimu. Kweni pambere mundasankhe kuŵa mupharazgi, mukwenera kughanaghanirapo dankha makora. Kasi ntchivichi chikawovwira Petrosi, Andireya, na ŵanyake kuti ŵasankhe makora vinthu?

3. Kasi ni mikhaliro wuli iyo yingamovwirani kuti muzomere para Yesu wamuchemani?

³ Ŵasambiri ŵakwambilira ŵa Yesu ŵakaŵa ŵakulimbikira, ŵachikanga, ŵankharo yiwemi, kweniso ŵakayimanyanga makora ntchito yawo. Mikhaliro iyi ndiyo yikaŵawovwira kuti ŵachitenge makora mulimo wa kupharazga makani ghawemi. Mu nkhani iyi, tiwonenge umo tingaŵira na mikhaliro iyi kuti tipharazgenge makora makani ghawemi na kusambizga ŵanji.

4. Chifukwa wuli Petrosi wakakoranga somba?

⁴ Petrosi wakakoranga somba kuti wawovwirenge mbumba yake. Kweni wakachitanga mulimo uwu mwakuchichizgika yayi. Iyo wakatemwanga chomene kukora somba. (Yoh. 21:3, 9-15) Kweniso wakasambira kuti watemwenge kuloŵa ŵanthu. Ndipo na wovwiri wa Yehova, Petrosi wakachitanga makora chomene mulimo uwu.—Mil. 2:14, 41.

5. Kuyana na Luka 5:8-11, chifukwa wuli Petrosi wakawopa ndipo ntchivichi chingatovwira usange nase tikopa?

⁵ Chifukwa chikuru icho tikupharazgira ntchakuti tikumutemwa Yehova. Pakuti tikumutemwa Yehova vikutovwira kuti tileke kopa nanga tingajiwona kuti tingafiska yayi mulimo uwu. Apo Yesu wakachemanga Petrosi kuti waŵe mulovi wa ŵanthu, wakamuphalira kuti: “Leka kopa.” (Ŵazgani Luka 5:8-11.) Petrosi wakawopa yayi kuti panji chinyake chimuchitikirenge para waŵa msambiri. Kweni wakazizwa chomene na unandi wa somba izo Yesu wakaŵawovwira kukora. Wakamanya kuti Yesu wakachita munthondwe, ndipo wakajiwona kuti  ngwambura kwenelera kuteŵetera na Yesu. Nga ni Petrosi, nyengo zinyake namwe mungafipa mtima na vyose ivyo muchitenge para mwaŵa msambiri wa Khristu. Usange vili nthena, khozgani ubwezi winu na Yehova na Yesu kweniso mutemwenge ŵazengezgani ŵinu. Para mwachita nthena, muzomerenge para Yesu wamuchemani kuti muŵe mulovi wa ŵanthu.—Mat. 22:37, 39; Yoh. 14:15.

6. Yowoyani vifukwa vinyake ivyo vikutituma kuti tipharazgenge.

⁶ Wonani vifukwa vinyake ivyo vikutituma kuti tipharazgenge. Tikukhumba kupulikira dango la Yesu lakuti: “Lutaninge mukazgore ŵanthu kuŵa ŵasambiri.” (Mat. 28:19, 20) Chifukwa chinyake icho tikupharazgira ntchakuti ŵanthu ‘mbakufyopoka na kujowoleka,’ ndipo ŵakukhumba chomene kumanya unenesko wakuyowoya vya Ufumu. (Mat. 9:36) Yehova wakukhumba kuti ŵanthu ŵa mitundu yose ŵamanye makora unenesko na kuponoskeka.—1 Tim. 2:4.

7. Kasi lemba la Ŵaroma 10:13-15 likulongora wuli kuti mulimo wa kupharazga ngwakuzirwa?

⁷ Tikhumbenge chomene kupharazga usange tikughanaghanira umo mulimo wa kupharazga ungaponoskera ŵanthu. Ŵalovi ŵakukora somba kuti ŵarye panji kuguliska. Kweni ise ‘tikukora’ ŵanthu kuti tiponoske umoyo wawo.—Ŵazgani Ŵaroma 10:13-15; 1 Tim. 4:16.

8-9. Kasi mulovi wakwenera kumanya vichi, ndipo chifukwa wuli?

⁸ Mu nyengo ya Yesu, Muisrayeli uyo wakaŵa mulovi wakakhumbikwiranga kumanya mitundu ya somba iyo wangakora. (Lev. 11:9-12) Wakakhumbikwirangaso kumanya uko somba zingasangika. Kanandi somba zikusangika ku malo agho zikutemwa kweniso uko kuli chakurya chinandi. Kasi nyengo iyo mulovi wakulutira kukaloŵa somba njakuzirwa? Pa nkhani ya nyengo yiwemi yakukolera somba, wonani ivyo wakayowoya Kaboni wa Yehova uyo wakukhala pa chirwa cha Pacific. Kaboni uyu wakachema mishonale kuti ŵakakolere lumoza somba. Mishonale wakazgora kuti: “Nizenge namachero, nyengo ya 9 koloko mulenji.” Mubali uyu wakaphalira mishonale kuti: “Somba ukuzimanya yayi. Tikuluta kukakora somba panyengo iyo zingasangika, panyengo iyo njiwemi kwa ise yayi.”

⁹ Umu ndimoso ŵakachitiranga ŵasambiri ŵa Yesu. Ŵakalutanga uko ŵanthu ŵangasangika ndiposo panyengo iyo ŵangasangikira. Mwachiyelezgero, ŵasambiri ŵa Yesu ŵakapharazganga mu tempile, mu masunagoge, ku nyumba na nyumba, ndiposo mu misika. (Mil. 5:42; 17:17; 18:4) Nase tikwenera kumanya ivyo ŵanthu ŵakutemwa mu chigaŵa chithu. Tikwenera kuŵa ŵakunozgeka kusintha mwakuti tipharazgenge uko ŵanthu ŵangasangika kweniso pa nyengo iyo ŵangasangikira.—1 Kor. 9:19-23.

10. Kasi gulu la Yehova latipa vichi?

¹⁰ Mulovi wakwenera kuŵa na vyose vyakwenelera pa ulovi, ndipo wakwenera kumanya umo wangavigwiliskira ntchito. Nase tikwenera kuŵa na vyose vyakukhumbikwa kuti tipharazgenge makora. Ndipo tikwenera kumanya umo tingavigwiliskira ntchito. Yesu wakasambizga ŵasambiri ŵake umo ŵangapharazgira makani ghawemi. Wakaŵaphalira ivyo ŵakwenera yayi kunyamura, uko ŵakwenera kukapharazga, na ivyo ŵamuyowoya. (Mat. 10:5-7; Luka 10:1-11) Mazuŵa ghano, gulu la Yehova latipa Ivyo Tikusambizgira Ŵanthu Baibolo ndipo ni vyakovwira chomene mu uteŵeti. * Kweniso gulu likutisambizga umo tingavigwiliskira ntchito. Ivi vikutovwira kuti tiŵe ŵakukwana para tikupharazga kweniso kuti tiŵe ŵaluso pakusambizga.—2 Tim. 2:15.

11. Chifukwa wuli ŵalovi ŵa ŵanthu ŵakwenera kuŵa na chikanga?

¹¹ Ŵalovi ŵakwenera kuŵa ŵachikanga chifukwa mwamabuchi ŵakukumana na mphepo pa nyanja. Kanandi ŵakugwira ntchito usiku, ntheura ŵakwenera kuŵa na chikanga nadi chifukwa ŵakumanyirathu yayi usange kuŵenge mphepo. Ŵalovi ŵa ŵanthu nawo ŵakwenera kuŵa na chikanga. Para tamba kupharazga ndipo ŵanthu ŵamanya kuti ndise Ŵakaboni ŵa Yehova, ŵamumbumba yithu ŵangamba kutisuska, ŵabwezi ŵithu ŵangamba kutiseka na kutinyoza, ndipo ŵanyake ŵangakana kutegherezga uthenga withu. Kweni ivi vikutizizika yayi. Yesu wakayowoya kuti wazamutuma ŵalondezgi ŵake kuti ŵakapharazge nanga nkhu ŵanthu awo ŵakuŵasuska.—Mat. 10:16.

12. Kuyana na Joshuwa 1:7-9, ntchivichi chingatovwira kuti tiŵe na chikanga?

¹² Kasi mungachita wuli kuti muŵe na chikanga? Chakwamba, mukwenera kugomezga kuti Yesu ndiyo wakulongozga mulimo wa kupharazga. (Yoh. 16:33; Chivu. 14:14-16) Chachiŵiri, muŵe na chipulikano kuti Yehova wamupweleleraninge nga umo wali kulayizgira. (Mat. 6:32-34) Para muli na chipulikano chakukhora, muŵengeso na chikanga chomene. Petrosi na ŵanyake ŵakalongora chipulikano chakukhora apo ŵakaleka ulovi mwakuti ŵalondezge Yesu. Namweso mukalongora chikanga apo mukaphalira ŵabwezi ŵinu na ŵamumbumba yinu kuti mwamba kusambira Baibolo na Ŵakaboni  ŵa Yehova ndipo mwamba kuwungana. Ndipo tikukayika yayi kuti mwasintha umoyo winu na nkharo yinu kuti vikolerane na fundo za Yehova izo ni zaurunji. Chipulikano na chikanga ndivyo vyamovwirani kuti mufiske vyose ivi. Apo mukulutilira kuŵa na chikanga, manyani kuti ‘Yehova wali namwe kulikose uko mukuya.’—Ŵazgani Joshuwa 1:7-9.

13. Kasi ni vinthu wuli vinyake ivyo vingamovwirani kuŵa na chikanga, ndipo vingamovwirani wuli?

¹³ Kasi ntchivichi chinyake chingatovwira kuŵa na chikanga? Tikwenera kulomba Yehova kuti watipe chikanga. (Mil. 4:29, 31) Yehova wazgorenge lurombo lwinu ndipo wamutayaninge yayi. Iyo nyengo zose walipo kuti wamovwirani. Mughanaghanirenge umo Yehova wakawovwilira ŵanji kumanyuma. Kweniso mughanaghanirenge umo wamovwilirani kutonda masuzgo agho mukasangana nagho na kumovwirani kuti musinthe umoyo winu. Tikukayika yayi kuti uyo wakambuska ŵanthu ŵake pa Nyanja Yiswesi wangamovwirani kuti muŵe msambiri wa Khristu. (Eks. 14:13) Lutilirani kuŵa na chipulikano mwa Yehova nga icho wamasalimo wakaŵa nacho, ndipo wakati: “Yehova wali kwa ine, niwopenge chara. Kasi munthu wangachitachi kwa ine?”—Sal. 118:6.

14. Kasi mwasambirako vichi ku ivyo vikachitikira Masae na Tomoyo?

¹⁴ Chinyakeso icho chingatovwira kuŵa na chikanga nkhuwona umo Yehova wawovwilira ŵanthu awo mwakawiro mbasoni kuti ŵaŵe na chikanga. Wonani umo wakaŵira mudumbu munyake zina lake Masae. Wakaŵa wasoni ndipo wakawonanga kuti wangafiska yayi kupharazga. Iyo wakawonanga kuti ntchakusuzga chomene kuyowoyeskana na ŵanthu ŵambura kuŵamanya ndipo wangafiska yayi. Ntheura wakawona kuti wambe kutemwa chomene Yehova na ŵazengezgani ŵake. Wakakumbuka kuti ntchito ya kupharazga iyi yikwenera kuchitika mwaluŵiro chomene, ndipo wakalomba Yehova kuti wamupe khumbo lakuti waŵikengepo mtima pa mulimo uwu. Mudumbu uyu wakamazga wofi nakuti wakachita upayiniya wakanyengo. Yehova wangawovwiraso ŵapharazgi ŵaphya kuti ŵaŵe ŵa “chikanga.” Wonani ivyo vikachitikira mudumbu munyake zina lake Tomoyo. Wati wamba kupharazga ku nyumba na nyumba, pa nyumba yakwamba apo wakaluta, mwanakazi munyake wakamukalipira na kumuphalira kuti: “Nkhukhumba yayi kuyowoyeskana na Ŵakaboni ŵa Yehova!” ndipo wakajara chijaro. Kweni Tomoyo wakawopa yayi ndipo wakaphalira uyo ŵakendera lumoza kuti: “Wapulika ivyo munthu uyu wayowoya? Nindayowoye nayo yayi, kweni wamanya kale kuti ndine Kaboni wa Yehova. Apa nakondwa chomene!” Pasono Tomoyo ni mupayiniya wanyengozose.

15. Para ntchakusuzga kupharazga, kasi tingachita wuli nga mbalovi, ndipo chifukwa wuli ntchakuzirwa?

¹⁵ Ŵalovi awo vikuŵayendera makora ŵakuŵikapo mtima kuchita vinthu vyose ivyo vikukhumbikwa. Mwachiyelezgero, ŵakuwuka mulenjilenji, ŵakulutilira kukora somba nanga mphepo yingaŵa kuti yili makora yayi pa nyanja. Nase ndimo tikwenera kuchitira. Nanga tingasangana na masuzgo pa mulimo withu, tikwenera kuzizipizga na kumalizga mulimo withu.—Mat. 10:22.

16. Kasi ntchivichi chingatovwira kufiska kuchita vinthu ivyo vikuwoneka vinonono?

¹⁶ Kanandi tikutemwa kusankha kuchita vinthu ivyo ni vipusu. Kweni nyengo zinyake vinthu vyakuzirwa chomene ni vipusu yayi kuchita. Ntheura tikwenera kuŵa ŵakujikora. Tikwenera kusambira kuchita vinthu ivyo vikuwoneka vinonono kwa ise. Ndipo Yehova watovwirenge na mzimu wake utuŵa.—Gal. 5:22, 23.

17. Kuyana na 1 Ŵakorinte 9:25-27, kasi Paulosi wakati wakeneranga kuchita vichi kuti walutilire kuchita vinthu mwakwenelera?

¹⁷ Mpositole Paulosi wakaŵa wakujikora pakuchita vinthu. Wakazomerezga kuti ‘wakatchayanga’  thupi lake kuti wachite icho ntchakwenelera. (Ŵazgani 1 Ŵakorinte 9:25-27.) Iyo wakachiska ŵanji kuti ŵajikorenge na kuchita vinthu vyose “mwakwenelera ndiposo mu ndondomeko.” (1 Kor. 14:40) Nase tikwenera kujikora mu vinthu vyose kuti tilutilire kuchita vinthu vyose vyauzimu, nga nkhupharazga nyengo zose na kusambizga ŵanthu uthenga uwemi.—Mil. 2:46.

18. Kasi tikwenera kuchita wuli kuti Yehova walutilire kutiwona kuti tikuchita makora uteŵeti withu?

¹⁸ Mulovi wakuti mulimo wake wenda makora para wakoma somba zinandi. Kweni ivi vikupambanako na mulimo wakupharazga. Ise kuti titi mulimo withu wenda makora vikuthemba pa unandi wa ŵanthu awo taŵawovwira kwiza mu gulu la Yehova yayi. (Luka 8:11-15) Chikuru tikulutilira kupharazga makani ghawemi na kusambizga ŵanji, Yehova wakuwona kuti tikuchita makora mulimo withu. Chifukwa wuli? Chifukwa tikulutilira kuchita ivyo Yehova na Mwana wake ŵakukhumba kuti tichitenge.—Mrk. 13:10; Mil. 5:28, 29.

19-20. Kasi ntchifukwa wuli icho tikwenera kupharazgira sono?

¹⁹ Mu vyaru vinyake, ŵakuzomerezga kukoma somba mu myezi yinyake pa chaka. Ku vyaru vyanthena ivi, mulovi wakuyezgayezga kuchita vinthu mwaluŵiro kuti wakome somba zinandi chomenechomene para myezi yakukomera somba yikuluta kuumaliro. Nase pakuŵa ŵalovi ŵa ŵanthu, tili na nyengo yichoko yakupharazgira. Umaliro wa charu ichi ukusendelera chomene. Ndipo takhala na nyengo yichoko yakupharazgira uthenga uwemi wakuponoska umoyo wa ŵanthu. Lekani kuchedwa na kulindizga kuti vinthu vizakaŵe dankha makora pa umoyo winu kuti ndipo muzakambe kuchita ntchito yakuzirwa iyi.—Muph. 11:4.

²⁰ Chitanipo kanthu sono kuti mujikhozge, sambirani vinandi mu Baibolo, kuzgani chikanga chinu, ndipo mujikorenge pakuchita vinthu. Gwirani ntchito lumoza na ŵanthu ŵakujumpha 8 miliyoni awo ŵakupharazga uthenga uwemi pa charu chose ndipo muŵenge na chimwemwe icho Yehova wakupeleka. (Neh. 8:10) Ŵikanipo mtima kupharazga umo mungafiskira ndipo lutilirani kuchita nthena m’paka Yehova wazakayowoye kuti mbwenu. Mu nkhani yakulondezgapo, tizamuwona nthowa zitatu izo zingatovwira kuti tilutilire kuŵikapo mtima kupharazga makani ghawemi gha Ufumu.