NKHANI YAKUSAMBIRA 44
Sungilirani Chigomezgo Chinu Kuŵa Chakukhora
‘Gomezgani Yehova.’—SAL. 27:14.
SUMU 144 Laŵiskaninge pa Njombe
IVYO VILI MU NKHANI IYI *
1. Kasi Yehova watipa chigomezgo wuli?
YEHOVA watipa chigomezgo chiwemi chomene cha umoyo wamuyirayira. Ŵanyake ŵali na chigomezgo chakukakhala kuchanya kwamuyirayira nga ni vilengiwa vyauzimu ivyo vingafwaso yayi. (1 Kor. 15:50, 53) Ndipouli, taŵanandi tili na chigomezgo chakuzakakhala pa charu chapasi na umoyo uwemi wambura kulwara kweniso wakukondweska. (Chivu. 21:3, 4) Kwali tili na chigomezgo chakuzakakhala kwamuyirayira pa charu chapasi panji kuchanya, kweni tose chigomezgo chithu ntchakuzirwa chomene.
2. Kasi chigomezgo chithu chikujintha pa vichi, ndipo chifukwa wuli tikuyowoya nthena?
2 Mu Baibolo lizgu lakuti “chigomezgo,” lingang’anamura “kulindilira kuti vinthu viwemi vichitikenge.” Chigomezgo chithu cha munthazi ntchanadi chifukwa chikufuma kwa Yehova. (Rom. 15:13) Tikumanya ivyo Yehova watilayizga, kweniso tikumanya kuti nyengo zose wakufiska iyo walayizga. (Maŵa. 23:19) Ndise ŵakukhorwa kuti Yehova wali na khumbo na nkhongono kufiska vyose ivyo wayowoya kuti wachitenge. Ntheura chigomezgo chithu chikujintha pa ivyo tikughanaghanira waka yayi, panji ivyo tikukhumba kuti vichitike, kweni chikujintha pa vinthu vyanadi ivyo vili na maukaboni.
3. Kasi tidumbiskanenge vichi mu nkhani iyi? (Salimo 27:14)
3 Adada ŵithu ŵakuchanya ŵakutitemwa, ndipo ŵakukhumba kuti tiŵagomezgenge. (Ŵazgani Salimo 27:14.) Para chigomezgo chithu mwa Yehova ntchakukhora, tizizipizgenge masuzgo na kuŵa na chikanga kweniso ŵakukondwa nanga tingasangana na masuzgo wuli. Tiyeni tiwone umo chigomezgo chithu chikutivikililira. Chakwamba, tiwonenge umo chigomezgo chiliri nga ni nyanguru kweniso nga ntchisoti. Kufuma apo tidumbiskanenge umo tingakhozgera chigomezgo chithu.
CHIGOMEZGO CHITHU CHILI NGA NI NYANGURU
4. Kasi chigomezgo chithu chili nga ni nyanguru munthowa wuli? (Ŵahebere 6:19)
4 Mu kalata yake ya ku Ŵahebere, mpositole Paulosi wakayaniska chigomezgo chithu na nyanguru. (Ŵazgani Ŵahebere 6:19.) Kanandi Paulosi wakendanga pa nyanja, ntheura wakamanyanga kuti nyanguru wakovwira ngalaŵa kuti yileke kuputaputa panji kubira. Nyengo yinyake apo wakakwera ngalaŵa ŵakasangana na chimphepo chikuru. Panyengo ya chimphepo iyi, wakawona ŵakwendeska ngalaŵa ŵakuponya nyanguru pa maji kuti ngalaŵa yileke kutimba ku malibwe. (Mil. 27:29, 39-41) Nga umo nyanguru wakovwilira ngalaŵa, chigomezgo chithu chikutovwira kuti tileke kupatukako kwa Yehova para tasangana na masuzgo ghakuru. Chigomezgo chithu ichi chikutovwiraso kuti mtima withu uŵe m’malo para tasangana na masuzgo chifukwa tikugomezga kuti vinthu viŵenge makora. Kumbukani kuti Yesu wakachenjezga kuti tizamutambuzgika. (Yoh. 15:20) Ntheura kughanaghanirapo pa ivyo Yehova watilayizga munthazi kukutovwira kuti tilutilire kumuteŵetera.
5. Kasi chigomezgo chikamovwira wuli Yesu nangauli wakamanyanga kuti wafwenge?
5 Ghanaghanirani umo chigomezgo chikawovwilira Yesu kulutilira kugomezgeka, nangauli wakamanyanga kuti wafwenge nyifwa yakuŵinya chomene. Pa zuŵa la Pentekoste mu 33 C.E., mpositole Petrosi wakakora uchimi wa mu buku la Masalimo uwo ukulongosora umo Yesu wakaŵira wakufwasa kweniso kuŵa na chigomezgo. Uchimi uwu ukuti: “Chifukwa munisidenge mu Dindi chara, nesi kuzomerezga kuti wakugomezgeka winu wawone kuvunda. . . . munipenge chimwemwe chikuru pamaso pinu.” (Mil. 2:25-28; Sal. 16:8-11) Nangauli Yesu wakamanyanga kuti wafwenge, kweni wakaŵa na chigomezgo chakukhora kuti Chiuta wamuwuskenge ndipo wazamukondwa kuŵaso na Adada ŵake kuchanya.—Heb. 12:2, 3.
6. Kasi mubali munyake wakayowoya vichi vyakukhwaskana na chigomezgo?
6 Chigomezgo chithu pakuŵa Ŵakhristu chawovwira ŵabali na ŵadumbu ŵanandi kuzizipizga. Wonani chiyelezgero cha Leonard Chinn, mubali wakugomezgeka uyo wakakhalanga ku England. Panyengo ya Nkhondo Yakwamba ya pa Charu Chose, wakakakika chifukwa wakakana kunjira usilikari. Kwa myezi yiŵiri wakaŵikika mu chipinda chayekha cha jele. Kufuma apo, ŵakamugwiliska ntchito yinonono chomene. Pamanyuma wakalemba kuti: “Ivyo vyanichitikira vyanovwira kumanya kuti chigomezgo ntchakukhumbikwa chomene kuti tizizipizge masuzgo. Tili na chiyelezgero cha Yesu, ŵapositole, na ntchimi za Chiuta, kweniso malayizgo gha mu Baibolo. Vyose ivi vikutipa chigomezgo chikuru cha munthazi kweniso kutovwira kuti tizizipizge.” Chigomezgo chikaŵa nga ni nyanguru kwa Leonard, ndipo kwa ise nase chingaŵa nga ni nyanguru.
7. Kasi viyezgo vikukhozga wuli chigomezgo chithu? (Ŵaroma 5:3-5; Yakobe 1:12)
7 Chigomezgo chithu chikukhora chomene pamanyuma pakuti tazizipizga viyezgo, na kuwona umo Yehova watovwilira, na kumanya kuti wakukondwa nase. (Ŵazgani Ŵaroma 5:3-5; Yakobe 1:12.) Ntheura sono chigomezgo chithu ntchakukhora chomene kuluska apo tikazomelera makani ghawemi kakwamba. Satana wakukhumba kuti viyezgo vitiwezgere nyuma, kweni na wovwiri wa Yehova tingatonda chiyezgo chilichose.
CHIGOMEZGO CHITHU CHILI NGA NTCHISOTI
8. Kasi chigomezgo chithu chili nga ntchisoti munthowa wuli? (1 Ŵatesalonika 5:8)
8 Baibolo likuyaniskaso chigomezgo chithu na chisoti. (Ŵazgani 1 Ŵatesalonika 5:8.) Msilikari wakuvwara chisoti kuti wavikilire mutu wake ku vinthu ivyo ŵalwani ŵakuponya kuti ŵapweteke mutu wake. Pa nkhondo yithu yauzimu, tikukhumbikwira kuvikilira maghanoghano ghithu kwa Satana. Wakugwiliskira ntchito vinthu vyakupambanapambana kuti watiyezge na kunanga maghanoghano ghithu. Nga umo chisoti chikuvikililira mutu wa msilikari, chigomezgo chithu nacho chikuvikilira maghanoghano ghithu mwakuti tilutilire kuŵa ŵakugomezgeka.
9. Kasi chikuchitika ntchivichi para ŵanthu ŵalije chigomezgo?
9 Chigomezgo chithu cha umoyo wamuyirayira chikutovwira kuti tichitenge vinthu mwavinjeru kweniso mwaumanyi. Kweni para chigomezgo chithu ntchakulopwa, ndipo tikwamba kughanaghanira vya makhumbiro ghithu, tingaluwa chigomezgo chithu cha umoyo wamuyirayira. Ghanaghanirani za Ŵakhristu ŵanyake awo ŵakakhalanga ku Korinte. Ŵakaleka kuŵa na chipulikano mu layizgo lakuzirwa la Chiuta. Iwo ŵakaleka kugomezga kuti kuli chiwuka. (1 Kor. 15:12) Paulosi wakalemba kuti awo ŵakugomezga yayi kuti kuli chiwuka ŵakukhala waka umoyo kuti ŵakhorweske waka makhumbiro ghawo. (1 Kor. 15:32) Mazuŵa ghano ŵanandi awo ŵakugomezga yayi malayizgo gha Chiuta ŵakuchita chilichose kuti ŵakondweske waka umoyo wawo. Kweni ise tili ŵakupambanako na iwo chifukwa tikugomezga malayizgo agho Chiuta watilayizga. Chigomezgo chithu chili nga ntchisoti icho chikuvikilira maghanoghano ghithu kuti tileke kujighanaghanira waka tekha, ivyo vingapangiska kuti ubwezi withu na Yehova unangike.—1 Kor. 15:33, 34.
10. Kasi chigomezgo chingativikilira wuli ku maghanoghano ghaheni?
10 Chigomezgo chithu chingativikiliraso ku maghanoghano ghakuti tizamumukondweskapo yayi Yehova. Mwachiyelezgero, ŵanyake ŵangati: ‘Ningaŵa yayi yumoza wa awo ŵazamukhala kwamuyirayira. Ndine muwemi yayi. Ningifiska yayi kuchita ivyo Chiuta wakukhumba kuti nichitenge.’ Kumbukani kuti mubwezi mutesi wa Yobu, Elifazi, wakayowoyaso fundo yakuyana waka kwa Yobu. Elifazi wakati: “Kasi munthu ni njani kuti waŵe mutuŵa?” Wakayowoyaso fundo yakukhwaskana na Chiuta yakuti: “Wona! Ŵatuŵa ŵake wakuŵagomezga yayi, ndipo nanga nkhuchanya nkhutuŵa chara mu maso ghake.” (Yobu 15:14, 15) Agha ni mautesi ghamaseŵera yayi. Kumbukani kuti Satana ndiyo wakukhumba kuti mughanaghanenge nthena. Wakumanya kuti usange mukulutilira kughanaghana nthena, chigomezgo chinu chambenge kumara. Ntheura imwe kanani maghanoghano ghanthena ndipo ŵikani mtima pa malayizgo gha Chiuta. Kukayikira yayi fundo yakuti Chiuta wakukhumba kuti muzakakhale kwamuyirayira ndipo wamovwiraninge kuti muzakafiske chilato ichi.—1 Tim. 2:3, 4.
SUNGILIRANI CHIGOMEZGO CHINU KUŴA CHAKUKHORA
11. Chifukwa wuli tikwenera kuzikira apo tikulindilira ivyo tikukhazga kuti vifiskike?
11 Ntchipusu yayi kuti tisungilire chigomezgo chithu kuŵa chakukhora. Tingatondeka kuzikira apo tikulindilira kuti Chiuta wafiske malayizgo ghake. Ndipouli, Yehova ngwamuyirayira ndipo wakuwona nyengo mwakupambana na umo ise tikuwonera. (2 Pet. 3:8, 9) Wazamufiska ivyo walayizga panyengo yake yakwenelera, kweni nyengo zinyake wangachita panyengo iyo takhazganga yayi. Kasi tingachita wuli kuti tisungilire chigomezgo chithu kuŵa chakukhora apo tikulindilira mwakuzikira kuti Chiuta wafiske malayizgo ghake?—Yak. 5:7, 8.
12. Kuyana na Ŵahebere 11:1, 6, kasi chigomezgo chikukolerana wuli na chipulikano?
12 Tisungilirenge chigomezgo chithu kuŵa chakukhora para tikulutilira kuŵa paubwezi na Yehova, uyo wazamufiska ivyo tikulindilira. Nakuti Baibolo likulongora kuti pali kukolerana pakati pa chigomezgo na chipulikano. Kuti tiŵe na chigomezgo, Baibolo likuti tikwenera kuŵaso na chipulikano kuti Yehova waliko ndipo “wakuŵapa njombe awo ŵakumupenja na mtima wose.” (Ŵazgani Ŵahebere 11:1, 6.) Para Yehova ngwanadi kwa ise, tiŵengeso na chigomezgo chikuru chakuti Yehova wazamuchita vyose ivyo wali kulayizga. Tiyeni tiwone nthowa izo tingakhozgera ubwezi withu na Yehova na kusungilira chigomezgo chithu kuŵa chakukhora.
Para tikulomba na kughanaghanirapo tisungilirenge chigomezgo chithu kuŵa chakukhora (Wonani ndime 13-15) *
13. Kasi tingasendelera wuli kwa Chiuta?
13 Mulombenge kwa Yehova, na kuŵazga Mazgu ghake. Nangauli Yehova tingamuwona yayi, kweni tingasendelera kwa iyo. Tingayowoya nayo mu lurombo na chigomezgo chakuti wakutipulika. (Yer. 29:11, 12) Tingategherezga kwa Chiuta para tikuŵazga Mazgu ghake na kughanaghanirapo. Apo tikuŵazga vyakukhwaskana na umo Yehova wakapwelelera ŵanthu awo ŵakaŵa ŵakugomezgeka kwa iyo mu nyengo yakale, chigomezgo chithu chikukura chomene. Chilichose icho chili mu Mazgu gha Chiuta chili ‘kulembeka kuti chitisambizge, kuti para tazizipizga na kusanguluskika na Malemba, tiŵe na chigomezgo.’—Rom. 15:4.
14. Chifukwa wuli tikwenera kughanaghanirapo pa ivyo Yehova wachita ku ŵanji?
14 Mughanaghanirengepo pa umo Yehova wafiskirapo malayizgo ghake. Ghanaghanirani ivyo Chiuta wakachita kwa Abrahamu na Sara. Ŵakaŵa ŵachekuru chomene mwakuti ŵangaŵaso na ŵana yayi. Kweni Chiuta wakaŵalayizga kuti ŵaŵenge na mwana. (Gen. 18:10) Kasi Abrahamu wakachita wuli? Baibolo likuti: “Wakaŵa na chigomezgo kweniso chipulikano kuti wazamuŵa wiske wa mitundu yinandi.” (Rom. 4:18) Nangauli mukawonero ka wunthu vikawonekanga nga vingachitika yayi, kweni Abrahamu wakaŵa na chigomezgo kuti Yehova wafiskenge layizgo lake. Ndipo Yehova wakamukoleska pasi yayi mwanalume wakugomezgeka uyu. (Rom. 4:19-21) Nkhani zanthena izi zikutisambizga kuti tikwenera kuŵa na chigomezgo chose kuti Yehova wafiskenge ivyo walayizga, nanga ivyo walayizga vingawoneka nga kuti vingachitika yayi.
15. Chifukwa wuli tikwenera kughanaghanirapo pa ivyo Chiuta wachitira ise?
15 Mughanaghanirengepo ivyo Yehova wamuchitirani imwe. Ghanaghanirani ivyo imwe mwasanga navyo kale chandulo chifukwa cha kufiskika kwa malayizgo agho ghakuyowoyeka mu Mazgu gha Chiuta. Mwachiyelezgero, Yesu wakalayizga kuti Adada ŵake ŵamupaninge vyakukhumbikwa pa umoyo. (Mat. 6:32, 33) Yesu wakasimikizgaso kuti Yehova wamupaninge mzimu wake utuŵa para mukumulomba. (Luka 11:13) Yehova wakufiska nadi malayizgo ghose agha. Mungaghanaghaniraso malayizgo ghanyake agho wali kufiska kwa imwe. Mwachiyelezgero, wakulayizga kuti wamugowokeraninge, kumupembuzgani, kweniso kumuryeskani mwauzimu. (Mat. 6:14; 24:45; 2 Kor. 1:3) Para mukughanaghanirapo pa ivyo Chiuta wamuchitirani kale, mukhozgenge chigomezgo chinu chakukhwaskana na ivyo wazamumuchitirani munthazi.
SEKELERANI MU CHIGOMEZGO
16. Chifukwa wuli chigomezgo ichi ntchawanangwa chakuzirwa chomene?
16 Chigomezgo chithu cha umoyo wamuyirayira ntchawanangwa chakuzirwa chomene chakufuma kwa Chiuta. Tikulindilira mwakunweka apo chigomezgo ichi chizamufiskikira, ndipo chizamufiskika nadi kwambura kutondeka. Chigomezgo ichi chili nga ni nyanguru withu, ndipo chikutovwira kuti tizizipizgenge masuzgo, kweniso viyezgo vilivyose nanga ni nyifwa. Chiliso nga ntchisoti, icho chikuvikilira maghanoghano ghithu mwakuti tikane icho ntchiheni na kudemelera ku icho ntchiwemi. Chigomezgo chithu chakujintha mu Baibolo ichi, chikutovwira kusendelera pafupi na Yehova kweniso chikulongora umo iyo wakutitemwera. Tikupindura chomene para tikusungilira chigomezgo chithu kuŵa chakukhora.
17. Chifukwa wuli chigomezgo chithu chikutovwira kuŵa ŵakukondwa?
17 Mu kalata yake yakuluta ku Ŵaroma, mpositole Paulosi wakaŵachiska kuti: “Sekelerani mu chigomezgo.” (Rom. 12:12) Paulosi wakasekeleranga chifukwa wakaŵa na chigomezgo chose kuti para wakhalilira wakugomezgeka, wazamusanga umoyo wamuyirayira kuchanya. Nase tingasekelera mu chigomezgo chithu chifukwa tili na chigomezgo chose kuti Yehova wafiskenge malayizgo ghake. Wamasalimo wakalemba kuti: “Ngwakukondwa uyo . . . chigomezgo chake chili mwa Yehova Chiuta wake. Mweneuyo ngwakugomezgeka nyengo zose.”—Sal. 146:5, 6.
SUMU 139 Jiwonani Kuti Muli mu Charu Chiphya
^ Yehova watipa chigomezgo chiwemi chomene cha munthazi. Chigomezgo ichi chikutikhozga na kutovwira kuti tileke kuŵika mtima pa masuzgo ghithu. Kweniso chikutipa nkhongono kuti tilutilire kugomezgeka nanga tingasangana na masuzgo wuli. Ndipo chikutivikilira ku fundo ziheni izo zingananga maghanoghano ghithu. Nga umo tiwonerenge mu nkhani iyi, ivi ni vifukwa viwemi vyakusungililira chigomezgo chithu kuŵa chakukhora.
^ MAZGU GHAKULONGOSORA CHITHUZI: Nga umo chisoti chikuvikililira mutu wa msilikari kweniso umo nyanguru wakovwilira ngalaŵa, chigomezgo chithu nacho chikuvikilira maghanoghano ghithu kweniso kutovwira kuzizipizga masuzgo. Mudumbu wakulomba na chigomezgo chose kuti Yehova wakumupulika. Mubali wakughanaghanirapo pa umo Chiuta wakafiskira malayizgo ghake kwa Abrahamu. Mubali munyake wakughanaghanirapo pa umo Yehova wamutumbikira.
