NKHANI YAKUSAMBIRA 10
Para Mukumutemwa Yehova na Kumuwonga Mubatizikenge
“Ntchivichi chikunitondeska kubatizika?”—MIL. 8:36.
SUMU 37 Kuteŵetera Yehova na Umoyo Wose
CHILATO CHA NKHANI IYI *
1-2. Kuyana na Milimo 8:27-31, 35-38, kasi ntchivichi chikawovwira nduna ya ku Etiyopiya kuti yibatizike?
KASI namwe mukukhumba kubatizika na kuŵa msambiri wa Khristu? Ŵanandi ŵali kubatizika chifukwa chakuti ŵakutemwa Yehova na kumuwonga. Wonani ivyo yikachita nduna yinyake iyo yikateŵeteranga fumukazi ya ku Etiyopiya.
2 Nduna iyi yikachitapo kanthu mwaluŵiro pa ivyo yikasambira mu Malemba. (Ŵazgani Milimo 8:27-31, 35-38.) Kasi ntchivichi chikayiwovwira? Yikazirwiskanga Mazgu gha Chiuta. Tikuyowoya nthena chifukwa chakuti nduna iyi yikaŵazganga buku la Yesaya uku yakwera gileta. Ndipo Filipu wati wayipharazgira, nduna iyi yikawonga chomene ivyo Yesu wali kuyichitira. Kweni chifukwa wuli nduna iyi yikalutanga ku Yerusalemu? Yikalutanga ku Yerusalemu chifukwa chakuti yikatemwanga Yehova. Kasi tikumanya wuli? Nduna iyi yikasopanga Yehova pera ku Yerusalemu. Yikaleka chisopa chake icho yikababikiramo na kwamba kusopa pamoza na mtundu uwo ukaŵa wakujipeleka kwa Chiuta waunenesko. Chifukwa chakuti nduna iyi yikatemwanga Yehova yikachitaso chinthu chinyake chakuzirwa chomene. Yikabatizika na kuŵa msambiri wa Khristu.—Mat. 28:19.
3. Kasi ntchivichi chingatondeska munthu kubatizika? (Wonani bokosi lakuti “ Kasi Mtima Winu Ukuyana na Dongo la Mtundu Wuli?”)
3 Namwe mubatizikenge para mukutemwa Yehova. Kweni chitemwa chingamutondeskaniso kubatizika. Kasi vingachitika wuli? Wonani viyelezgero vichoko waka ivi. Nyengo zinyake mungaŵa kuti mukuŵatemwa chomene ŵachibali na ŵabwezi ŵinu awo Mbakaboni yayi, ndipo mungamba kufipa mtima kuti usange mwabatizika ŵambenge kumutinkhani. (Mat. 10:37) Panji nyengo zinyake mungaŵa kuti mukutemwa vinthu ivyo Chiuta wakutinkha, kweni vikumusuzgani kuvileka. (Sal. 97:10) Panji umo muli kukulira, muli kuzgoŵera kukondwelera maholide agho ghakukolerana na chisopa chautesi. Ndipo nyengo zinyake mukukumbuka umo mukasangwiranga apo mukakondweleranga maholide agha. Ntheura ivi vingapangiska kuti mwambe kuwona kuti ntchakusuzga kuleka mitheto iyo yikumukwiyiska Yehova. (1 Kor. 10:20, 21) Kweni jifumbani kuti, “Kasi ni njani uyo nkhwenera kumutemwa chomene?”
UYO TIKWENERA KUMUTEMWA CHOMENE
4. Kasi chakuzirwa chomene ntchivichi icho chingamovwirani kuti mubatizike?
4 Mukwenera kuti muli na vinthu viwemi ivyo mukuvitemwa, ndipo mukuwonga chomene chifukwa cha kuŵa navyo vinthu ivi. Mwachiyelezgero, panji pambere mundambe kusambira na Ŵakaboni ŵa Yehova, Baibolo mukaliwonanga kale kuti ndakuzirwa kweniso mukamutemwanga kale Yesu. Sono pakuti mwaŵamanya Ŵakaboni ŵa Yehova, mukutemwa kuchezga nawo. Kweni kutemwa waka vinthu ivi kungamovwirani viŵi yayi kuti mujipeleke kwa Yehova na kubatizika. Chakuzirwa chomene icho chingamovwirani kuti mubatizike, nkhutemwa Yehova. Para mukutemwa chomene Yehova kuluska chilichose, muzomerezgenge chilichose yayi kumutondeskani kumuteŵetera. Kumutemwa Yehova kumovwiraninge kuti mubatizike kweniso kuti mulutilire kugomezgeka pamanyuma pa kubatizika.
5. Kasi tiwonenge mafumbo wuli mu nkhani iyi?
5 Yesu wakati tikwenera kutemwa Yehova na mtima withu wose, umoyo withu wose, maghanoghano ghithu ghose, na nkhongono zithu zose. (Mrk. 12:30) Tikwenera kughanaghanirapo umo Yehova wakutitemwera, ndipo ivi vitovwirenge kuti nase timutemwenge. Kasi mungachita wuli kuti mutemwenge Yehova na kumuchindika chomene? (1 Yoh. 4:19) Kasi tichitenge wuli para tamba kumutemwa chomene Yehova? *
6. Kuyana na Ŵaroma 1:20, kasi ni nthowa wuli yimoza iyo mungasambilira vya Yehova?
6 Sambirani vya Yehova kwizira mu chilengiwa. (Ŵazgani Ŵaroma 1:20; Chivu. 4:11) Yehova wali kulenga vyakumera na vinyama, ntheura ghanaghanirani umo vinthu ivi vikulongolera kuti ngwavinjeru chomene. Sambiranipo pa umo thupi linu lili kupangikira. (Sal. 139:14) Ndipo ghanaghanirani nkhongono izo Yehova wali kuŵika mu dazi ilo nalo lili mu gulu la nyenyezi * mabiliyoni ghanandi izo Yehova wali kulenga. (Yes. 40:26) Para mukughanaghanirapo pa vinthu ivyo Yehova wali kulenga, mumuchindikenge chomene. Ntchakuzirwa chomene kumanya kuti Yehova ngwavinjeru kweniso wankhongono. Kweni kuti mumutemwe chomene Yehova na kuŵa nayo paubwezi, mukwenera kumanya vinandi vyakukhwaskana na iyo.
7. Kuti mumutemwe chomene Yehova, kasi mukwenera kukhorwa kuti vichi?
7 Mukwenera kukhorwa kuti Yehova wakumutemwani imwe pamwekha. Kasi vikumusuzgani kugomezga kuti Mlengi wakuchanya na charu chapasi wakumuwonani kweniso kumupwelelerani? Para ni nthena, kumbukani kuti Yehova wali “kutali yayi na waliyose wa ise.” (Mil. 17:26-28) “Wakusanda mitima yose,” ndipo wakumulayizgani kuti ‘usange mukumupenja, iyo wasangikenge na imwe.’ (1 Mid. 28:9) Nakuti chifukwa icho mukusambilira Baibolo sono ntchakuti Yehova ‘wamuguzani.’ (Yer. 31:3) Para mukuwonga vyose ivyo Yehova wamuchitirani, mumutemwenge chomene.
8. Kasi mungalongora wuli kuti mukumuwonga Yehova chifukwa chakuti wakumutemwani?
8 Nthowa yimoza iyo mungalongolera kuti mukumuwonga Yehova pakuti wakumutemwani, nkhuyowoya nayo mu lurombo. Chitemwa chinu pa iyo chikurenge para mukumuphalira maghanoghano ghinu na kumuwonga pa vyose ivyo wakumuchitirani. Ndipo ubwezi winu na Yehova uŵenge wakukhora apo mukuwona umo wakuzgolera malurombo ghinu. (Sal. 116:1) Mukhorwenge kuti wakumupulikiskani. Kweni kuti muŵe paubwezi wakukhora na Yehova, mukwenera kumanya ivyo wakutemwa, kutinkha, na umo wakuchitira vinthu. Ndipo mukwenera kumanya ivyo wakukhumba kwa imwe. Nthowa yekha iyo mungamumanyira makora nkhuŵazga Mazgu ghake, Baibolo.
Kusambira Baibolo ni nthowa yiwemi chomene iyo mungaŵira paubwezi na Chiuta na kumanya ivyo wakukhumba kwa ise (Wonani ndime 9) *
9. Kasi mungalongora wuli kuti Baibolo mukuliwona kuti ndakuzirwa?
9 Zirwiskani Mazgu gha Chiuta, Baibolo. Mu Baibolo ndimo muli unenesko wakuyowoya za Yehova na khumbo lake. Mukulongora kuti Baibolo mukuliwona kuti ndakuzirwa para mukuliŵazga zuŵa lililose, mukunozgekera nkhani iyo muzamusambira na uyo wakumusambizgani Baibolo, kweniso para mukulondezga ivyo mukusambira. (Sal. 119:97, 99; Yoh. 17:17) Kasi muli nayo ndondomeko yakuŵazgira Baibolo? Kasi mukuŵazga Baibolo zuŵa lililose?
10. Kasi ntchivichi icho chikupangiska Baibolo kuŵa lapadera chomene?
10 Chimoza icho chikupangiska Baibolo kuŵa lapadera chomene ntchakuti muli nkhani za ŵanthu awo ŵakawona nadi Yesu. Kweniso ni buku lekha ilo likulongosora ivyo Yesu wali kumuchitirani. Para mungasambira ivyo Yesu wakayowoya na kuchita, mukhumbenge kuti muŵe nayo paubwezi.
11. Kasi ntchivichi chimovwiraninge kuti mutemwenge Yehova?
11 Temwani Yesu, ndipo chitemwa chinu pa Yehova chikurenge. Chifukwa wuli? Chifukwa ntchakuti Yesu wakayezga Awiske ndendende. (Yoh. 14:9) Ntheura para musambirenge vinandi vya Yesu, mumumanyenge makora Yehova na kumuchindika chomene. Ghanaghanirani umo Yesu wakalongolera chiwuravi ku ŵanthu awo ŵakawonekanga ŵapasi chifukwa cha ukavu, ulwari panji kuŵavya nkhongono. Kweniso ghanaghanirani ulongozgi uwo wakumupani ndiposo umo ukumovwilirani pa umoyo winu para mwaulondezga ulongozgi uwu.—Mat. 5:1-11; 7:24-27.
12. Kasi para mwasambira vya Yesu, mukhumbenge kuchita vichi?
12 Mumutemwenge chomene Yesu para mughanaghanirengepo chomene vya sembe iyo wakapeleka mwakuti zakwananga zithu zigowokereke. (Mat. 20:28) Para mwamanya kuti Yesu wakafwa chifukwa chakuti wakajipeleka chifukwa cha imwe, mulapenge zakwananga zinu na kulomba kuti Yehova wamugowokerani. (Mil. 3:19, 20; 1 Yoh. 1:9) Para mutemwenge chomene Yehova na Yesu, mukhumbengeso kuŵa paubwezi na ŵanthu awo ŵakutemwa Yehova na Yesu.
13. Kasi Yehova wamupani vichi?
13 Temwani ŵanthu awo ŵakutemwa Yehova. Ŵachibali na ŵabwezi ŵinu awo Mbakaboni yayi ŵangapulikiska yayi chifukwa icho mukukhumbira kujipeleka kwa Yehova. Ndipo nyengo zinyake ŵangamususkani. Kweni Yehova wamovwiraninge pakumupani mbumba yauzimu. Para muŵenge paubwezi na mbumba iyi, musangenge chitemwa chanadi kweniso wovwiri uwo mukukhumba. (Mrk. 10:29, 30; Heb. 10:24, 25) Para nyengo yajumphapo, ŵabali ŵinu nawo ŵangamba kuteŵetera Yehova na kupulikira malango ghake.—1 Pet. 2:12.
14. Kuyana na 1 Yohane 5:3, kasi mwasanga vichi pa nkhani ya malango gha Yehova?
14 Zirwiskani malango gha Yehova na kughalondezga. Pambere mundamumanye Yehova, panji mukaŵa na malango ghinu agho mukaghalondezganga, kweni sono mukuwona kuti malango gha Yehova ngawemi chomene. (Sal. 1:1-3; ŵazgani 1 Yohane 5:3.) Ghanaghanirani ulongozgi wa mu Baibolo wakuyowoya za ŵafumu, ŵawoli, ŵapapi, na ŵana. (Efe. 5:22–6:4) Kasi mbumba yinu njakukondwa chifukwa cha kupulikira ulongozgi uwu? Kasi ndimwe munthu muwemi sono chifukwa cha kupulikira ulongozgi wa Yehova pa nkhani ya ŵabwezi? Kasi ndimwe munthu wakukondwa sono? (Zinth. 13:20; 1 Kor. 15:33) Tikukayika yayi kuti zgoro la mafumbo agha ndakuti enya.
15. Kasi mungachita wuli usange mukukhumba kumanya umo mungalondezgera fundo za mu Baibolo?
15 Nyengo zinyake, vingamusuzgani kumanya umo mungalondezgera fundo za mu Baibolo izo mukusambira. Lekani Yehova kwizira mu gulu lake wakutipa mabuku ghakulongosora Baibolo kuti ghamovwirani kumanya icho ntchiwemi na icho ntchiheni. (Heb. 5:13, 14) Para mungaŵazga mabuku agha, musangenge ulongozgi wakuzirwa chomene wa umo mungalondezgera fundo za mu Baibolo, ndipo tikukayika yayi kuti mutemwenge kuŵa mu gulu la Yehova.
16. Kasi Yehova wakulongozga wuli ŵanthu ŵake?
16 Temwani na kukhozgera gulu la Yehova. Yehova wakulongozga ŵanthu ŵake kwizira mu mipingo ya Ŵakaboni ŵa Yehova, ndipo Mwana wake, Yesu, ndiyo ni mutu wa mipingo yose iyi. (Efe. 1:22; 5:23) Yesu wali kusora kagulu ka ŵanalume ŵakuphakazgika kuti kalongozgenge ntchito iyo wakukhumba kuti yichitike mazuŵa ghano. Kagulu aka Yesu wakati ni “muzga wakugomezgeka na wavinjeru,” ndipo kakuŵikapo mtima kulyeska na kumuvikilirani mwauzimu. (Mat. 24:45-47) Nthowa yimoza iyo muzga wakugomezgeka na wavinjeru wakumupwelelerani njakuti wakwimika ŵanalume ŵakwenelera kuŵa ŵalara kuti ŵamulongozganinge na kumuvikilirani. (Yes. 32:1, 2; Heb. 13:17; 1 Pet. 5:2, 3) Ŵalara aŵa mbakunozgeka kumukhozgani na kumovwirani kuti muŵe paubwezi wakukhora na Yehova. Kweni chakuzirwa chomene icho ŵangamuchitirani, nkhumovwirani kuti namwe musambizgenge ŵanji vya Yehova.—Efe. 4:11-13.
17. Kuyana na Ŵaroma 10:10, 13, 14, chifukwa wuli tikupharazgira ŵanyithu vya Yehova?
17 Wovwirani ŵanji kutemwa Yehova. Yesu wakaphalira ŵalondezgi ŵake kuti ŵasambizgenge ŵanji vya Yehova. (Mat. 28:19, 20) Vingachitika kupulikira languro ili mwadango waka. Kweni para chitemwa chinu pa Yehova chikukura, mujipulikenge nga umo mpositole Petrosi na Yohane ŵakajipulikira. Iwo ŵakati: “Ise tingaleka yayi kuyowoya vinthu ivyo tili kuwona na kupulika.” (Mil. 4:20) Muŵenge ŵakukondwa chomene para mungawovwira munthu kuti wambe kutemwa Yehova. Filipu wakakondwa chomene wati wawovwira nduna ya ku Etiyopiya kusambira unenesko wa mu Malemba na kubatizika. Para mungayezga Filipu na kupulikira dango la Yesu, mukulongora kuti namwe mukukhumba kuŵa Kaboni wa Yehova. (Ŵazgani Ŵaroma 10:10, 13, 14.) Tikukayika yayi kuti namwe mungazakafumba fumbo lakuya na ilo nduna ya ku Etiyopiya yikafumba, lakuti: “Ntchivichi chikunitondeska kubatizika?”—Mil. 8:36.
18. Kasi ni mafumbo wuli agho ghazamuzgoreka mu nkhani yakulondezgapo?
18 Para mwasankha kubatizika, muzamuŵa kuti mwasankha chinthu chakuzirwa chomene pa umoyo winu. Pakuti kubatizika nkhwakuzirwa chomene, ntheura mukwenera kumanya makora ng’anamuro la ubatizo. Kasi mukwenera kumanya vichi vya ubatizo? Kasi mukwenera kuchita vichi pambere mundabatizike? Kasi mukwenera kuchita vichi para mwabatizika? Mafumbo agha ghazamuzgoreka mu nkhani yakulondezgapo.
SUMU 2 Zina Linu Ndimwe Yehova
^ ndime 5 Ŵanyake awo ŵakumutemwa Yehova ŵakujikayikira usange mbakunozgeka kubatizika na kuŵa Kaboni wa Yehova. Usange namwe mukujikayikira, nkhani iyi yimovwiraninge kuti mughanaghanireposo vinyake ivyo mungachita, ivyo vingamovwirani kuti mubatizike.
^ ndime 5 Pakuti taŵanthu tikupambana, ŵanyake ŵangalondezga ulongozgi uwo ukuyowoyeka mu nkhani iyi mu ndondomeko ya umo walembekera apo ŵanyake yayi.
^ ndime 6 Kuti muwone viyelezgero vinyake, wonani burosha la Kasi Vyamoyo Vikachita Kulengeka? na la Umoyo Ukaŵako Wuli?—Mafumbo 5 Agho Tikwenera Kujifumba.
^ ndime 61 MAZGU GHAKULONGOSORA CHITHUZI: Mudumbu wakupeleka thirakiti ku msungwana uyo wakumana nayo ku msika.
