1. Kasi Yesu wakalongora chiyelezgero wuli ku ŵasambiri ŵake, ndipo iwo ŵakachita wuli? (Wonani chithuzi cha pa chikopi.)

NYENGO yose iyo wakaŵira pano pasi, Yesu wakagongowapo yayi pa uteŵeti wake, ndipo wakukhumba kuti wose awo ŵakumulondezga nawo ndimo ŵachitirenge. (Yoh. 4:35, 36) Apo ŵasambiri ŵakaŵa pamoza na Yesu, ŵakalimbikiranga chomene kupharazga. (Luka 10:1, 5-11, 17) Kweni Yesu wati wakakika na kukomeka, ŵasambiri ŵakawelera dankha nyuma pakupharazga. (Yoh. 16:32) Yesu wati wawuskika, wakaŵachiska kuti ŵaŵikengepo mtima pakupharazga. Ndipo iyo wati wakwelera kuchanya, ŵasambiri ŵakalimbikira chomene kupharazga mwakuti ŵalwani ŵawo ŵakadandawura kuti: “Wonani, mwazuzga Yerusalemu na chisambizgo chinu.”​—Mil. 5:28.

2. Kasi Yehova watumbika wuli ntchito ya kupharazga?

² Yesu ndiyo wakalongozganga Ŵakhristu ŵakwambilira pa mulimo wakupharazga, ndipo Yehova wakaŵatumbika chifukwa ŵanthu ŵanandi ŵakapokelera uthenga. Mwachiyelezgero, pa Pentekoste 33 C.E., ŵanthu pafupifupi 3,000 ŵakabatizika. (Mil. 2:41) Nakuti ŵasambiri ŵakalutilira kusazgikira chomene. (Mil. 6:7) Ndipouli, Yesu wakayowoyerathu kuti ntchito ya kupharazga yizamuchitika chomene mu mazuŵa ghaumaliro.​—Yoh. 14:12; Mil. 1:8

3-4. Chifukwa wuli mu vigaŵa vinyake ntchito ya kupharazga njakusuzga, ndipo tiwonenge vichi mu nkhani iyi?

³ Tose tikuyezgayezga kuti tileke kugongowa pa uteŵeti withu. Mu vyaru vinyake, ntchipusu kuchita nthena. Chifukwa wuli? Chifukwa ŵanthu ŵanandi ŵakukhumba kusambira Baibolo mwakuti ŵanyake ŵakuchita kulindilira m’paka Kaboni  wasangike! Kweni mu vigaŵa vinyake, ntchito ya kupharazga yikuŵa yakusuzga; ŵanthu ŵakusangika viŵi yayi pa nyumba, ndipo awo ŵasangika nyengo zinyake ŵakukhumba yayi kupulika vya Baibolo.

⁴ Usange mukukhala mu chigaŵa icho ntchito ya kupharazga njakusuzga, masachizgo agho ghali mu nkhani iyi ghamovwiraninge. Tiwonenge ivyo ŵanyake ŵachita kuti ŵafikire ŵanthu ŵanandi mu uteŵeti wawo. Ndipo tiwonengeso chifukwa icho tilutilirenge kupharazga kwali ŵanthu ŵakutegherezga uthenga withu panji yayi.

5. Kasi ni masuzgo wuli agho Ŵakaboni ŵanandi ŵakukumana nagho?

⁵ Ŵakaboni ŵanandi vikuŵasuzga chomene kufikira ŵanthu ŵanyake mu nyumba zawo. Ŵapharazgi ŵanyake ŵakukhala mu malo agho nyumba zinandi zili na chivikiliro chikuru panji zili mu mipanda. Pa geti pangaŵa mulonda uyo wakukana kunjizga waliyose uyo wandachemeke. Mu malo ghanyake ŵapharazgi ŵakwenda nyumba na nyumba makora waka, kweni ŵanthu ŵakusangika viŵi yayi panyumba. Ŵapharazgi ŵanyakeso ŵakupharazga mu mizi panji vigaŵa vyakutali uko kukukhala ŵanthu ŵachoko waka. Nyengo zinyake ŵapharazgi aŵa ŵakwenda mitunda yitali kuti ŵakakumane waka na munthu yumoza, kweni nayo panji ŵakukamusangaso yayi pa nyumba! Usange tikukumana na masuzgo agha, tingagongowanga yayi. Kasi tingachita wuli kuti timarane na masuzgo agha na kufikira ŵanthu ŵanandi mu uteŵeti?

6. Kasi ŵapharazgi ŵakuyana wuli na ŵalovi?

⁶ Yesu wakayaniska ntchito ya kupharazga na ntchito ya mulovi. (Mrk. 1:17) Ŵalovi ŵanyake ŵangaloŵa nyengo yitali kwambura kukorapo somba nanga njimoza. Kweni ŵakugongowa yayi; ŵakusintha waka umo ŵangachitira. Ŵakusintha nyengo, malo, panji nthowa zakukolera somba. Ndivyo nase tingakhumbikwira kuchita pa uteŵeti withu. Tiyeni tiwone masachizgo agha.

7. Kasi chingachitika ntchivichi usange tingasintha nyengo ya kupharazgira?

⁷ Yezgani kusintha nyengo. Tingadumbiskana na ŵanthu ŵanandi usange tikupharazga pa nyengo iyo ŵangasangika pa nyumba. Nakuti waliyose m’paka wawelere kunyumba nyengo yinyake. Ŵabali na ŵadumbu ŵanandi ŵakuwona kuti ntchiwemi kupharazga chakumuhanya panji mise chifukwa ndipo ŵanthu ŵanandi ŵakusangika pa nyumba. Chinyake ntchakuti ŵeneko nyumba ŵangaŵa ŵakufwatuka kuyowoya nase panyengo zanthena izi. Panyake mungayezga kulondezga masachizgo gha mulara munyake zina lake David. Iyo wakuti para wapharazga kwakanyengo mu chigaŵa chake, iyo na munyake uyo ŵendera lumoza ŵakuweleraso ku nyumba izo ŵangusangamo ŵanthu yayi pakwamba. Iyo wakuti, “Chakuzizika ntchakuti para tawelerako tikusanga ŵanthu ŵanandi pa nyumba.” *

8. Kasi tingalondezga wuli fundo ya pa Mupharazgi 11:6 mu uteŵeti withu?

⁸ Tingagongowanga yayi. Nakuti ndivyo lemba ilo pajintha nkhani iyi likutichiska. (Ŵazgani Mupharazgi 11:6.) David, uyo tamuzunura kale, wakagongowa yayi. Pa nyumba yinyake, wakamusanga mweneko wa nyumba wati wambwata kanandi waka. Munthu uyu wakaŵa wakunweka kuyowoya nayo vya Baibolo ndipo wakati, “Nakhala mu chigaŵa ichi pafupifupi vyaka 8, kweni nindawonanepo na Ŵakaboni ŵa Yehova pa nyumba yane.” David wakuti, “Nasanga kuti para waŵasanga ŵanthu pa  nyumba zawo, kanandi ŵakutegherezga uthenga uwo tikupharazga.”

9. Kasi Ŵakaboni ŵanyake ŵachita wuli kuti ŵafikire ŵanthu awo ŵakusangika yayi pa nyumba?

⁹ Yezgani kusintha malo. Kuti ŵafikire ŵanthu awo ŵakusangika yayi pa nyumba, ŵapharazgi ŵanyake ŵakusintha malo ghakupharazgako. Mwachiyelezgero, vyalongora kuti kupharazga mu misewu kweniso na tumashelufu twamatayala ni nthowa ziwemi chomene kukumana na ŵanthu awo ŵakukhala mu nyumba izo ntchakukanizgika kupharazgako. Ivi vyawovwira kupharazgira ŵanthu awo ntchakusuzga kuŵafikira mu nyumba zawo. Chinyakeso ntchakuti ŵapharazgi ŵanandi ŵasanga kuti ŵanthu ŵakuzomera kuyowoya nawo panji kupokera mabuku para ŵali pa malo agho kukusangika ŵanthu ŵanandi, mu misika, na mu mashopu. Floiran, mulaŵiliri wa dera ku Bolivia, wakuti: “Tikuluta ku misika na ku mashopu nyengo yapakati pa 1:00 p.m. na 3:00 p.m. apo kukuŵa ŵanthu ŵachoko ŵakugura. Nyengo zinandi ŵanthu ŵakutitegherezga ndipo tikwambiskaso masambiro gha Baibolo.”

10. Kasi mungachitaso vichi kuti mupharazgire ŵanthu?

¹⁰ Yezgani kusintha nthowa. Tiyelezgere kuti mwayezga kanandi waka kuti mukumane na munthu munyake. Mwalutapo nyengo zakupambanapambana ku nyumba yake kweni wakusangika yayi pa nyumba. Kasi paliso nthowa zinyake izo mungamupharazgira munthu uyu? Katarína wakuti, “Awo ŵakusangikapo yayi pa nyumba nkhuŵalembera makalata, kuŵaphalira ivyo nkhukhumba kuyowoya nawo maso na maso.” Kasi fundo njakuti wuli apa? Yezgani nthowa yiliyose iyo mungakwaniska kuti mupharazgire waliyose mu chigaŵa chinu.

11. Chifukwa wuli ŵanthu ŵanyake ŵakukhumba yayi kupulika uthenga withu?

¹¹ Ŵanthu ŵanyake ŵakukhumba yayi napachoko kupulika uthenga withu. Ŵakuwona kuti ntchakukhumbikwa yayi kumanya Chiuta panji Baibolo. Ŵakugomezga yayi mwa Chiuta chifukwa ŵakuwona kuti mu charu muli masuzgo ghanandi. Ŵakukana Baibolo chifukwa cha kuwona upusikizgi wa ŵalongozgi ŵa chisopa awo ŵakuti ŵakulondezga fundo za mu Baibolo. Ŵanyake ŵakutangwanika na ntchito zawo, mabanja, panji masuzgo ghawo, ndipo ŵakuwona kuti Baibolo lingaŵawovwira yayi. Kasi ise tingachita wuli kuti tilutilire kuŵa ŵachimwemwe para awo tikuŵapharazgira ŵakuwona kuti uthenga withu ngwakuzirwa yayi?

12. Kasi fundo ya pa Ŵafilipi 2:4 yingatovwira wuli mu uteŵeti?

¹² Longorani kuti mukuŵaghanaghanira. Ŵanandi awo pakwamba ŵakakhumbanga yayi kupulika uthenga withu, pamanyuma ŵakuzomera para ŵawona kuti uyo wakuŵapharazgira wakuŵaghanaghanira. (Ŵazgani Ŵafilipi 2:4.) Mwachiyelezgero, David, uyo tamuzunura kale, wakuti, “Usange munthu wakuti wakukhumba yayi kupulika uthenga withu, tikuŵika dankha pamphepete Baibolo panji mabuku ghithu, na kuyowoya kuti: ‘Nkhukhumba kumanya chifukwa icho mukughanaghanira nthena.’” Ŵanthu ŵakumanya para ukuŵaghanaghanira. Ŵangaluwa ivyo taŵaphalira, kweni ŵangaluwa yayi para talongora kuti tikuŵaghanaghanira. Nanga ni para mweneko nyumba wandatizomerezge kuyowoya, vyakuchita kweniso kawonekero ka chisko chithu vingalongora kuti tikumughanaghanira.

13. Kasi tingachita wuli kuti uthenga withu uŵenge wakukolerana na munthu waliyose uyo takumana nayo?

¹³ Tikulongora kuti tikughanaghanira munthu waliyose para tikusintha uthenga withu kuti uyane na munthu uyo tikuyowoya nayo. Mwachiyelezgero, kasi pa nyumba iyo tafika pakulongora kuti pali ŵana? Usange ŵalipo, panji ŵapapi ŵangatemwa kupulika fundo za mu Baibolo pa nkhani yakulera ŵana panji ulongozgi wa umo ŵangaŵira ŵakukondwa mu mbumba yawo. Kasi pa nyumba iyo tafika ŵali kuŵikapo maloko ghanandi pa chijaro? Usange ni nthena, tingasankha kuyowoya vya uchigeŵenga kweniso wofi uwo ŵanthu ŵali nawo pa charu, ivyo panji mwenenyumba wangatemwa kumanya umo vizamumalira. Muli mose umo vingaŵira, para mwakumana na munthu uyo wakutegherezga, yezgani kumovwira kumanya umo ulongozgi wa mu Baibolo ungamovwilira. Katarína, uyo tamuzunura kale, wakuti, “Nkhujikumbuska umo Baibolo lanovwilira pa umoyo wane.” Pa chifukwa ichi,  Katarína wakuyowoya mwakusimikizga, ndipo ŵanthu awo wakuyowoya nawo ŵakuwona kuti nayo wakugomezga ivyo wakuyowoya.

14. Kuyana na Zintharika 27:17, kasi ŵanthu awo ŵakupharazgira lumoza ŵangawovwirana wuli?

¹⁴ Sangani wovwiri ku ŵanyinu. Mu nyengo yakale, Paulosi wakasambizga Timote nthowa izo iyo wakachitanga pakupharazga na kusambizga, ndipo wakachiska Timote kuti nayo wasambizge ŵanji. (1 Kor. 4:17) Nga Timote, nase tingasambira vinandi ku awo ŵakumanya tunthu mu mpingo withu. (Ŵazgani Zintharika 27:17.) Wonani umo wakachitira mubali munyake zina lake Shawn. Nyengo yitaliko, wakachitanga upayiniya mu chigaŵa chinyake cha kumizi uko ŵanthu ŵanandi ŵakaŵa ŵakukhorwa na chisopa chawo. Kasi wakachita wuli kuti walutilire kuŵa wachimwemwe? Iyo wakuti: “Para mwaŵi wasangika, nkhaŵanga na munyane pakupharazga. Munthowa para tafuma pa nyumba yinyake kuya pa yinyake tikawovwirananga umo tingakuzgira maluso ghithu pakusambizga. Mwachiyelezgero, tikadumbiskananga ivyo mwenenyumba wanguyowoya na umo ise tanguchitira. Kufuma apo, tikadumbiskananga umo tingachitira mwakupambanako usange tingakumanaso na munthu wanthena.”

15. Chifukwa wuli lurombo ndwakuzirwa pa mulimo withu wakupharazga?

¹⁵ Lombani Yehova kuti wamovwirani. Pemphani Yehova kuti wamovwirani nyengo yiliyose para mukupharazga. Palije icho tingachita patekha kwambura mzimu utuŵa wa Chiuta. (Sal. 127:1; Luka 11:13) Para mukupempha wovwiri kwa Yehova, zunurani icho mukukhumba. Mwachiyelezgero, mupemphani kuti wamulongozgerani kwa munthu uyo wali na maghanoghano ghakwenelera ndipo ngwakunozgeka kutegherezga. Kufuma apo, chitani vinthu kuyana na lurombo lwinu pakupharazgira waliyose uyo mwakumana nayo.

16. Chifukwa wuli sambiro la taŵene ndakukhumbikwa kuti tipharazgire makora ŵanthu?

¹⁶ Sangani nyengo yakusambilira pamwekha. Mazgu gha Chiuta ghakuti: ‘Manyani khumbo la Chiuta, ilo ndiwemi, lakuzomerezgeka na lakufikapo.’ (Rom. 12:2) Para ise tikukhorwa kuti tikumanya unenesko wakukhwaskana na Chiuta, tiyowoyenge mwakusimikizga chomene para tikupharazgira ŵanthu mu uteŵeti. Katarína, uyo wazunulika kale wakuti: “Nyengo yichoko waka iyo yajumphapo, nkhawona kuti nkhwenera kukhozga chipulikano chane pa visambizgo vinyake vya mu Baibolo. Ntheura nkhasambira mwakufwasa ukaboni wakuti kuli Mlengi, Baibolo ni Mazgu gha Chiuta nadi, kweniso kuti Chiuta wali na gulu ilo likwimira iyo mazuŵa ghano.” Katarína wakuti chifukwa cha kusambira payekha, chipulikano chake chakhora kweniso chimwemwe chake mu uteŵeti chasazgikira.

17. Chifukwa wuli Yesu wakagongowa yayi pa uteŵeti wake?

¹⁷ Yesu wakagongowa yayi ndipo wakalutilira kupharazga nangauli ŵanyake ŵakakhumbanga yayi kupulika uthenga wake. Chifukwa wuli? Chifukwa iyo wakamanyanga kuti ŵanthu ŵakukhumbikwira kumanya unenesko, ndipo wakakhumbanga kovwira ŵanthu ŵanandi kuti ŵapulike uthenga wa Ufumu. Wakamanyangaso kuti ŵanyake awo pakwamba ŵakakhumbanga yayi pamanyuma ŵangazomera uthenga. Wonani ivyo vikachitika mu mbumba yakwake. Pa uteŵeti wake wa vyaka vitatu na hafu, pakaŵavya munung’una wake uyo wakazgoka msambiri wake. (Yoh. 7:5) Kweni Yesu wati wawuskika, ŵanung’una ŵake ŵakazgoka Ŵakhristu.​—Mil. 1:14.

18. Chifukwa wuli tikulutilira kupharazga?

¹⁸ Ise tikumanya yayi kuti ninjani uyo wasambirenge unenesko wa mu Baibolo. Ŵanthu ŵanyake ŵakutora nyengo yitali kuti ŵachitepo  kanthu pa uthenga uwo taŵapharazgira kuluska ŵanyake. Nanga ni awo ŵakukhumba yayi kupulika uthenga withu ŵakuwona nkharo yithu yiwemi na mtima walusungu, ndipo pamanyuma ŵangamba ‘kupeleka uchindami kwa Chiuta.’​—1 Pet. 2:12.

19. Kuyana na 1 Ŵakorinte 3:6, 7, kasi tikwenera kumanya vichi?

¹⁹ Apo ise tikupanda na kuthilira, tikwenera kumanya kuti Chiuta ndiyo wakukuzga. (Ŵazgani 1 Ŵakorinte 3:6, 7.) Getahun, mubali uyo wakuteŵetera ku Ethiopia, wakuti: “Kwa vyaka vyakujumpha 20, nkhaŵa nekha Kaboni mu chigaŵa chithu. Kweni sono tili ŵapharazgi 14. Ŵapharazgi 13 ŵali kubatizika, kusazgapo muwoli wane na ŵana ŵithu ŵatatu. Pa maungano, pa avereji tikuwungana ŵanthu 32.” Getahun ngwakukondwa kuti wakalutilira kupharazga apo wakalindiliranga mwakuzikira kuti Yehova waguzire ŵanthu ŵamitima yiwemi ku gulu lake!​—Yoh. 6:44.

20. Kasi tikuyana wuli na awo ŵakuthaska ŵanthu pangozi?

²⁰ Yehova wakuwona ŵanthu wose kuti mbakuzirwa. Watipa mwaŵi wakugwira ntchito na Mwana wake, ya kuwunganya ŵanthu kufuma mu mitundu yose pambere umaliro wa mgonezi uwu undafike. (Hag. 2:7) Mulimo withu wakupharazga tingawuyaniska na ntchito ya kuthaska ŵanthu pangozi. Ndipo ise tili nga ni gulu ilo latumika kukathaska ŵanthu awo ŵajalirika mu mgodi. Nangauli ŵachoko waka ndiwo ŵangathaskapo ŵanthu, kweni wose awo ŵangulutako ŵakuŵa kuti ŵawovwirapo pa ntchito yakuzirwa iyi. Ndivyo nase tikuchita mu uteŵeti withu. Tikumanya yayi kuti mbanthu ŵalinga awo ŵathaskikenge ku mgonezi wa Satana. Kweni Yehova wangaŵawovwira ŵanthu aŵa kwizira mwa waliyose wa ise. Andreas, uyo wakukhala ku Bolivia, wakuti, “Para munthu wasambira unenesko wa mu Baibolo na kubatizika, nkhuwona kuti vyachitika chifukwa cha wovwiri wa ŵanthu ŵanandi.” Nase tiŵenge na mtima wenewuwu pakuchita uteŵeti withu. Usange ndimo tichitirenge, Yehova watitumbikenge, ndipo tisangenge chimwemwe pakuchita uteŵeti withu.