NKHANI YAKUSAMBIRA 43
SUMU 90 Tikhwimiskane Yumoza na Munyake
Umo Mungachitira Usange Mukukayika
“Musande vinthu vyose.”—1 TES. 5:21.
FUNDO YIKURU
Nkhani iyi yitovwirenge kuti timazge maghanoghano agho ghangatitimbanizga pakuteŵetera Yehova.
1-2. (a) Kasi ŵateŵeti ŵanyake ŵa Yehova ŵangamba kukayikira vichi? (b) Kasi tidumbiskanenge vichi mu nkhani iyi?
MUNTHU waliyose nyengo zinyake wakujikayikira, a kwali wangaŵa mulara panji muchoko. Mwachiyelezgero, ghanaghanirani vya Kaboni wachinyamata uyo wakukayikira usange wakutemweka nadi na Yehova. Ndipo ivi vingapangiska kuti wambeso kukayika usange ntchakwenelera kuti wabatizike. Panji ghanaghanirani vya mubali uyo pa uwukirano wakasankha kudangizga vinthu vya Ufumu m’malo mwa kupenja chomene usambazi wa mu charu ichi. Sono pakuti wali na mbumba ndipo bajeti yasazgikirako, wangamba kujifumba usange wakasankha makora. Panjiso ghanaghanirani za mudumbu muchekuru uyo sono walije nkhongono. Nyengo zinyake wangamba kugongowa chifukwa pasono wangachitaso yayi ivyo wakachitanga pakwamba. Kasi muli kujifumbapo mafumbo nga: ‘Kasi Yehova wakuniwona ine panekha? Kasi kujipata uko nili kuchita pakuteŵetera Yehova kwaŵa na chandulo chilichose? Kasi nichali wakuzirwa kwa Yehova?’
2 Usange mafumbo nga ni agha tingaghaleka waka kwambura kusanga mazgoro ghake, vingatimbanizga chomene kusopa kwithu. Mu nkhani iyi tiwonenge umo kughanaghanirapo fundo za mu Baibolo kungatovwilira usange tikukayika kuti (1) Yehova wakutitemwa, (2) tikasankha makora kumasinda, panji (3) tichali ŵakuzirwa kwa Yehova.
IVYO MUNGACHITA PARA MUKUKAYIKA
3. Kasi tingachita wuli para tikukayikira?
3 Usange tamba kukayika tingachita makora kupenjerezga mu Mazgu gha Chiuta kuti tisange mazgoro gha mafumbo ghithu. Para tichitenge nthena, tikhozgekenge, tikurenge mwauzimu, kweniso tiŵenge ŵakunozgeka ‘kwimilira nganganga mu chipulikano.’—1 Kor. 16:13.
4. Kasi ‘tingasanda wuli vinthu vyose’? (1 Ŵatesalonika 5:21)
4 Ŵazgani 1 Ŵatesalonika 5:21. Wonani kuti Baibolo likutichiska kuti ‘tisandenge vinthu vyose.’ Kasi tingachita wuli nthena? Tingasanda panji kuti kupima usange ivyo tikugomezga ni vyaunenesko para tingaviyaniska na ivyo Baibolo likuyowoya. Mwachiyelezgero, ghanaghanirani vya muwukirano uyo wakukayikira usange ngwakuzirwa nadi mu maso gha Chiuta. Kasi wakwenera kughagomezga waka maghanoghano ghake agha? Yayi, wakwenera ‘kusanda vinthu vyose’ mwa kumanya maghanoghano gha Yehova pa nkhani iyi.
5. Kasi Yehova wangazgora wuli mafumbo ghithu?
5 Para tikuŵazga Mazgu gha Chiuta, vikuŵa nga “tikupulika” Yehova wakuyowoya nase. Kweni kuti timanye maghanoghano ghake pa nkhani yinyake tikukhumbikwira kuŵikapo mtima. Para tikuŵazga Baibolo tikwenera kuŵika mtima pa fundo iyo yikukolerana na umo vinthu viliri kwa ise. Tingapenjerezga nkhani iyo mwa kugwiliskira ntchito vinthu ivyo gulu la Yehova likutipa. (Zinth. 2:3-6) Tikwenera kulomba kuti Yehova watilongozge na kutovwira kumanya maghanoghano ghake pa fumbo ilo tili nalo. Kufuma apo tingapenjerezga fundo za mu Baibolo kweniso fundo zinyake izo zingatovwira pa suzgo lithu. Tingasangaso chandulo para tingasambira nkhani za ŵanthu ŵa mu Baibolo awo ŵakasangana na suzgo lakuyana na lithu.
6. Kasi maungano ghakutovwira wuli para tikukayikira?
6 Yehova wakuyowoyaso nase kwizira pa maungano ghithu. Usange nyengo zose tikuŵapo pa maungano, tingapulika fundo yinyake mu nkhani panji zgoro ilo mubali panji mudumbu wangapeleka, ivyo vingaŵa vyakukolerana chomene na suzgo lithu. (Zinth. 27:17) Sono tiyeni tiwone umo tingachitira usange tikukayikira vinthu vinyake.
PARA MUKUKAYIKA KUTI YEHOVA WAKUMUTEMWANI
7. Kasi ni fumbo wuli ilo ŵanyake ŵangafumba?
7 Kasi muli kujifumbapo kuti, ‘Kasi Yehova wakuniwona nadi ine panekha?’ Usange mukujiwona kuti ndimwe ŵambura kuzirwa, mbwenu mungamba kuwona kuti vingachitika yayi kuti muŵe paubwezi na Mlengi wa chilengiwa chose. Themba Davide panji ndimo nalo likajiwoneranga. Likayowoya kuti ntchakuzizika chomene kuti Yehova wakuwona nanga ni ŵanthu awo mbapasi. Ilo likati: “A Yehova, kasi munthu ni njani kuti mumuŵanike, na mwana wa munthu kuti muŵikeko mahara kwa iyo?” (Sal. 144:3) Kasi zgoro mungalisanga nkhu la fumbo lakuti, ‘Kasi Yehova wakuŵikako mahara ku munthu waliyose payekha?’
8. Kuyana na 1 Samuyeli 16:6, 7, 10-12, kasi Yehova wakuwona vichi mu ŵanthu?
8 Baibolo likutisambizga kuti Yehova wakuŵikako mahara kwa waliyose, nanga ni awo ŵakuwoneka kuti mbapasi. Mwachiyelezgero, Yehova wakatuma Samuyeli kuti walute ku nyumba ya Yese kuti wakaphakazge yumoza wa ŵana ŵake kuŵa themba lamunthazi la Israyeli. Yese wakachema ŵana ŵake ŵanalume 7 pa ŵana ŵake 8 kuti ŵakumane na Samuyeli, kweni wakamusazgapo yayi Davide mwana wake muchoko chomene. b Kweni Yehova wakaŵa kuti wasankha Davide. (Ŵazgani 1 Samuyeli 16:6, 7, 10-12.) Yehova wakawona wunthu wamukati wa Davide, kuti ni mwanalume uyo wakuzirwiska vinthu vyauzimu.
9. Chifukwa wuli mungagomezga kuti Yehova wakumutemwani? (Wonaniso chithuzi.)
9 Ghanaghanirani umo Yehova walongolera kale kuti wakuŵikako mahara kwa imwe pamwekha. Wakumupani ulongozgi uwo nkhanira ukukolerana na suzgo linu. (Sal. 32:8) Kasi mukuwona kuti vingachitika kuti wamupani ulongozgi wanthena uwu uku wakumumanyani makora yayi? (Sal. 139:1) Para mukulondezga ulongozgi wa Yehova na kuwona umo wakumovwilirani, mukhorwenge kuti Yehova wakumutemwani. (1 Mid. 28:9; Mil. 17:26, 27) Yehova wakuwona kuyezgayezga kwinu apo mukumuteŵetera. Wakuwona mikhaliro yinu yiwemi ndipo ngwakunozgeka kuti waŵe mubwezi winu. (Yer. 17:10) Ndipo waŵenge wakukondwa chomene usange muzomerenge kuti muŵe nayo paubwezi.—1 Yoh. 4:19.
“Usange ukumupenja [Yehova], iyo wasangikenge na iwe.”—1 Mid. 28:9 (Wonani ndime 9) c
PARA MUKUKAYIKA KUTI MUKASANKHA MWAMAHARA KUMASINDA
10. Para tikughanaghanirapo ivyo tikasankha kumanyuma, kasi ni mafumbo wuli agho tingajifumba?
10 Para nyengo yajumphapo, ŵanyake ŵangamba kughanaghaniraso usange ŵakasankha vinthu mwamahara. Panji ŵakasankha kuleka ntchito yapachanya panji bizinesi, mwakuti ŵamuteŵetere Yehova mwakukwana. Kweni sono nyengo yajumphapo, ndipo panji pajumpha vyaka vinandi. Ŵangamba kuwona ŵanyawo awo ŵakasankha ntchito zapachanya ndipo pasono ŵakuwoneka ŵakukondwa chifukwa ŵali na ndalama. Ntheura ŵangamba kujifumba kuti: ‘Kasi kujipata uko nkhachita pakuteŵetera Yehova kwaŵa na chandulo chilichose? Panji kasi kuli kupangiska kuti nitaye mwaŵi yinyake?’
11. Kasi uyo wakalemba Salimo 73 wakasuzgikanga na vichi?
11 Usange namwe mukusuzgika na mafumbo ghakuyana waka, ghanaghanirani umo uyo wakalemba Salimo 73 wakajipulikiranga. Wakawona kuti ŵanyake ŵakusangwa na usambazi kweniso umoyo wambura masuzgo. (Sal. 73:3-5, 12) Apo wakawonanga ŵanthu aŵa kweniso umo vinthu vikenderanga makora pa umoyo wawo, wakamba kujipulika kuti wakuphyoka pawaka pakuteŵetera Yehova. ‘Wakakweŵekanga zuŵa lose’ chifukwa cha maghanoghano ghakugongoweska agha. (Sal. 73:13, 14) Kasi wakachita wuli kuti waleke kuŵa na maghanoghano agha?
12. Kuyana na Salimo 73:16-18, kasi ntchivichi chikamovwira wamasalimo kumarana na suzgo lake?
12 Ŵazgani Salimo 73:16-18. Wamasalimo wakaluta ku malo ghakupatulika gha Yehova. Wakati waluta ku malo agha, wakamba kughanaghana makora. Wakamanya kuti nangauli ŵanyake ŵangawoneka nga ŵakukhala umoyo wa wofuwofu, kweni ŵalije chilindizga cha munthazi. Ivi vikamovwira kuti waŵe na mtende wa mu mtima, pakumanya kuti kudangizga vinthu vyauzimu ntchinthu chiwemi chomene icho wakasankha. Ntheura wakaŵikaposo mtima kulutilira kuteŵetera Yehova.—Sal. 73:23-28.
13. Kasi mungachita wuli kuti musange mtende wa mu mtima para mukuwona kuti mukasankha makora yayi kumasinda? (Wonaniso chithuzi.)
13 Namwe mungaŵa na mtende uwu na wovwiri wa Mazgu gha Chiuta. Mwawuli? Mughanaghanirengepo vinthu vyakuzirwa ivyo muli navyo, kusazgapo chuma chinu chakuzirwa icho muli kusunga kuchanya, na kuyaniska na ivyo ŵakusanga awo ŵakupokera njombe ya mu charu ichi pera. Iwo ŵakuthemba waka vinthu ivyo ŵajiwunjikira chifukwa ŵalije chilindizga chilichose cha munthazi. Kweni imwe Yehova wamulayizgani vitumbiko vinandi ivyo mungayaniska na chinthu chilichose yayi cha mu charu ichi. (Sal. 145:16) Kweniso ghanaghanirani ichi: Kasi tikumanya nadi umo vinthu vyate viŵirenge pa umoyo withu tisankhenge mwakupambanako na ivyo tikasankha? Fundo iyo tingasimikizga njakuti: Awo ŵakusankha vinthu chifukwa chakuti ŵakutemwa Chiuta na ŵazengezgani ŵawo, ŵakusoŵa kanthu kalikose yayi ako nkhawemi nadi.
Mughanaghanirenge chomene za vitumbiko ivyo Yehova wamulayizgani (Wonani ndime 13) d
PARA MUKUKAYIKA KUTI NDIMWE ŴAKUZIRWA KWA YEHOVA
14. Chifukwa wuli ŵanyake ŵangamba kujikayikira, ndipo ŵangajifumba fumbo wuli?
14 Ŵateŵeti ŵanyake ŵa Yehova ŵakutondeka kuchita vinandi chifukwa cha uchekuru, ulwari, panji chifukwa chakuti mbakupendera. Ndipo panji ivi vingaŵapangiska kuti ŵambe kukayika usange mbakuzirwa mu maso gha Yehova. Ntheura ŵangajifumba kuti, ‘Kasi nichali wakuzirwa mu maso gha Yehova?’
15. Kasi uyo wakalemba Salimo 71 wakakhorwa kuti vichi?
15 Uyo wakalemba Salimo 71 nayo wakajipulikanga mwakuyana waka. Wakalomba kuti: “Munganisidanga yayi para nkhongono zane zalopwa.” (Sal. 71:9, 18) Nangauli vikaŵa nthena, kweni wamasalimo uyu wakaŵa na chigomezgo chose kuti para wakuteŵetera Chiuta mwakugomezgeka, Yehova wamulongozgenge na kumovwira. Wamasalimo wakamanya kuti Yehova wakukondwa chomene na awo ŵakuchita vyose ivyo ŵangafiska kuti ŵamuteŵetere nangauli ŵakusangana na masuzgo.—Sal. 37:23-25.
16. Kasi ŵachekuru mbakuzirwa kwa Yehova munthowa wuli? (Salimo 92:12-15)
16 Para ndimwe muchekuru, yezgani kuwona vinthu nga umo Yehova wakuwonera. Wangamovwirani kuti mulutilire kumuteŵetera mwakugomezgeka nangauli mukusangana na masuzgo pa umoyo winu. (Ŵazgani Salimo 92:12-15.) M’malo mwa kughanaghanira waka ivyo mukutondeka kuchita, ŵikani mtima pa ivyo mukufiska kuchita. Mwachiyelezgero, mungakhozga ŵanji chifukwa cha kugomezgeka kwinu kweniso chitemwa icho mukulongora. Mungaŵaphalirako ŵanji umo Yehova wamovwilirani vyaka vyose ivi, kweniso vya chigomezgo chinu chakukhora chakukhwaskana na kufiskika kwa malayizgo ghake. Ndipo lekani kukayikira kuti malurombo ghinu ghakufumira pasi pa mtima, ghangawovwira chomene ŵanji. (1 Pet. 3:12) Mulimose umo vinthu vingaŵira pa umoyo withu, waliyose wa ise wali na chakuti wangamupa Yehova kweniso ŵanji.
17. Chifukwa wuli mukwenera kugega kujiyaniska na ŵanji?
17 Usange mukukwenyelera chifukwa chakuti mukutondeka kuchita vinandi pakuteŵetera Yehova, gomezgani kuti Yehova wakuzirwiska chomene vyose ivyo mukufiska kuchita. Nyengo zinyake mungamba kuyaniska ivyo mukuchita na ivyo ŵanyinu ŵakuchita. Kweni mukwenera kugegerathu kuchita nthena! Chifukwa wuli? Chifukwa chakuti Yehova wakumuyaniskani na ŵanyake yayi. (Gal. 6:4) Mwachiyelezgero, Mariya wakamupa Yesu chawanangwa, agho ghakaŵa mafuta ghakudura chomene. (Yoh. 12:3-5) Mwakupambana na mwanakazi uyu, chokoro chikavu chikapeleka tundalama tuŵiri twakuzirwa pachoko pa tempile. (Luka 21:1-4) Kweni Yesu wakaŵayaniska yayi ŵanakazi aŵa, iyo wakawona kuti wose ŵakalongora kuti ŵali na chipulikano pakupeleka vyawanangwa ivi. Adada ŵake a Yehova ŵakuzirwiska chomene chilichose icho mukuchita chifukwa chakuti mukuŵatemwa, nanga mwaŵeneko mungawona kuti ni vichoko.
18. Kasi ntchivichi chingatovwira usange tamba kukayika? (Wonaniso bokosi lakuti “ Mazgu gha Yehova Ghangamovwirani Kuti Muleke Kukayika.”)
18 Tose nyengo zinyake tikukayikanga. Ndipouli, nga umo tawonera, Mazgu gha Chiuta Baibolo, ghangatovwira pa nkhani iyi. Ntheura ŵikanipo mtima kusanga mazgoro gha vinthu ivyo mukukayikira, na kuleka kufipa mtima. Kukayika yayi, Yehova wakumuwonani pamwekha. Wakuzirwiska kujipata kwinu ndipo wamutumbikaninge. Gomezgani kuti Yehova wakuŵatemwa ŵateŵeti ŵake wose ŵakugomezgeka ndipo wakuŵikako mahara kwa iwo.
SUMU 111 Vifukwa Vyakuŵira na Chimwemwe
a MAZGU GHALONGOSOREKA: Mu nkhani iyi, tikudumbiskana vya kukayika uko kungatipangiska kuti tambe kuwona kuti ndise ŵambura kuzirwa kwa Yehova panji kuwona kuti tikasankha makora yayi. Kukayika uku ndiko kukuyowoyeka mu Baibolo yayi, uko kukulongora kuti munthu walije chipulikano mwa Yehova kweniso malayizgo ghake.
b Nangauli Baibolo likutiphalira yayi vyaka vyenecho ivyo Davide wakaŵa navyo apo Yehova wakamusankhanga, kweni wakwenera kuti wakaŵa wachali musepuka.—Wonani Gongwe la Mulinda la Seputembala 1, 2011, peji 29, ndime 2.
