1, 2. (a) Chifukwa wuli mazgu gha pa Dotoronome 6:4 ngakumanyikwa chomene? (b) Chifukwa wuli Mozesi wakayowoya mazgu agha?

ŴAYUDA ŵanandi ŵakugwiliskira ntchito mazgu gha pa Dotoronome 6:4 mu lurombo lwawo lakuchemeka kuti Shema, ndipo ŵaghagwiliskira ntchito kwa vyaka vinandi chomene. Ŵakughayowoya zuŵa lililose, mulenji na namise. Para Ŵayuda ŵalomba lurombo ulu, ŵakuwona kuti mbakujipeleka nkhanira kwa Chiuta.

² Mazgu gha pa Dotoronome 6:4 wakayowoya ni Mozesi. Iyo wakayowoya mazgu agha apo wakalayilananga na Ŵaisrayeli mu vidika vya Mowabu mu chaka cha 1473 B.C.E. Pa nyengo iyi, Ŵaisrayeli ŵakaŵa kuti ŵakhala pachoko waka kwambuka mlonga wa Yorodani na kuhara Charu cha Layizgano. (Doto. 6:1) Mozesi, uyo wakaŵa kuti waŵalongozga kwa vyaka 40, wakakhumbanga kuti Ŵaisrayeli ŵaŵe na chikanga kuti ŵamarane na masuzgo agho ŵakaŵa pafupi kukumana nagho. Iwo ŵakeneranga kuthemba Yehova na kuŵa ŵakugomezgeka kwa iyo nga ni Chiuta wawo. Mazgu ghaumaliro gha Mozesi, ghakwenera kuti ghakakhozga chomene Ŵaisrayeli. Wakati wayowoya Malango 10 na ghanyake, Mozesi wakayowoya  mazgu ghankhongono na ghakukhozga agho tikughasanga pa Dotoronome 6:4, 5. (Ŵazgani.)

3. Kasi mu nkhani iyi tidumbiskanenge mafumbo wuli?

³ Apo Mozesi wakayowoyanga mazgu gha pa Dotoronome 6:4, kasi Ŵaisrayeli ŵakamanyanga yayi kuti Yehova Chiuta wawo ni “Yehova yumoza”? Iwo ŵakamanyanga. Nakuti Ŵaisrayeli ŵakugomezgeka ŵakamanyanga na kusopa Chiuta yumoza pera uyo wakaŵaso Chiuta wa Abrahamu, Yisake, na Yakhobe. Ipo chifukwa wuli pera Mozesi wakaŵaphalira kuti Yehova Chiuta wawo ni “Yehova yumoza”? Kasi fundo yakuti Yehova njumoza yikukolerana wuli na fundo yakuti tikwenera kumutemwa na mtima withu wose, umoyo withu wose, na nkhongono zithu zose iyo yikusangika pa vesi 5? Chifukwa wuli mazgu gha pa Dotoronome 6:4, 5 ngakuzirwa kwa ise mazuŵa ghano?

4, 5. (a) Kasi mazgu ghakuti “Yehova yumoza” ghakung’anamurachi? (b) Kasi Yehova wakupambana wuli na ŵachiuta ŵatesi?

⁴ Yehova ni yekha na yekha. Mu Chihebere kweniso mu viyowoyero vinyake, mazgu ghakuti “yumoza” ghakung’anamura vinandi. Ghangang’anamura kuti Yehova ni yekha na yekha, palijeso munyake. Chilato cha Mozesi pakuyowoya mazgu agha chikaŵa chakuti wasuske waka chisambizgo cha utatu yayi. Yehova ni Mlengi wakuchanya na charu chapasi, ndipo ni Fumu ya chilengiwa chose. Padera pa Yehova, palije Chiuta munyake waunenesko. (2 Sam. 7:22). Ntheura apo wakayowoyanga kuti Yehova Chiuta ni “Yehova yumoza,” Mozesi wakakumbuskanga Ŵaisrayeli kuti ŵakwenera kusopa Yehova pera. Iwo ŵakenerangaso kusopa ŵachiuta ŵatesi yayi awo ŵanthu ŵanyake ŵakasopanga. Ŵanthu ŵamitundu yinyake ŵakaŵa na ŵachiuta ŵawo awo ŵakatenge ŵali na mazaza pa chilengiwa na vinthu vinyake.

⁵ Mwachiyelezgero, Ŵaeguputo ŵakasopanga Ra, Neti, Gebi, Hapi na vinyama vinyake vinandi ivyo ŵakatenge ni vyakupatulika. Ra wakaŵa chiuta wa dazi, Neti wakaŵa chiuta mwanakazi wamlengalenga, Gebi wakaŵa chiuta wa charu chapasi, ndipo Hapi wakaŵa chiuta wa mlonga wa Nile. Ŵanandi mwa ŵachiuta aŵa ŵakaparanyika pa nyengo iyo Yehova wakiziska miliri 10 pa ŵanthu ŵa ku Eguputo. Baala wakaŵa chiuta wakutchuka chomene wa Ŵakenani. Ŵakenani ŵakatenge chiuta uyu wakupeleka nkhongono zakubabira, kweniso wakaŵa chiuta wamlengalenga, vula, na chimphepo. Nakuti mu vigaŵa vinandi, ŵanthu ŵakasopanga na kuthemba chiuta Baala. (Maŵa. 25:3) Ntheura nyengo zose Ŵaisrayeli ŵakeneranga kukumbuka kuti “Chiuta waunenesko” ni Yehova pera.—Doto. 4:35, 39.

6, 7. Kasi lizgu lakuti “yumoza” likung’anamuraso vichi, ndipo Yehova wakalongora wuli kuti iyo njumoza?

⁶ Yehova wakusintha yayi ndipo ngwakugomezgeka. Lizgu lakuti “yumoza” likung’anamuraso kukolerana vyakuchita kweniso kuŵa na chilato chimoza. Yehova ngwakugaŵikana yayi, ndiposo ngwakusuzga yayi kumupulikiska. M’malo mwake, nyengo zose iyo ngwakugomezgeka, wakusintha yayi, ndipo wakuneneska. Yehova wakalayizga Abrahamu kuti ŵana ŵake ŵazamuhara Charu cha Layizgano, ndipo wakachitapo kanthu mwankhongono kuti wafiske ivyo wakalayizga. Nangauli pakajumpha vyaka 430, kweni Yehova wakasintha yayi ivyo wakalayizga.—Gen. 12:1, 2, 7; Eks. 12:40, 41.

⁷ Pakati pajumpha vyaka vinandi, Yehova wakaphalira Ŵaisrayeli kuti mbakaboni ŵake. Kweniso wakaŵaphalira kuti: “Ine ndine mweneyura. Nindaŵeko ine, pakaŵavya Chiuta uyo wakapangika, ndipo kufuma pa ine, kulije munyake.” Yehova wakadidimizga fundo yakuti iyo wakusintha chara, ntheura wakayowoyaso kuti: “Nyengo zose ndine mweneyura.”  (Yes. 43:10, 13; 44:6; 48:12) Ŵaisrayeli ŵakaŵa na mwaŵi wakuteŵetera Yehova Chiuta uyo wakusintha yayi kweniso wakugomezgeka. Nase tili na mwaŵi ukuru chomene chifukwa tikuteŵetera Yehova.—Mal. 3:6; Yak. 1:17.

8, 9. (a) Kasi Yehova wakukhumba vichi ku awo ŵakumusopa? (b) Kasi Yesu wakadidimizga wuli mazgu gha Mozesi?

⁸ Mozesi wakakumbuska Ŵaisrayeli kuti Yehova wakusintha yayi ndipo walutilirenge kuŵatemwa na kuŵapwelelera. Ipo nawo ŵakeneranga kumuteŵetera kweniso kumutemwa na mtima wawo wose, umoyo wawo wose, na nkhongono zawo zose. Ŵana nawo ndimo ŵakeneranga kuchitira chifukwa ndivyo ŵapapi ŵawo ŵakaŵasambizganga nyengo zose.—Doto. 6:6-9.

⁹ Yehova wakusintha yayi ndipo wazamufiska khumbo lake. Mazuŵa ghano napo, wakukhumba kuti awo ŵakumusopa ndimo ŵachitirenge. Nase tikwenera kuteŵetera na kutemwa Yehova na umoyo withu wose, maghanoghano ghithu ghose, na nkhongono zithu zose. Nakuti ivi ndivyo Yesu wakaphalira munthu uyo wakamufumba za dango lakwamba. (Ŵazgani Mariko 12:28-31.) Tiyeni tiwone ivyo ise tingachita kulongora kuti tikumanya nadi kuti “Yehova Chiuta withu ni Yehova yumoza.”

10, 11. (a) Kasi tingasopa wuli Yehova pera? (b) Kasi ŵanyamata Ŵachihebere ŵakalongora wuli kuti ŵakajipeleka kwa Yehova?

¹⁰ Para tikuteŵetera Yehova na mtima withu wose, tikulongora kuti iyo ni Chiuta waunenesko pera. Tikwenera yayi kusopaso chiuta munyake padera pa iyo, ndipo tileke kumusopa na mitima yiŵiri. Kuluwa yayi kuti palije chiuta wakuyana na Yehova. Lekani tikwenera kusopa Yehova pera.—Ŵazgani Chivumbuzi 4:11.

¹¹ Mu buku la Daniyeli muli nkhani ya ŵanyamata ŵanayi Ŵachihebere. Ŵanyamata aŵa ni Daniyeli, Hananiya, Mishayeli na Azariya. Iwo ŵakajipeleka na mtima wose kwa Yehova ndipo ŵakaziŵizga kurya vyakurya vyakufipiskika kweniso kusindamira chikozgo chagolide icho Themba Nebukadinezara likimika. Ŵakasankha kusopa Yehova pera na kukana kusopa chinthu chinyake chilichose.—Dan. 1:1–3:30.

12. Kasi tingachita wuli kuti tisope Yehova na mtima wose?

¹² Tingateŵetera Yehova na mtima wose para tikuleka kuzomerezga chilichose kutitimbanizga pakumuteŵetera. Kasi ni vichi ivyo vingatitimbanizga pakuteŵetera Yehova? Mu Malango Khumi agho Yehova wakapeleka kwa Ŵaisrayeli, wakaŵaphalira kuti ŵangasopangaso ŵachiuta ŵanyake chara panji kuti vikozgo padera pa iyo. (Doto. 5:6-10) Mazuŵa ghano, pali mitundu yinandi yakusopa vikozgo ndipo nyengo zinyake munthu wangavisopa kwambura kumanya. Kweni malango gha Yehova pa nkhani yakusopa vikozgo ghandasinthe, iyo wachali “Yehova yumoza.” Tiyeni tiwone ivyo fundo iyi yikung’anamura kwa ise.

13. Kasi ni vichi vingatipatuska kwa Yehova?

¹³ Pa Ŵakolose 3:5 (ŵazgani), tikusangapo ulongozgi wankhongono uwo ungawovwira Ŵakhristu kuti ŵasope Yehova na mtima wose. Tikwenera kumanya kuti udokezi nkhukusopa vikozgo. Ivi vili nthena chifukwa para munthu wakudokera vinthu vinyake nga nkhusambazgika, wangaŵa na mtima wakuti waŵe na vinthu vinandi ivyo vingapangiska kuti waleke kusopa Yehova mwakugomezgeka. Kweniso mikhaliro yose yiheni iyo yazunulika pa vesi ili, yikukolerana na udokezi uko nkhusopa vikozgo. Para munthu wakudokera vinthu ivi, wangaleka kutemwa Yehova. Kasi tizomerezgenge kuti vinthu ivi vitipatuske kwa Yehova na kutondeka kuwona kuti iyo ni “Yehova yumoza”? Yayi, tingayezganga na pachoko!

14. Kasi Yohane wakachenjezga vichi?

 ¹⁴ Mpositole Yohane nayo wakachenjezga za uheni wakutemwa chomene vinthu vya mu charu nga ni “makhumbiro gha thupi, makhumbiro gha maso na kujilongora chifukwa cha ivyo uli navyo.” Iyo wakati uyo wakutemwa ivi “wakutemwa Adada yayi.” (1 Yoh. 2:15, 16) Apa vikulongora kuti nyengo zose tikwenera kusanda mtima withu kuti timanye usange tamba kutemwa vyakusanguluska viheni, mendezgano ghaheni, na masitayero ghaheni ghakavwaliro na kujitozga. Kutemwa vinthu vya charu kungasazgapo kuŵika chomene mtima pa masambiro ghapachanya kuti tisange “vinthu vikuru.” (Yer. 45:4, 5) Pasono, tili pa mulyango nkhanira wa charu chiphya icho Yehova watilayizga. Ipo tingaluwanga yayi mazgu ghankhongono agho Mozesi wakayowoya. Para tikulutilira kupulikiska na kugomezga kuti “Yehova Chiuta withu ni Yehova yumoza,” timuteŵeterenge na mtima withu wose kweniso mwakuyana na umo iyo wakukhumbira.—Heb. 12:28, 29.

15. Chifukwa wuli Paulosi wakakumbuska Ŵakhristu kuti Chiuta wawo njumoza?

¹⁵ Fundo yakuti Yehova njumoza yikung’anamuraso kukolerana pakuchita vinthu na chilato chimoza. Nga mbateŵeti ŵake, nase tikwenera kumusopa mwakukolerana. Mpingo wa Ŵakhristu ŵakwambilira ukaŵa na Ŵayuda, Ŵagiriki, Ŵaroma, na ŵanthu ŵamitundu yinyake. Ŵanthu aŵa pambere ŵandazgoke Ŵakhristu ŵaunenesko, ŵakaŵa mu matchalitchi ghakupambanapambana, kweniso ŵakalondezganga mitheto yakupambana na kuwona vinthu mwakupambana. Ichi chikapangiska kuti chiŵe chakusuzga kuti ŵanyake ŵalondezge ivyo ŵakusambira na kulekerathu nthowa zawo zakale. Lekani Paulosi wakawona kuti ntchiwemi kukumbuska Ŵakhristu wose kuti  Chiuta wawo njumoza pera, Yehova.—Ŵazgani 1 Ŵakorinte 8:5, 6.

16, 17. (a) Kasi ni uchimi wuli uwo ukufiskika mazuŵa ghano, ndipo ukufiskika wuli? (b) Kasi ni vichi ivyo vingatitondeska kukolerana mu mpingo?

¹⁶ Wuli pakuyowoya za mpingo Wachikhristu mazuŵa ghano? Ntchimi Yesaya yikayowoyerathu kuti “mu mazuŵa ghaumaliro,” ŵanthu ŵanandi ŵazamuthilimukira ku chisopa chaunenesko icho chikuyelezgereka na phiri la Yehova. Iwo ŵazamuti: “[Yehova] wamutisambizga nthowa zake, ndipo tamwenda mu mendero ghake.” (Yes. 2:2, 3) Kasi tikukondwa chara kuwona kuti uchimi uwu ukufiskika mazuŵa ghano? Mpingo Wachikhristu uli na ŵanthu ŵamitundu, mafuko, mitheto, kweniso viyowoyero vyakupambanapambana ndipo ŵakulumba Yehova mwakukolerana. Ndipouli, nyengo zinyake mu mpingo mungaŵa tumasuzgo tunyake uto tikwenera kuŵa nato maso.

¹⁷ Mwachiyelezgero, kasi mukuŵawona wuli Ŵakhristu ŵanyinu awo mukupambana mitheto? Mungapambana chiyowoyero, kavwaliro, nkharo, na chakurya icho mukutemwa. Kasi mukuŵagwentha na kuchezga na ŵekha awo mbafuko linu pera? Kasi mukujipulika wuli usange awo ŵasankhika kuti ŵateŵetere nga mbalara pa mpingo panji mu dera linu, mbana ŵachoko kwa imwe panji mbamtundu unyake? Kasi ivi vikumutondeskani kuti mukolerane na Ŵakhristu ŵanyinu?

18, 19. (a) Kasi lemba la Ŵaefeso 4:1-3 lili na ulongozgi wuli? (b) Kasi tingachita wuli kuti mpingo ulutilire kuŵa wakukolerana?

¹⁸ Kasi ntchivichi icho chingatovwira kuti tilutilire kukolerana mu mpingo? Paulosi wakapeleka ulongozgi uwemi chomene ku Ŵakhristu ŵa mpingo wa Efeso. Mpingo uwu ukaŵa mu msumba wa Efeso uwo ukaŵa usambazi chomene kweniso na ŵanthu ŵakupambana mitundu. (Ŵazgani Ŵaefeso 4:1-3.) Chakwamba, Paulosi wakazunura mikhaliro nga kujiyuyura, kuzika, kuzikira, na chitemwa. Mikhaliro iyi yili nga ni mapilara panji kuti mizati iyo yikukhozga nyumba. Ndipouli, nangauli nyumba yingaŵa na mapilara ghakukhora, kweni yikwenera kunozgeka nyengo zose kuti yileke kunangika. Paulosi wakachiska Ŵakhristu ŵa ku Efeso kuti ŵalutilire “kusungilira umoza wa mzimu.”

¹⁹ Waliyose mu mpingo wakwenera kumanya kuti wali na udindo wakusungilira umoza mu mpingo. Kasi tingachita vichi kuti tilutilire kukolerana? Chakwamba, tiŵe ŵakujiyuyura, ŵakuzika, ŵakuzikira, kweniso ŵachitemwa. Pamanyuma, tikwenera kuŵikapo mtima kuti tisungilire “chakukakira cha mtende.” Para nyumba yili na lumwa, tikuyinozga mwaluŵiro kuti yileke kunangikirathu. Mwakuyana waka, nase para tawona suzgo linyake ilo lingatitondeska kukolerana na Ŵakhristu ŵanyithu, tikwenera kulimazga mwaluŵiro. Para ndimo tichitirenge, tilutilirenge kukolerana na Ŵakhristu ŵanyithu.

20. Kasi tingalongora wuli kuti tikumanya kuti “Yehova Chiuta withu ni Yehova yumoza”?

²⁰ Kuluwa yayi kuti “Yehova Chiuta withu ni Yehova yumoza.” Mazgu agha ghakakhozga chomene Ŵaisrayeli kuti ŵamarane na masuzgo agho ŵakakumana nawo apo ŵakanjiranga na kuhara Charu cha Layizgano. Para nase tikukumbuka mazgu agha, ghazamutikhozga chomene pa suzgo yikuru iyo yili pafupi chomene, kweniso ghazamutovwira kulutilira kukolerana nanga ni mu charu chiphya. Ntheura tiyeni tilutilire kujipeleka kwa Yehova na mtima withu wose. Tingalongora kuti tajipeleka nadi para tikumutemwa na kumuteŵetera na umoyo withu wose, kweniso para tikulimbikira kukolerana na Ŵakhristu ŵanyithu. Para talutilira kuchita nthena, tiŵenge na chigomezgo chose kuti mazgu gha Yesu ghazamufiskika nadi. Yesu wakati: “Zaninge, imwe mwatumbikika na Adada, muhare Ufumu uwo ukanozgekera imwe kufuma apo charu chikambira.”—Mat. 25:34.