NKHANI YAKUSAMBIRA 35
SUMU 123 Kujilambika ku Ndondomeko ya Chiuta
Umo Ŵalara Ŵangawovwilira Awo Ŵafumiskika mu Mpingo
‘Kuzamuŵa chimwemwe chikuru kuchanya para wakwananga yumoza wang’anamuka mtima, kuluska ŵarunji 99 awo ŵakukhumbikwira kung’anamuka mtima yayi.’—LUKA 15:7.
FUNDO YIKURU
Chifukwa icho ŵanyake ŵakwenera kufumiskikamo mu mpingo kweniso umo ŵalara ŵangaŵawovwilira kuti ŵang’anamuke mtima na kuŵaso paubwezi na Yehova.
1-2. (a) Kasi Yehova wakuŵawona wuli awo ŵakwanangira dala? (b) Kasi Yehova wakukhazga kuti ŵanthu awo ŵachita kwananga ŵachite vichi?
YEHOVA ni Chiuta wakulekelera yayi, ndipo wakutinkha kwananga kulikose. (Sal. 5:4-6) Wakukhumba kuti tilondezgenge fundo zake zaurunji, izo zili mu Mazgu ghake. Mbunenesko kuti Yehova wakukhazga kuti tichitenge vinthu mwakufikapo yayi. (Sal. 130:3, 4) Kweni panyengo yimozamoza, wakuŵalekelera yayi ‘ŵanthu ŵambura kopa Chiuta, awo ŵakuzgora lusungu lwake lukuru kuŵa chifukwa chakuchitira ukwakwa.’ (Yuda 4) Lekani Baibolo likuyowoya vya “pharanyiko la ŵanthu ŵambura kopa Chiuta” ilo lizamuchitika pa nkhondo ya Aramagedoni.—2 Pet. 3:7; Chivu. 16:16.
2 Ndipouli, Yehova wakukhumba yayi kuti munyake wazakaparanyike. Nga umo tikawonera mu nkhani izo zajumpha, Baibolo likuyowoya mwakupulikikwa makora kuti “wakukhumba kuti wose ŵang’anamuke mtima.” (2 Pet. 3:9) Ŵalara Ŵachikhristu ŵakuyezga Yehova apo ŵakovwira mwakuzikira awo ŵachita kwananga kuti ŵasinthe nthowa zawo na kuŵaso paubwezi na Yehova. Ndipouli, ni ŵakwananga wose yayi awo ŵakung’anamuka mtima. (Yes. 6:9) Ŵanyake ŵakulutilira mu nthowa yawo yiheni nangauli ŵalara ŵayezgayezga kuŵawovwira kuti ŵang’anamuke mtima. Kasi ŵalara ŵakwenera kuchita wuli para vili nthena?
“MUFUMISKANIMO MUNTHU MUHENI”
3. (a) Kasi Baibolo likuti ŵalara ŵakwenera kuchita nawo wuli ŵanthu ŵambura kung’anamuka mtima? (b) Chifukwa wuli tingayowoya kuti wakwananga wambura kung’anamuka mtima wasankha yekha kuti wafumiskike mu mpingo?
3 Usange uyo wachita kwananga ngwambura kung’anamuka mtima, ŵalara ŵakwenera kulondezga ulongozgi wa pa 1 Ŵakorinte 5:13, apo pakuti: “Mufumiskanimo munthu muheni uyo mukati mwinu.” Tingayowoya kuti apa wakwananga wasankha yekha kuti viŵe nthena; wakuvuna ivyo wakaseŵa. (Gal. 6:7) Chifukwa wuli tikuyowoya nthena? Chifukwa ntchakuti wakana kuti wang’anamuke mtima pamanyuma pakuti ŵalara ŵamovwira mwakuwerezgawerezga. (2 Mathe. 17:12-15) Vyakuchita vyake vyalongora kuti wakukhumba yayi kulondezga fundo za Yehova.—Doto. 30:19, 20.
4. Chifukwa wuli chipharazgo chikupharazgika ku mpingo para wakwananga wambura kung’anamuka mtima wafumiskika mu mpingo?
4 Para wakwananga wambura kung’anamuka mtima wafumiskika mu mpingo, chipharazgo chikupharazgika ku mpingo kuti njumozaso yayi wa Ŵakaboni ŵa Yehova. a Chilato cha chipharazgo ichi nkhulengeska wakwananga yayi. M’malo mwake, chikupharazgika kuti mpingo ulondezge ulongozgi wa mu Malemba wakuti ‘ŵaleke kwenderana nayo’ munthu uyo, ‘nanga nkhurya nayo.’ (1 Kor. 5:9-11) Pali chifukwa chiwemi icho tikupikira ulongozgi uwu. Mpositole Paulosi wakalemba kuti: “Nthukumusi yichoko waka yikutukumuska bulunga lose la nthimphwa.” (1 Kor. 5:6) Ŵakwananga ŵambura kung’anamuka mtima ŵangapangiska kuti awo ŵakuŵikapo mtima kulondezga fundo za Yehova ŵambe kulopwa.—Zinth. 13:20; 1 Kor. 15:33.
5. Kasi tikwenera kumuwona wuli munthu uyo wafumiskika mu mpingo, ndipo chifukwa wuli?
5 Ipo kasi tikwenera kumuwona wuli mubali panji mudumbu uyo wafumiskika mu mpingo? Nangauli tikwenderana nayo yayi, kweni tikwenera kumuwona kuti ni mberere yakuzgeŵa. Mberere iyo yazgeŵa, yingaweleraso pa mskambo. Kumbukani kuti mberere yakuzgeŵa iyi, yikajipeleka kwa Yehova. Chachitima ntchakuti munthu uyu waleka kuchita ivyo wakamulayizga Yehova, ndipo vyapangiska kuti ubwezi wake na Yehova uŵe pangozi. (Ezek. 18:31) Ndipouli, pakuti Yehova ngwalusungu, chigomezgo chikuŵapo chakuti munthu uyu wangawelera. Kasi ŵalara ŵakulongora wuli kuti ŵali na chigomezgo chanthena nanga nkhu wakwananga uyo wafumiskika mu mpingo?
UMO ŴALARA ŴAKOVWILIRA AWO ŴAFUMISKIKA MU MPINGO
6. Kasi ŵalara ŵachitenge wuli kuti ŵawovwire uyo wafumiskika mu mpingo?
6 Kasi uyo wafumiskika mu mpingo wakujowoleka waka kuti wachitengepo kanthu yekha kuti wawelere kwa Yehova? Yayi. Para munthu wambura kung’anamuka mtima wakuphalirika kuti wafumiskikengemo mu mpingo, komiti ya ŵalara yimulongosolerenge ivyo wakwenera kuchita kuti wawelere mu mpingo. Kweni ŵalara ŵachitengeso vinandi. Nyengo zinyakeso ŵamuphalirenge wakwananga kuti ŵangatemwa kuti ŵazakakumaneso nayo para pajumpha myezi kuti ŵazakawone usange wasintha. Usange wakwananga ngwakukhumbisiska kuzakakumanaso nawo, paulendo uwu ŵalara ŵazamumuchiska kuti wang’anamuke mtima na kuwelera kwa Yehova. Nanga vingaŵa kuti wandalongore kuti wasintha, ŵalara ŵayezgeyezgenge nipera kuti ŵazakakumaneso nayo kunthazi.
7. Kasi ŵalara ŵakumuyezga wuli Yehova pa nkhani ya chiwuravi para ŵakovwira munthu uyo wafumiskika mu mpingo? (Yeremiya 3:12)
7 Ŵalara ŵakuyezgayezga kulongora chiwuravi nga umo Yehova wakuchitira, apo ŵakovwira uyo wafumiskika mu mpingo. Mwachiyelezgero, Yehova wakalindilira kuti Ŵaisrayeli awo ŵakapuluka ŵachitepo dankha kanthu yayi, ndipo iyo waŵawovwirenge. M’malo mwake, iyo ndiyo wakamba kuchitapo kanthu kuti waŵawovwire pambere ŵandalongore chimanyikwiro chilichose cha kung’anamuka mtima. Nga umo tikawonera mu nkhani yachiŵiri mu magazini iyi, Yehova wakalongora chiwuravi chake pa kuphalira ntchimi Hoseya kuti yimugowokere na kuwelerana na muwoli wake, uyo wakaŵa kuti wachali kuchita kwananga. (Hos. 3:1; Mal. 3:7) Pakuyezga Yehova, ŵalara Ŵachikhristu ŵakukhumbisiska na mtima wose kuti wakwananga wawelere mu mpingo, ndipo ŵakugega kuchita ivyo vingamutondeska kuwelera.—Ŵazgani Yeremiya 3:12.
8. Kasi ntharika ya Yesu ya mwana wakuzgeŵa yikulongoraso wuli kuti Yehova ngwalusungu na chiwuravi? (Luka 15:7)
8 Kumbukani ntharika ya Yesu ya mwana wakuzgeŵa, iyo tikadumbiskana mu nkhani yachiŵiri mu magazini iyi. Dada wakati wawona mwana wake wakwiza chapatali kuwelera kunyumba, ‘wakachimbira na kumuvumbatira na kumufyofyontha.’ (Luka 15:20) Mungawona kuti dada wakalindilira dankha kuti mwana wake wapemphe chigowokero yayi. M’malo mwake, iyo ndiyo wakamba kuchitapo kanthu, nga umo dada waliyose wachitemwa wangachitira. Ŵalara nawo ŵakuyezgayezga kulongora mtima wanthena uwu kwa munthu uyo wapuluka. Ŵakukhumba kuti mberere yakuzgeŵa yiwelere kwa Yehova. (Luka 15:22-24, 32) Kukuŵa chimwemwe chikuru kuchanya kweniso pa charu chapasi para wakwananga wawelera.—Ŵazgani Luka 15:7.
9. Kasi Yehova wakukhumba ŵakwananga ŵachite vichi?
9 Kufuma pa ivyo tasambira, ntchakuwonekerathu kuti Yehova wakuŵalekelera yayi ŵakwananga ŵambura kung’anamuka mtima. Ndipouli, wakuŵajowora yayi. Wakukhumba kuti ŵawelereso kwa iyo. Lemba la Hoseya 14:4 likulongosora makora umo Yehova wakujipulikira na ŵakwananga awo ŵang’anamuka mtima, likuti: “Nizamuchizga kuleka kugomezgeka kwawo. Nizamuŵatemwa mwakukhumba kwane, chifukwa ukali wane wawerako kwa iyo.” Ntheura ntchakuzirwa chomene kuti ŵalara nawo ŵawonenge kalikose ako munthu wasintha, kulongora kuti wamba kung’anamuka mtima. Ndipo awo ŵamuleka Yehova nawo ŵakwenera kujinyumwa na kuwerako mwaluŵiro ku nthowa zawo ziheni.
10-11. Kasi ŵalara ŵawovwirenge wuli awo ŵakafumiskikamo mu mpingo ni kale?
10 Wuli pakuyowoya za awo ŵakafumiskikamo mu mpingo ni kale, panji pajumpha vyaka vinandi? Ŵanthu ŵanthena panji ŵangaŵaso kuti ŵali kuleka ni kale kuchita kwananga uko kukapangiska kuti ŵafumiskikemo mu mpingo. Ndipo nyengo zinyake ŵangaŵa kuti ŵakukumbukaso yayi vifukwa ivyo ŵakafumiskikiramo mu mpingo. Vilije kanthu kuti ŵakhala kuwaro kwa mpingo nyengo yitali wuli, kweni ŵalara ŵayezgeskenge kuŵapenja na kuŵayendera. Pa maulendo agha, ŵalara ŵazamuŵalombera na kuŵachiska kuti ŵawelere mu mpingo. Mbunenesko kuti para munthu waŵa kuwaro kwa gulu la Yehova kwa vyaka vinandi, kanandi wakuŵa wakulopwa chomene mwauzimu. Ntheura para wayowoya kuti wakukhumba kuwelera mu mpingo, ŵalara ŵakwenera kunozga ndondomeko kuti munthu munyake wasambirenge nayo Baibolo, nangauli wangaŵa kuti wachali wandawezgekeremo mu mpingo. Kweni ŵalara pera ndiwo ŵakwenera kunozga ndondomeko iyi.
11 Pakuti ŵakukhumba kulongora chiwuravi nga ni Yehova, ŵalara ŵakuŵikapo mtima kupenja na kovwira ŵanthu ŵanandi kuyana na umo ŵangafiskira, kuti ŵamanye kuti mulyango ngwakujulika kuwelera mu mpingo. Para wakwananga wakulongora kuti wang’anamuka mtima ndipo waleka ivyo wakachitanga, wakwenera kuwezgekeramo mu mpingo kwambura kuchedwa.—2 Kor. 2:6-8.
12. (a) Kasi ni mphani apo ŵalara ŵakwenera kuŵa maso chomene? (b) Chifukwa wuli tikwenera yayi kuwona kuti ŵakwananga ŵanyake mbakuti Yehova wangaŵalongoraso lusungu yayi? (Wonaniso mazgu ghamusi.)
12 Kweni nyengo zinyake ŵalara ŵakwenera kuŵa maso chomene pambere ŵandamuwezgeremo munthu mu mpingo. Mwachiyelezgero, usange munthu wakachitira nkhaza mwana panji wakagaluka, panjiso kuchita njomba kuti wamazge nthengwa yake, ŵalara ŵakwenera kuwoneseska kuti munthu uyo wasintha nadi. (Mal. 2:14; 2 Tim. 3:6) Ŵalara ŵakwenera kuvikilira mpingo. Pa nyengo yimozamoza, tikwenera kumanya kuti Yehova wazamumupokelera wakwananga waliyose uyo walongora kuti wang’anamuka nadi mtima ndipo waleka viheni ivyo wakachitanga. Ntheura, nangauli ŵalara ŵakwenera kuŵa maso pakuchita vinthu na ŵakwananga ŵanthena, kweni ŵaleke kudumura kuti kwananga kunyake nkhwakuti munthu Yehova wangamulongora lusungu yayi. b—1 Pet. 2:10.
IVYO MPINGO UNGACHITA
13. Kasi umo tikuchitira vinthu na uyo ŵalara ŵamuchenya vikupambana wuli na umo tikuchitira na uyo wafumiskika mu mpingo?
13 Nga umo tikawonera mu nkhani iyo yajumpha, nyengo zinyake chipharazgo chikupharazgika kuti munyake wachenyeka. Para vyaŵa nthena, tingalutilira kuchezga nayo pakumanya kuti wang’anamuka mtima ndipo waleka nthowa zake ziheni. (1 Tim. 5:20) Nayo wachali mu mpingo ndipo wakukhumbikwira kukhozgeka na Ŵakhristu ŵanyake. (Heb. 10:24, 25) Ndipouli, vikupambana chomene na munthu uyo wafumiskika mu mpingo. Tikuleka “kwenderana” nayo munthu wanthena, ‘nanga nkhurya nayo.’—1 Kor. 5:11.
14. Kasi Mkhristu wangagwiliskira wuli ntchito njuŵi yake yakusambizgika Baibolo pakuchita vinthu na awo ŵali kufumiskika mu mpingo? (Wonaniso chithuzi.)
14 Kasi ivyo tawona apa vikung’anamura kuti timujowolerethu munthu uyo wafumiskika mu mpingo? Viŵi yayi. Mbunenesko kuti tenderanenge nayo yayi. Kweni Ŵakhristu ŵangagwiliskira ntchito njuŵi yawo yakusambizgika Baibolo pakusankha kuti ŵamuchemereko munthu wanthena ku maungano, usange ni mubali wawo panji wakaŵa mubwezi wawo. Wuli para wakwiza kale ku maungano? Kumanyuma uku, tikamutawuzganga yayi munthu wanthena. Kweni apa napo, Mkhristu waliyose wakwenera kugwiliskira ntchito njuŵi yake yakusambizgika Baibolo pa nkhani iyi. Ŵanyake ŵangafwatuka kumutawuzga panji kumupokelera pa maungano. Ndipouli, tikwenera yayi kwamba kudumbiskana nayo nkhani zinyake panji na kwamba kwenderana nayo wuwo.
Ŵakhristu ŵangagwiliskira ntchito njuŵi yawo yakusambizgika Baibolo pakusankha kumuchemerako ku maungano panji kumutawuzga mwakudumura munthu uyo wali kufumiskika mu mpingo (Wonani ndime 14)
15. Kasi mbakwananga wuli awo ŵakulongosoreka pa 2 Yohane 9-11? (Wonaniso bokosi lakuti “ Kasi Yohane na Paulosi Ŵakayowoyanga za Kwananga Kwakuyana?”)
15 Ŵanji ŵangafumba kuti, ‘Asi Baibolo likuti Mkhristu uyo wakutawuzgana nayo ndikuti wakugaŵana nayo milimo yake yiheni?’ (Ŵazgani 2 Yohane 9-11.) Nkhani yose ya lemba ili yikulongora kuti ulongozgi uwu ukuyowoya vya ŵachigaluka ndiposo ŵanyake awo ŵakukhuŵilizga nkharo zawakawaka. (Chivu. 2:20) Ntheura usange munthu wakukhuŵilizga visambizgo vya ŵakugaluka, panji makhaliro ghanyake ghaheni, ŵalara ŵamwenderenge yayi. Mbunenesko kuti chigomezgo chichalipo chakuti wangawelera. Kweni tikwenera yayi kumutawuzga panji kumuchemerako ku maungano, m’paka apo wazamulongora kuti wamba kusintha.
KUYEZGA YEHOVA PA NKHANI YA CHIWURAVI NA LUSUNGU
16-17. (a) Kasi Yehova wakukhumba ŵakwananga ŵachite vichi? (Ezekiyeli 18:32) (b) Kasi ŵalara ŵangalongora wuli kuti mbantchito ŵanyake na Yehova para ŵakovwira ŵakwananga?
16 Kasi tasambira vichi mu nkhani 5 izi? Yehova wakukhumba yayi kuti munyake wazakaparanyike. (Ŵazgani Ezekiyeli 18:32.) Wakukhumba ŵakwananga ŵaphemane na iyo. (2 Kor. 5:20) Lekani kwamba kale chomene, Yehova wakuchiska ŵateŵeti ŵake awo ŵamuleka kuti ŵang’anamuke mtima na kuwelera kwa iyo. Ŵalara ŵa mpingo ŵali na mwaŵi wakugwilira lumoza na Yehova apo ŵakuyezgayezga kuti ŵawovwire ŵakwananga kung’anamuka mtima.—Rom. 2:4; 1 Kor. 3:9.
17 Ghanaghanirani waka chimwemwe icho chikuŵa kuchanya para wakwananga wang’anamuka mtima! Adada ŵithu ŵakuchanya, a Yehova, ŵakukondwa chomene para ŵawona mberere iyo yikazgeŵa yawelera mu mpingo. Chitemwa chithu chikulutilira kukura chomene para tikughanaghanira umo Yehova waliri wachiwuravi, walusungu, kweniso kuti wakutighanaghanira chomene.—Luka 1:78.
SUMU 111 Vifukwa Vyakuŵira na Chimwemwe
a Pasono tikugwiliskiraso ntchito yayi mazgu ghakuti kusezgeka. Kuyana na mazgu gha Paulosi agho ghali pa 1 Ŵakorinte 5:13, pasono tikuti kufumiskika mu mpingo.
b Kuyana na Baibolo, kwananga kwambura kugowokereka ni mtundu wa kwananga yayi, kweni nkhunonopeska mtima uko munthu wakuchita, ndipo wasankha kumulekerathu Chiuta. Nanga munthu wangachita nthena, ise tilije mazaza kumweruzga kuti wangagowokereka yayi.—Mrk. 3:29; Heb. 10:26, 27.
