NKHANI YAKUSAMBIRA 42
Umo Tingawovwilira Ŵasambiri Ŵithu ŵa Baibolo Kuti Ŵabatizike—Chigaŵa Chachiŵiri
“Nyengo zose, uŵe maso na ivyo ukuchita na kusambizga.” —1 TIM. 4:16.
SUMU 77 Ungweru mu Charu cha Chisi
CHILATO CHA NKHANI IYI *
1. Kasi tikumanya wuli kuti mulimo wakupharazga ni mulimo wakuponoska umoyo?
MULIMO wakuzgora ŵanthu kuŵa ŵasambiri ni mulimo wakuponoska umoyo. Kasi tikumanya wuli? Yesu wakapeleka dango ilo lili pa Mateyu 28:19, 20, lakuti: “Lutaninge mukazgore ŵanthu . . . kuŵa ŵasambiri , mukaŵabatize.” Chifukwa wuli kubatizika nkhwakuzirwa? Chifukwa munthu wakwenera kubatizika kuti wazakaponoskeke. Munthu uyo wakukhumba kubatizika wakwenera kugomezga kuti wangazakasanga umoyo wamuyirayira pekha para wakugomezga kuti Yesu wakatifwira kweniso kuti wakawuskika. Lekani mpositole Petrosi wakaphalira Ŵakhristu ŵanyake kuti: “Ubatizo ndiwo, ukumuponoskani sono . . . kwizira mu chiwuka cha Yesu Khristu.” (1 Pet. 3:21) Ntheura para msambiri muphya wabatizika, wangaŵa na chigomezgo chakuzakakhala kwamuyirayira.
2. Kasi lemba la 2 Timote 4:1, 2 likuti tikwenera kusambizga wuli?
2 Kuti tizgore ŵanthu kuŵa ŵasambiri, tikwenera “kusambizga mwaluso.” (Ŵazgani 2 Timote 4:1, 2.) Chifukwa wuli? Chifukwa Yesu wali kutipa dango lakuti: “Lutaninge mukazgore ŵanthu . . . kuŵa ŵasambiri, mukaŵasambizge.” Mpositole Paulosi wakati tikwenera kulutilira kuchita mulimo uwu, ‘chifukwa para tikuchita nthena, tijiponoskenge tekha na awo ŵakutipulika.’ Lekani pamanyuma Paulosi wakati: ‘Nyengo zose, tiŵe maso na ivyo tikusambizga.’ (1 Tim. 4:16) Ŵanthu kuti ŵaŵe ŵasambiri, tikwenera kuŵasambizga dankha. Ntheura tikwenera kusambizga mwaluso.
3. Kasi tiwonenge vichi mu nkhani iyi?
3 Tikusambizga Baibolo ŵanthu mamiliyoni ghanandi pa charu chose chapasi. Kweni nga umo yikayowoyera nkhani iyo yajumpha, tikwenera kumanya umo tingachitira kuti tovwire ŵanandi kuti ŵabatizike na kuŵa ŵasambiri ŵa Yesu Khristu. Mu nkhani iyi, tiwonenge vinthu vinyakeso 5 ivyo msambizgi waliyose wakwenera kuchita kuti wawovwire msambiri wake kubatizika.
MUGWIRISKIRENGE NTCHITO BAIBOLO PAKUSAMBIZGA
Pemphani mupharazgi waluso kuti wamovwirani kuti namwe mugwiliskirenge ntchito Baibolo mwaluso pakusambizga (Wonani ndime 4-6) *
4. Chifukwa wuli msambizgi wakwenera kuŵa wakujikora para wakuchitiska sambiro la Baibolo? (Wonaniso mazgu ghamusi.)
4 Tikutemwa chomene ivyo vili mu Mazgu gha Chiuta. Ntheura tingakhumba kuyowoya vinandi. Ndipouli, kwali mphakuchitiska Sambiro la Gongwe la Mulinda, Sambiro la Baibolo la Mpingo, panji sambiro la Baibolo la panyumba, uyo wakuchitiska wakwenera kuyowoya vinthu vinandinandi yayi. Msambizgi waliyose wakwenera kugwiliskira ntchito Baibolo mwaluso para wakusambizga. Ntheura wakwenera kuŵa maso kuti waleke kuyowoya vinandinandi kweniso kulongosora vesi lililose ilo wakulimanya panji nkhani yinyake. * (Yoh. 16:12) Ghanaghanirani ivyo mukamanyanga vya Baibolo mukati mwabatizika waka na ivyo mukumanya sono. Mukati mwabatizika waka, mukamanyanga waka visambizgo vyakwambilira vya mu Baibolo. (Heb. 6:1) Vyamutolerani vyaka vinandi kusambira ivyo mukumanya sono. Ntheura lekani kusambizga msambiri muphya vinthu vinandinandi panyengo yimoza.
5. (a) Kuyana na 1 Ŵatesalonika 2:13, kasi tikukhumba kuti msambiri withu wa Baibolo wapulikiske vichi? (b) Kasi tingachiska wuli msambiri kuti wayowoyenge vinthu ivyo wakusambira?
5 Tikukhumba kuti ŵasambiri ŵithu ŵapulikiskenge kuti ivyo ŵakusambira vikufuma nadi mu Baibolo. (Ŵazgani 1 Ŵatesalonika 2:13.) Kasi tingachita wuli nthena? Timuchiskenge msambiri kuti wayowoyenge ivyo wakusambira. M’malo mwakuti nyengo zose mulongosorenge mwekha Malemba, mumupemphenge kuti nayo walongosorengepo. Movwirani kuti wawonenge umo Mazgu gha Chiuta ghakumukhwaskira iyo payekha. Mufumbani mafumbo agho ghangamovwira kuti wayowoye umo wakughanaghanira kweniso umo wakujipulikira na malemba agho wakuŵazga. (Luka 10:25-28) Mwachiyelezgero, mungamufumba kuti: “Kasi lemba ili lamovwirani wuli kumanya umoza mwa mikhaliro iyo Yehova wali nayo?” “Kasi vinthu ivyo mwasambira mu Baibolo vingamovwirani wuli?” “Kasi mukujipulika wuli na ivyo mwasambira?” (Zinth. 20:5) Chakuzirwa mbunandi wa ivyo msambiri wakumanya yayi, kweni ivyo wakutemwa na umo wakugwiliskira ntchito ivyo wakusambira.
6. Chifukwa wuli ntchakuzirwa kuluta na mupharazgi waluso para tamuchitiska sambiro la Baibolo?
6 Kasi ku sambiro linu la Baibolo mukuŵachemerako ŵapharazgi awo ŵali na luso pakusambizga? Usange ni nthena, mungaŵafumba ivyo ŵawona pa umo mukuchitira pakusambizga ndiposo usange mukugwiliskira ntchito makora Baibolo pakusambizga. Mukwenera kuŵa ŵakujiyuyura usange mukukhumba kusazgirako luso lwinu pakusambizga. (Yaniskani na Milimo 18:24-26) Kufuma apo, mufumbani mupharazgi waluso usange msambiri wakupulikiska ivyo wakusambira. Mungamupemphaso mupharazgi mweneyuyu uyu kuti usange imwe mwafumapo kwa sabata yimoza panji kujumphirapo ndiyo wachitiskenge sambiro. Para mwachita nthena viwovwirenge kuti sambiro lileke kuyimayima, ndipo msambiri wamanyenge kuti sambiro ndakuzirwa. Lekani kughanaghana kuti ili ni sambiro “lane” nekha, ndipo palijeso munyake uyo wakwenera kupangiskako. Nkhani njakuti mukumukhumbira viwemi msambiri winu kuti walutilire kusambira unenesko.
LONGORANI KUTI MUKUTEMWA NA KUGOMEZGA IVYO MUKUSAMBIZGA
Muphaliraniko msambiri winu umo ŵanji ŵakasinthira umoyo wawo chifukwa cha kusambira Baibolo kuti nayo vimovwire kuchita ivyo wakusambira (Wonani ndime 7-9) *
7. Kasi ntchivichi icho chingawovwira msambiri kuti watemwenge ivyo wakusambira?
7 Msambiri wakwenera kuwona kuti mukutemwa na kugomezga ivyo Baibolo likusambizga. (1 Tes. 1:5) Para vyaŵa nthena, nayo watemwenge ivyo wakusambira. Usange ntchakwenelera, muphalirani umo Baibolo lamovwilirani pa umoyo winu. Para mwachita nthena, vimovwirenge kumanya kuti Baibolo lili na ulongozgi wakuzirwa ndipo nayo lingamovwira.
8. Kasi ni vichi vinyake ivyo mungachita kuti movwire msambiri winu wa Baibolo, ndipo chifukwa wuli mungachita nthena?
8 Panyengo ya sambiro, muphalirani msambiri winu za ŵabali na ŵadumbu ŵanyake awo nawo ŵakaŵa na masuzgo ghakuyana na ghake kweni ŵakaghatonda. Mungalutaso na munyake wa mu mpingo winu uyo mukuwona kuti ivyo vikamuchitikira vingawovwira msambiri winu. Panji mungasanga nkhani yakukhozga pa jw.org pa mutu wakuti “Baibolo Likusintha Umoyo wa Ŵanthu.” * Nkhani za nthena izi kweniso mavidiyo vingamovwira msambiri winu kumanya kuti nayo Baibolo lingamovwira kusintha umoyo wake.
9. Kasi mungamovwira wuli msambiri kuti waphalirengeko ŵamumbumba yake na ŵabwezi ŵake ivyo wakusambira?
9 Usange msambiri winu ngwakutora panji kutengwa, kasi munyake wa mu nthengwa nayo wakusambira Baibolo? Para wakusambira yayi, mungamuchema kuti nayo waŵengepo pa sambiro. Muchiskani msambiri winu kuti waphalirengeko ŵamumbumba yake na ŵabwezi ŵake ivyo wakusambira. (Yoh. 1:40-45) Kasi mungachita wuli? Mungamufumba kuti: “Kasi mungaŵalongosolera wuli ŵamumbumba yinu fundo iyi? panji “Kasi ni lemba wuli ilo mungagwiliskira ntchito kuti mukhozgere fundo iyi kwa mubwezi winu?” Para mungachita nthena, movwirenge msambiri winu kuti waŵe msambizgi. Pamanyuma para waŵa wakwenelera, wangamba kupharazga na mpingo. Mungamufumbaso msambiri winu usange wakumanyapo munthu waliyose uyo wakukhumba kusambira Baibolo. Usange walipo, kumanani nayo mwaluŵiro na kumupempha kuti musambirenge nayo. Mulongorani vidiyo ya mutu wakuti Kasi Ŵakaboni ŵa Yehova Ŵakuchita Wuli Pakusambizga Munthu Baibolo? *
CHISKANI MSAMBIRI KUTI WASANGE ŴABWEZI MU MPINGO
Chiskani msambiri kusanga ŵabwezi mu mpingo (Wonani ndime 10-11) *
10. Kuyana na 1 Ŵatesalonika 2:7, 8, kasi ise tikusambizga ŵanthu Baibolo tingamuyezga wuli Paulosi?
10 Tikwenera kulongora kuti tikuŵatemwa awo tikusambira nawo Baibolo. Tiŵawonenge kuti nawo ŵangaŵa ŵabali panji ŵadumbu mu mpingo. (Ŵazgani 1 Ŵatesalonika 2:7, 8.) Ntchipusu yayi kwa iwo kuleka ŵabwezi ŵawo mu charu ichi na kusintha kuti ŵateŵeterenge makora Yehova. Tikwenera kuŵawovwira kuti ŵasange ŵabwezi ŵanadi mu mpingo. Msambiri winu mukwenera kumuwona kuŵa mubwezi winu ndipo muchezgenge nayo padera pakusambira waka nayo Baibolo. Para mungamwimbira foni, kumutumira meseji panji kumwendera waka, vingalongora kuti mukumughanaghanira.
11. Kasi tikukhumba kuti msambiri withu wasange vichi mu mpingo, ndipo chifukwa wuli?
11 Pali ntharika yakuti: “Mwana wamunyako ngwako.” Kung’anamura kuti mpingo wose ukovwirapo pakupanga msambiri. Lekani ŵapharazgi ŵaluso, ŵakovwira awo ŵakusambira nawo Baibolo kuti ŵamanyanenge na ŵanthu mu mpingo chifukwa ŵakumanya kuti ŵapharazgi aŵa nawo ŵangawovwirapo kuti ŵasambiri ŵasendelere chomene kwa Yehova. Ivi vingawovwira kuti ŵasambiri ŵaŵe paubwezi na ŵanthu ŵa Chiuta, awo ŵangaŵawovwira mwauzimu na kuŵakhozga para ŵasangana na masuzgo. Tikukhumba msambiri waliyose wajipulikenge kuti ngwakupokelereka mu mpingo, ndipo nayo wali mu mbumba yauzimu. Kweniso tikukhumba kuti wawonenge kuti mu gulu la Yehova ndimo muli chitemwa chanadi. Ivi vimovwirenge kuti waleke kutemwana na ŵanthu awo ŵakusopa Yehova yayi. (Zinth. 13:20) Para ŵanthu awo wakachezganga nawo kale ŵamba kumugega, wamanyenge kuti wasangenge ŵabwezi ŵanadi mu gulu la Yehova.—Mrk. 10:29, 30; 1 Pet. 4:4.
DIDIMIZGANI CHOMENE FUNDO YA KUJIPELEKA NA KUBATIZIKA
Pachoko na pachoko sambiro la Baibolo ilo likuluta panthazi lingabatizika (Wonani ndime 12-13)
12. Chifukwa wuli kanandi tikwenera kuyowoya za kujipeleka na kubatizika kwa msambiri withu?
12 Muyowoyenge mwakuwerezgawerezga kwa msambiri winu kuzirwa kwa kujipeleka kwa Yehova na kubatizika. Nakuti chilato chithu icho tikusambizgira ŵanthu Baibolo ntchakuti ŵabatizike na kuteŵetera Yehova. Para munthu wasambira Baibolo kwa myezi yichoko waka ndipo wamba kwiza ku maungano, wakwenera kumanya kuti tikukhumba kumovwira kuti waŵe Kaboni wa Yehova.
13. Kasi munthu wakwenera kuchita vichi kuti wabatizike?
13 Pali vinthu vinandi ivyo munthu uyo wakukhumba kubatizika wakwenera kuchita. Chakwamba, wakwenera kumanya dankha Yehova na kumutemwa, na kuŵa na chipulikano mwa Iyo. (Yoh. 3:16; 17:3) Kufuma apo, wakwenera kuŵa paubwezi na Yehova kweniso ŵabali na ŵadumbu mu mpingo. (Heb. 10:24, 25; Yak. 4:8) Wakweneraso kuleka ivyo wakachitanga kale na kulapa zakwananga zake. (Mil. 3:19) Kweniso wakwenera kuphalirako ŵanji ivyo wamba kugomezga sono. (2 Kor. 4:13) Paumaliro wakwenera kujipeleka kwa Yehova, ndipo wakulongora kujipeleka uku mwakubatizika. (1 Pet. 3:21; 4:2) Ili likuŵa zuŵa lakukondweska chomene kwa waliyose. Ntheura, para msambiri wakuchita vinthu ivyo vikulongora kuti wakukhumba kubatizika, lutilirani kumukhozga na kumuchiska kuti walutilire kuchita vinthu ivi.
NYENGO ZOSE MUWONENGE USANGE MSAMBIRI WAKULUTA PANTHAZI
14. Kasi msambizgi wangamanya wuli para msambiri wakuluta panthazi?
14 Tikwenera kuŵa ŵakuzikira para tikovwira msambiri withu kuti waŵe wakwenelera kubatizika. Kweniso tikwenera kumanya usange wakukhumba nadi kuteŵetera Yehova Chiuta. Kasi msambiri wakulongora kuti wakuyezgayezga kupulikira malango agho Yesu wali kupeleka? Panji kasi wakukhumba kusambira waka fundo zinyake zakukondweska za mu Baibolo?
15. Kasi ni vichi vingawovwira msambizgi kumanya usange msambiri wakuluta panthazi ndipo wangaŵa wakwenelera kubatizika?
15 Nyengo zose muwonenge usange msambiri winu wakuluta panthazi. Mwachiyelezgero, kasi wakuyowoya umo wakujipulikira pakukhwaskana na Yehova? Kasi wakulomba kwa Yehova? (Sal. 116:1, 2) Kasi wakutemwa kuŵerenga Baibolo? (Sal. 119:97) Kasi wakuwungana nyengo zose? (Sal. 22:22) Kasi wali kusintha vinthu vinyake pa umoyo wake kulongora kuti wakuchita ivyo wakusambira? (Sal. 119:112) Kasi wakuphalirako ŵamumbumba yake kweniso ŵabwezi ŵake ivyo wakusambira? (Sal. 9:1) Kweniso kasi wakukhumba nadi kuŵa Kaboni wa Yehova? (Sal. 40:8) Usange palije icho msambiri wakuchitapo kuyana na mafumbo agha, mwaumanyi sangani icho chikuchitiska ndipo dumbiskanani nayo mwalusungu kweni mwambura kumubisa. *
16. Kasi mphawuli apo ntchakwenelera kuleka kusambira na munthu?
16 Nyengo na nyengo mujifumbenge usange ntchakwenelera kulutilira kusambira na munthu. Mungajifumba kuti: ‘Kasi msambiri wakunozgekera sambiro? Kasi ukata ukumukora kwiza ku maungano? Kasi wachali kuchita mikhaliro yinyake yiheni? Kasi wachali kuluta ku chisopa chautesi?’ Usange zgoro la mafumbo agha ndakuti enya, mbwenu kulutilira kusambira na munthu wanthena, vingayana waka na kusambizga munthu kushuwa panji kuti kuskamba uku wakukhumba yayi kunyewa. Para msambiri wakutemwa yayi ivyo wakusambira ndipo wakukhumba yayi kusintha, palije chifukwa cha kulutilira kusambira nayo.
17. Kuyana na 1 Timote 4:16, kasi tose ise tikusambizga ŵanthu Baibolo tikwenera kuchita vichi?
17 Ntchakuzirwa chomene kwa ise kufiska mulimo withu wakuzgora ŵanthu kuŵa ŵasambiri, ndipo tikwenera kovwira awo tikusambira nawo Baibolo kuti ŵabatizike. Lekani tikwenera kugwiliskira chomene ntchito Baibolo pakusambizga na kulongora kuti tikutemwa na kugomezga ivyo tikusambizga. Kweniso tichiskenge msambiri kuti wasange ŵabwezi mu mpingo. Ndipo kanandi tiyowoyenge kuzirwa kwa kujipeleka na kubatizika, kweniso kuwona usange msambiri withu wakuluta panthazi. (Wonani bokosi lakuti “ Ivyo Ŵasambizgi Ŵakwenera Kuchita Kuti Ŵawovwire Ŵasambiri Kuti Ŵabatizike.”) Ndise ŵakukondwa chomene kuti tikuchitako mulimo wakuponoska umoyo uwu. Tiyeni tiŵikepo mtima kovwira awo tikusambira nawo Baibolo kuti ŵaŵe ŵakwenelera kubatizika.
SUMU 79 Ŵawovwirani Kuti Ŵatchinthe
^ ndime 5 Kusambizga ŵanthu Baibolo, ntchawanangwa chapadera chakufuma kwa Yehova. Vili nthena chifukwa chakuti tikovwira ŵanthu awo tikusambira nawo kuti ŵaghanaghanenge na kuchita vinthu nga umo Yehova wakukhumbira. Nkhani iyi yikulongosora umo tingachitira kuti tisazgireko luso lwithu pakusambizga.
^ ndime 4 Wonani nkhani yakuti “Lekani Kuchita Ivi Para Mukuchitiska Sambiro la Baibolo” mu Kabuku ka Maungano ka Uteŵeti na Umoyo Wachikhristu ka Seputembala 2016.
^ ndime 8 Lutani pa MANYANI VYA ISE > IVYO VIKAŴACHITIKIRA.
^ ndime 9 Pa JW Library®, lutani pa MEDIA > OUR MEETINGS AND MINISTRY > TOOLS FOR THE MINISTRY.
^ ndime 15 Wonani nkhani zakuti “Para Mukumutemwa Yehova na Kumuwonga Mubatizikenge” na “Kasi Ndimwe Ŵakunozgeka Kubatizika?” mu Gongwe la Mulinda la Malichi 2020.
^ ndime 77 MAZGU GHAKULONGOSORA CHITHUZI: Ŵati ŵawerako kukasambira na munthu Baibolo, mudumbu uyo ngwaluso pakusambizga wakovwira mudumbu uyo wachitiskanga sambiro la Baibolo kuti wakwenera yayi kuyowoya vinthu vinandinandi para wakusambizga.
^ ndime 79 MAZGU GHAKULONGOSORA CHITHUZI: Pa nyengo ya sambiro, msambiri wakusambira umo wangaŵira muwoli muwemi. Pamanyuma wakuphalirako mfumu wake ivyo wangusambira.
^ ndime 81 MAZGU GHAKULONGOSORA CHITHUZI: Msambiri na mfumu wake ŵakuchezga ku nyumba ya mudumbu munyake uyo ŵangukumana ku Nyumba ya Ufumu.
