Nkhani Yakusambira 34
Kasi Tingachita Wuli Para Uteŵeti Withu Wasintha?
“Chiuta ngwambura urunji yayi kuti waluwe mulimo winu na chitemwa icho mukalongora ku zina lake.”—HEB. 6:10.
SUMU 38 Wamuzgoraninge Ŵankhongono
CHILATO CHA NKHANI IYI *
1-3. Kasi ni vichi vinyake ivyo vingapangiska kuti ŵabali na ŵadumbu awo ŵakuchita uteŵeti wanyengozose, uteŵeti wawo usinthe?
ROBERT na Mary Jo ŵakati: “Tikati tachita umishonale vyaka 21, ŵapapi ŵithu wose ŵanayi ŵakachekura chomene. Tikaŵa ŵakukondwa kuti tamuŵapwelelera. Kweni chikaŵa chakuŵinya chomene kufumako uko tikateŵeteranga chifukwa tikazgoŵera.”
2 William na Terrie ŵakati: “Tikati tamanya kuti tiwelerengekoso yayi ku uteŵeti withu chifukwa cha ulwari, tikalira. Tikamanya kuti chilato chithu chakuti tikateŵetere Yehova ku charu chinyake chikamalira penepapa.”
3 Aleksey wakuti: “Tikamanya kuti ŵakususka ŵakakhumbanga kujara ofesi yithu ya munthavi iyo nkhateŵeterangako. Kweni tikazizwa nipera ŵati ŵayijara nadi, ndipo tikeneranga kufumapo pa Beteli.”
4. Kasi tidumbiskanenge mafumbo wuli mu nkhani iyi?
4 Ŵabali na ŵadumbu ŵanandi awo ŵakachitanga uteŵeti wanyengozose kusazgapo awo ŵakateŵeteranga pa Beteli ŵakapika mauteŵeti ghanyake. * Ŵabali na ŵadumbu ŵakugomezgeka aŵa, chingaŵaŵira chakusuzga chomene kuleka uteŵeti uwo ŵakawutemwanga chomene. Kasi ntchivichi chingaŵawovwira? Kasi mungaŵawovwira wuli? Mazgoro gha mafumbo agha ghangatovwira tose para vinthu vyasintha pa umoyo withu.
UMO MUNGACHITIRA PARA VINTHU VYASINTHA
Chifukwa wuli chingaŵa chakusuzga ku ŵateŵeti ŵanyengozose kuleka mulimo wawo para uteŵeti wasintha? (Wonani ndime 5) *
5. Kasi tingajipulika wuli para uteŵeti wasintha?
5 Kwali tikuteŵetera ku malo ghanyake panji pa Beteli, nyengo zinyake tingatemwa chomene ŵanthu na malo agho tikuteŵeterako. Ntheura tikuŵa na chitima chomene para taphalirika kuti tileke uteŵeti uwo tikachitanga. Tikuŵasoŵa ŵabali na ŵadumbu ŵithu awo tikateŵeteranga nawo ndipo tikuŵafipira mtima, chomenechomene para taleka uteŵeti chifukwa chakuti ŵanthu ŵakususka ŵakatitambuzganga. (Mat. 10:23; 2 Kor. 11:28, 29) Kweniso chingaŵa chakusuzga chomene kulutaso ku malo ghanyake chifukwa tingakhumbikwira kuti tikasambireso umoyo unyake, nanga kungaŵa kukaya kwithu. Robert na Mary Jo ŵakati: “Tikaluwa mitheto yithu kweniso chikaŵa chakusuzga kupharazga mu chiyowoyero chithu. Chifukwa chakuti tikateŵetera ku malo ghanyake nyengo yitali, tati tawerako tikaŵa nga ndise ŵalendo mu charu chithu.” Ŵanandi awo uteŵeti wawo uli kusintha ŵangasangana na masuzgo gha vyachuma. Nkhongono zingaŵamalira, ŵangagongowa, ndipo ŵangamba kwenjerwa. Kasi ntchivichi chingawovwira?
Ntchakuzirwa chomene kusendelera kwa Yehova na kumugomezga (Wonani ndime 6-7) *
6. Kasi tingachita wuli kuti tiŵe pafupi na Yehova?
6 Ŵani pafupi na Yehova. (Yak. 4:8) Kasi tingachita wuli nthena? Tigomezge chomene Yehova uyo ‘Wakupulika malurombo.’ (Sal. 65:2) Lemba la Salimo 62:8 likuti: “Pungulirani mitima yinu pamaso pake.” Yehova wangachita vinandi “kuluska vinthu vyose ivyo tikulomba panji kughanaghana.” (Efe. 3:20) Yehova wakutipa vinthu ivyo talomba pera yayi. Wangachita vinthu ivyo takhazganga yayi kuti watovwire pa masuzgo ghithu.
7. (a) Kasi ntchivichi chitovwirenge kuti tilutilire kuŵa pafupi na Yehova? (b) Kuyana na Ŵahebere 6:10-12, kasi paŵenge uwemi wuli para talutilira kuteŵetera Yehova mwakugomezgeka?
7 Tikwenera kuŵazga Malemba zuŵa lililose na kughanaghanirapo kuti tilutilire kuŵa pafupi na Yehova. Mishonale munyake wakati: “Tikwenera kulutilira kulondezga ndondomeko iyo tikaŵa nayo apo vinthu vikaŵa kuti vindasinthe, nga nkhusopa kwa mbumba na kunozgekera maungano.” Kweniso tikwenera kulutilira kupharazga makani ghawemi mu mpingo wasono. Yehova wakuŵakumbuka awo ŵakumuteŵetera mwakugomezgeka, nanga vingaŵa kuti pasono ŵakutondeka kuchita vinandi.—Ŵazgani Ŵahebere 6:10-12.
8. Kasi mazgu agho ghali pa 1 Yohane 2:15-17 ghangamovwirani wuli kuti muŵe na umoyo wambura kukhumba vinandi?
8 Kukhumba vinandi yayi. Mungazomerezganga chara kuti masuzgo gha mu charu cha Satana ichi ghamutondeskani kuteŵetera Yehova. (Mat. 13:22) Mungaŵapulikiranga yayi ŵanthu ŵambura kumanya Yehova, ŵabwezi, panji ŵabali ŵinu, awo ŵakuyowoya kuti mukwenera kuŵa na ndalama zinandi kuti mukhale makora. (Ŵazgani 1 Yohane 2:15-17.) Gomezgani Yehova, uyo walayizga kuti watipenge vyose ivyo tikukhumbikwira mwauzimu na mwakuthupi wuwo “pa nyengo yakwenelera.”—Heb. 4:16; 13:5, 6.
9. Kuyana na Zintharika 22:3, 7, chifukwa wuli ntchakuzirwa kuleka kuŵa na ngongoli zambura kwenelera? Ndipo kasi ntchivichi chingatovwira kuti tichitenge mwahara vinthu?
9 Gegani ngongoli zambura kwenelera. (Ŵazgani Zintharika 22:3, 7.) Pangakhumbikwa ndalama zinandi kuti munthu wasame, ndipo ivi vingapangiska kuti wanjire mu ngongoli. Kuti muchepeske ngongoli, lekani kugura vinthu vyambura kukhumbikwa. Mwachiyelezgero, chingaŵa chakusuzga kumanya unandi wa ndalama izo tikukhumbikwira kukongora, chomene para tikupwelelera wamumbumba yithu uyo wakulwara. Para vyaŵa nthena, kumbukani kuti “lurombo na maŵeyelero,” vingamovwirani kuti muchite mwamahara. Yehova wamovwiraninge ndipo wamupaninge mtende uwo “uvikilirenge mitima yinu na maghanoghano ghinu.”—Fil. 4:6, 7; 1 Pet. 5:7.
10. Kasi tingaŵasanga wuli ŵabwezi ŵanyake?
10 Muŵe na ŵabwezi ŵawemi. Ŵaphalirani ŵanyinu umo mukujipulikira na masuzgo agho mukukumana nagho, chomenechomene awo ŵali kukumanapo na masuzgo ghakuyana na ghinu. Para mungachita nthena, vingamovwirani kuti muleke kusuzgika maghanoghano. (Muph. 4:9, 10) Ŵabwezi awo mukasanga uko mukateŵeteranga ŵalutilirenge kuŵa ŵabwezi ŵinu. Sono apo mukuchita uteŵeti unyake mukweneraso kusanga ŵabwezi ŵanyake. Mukwenera kumanya kuti mungasanga ŵabwezi pekha para muli ŵaubwezi. Kasi mungasanga wuli ŵabwezi ŵaphya? Ŵaphaliraniko ŵanyinu viwemi ivyo vikamuchitikirani apo mukachitanga uteŵeti mwakuti nawo ŵawone kuti mukukondwa. Ŵanyake mu mpingo ŵangapulikiska yayi chifukwa icho mukutemwera uteŵeti wanyengozose, kweni ŵanyake ŵangakhumba kumanya vinandi ndipo ŵangaŵa ŵabwezi ŵinu. Kweni mukwenera kuŵa maso kuti muleke kukhalira waka kuyowoya vya imwe panji ivyo mwachita mu gulu la Yehova ndiposo kuyowoya vinthu vyambura kukhozga.
11. Kasi mungachita wuli kuti mulutilire kukondwa mu nthengwa yinu?
11 Para mwaleka uteŵeti chifukwa chakuti mfumu panji muwoli winu ni mulwari, kumupa mulandu yayi. Kweniso usange ndimwe mukulwara, kujipa mulandu yayi, kughanaghana kuti mwamutangwaniska munyinu. Kumbukani kuti ndimwe “thupi limoza” ndipo mukalayizga Yehova kuti muzamupwelelerana visuzge viti wuli. (Mat. 19:5, 6) Para mukaleka uteŵeti chifukwa cha nthumbo, mumuphalirenge mwana winu kuti ngwakuzirwa chomene kwa imwe kujumpha uteŵeti uwo mukachitanga. Muphaliraniso kuti wali nga “ntchiharo” chakufuma kwa Chiuta. (Sal. 127:3-5) Kweniso mukwenera kumuphalira vinthu viwemi ivyo vikamuchitikiraninge apo mukachitanga uteŵeti. Para mwachita nthena muwovwirenge mwana winu kuti nayo wazakachite uteŵeti wanyengozose.
UMO ŴANJI ŴANGAWOVWILIRAPO
12. (a) Kasi tingaŵawovwira wuli awo ŵakuchita uteŵeti wanyengozose kuti ŵalutilire kuchita uteŵeti wawo? (b) Kasi tingachita wuli kuti ŵalutilire kuchita makora uteŵeti wawo?
12 Mipingo yinandi kweniso ŵabali na ŵadumbu ŵanyake ŵakovwira awo ŵakuchita uteŵeti wanyengozose kuti ŵalutilire kuchita uteŵeti wawo. Ŵakuŵakhozga, ŵakuŵawovwira na vinthu vyakuthupi panji kuŵawovwira kupwelelera ŵapapi ŵawo awo ŵali kunyumba. (Gal. 6:2) Para mwapokera awo uteŵeti wawo wasintha mu mpingo winu, muleke kuŵawona nga kuti ŵali kutondeka uteŵeti wawo panji ŵali kubudiska chinthu chinyake. * M’malo mwake muŵawovwire kuti ŵalutilire kuchita makora uteŵeti wawo. Ŵapokelerani makora na kuŵawonga chifukwa cha mulimo uwo ŵali kuchita, nanga vingaŵa kuti pasono ŵakutondeka kuchita vinandi chifukwa cha ulwari. Ŵamanyani makora. Sambiraniko kwa iwo.
13. Kasi tingawovwira wuli awo uteŵeti wawo wasintha?
13 Nyengo zinyake awo uteŵeti wawo wasintha ŵangakhumbikwira kuŵawovwira kusanga nyumba, ndalama zakwendera, ntchito, na kuŵapako vinthu vinyake ivyo ŵakukhumbikwira. Mungaŵaphaliraso umo ŵanthu ŵakukhalira mu chigaŵa icho ŵafikira, nkharo yawo na ivyo ŵakutemwa. Chakuzirwa chomene kwa iwo ni para mukuŵapulikiska. Ŵanyake ŵangaŵa kuti ŵakusuzgika na ulwari panji ŵabali ŵawo ndiwo ŵakulwara. Ŵangaŵa kuti ŵali na chitima chifukwa cha nyifwa ya wakutemweka wawo. * Kweniso ŵangaŵa kuti ŵakudandawura chifukwa chakuti ŵakukumbuka ŵabali na ŵadumbu awo ŵakateŵeteranga nawo lumoza, ndipo ŵali na phukwa. Pangatora nyengo kuti ŵakhazikike.
14. Kasi ŵabali na ŵadumbu mu mpingo ŵakamovwira wuli mudumbu munyake uyo uteŵeti wake ukasintha?
14 Para mungapharazgira nawo lumoza na kuŵakhozga mungaŵawovwira kuti ŵalutilire kuchita makora. Mudumbu munyake uyo wakateŵeteranga ku charu chinyake wakuti: “Pambere uteŵeti undasinthe, nkhasambizganga ŵanthu Baibolo zuŵa lililose. Kweni ukati wasintha chikaŵa chakusuzga kupharazgira munthu nanga nkhumujulira Baibolo panji kumulongora vidiyo. Kweni ŵabali na ŵadumbu ŵa mpingo uwo nkhafikira ŵakanipemphanga kuti nilute nawo ku maulendo ghakuwelerako na ku masambiro ghawo. Nkhati nawona kuti ŵabali na ŵadumbu ŵakugomezgeka na ŵakulimbikira aŵa, ŵali na masambiro gha Baibolo agho ghakakuranga mwauzimu, vikanovwira kuti nambe kuchiwona mwakwenelera chigaŵa chakupharazgako. Nkhasambira umo ningambira kuyowoya na ŵanthu mu chigaŵa ichi. Vyose ivi vikanovwira kuti niŵeso wakukondwa.”
LUTILIRANI KUCHITA MAKORA
Para uteŵeti winu wasintha, sangani nthowa zakupharazgira mu chigaŵa chinu (Wonani ndime 15-16) *
15. Kasi mungachita wuli kuti uteŵeti winu uphya wendenge makora?
15 Vinthu vingamwenderani makora pa uteŵeti winu uphya. Mungaghanaghananga kuti ndimwe ŵakutondeka yayi panji ŵambura kuzirwa lekani uteŵeti winu wasintha. Ghanaghanirani umo Yehova wamovwilirani, ndipo lutilirani kupharazga. Yezgani Ŵakhristu ŵakwambilira ŵakugomezgeka. Kulikose uko ŵakaŵanga, ŵakalutilira “kupharazga makani ghawemi gha mazgu gha Chiuta.” (Mil. 8:1, 4) Para mwalutilira kupharazga muwonenge uwemi wake. Mwachiyelezgero, ŵapayiniya awo ŵakachimbizgika ku charu chinyake, ŵakasamukira mu charu chinyake chapafupi uko kukaŵaso ŵanthu ŵanandi ŵa chiyowoyero chawo. Mu myezi yichoko waka kukapangika magulu ghanandi gha chiyowoyero ichi.
16. Kasi mungachita wuli kuti mukondwenge na uteŵeti winu wasono?
16 “Chimwemwe cha Yehova ni nkhongono zinu.” (Neh. 8:10) Tikuŵa ŵakukondwa zanadi para tili paubwezi wakukhora na Yehova, uteŵeti yayi nanga tingaŵa kuti tikuwutemwa chomene. Ntheura, lutilirani kwenda na Yehova, gomezgani iyo kuti wamupani vinjeru, wamulongozgani, na kumovwirani. Kumbukani kuti uteŵeti uwo mukachitanga mukawutemwanga chifukwa chakuti mukakondwanga kovwira ŵanthu ku chigaŵa icho. Ŵikani mtima pa uteŵeti winu wasono ndipo mujiwonerenge mwekha umo Yehova wamovwiliraninge kuti mwambe kuwutemwa.—Muph. 7:10.
17. Kasi tikwenera kukumbuka vichi za uteŵeti uwo tikuchita sono?
17 Tikwenera kumanya kuti titeŵeterenge Yehova kwamuyirayira, kweni uteŵeti uwo tikuchita ngwakanyengo. Mu charu chiphya, tose mauteŵeti ghangazakasintha. Aleksey, uyo tamuzunura kukwambilira wakugomezga kuti umo uteŵeti wake uli kusinthira, vikumovwira kunozgekera para uteŵeti wake wazakasinthaso munthazi. Iyo wakuti: “Nkhamanyanga kuti Yehova waliko kweniso kuti charu chiphya chizenge nadi. Kweni nkhawonanga nga kuti Yehova wali kutali na ine ndiposo kuti charu chiphya chikuchedwa. Sono nkhuwona kuti nili pafupi chomene na Yehova ndiposo kuti charu chiphya chili pafupi chomene.” (Mil. 2:25) Ntheura kwali tikuchita uteŵeti uli, tiyeni tilutilire kwenda na Yehova. Watitayenge yayi, kweni watovwirenge kuti tikondwenge para tikuchita uteŵeti withu kulikose uko tingaŵa.—Yes. 41:13.
SUMU 90 Tikhwimiskane Yumoza na Munyake
^ ndime 5 Nyengo zinyake ŵabali na ŵadumbu awo ŵakuchita uteŵeti wanyengozose, uteŵeti wawo ungasintha panji ungamara. Nkhani iyi yikulongosora masuzgo agho ŵabali na ŵadumbu aŵa ŵakukumana nagho ndiposo ivyo ŵangachita kuti vinthu vilutilire kuŵayendera makora. Yikulongosoraso ivyo ŵanji ŵangachita kuti ŵakhozge na kovwira ŵabali na ŵadumbu aŵa, kweniso yili na fundo izo zingatovwira tose para vinthu vyasintha pa umoyo withu.
^ ndime 4 Mwakuyana waka, ŵabali ŵanyake ŵati ŵaŵa na vyaka vinandi, mauteŵeti ghawo ŵakalekera ŵabali ŵachinyamata. Wonani nkhani ya mutu wakuti “Ŵakhristu Ŵachekuru—Yehova Wakumuzirwiskani Chifukwa Muli Ŵakugomezgeka” mu Gongwe la Mulinda la Seputembala 2018, na “Lutilirani Kuŵa na Mtende wa mu Mtima Nanga Vinthu Vingasintha” mu Gongwe la Mulinda la Okutobala 2018.
^ ndime 12 Ŵalara ku mpingo uwo ŵabali aŵa ŵafuma ŵakwenera kulembera kalata mpingo uwo ŵaliko sono mwaluŵiro kuti ŵabali aŵa ŵalutilire kuchita mauteŵeti ghawo nga mbapayiniya, ŵalara, panji ŵateŵeti ŵakovwira kwambura kuchedwa.
^ ndime 13 Wonani nkhani ya mutu wakuti “Wovwiri Uwemi ku Ŵanthu Awo Ŵali na Chitima,” mu Wukani! ya 2018 ya nambara 3.
^ ndime 57 MAZGU GHAKULONGOSORA CHITHUZI: Mubali na mudumbu awo ŵakachitanga umishonale ku charu chinyake ŵakulayirana na ŵabali na ŵadumbu pa Nyumba ya Ufumu.
^ ndime 59 MAZGU GHAKULONGOSORA CHITHUZI: Ŵati ŵafika ku charu chawo ŵakulutilira kulomba kwa Yehova kuti waŵawovwire kulimbana na masuzgo.
^ ndime 61 MAZGU GHAKULONGOSORA CHITHUZI: Yehova waŵawovwira ndipo ŵambiraso kuchita uteŵeti wanyengozose. Ŵakuchita ivyo ŵakasambira apo ŵakaŵa ŵamishonale kuti ŵapharazgire ŵalendo awo ŵiza mu charu chawo ndipo ŵali mu chigaŵa cha mpingo wawo.
