1-2. Kasi Mkhristu wangachita wuli kuti waŵe nga ni nyumba yitali kweni yakukhora? (1 Ŵakorinte 15:58)

 MU 1978 mu msumba wa Tokyo, ku Japan, mukazengeka nyumba yitali chomene. Ŵanthu ŵakazizwanga chomene na nyumba iyi kuti yikulutilira kutchintha ku vindindindi vikuruvikuru ivyo vikachitikanga mu msumba uwu. Kasi chisisi chikagona mpha kuti nyumba iyi yilutilire kutchintha? Ŵakuzenga ŵakagwiliskira ntchito vinthu vyakukhora kweniso vyakuti vingathifuka waka na kuweleraso pa malo ghake, mwakuti vikawovwira kuti nyumba iyi yitchinthenge ku vindindindi. Ŵakhristu ŵali nga nyumba iyi. Munthowa wuli?

² Mkhristu wakwenera kuŵa wakukhora, kweni panyengo yimozaso wakwenera kuŵa wakuthifuka panji kuti wambura kukhwimiska vinthu. Wakwenera kuŵa wakukhora na wambura kusunkhunyika pa nkhani ya kulondezga malango na fundo za Yehova. (Ŵazgani 1 Ŵakorinte 15:58.) Wakwenera kuŵa wakupulikira luŵiro kweniso wambura kulekelera vinthu. Kweni panyengo yimozamozaso, wakwenera kuŵa ‘wakupulikiska,’ panji wambura kukhwimiska vinthu usange ntchakwenelera kuchita nthena. (Yak. 3:17) Mkhristu uyo wakuchita mwakwenelera pa nkhani iyi wagegenge kuŵa wakukhwimiska vinthu panji kulekelera vinthu. Mu nkhani iyi, tiwonenge umo tingachitira kuti tiŵe ŵambura kusunkhunyika. Tiwonengeso nthowa zinkhondi izo Satana wakugwiliskira ntchito kuti watilopweske mwakuti tileke kupulikira Yehova. Kweniso tiwonenge umo tingachitira kuti titonde njomba zake izi.

3. Kasi Yehova wali kupeleka malango wuli agho ghakusangika pa Milimo 15:28, 29?

³ Pakuŵa Mupi Mukuru wa Dango, kwamba kale Yehova wakupeleka  malango ghakupulikikwa makora ku ŵanthu ŵake. (Yes. 33:22) Mwachiyelezgero, wupu wakulongozga mu nyengo yakale ukayowoya vigaŵa vitatu ivyo Ŵakhristu ŵakeneranga kulutilira kuŵa ŵakukhora: (1) kukana kusopa vikozgo, kweni kusopa Yehova pera, (2) kupulikira dango la Yehova lakuti ndopa ni zakupatulika, kweniso (3) kupulikira dango la mu Baibolo la kugega uzaghali. (Ŵazgani Milimo 15:28, 29.) Kasi Ŵakhristu mazuŵa ghano ŵangachita wuli kuti ŵalutilire kupulikira Yehova pa vigaŵa vitatu ivi?

4. Kasi tikulongora wuli kuti tikusopa Yehova pera? (Chivumbuzi 4:11)

⁴ Tikugega kusopa vikozgo, kweni tikusopa Yehova pera. Yehova wakalangura Ŵaisrayeli kuti ŵasopenge iyo pera. (Doto. 5:6-10) Ndipo apo Yesu wakayezgeka na Dyabulosi, wakayowoya mwambura kubisa kuti tikwenera kusopa Yehova pera. (Mat. 4:8-10) Lekani tikusopa vikozgo yayi. Kweniso tikusopa yayi ŵanthu ŵakumanyikwa nga ŵalongozgi ŵavisopa, ŵandyali, nesi ŵanthu ŵakutchuka pa maseŵero na vyakusanguluska, na kuŵatora nga mbachiuta. Nyengo zose tikuŵa ku chigaŵa cha Yehova na kusopa iyo pera uyo ‘wakalenga vinthu vyose.’—Ŵazgani Chivumbuzi 4:11.

5. Chifukwa wuli tikupulikira dango la Yehova lakukhwaskana na umoyo na ndopa?

⁵ Tikupulikira dango la Yehova lakukhwaskana na umoyo na ndopa kuti ni vyakupatulika. Chifukwa wuli? Chifukwa chakuti Yehova wakuti ndopa zikwimira umoyo, uwo ntchawanangwa chakuzirwa chomene chakufuma kwa iyo. (Lev. 17:14) Apo Yehova wakazomerezganga ŵanthu kurya nyama, wakaŵalangura kuti ŵangalyeranga lumoza na ndopa yayi. (Gen. 9:4) Dango ili wakaliwerezgaso mu Dango la Mozesi ilo wakapeleka ku Ŵaisrayeli. (Lev. 17:10) Ndipo kwizira mu mzimu wake wakachiska wupu wakulongozga mu nyengo yakale kuti uphalire Ŵakhristu wose kuti ‘ŵalutilire kuziŵizga ndopa.’ (Mil. 15:28, 29) Nase tikulongora kuti tikupulikira dango ili para tikusankha mwamahara wovwiri uwo tingapokera ku chipatala. b

6. Kasi tikuchita wuli kuti tipulikire fundo za Yehova za makhaliro ghawemi?

⁶ Tikupulikira chomene fundo za Yehova za makhaliro ghawemi. (Heb. 13:4) Mpositole Paulosi wakutiphalira kuti ‘tizgore’ viŵaro vya thupi lithu kuŵa vyakufwa, icho chikung’anamura kuti tikwenera kuchita chilichose icho tingafiska kuti tiwuskemo makhumbiro ghaheni. Ntheura tikugega kulaŵiska panji kuchita chilichose icho chingapangiska kuti tichite uzaghali. (Kol. 3:5; Yobu 31:1) Para tayezgeka, mwaluŵiro tikukana kaghanaghaniro kalikose panji kuchita chilichose icho chingananga ubwezi withu na Chiuta.

7. Kasi tikwenera kudumura kuchita vichi, ndipo chifukwa wuli?

⁷ Yehova wakukhazga kuti ‘timupulikirenge kufumira pasi pa mtima.’ (Rom. 6:17) Ulongozgi wake nyengo zose ndise tikusanga nawo chandulo, ndipo tingasintha yayi malango ghake. (Yes. 48:17, 18; 1 Kor. 6:9, 10) Lekani tikuchita chilichose icho tingafiska kuti tikondweske Yehova na kuyezga wamasalimo uyo wakayowoya kuti: “Nadumura kuti nipulikirenge ulongozgi winu nyengo zose, m’paka umaliro.” (Sal. 119:112) Ndipouli, Satana wayezgeyezgenge kutitondeska kuti tileke kuŵa ŵakukhora. Kasi ni nthowa wuli izo wakugwiliskira ntchito?

8. Kasi Satana wakugwiliskira wuli ntchito nthambuzgo kuti watitondeske kulutilira kuŵa ŵakukhora?

⁸ Nthambuzgo. Satana wakugwiliskira ntchito nthambuzgo kuti watitondeske kuŵa ŵakukhora. Chilato chake ntchakuti ‘watimilimitizge,’ mwakuti wanange ubwezi withu na Yehova. (1 Pet. 5:8) Ŵakhristu mu nyengo yakale  ŵakawofyekanga, kutimbika, kweniso kukomeka chifukwa cha kuŵikapo mtima kulutilira kuŵa ŵakugomezgeka. (Mil. 5:27, 28, 40; 7:54-60) Satana wachali kugwiliskira ntchito nthambuzgo mazuŵa ghano. Tikusanga ukaboni uwu para tikuwona umo ŵabali na ŵadumbu ŵithu ku Russia na vyaru vinyake ŵakutambuzgikira mwankhaza. Kweniso ŵakususka ŵakutambuzga ŵabali na ŵadumbu mu nthowa zakupambanapambana.

9. Chifukwa wuli ntchakukhumbikwa kuŵa maso na viyezgo ivyo vingiza mwauryarya? Yowoyani chiyelezgero.

⁹ Viyezgo ivyo vikwiza mwauryarya. Padera pa nthambuzgo, Satana wakugwiliskiraso ntchito “mauryarya” ghake. (Efe. 6:11) Wonani ivyo vikachitikira mubali munyake zina lake Bob, uyo wakagonekeka mu chipatala kuti ŵamupange opareshoni yikuru chomene. Wakamanyiska madokotala kuti mulimose umo vingaŵira iyo wazomerenge yayi kuŵikika ndopa. Madokotala ghakazomerezga ivyo wakasankha. Ndipouli, nausiku pambere opareshoni yindachitike, dokotala munyake wakiza kuzakawona Bob, ndipo panyengo iyi ŵabali ŵa Bob ŵakaŵa kuti ŵawera. Wakamuphalira Bob kuti ndopa wapikenge yayi, kweni ŵaŵikirengethu waka pamphepete kuchitira waka pangozi. Panji dokotala uyu wakaghanaghananga kuti Bob wangasintha maghanoghano chifukwa ŵamumbumba yake pakaŵavya. Kweni Bob wakalutilira kuŵa wakukhora, wakayowoya kuti wazomerenge yayi kuŵikika ndopa nanga vingasuzga wuli.

10. Chifukwa wuli vinjeru vya charu ichi ni vyakofya? (1 Ŵakorinte 3:19, 20)

¹⁰ Vinjeru vya charu. Para tingamba kuwona vinthu nga umo ŵanthu ŵa mu charu ichi ŵakuwonera, tingamba kusulako Yehova na malango ghake. (Ŵazgani 1 Ŵakorinte 3:19, 20.) “Vinjeru vya charu ichi,” kanandi vikupangiska ŵanthu kuleka kupulikira Chiuta. Ŵakhristu ŵachoko waka ŵa mu mpingo wa Peregamo na Tiyatira ŵakatolerako mikhaliro ya ŵanthu awo ŵakaŵazingilizga awo ŵakachitanga uzaghali na kusopa vikozgo. Yesu wakapeleka ulongozgi wankhongono ku mipingo yose yiŵiri iyi chifukwa cha kulekelera uzaghali. (Chivu. 2:14, 20) Nase mazuŵa ghano, ŵanthu awo ŵatizingilizga ŵangatipangiska kuti titolereko nkharo zawo ziheni. Ŵamumbumba yithu kweniso ŵabwezi ŵithu ŵangayezga kutikopa kuti tiswe malango gha Yehova. Mwachiyelezgero, ŵangatiphalira kuti palije suzgo kuchita ivyo ise tikukhumba ndipo fundo za mu Baibolo za makhaliro ghawemi zili kutchujuka.

11. Apo tikulutilira kuŵa ŵakukhora, kasi tikwenera kugega kuchita vichi?

¹¹ Nyengo zinyake tingamba kughanaghana kuti ulongozgi uwo Yehova wakutipa ngwambura kupulikikwa makora. Ntheura tingayezgeka kuti ‘tijumphe vinthu ivyo vili kulembeka.’ (1 Kor. 4:6) Ŵalongozgi ŵavisopa mu nyengo ya Yesu ndivyo ŵakachita. Padera pa malango gha Yehova, iwo ŵakapangaso malango ghawo agho ghakaŵa ghakusuzga kuti ŵanthu ŵaghalondezgenge. (Mat. 23:4) Yehova wakutipa ulongozgi wakupulikikwa makora kwizira mu Mazgu ghake kweniso gulu lake. Ipo palije chifukwa chakuti tisazgirengeko malango ghithu pa ulongozgi uwo wakutipa. (Zinth. 3:5-7) Ntheura, tikwenera yayi kujumpha vinthu ivyo vili kulembeka mu Baibolo panji kupanga tumalango twithu pa nkhani izo ŵabali na ŵadumbu ŵakwenera kujisankhira ŵekha.

12. Kasi Satana wakugwiliskira wuli ntchito “upusikizgi wawaka”?

¹² Maupusikizgi. Satana wakugwiliskira ntchito “upusikizgi wawaka” kweniso “vinthu vya charu” kuti wapuluske ŵanthu na kuŵapangiska kuŵa ŵakugaŵikana. (Kol. 2:8) Mu nyengo ya Ŵakhristu ŵakwambilira, ivi vikasazgangapo visambizgo vyakujintha pa vinjeru vya ŵanthu, visambizgo vya Chiyuda ivyo vikafumanga mu Malemba yayi, kweniso chisambizgo chakuti Ŵakhristu ŵakwenera kupulikira Dango la Mozesi. Agha ghakaŵa maupusikizgi chifukwa ghakapangiskanga ŵanthu kuti ŵapatukeko kwa Yehova uyo ni Mwenecho wa vinjeru. Mazuŵa ghano Satana wakugwiliskira ntchito mawayilesi, manyuzipepara, TV, na malo ghakuchezgerapo gha pa Intaneti,  kuti wathandazge nkhani zambura ukaboni kweniso nkhani zautesi izo ŵalongozgi ŵandyali ŵakuyowoya. Ukaboni wa fundo iyi ni ivyo vikayowoyekanga mu nyengo ya COVID-19, mautesi ghakaŵa waka palipose. c Ŵakaboni ŵa Yehova awo ŵakapulikira ulongozgi wakufuma ku gulu lithu ŵakenjerwanga mwakujumphizga yayi pakuyaniska na ŵanthu awo ŵakapulikiranga mautesi agho ghakathandazgikanga.—Mat. 24:45.

13. Chifukwa wuli tikwenera kuŵa maso na vyakutimbanizga?

¹³ Vyakutimbanizga. Tikwenera kuŵika mtima pa “vinthu vyakuzirwa chomene.” (Fil. 1:9, 10) Vyakutimbanizga vingatilyera nyengo yithu yinandi na kutitondeska kuŵika mtima pa vinthu vyakuzirwa. Vinthu ivyo tikuchita zuŵa na zuŵa, nga kurya, kumwa, vyakusanguluska, na ntchito zinyake zakuthupi, vingaŵa vyakutimbanizga usange ndivyo tikuŵikapo mtima chomene pa umoyo withu. (Luka 21:34, 35) Kweniso, zuŵa lililose tikupulika nkhani zakupambanapambana zakukhwaskana na viwoneskero kweniso ndyali. Tikwenera yayi kuzomerezga kutimbanizgika na nkhani izi. Vili nthena, chifukwa tingamba kukhozgera chigaŵa chinyake mu maghanoghano na mu mtima withu. Satana wakugwiliskira ntchito nthowa zose izo zazunulika apa mwakuti watilopweske na kutitondeska kuchita icho ntchiwemi. Tiyeni tiwone umo tingachitira kuti tigege nthowa zake izi na kulutilira kuŵa ŵakukhora.

14. Kasi ntchinthu wuli chimoza icho chingatovwira kulutilira kuŵa ku chigaŵa cha Yehova?

¹⁴ Ghanaghanirani chifukwa icho mukajipelekera kwa Yehova na kubatizika. Mukachita vyose ivi chifukwa chakuti mukakhumbanga kuŵa ku chigaŵa cha Yehova. Ghanaghaniraniso icho chikamukhorweskani kuti mwasanga nadi unenesko. Mukamumanya makora Yehova na kwamba kumuchindika na kumutemwa chomene pakuŵa Dada winu wakuchanya. Mukamba kuŵa na chipulikano ndipo vikamovwirani kuti mupere. Mukaleka kuchita vinthu ivyo Yehova wakutinkha na kwamba kuchita vinthu ivyo vikumukondweska. Mukajipulika makora mukati mwamanya kuti Chiuta wamugowokerani. (Sal. 32:1, 2) Mukamba kuwungana kweniso kuphalirako ŵanyinu  ivyo mukusambira. Pakuŵa Mkhristu wakujipeleka kweniso wakubatizika, sono mukwenda pa nthowa yakuluta ku umoyo, ndipo mwaŵikapo mtima kuleka kupatuka pa nthowa iyi.—Mat. 7:13, 14.

15. Chifukwa wuli kusambira na kughanaghanirapo nkhwachandulo?

¹⁵ Musambirenge Mazgu gha Chiuta na kughanaghanirapo. Nga umo khuni likuŵira lakukhora para misisi yake yajintha chomene pasi, nase tingalutilira kuŵa ŵakukhora para chipulikano chithu chikujintha pa Mazgu gha Chiuta. Para khuni likukura, misisi yake nayo yikujintha chomene pasi kweniso kuthazira kutali. Nase para tikusambira Mazgu gha Chiuta na kughanaghanirapo, tikukhozga chipulikano chithu kweniso tikukhorwa kuti nthowa za Chiuta ndizo ni ziwemi chomene. (Kol. 2:6, 7) Ghanaghanirani umo malango gha Yehova, ulongozgi wake, na chivikiliro chake vikawovwilira ŵateŵeti ŵake mu nyengo yakale. Mwachiyelezgero, Ezekiyeli wakalaŵisiska chomene apo mungelo wakapimanga mwakupwelelera tempile ilo wakawona mu mboniwoni. Mboniwoni iyi yikamukhozga chomene Ezekiyeli, ndipo nase yikutisambizga fundo zakuzirwa za umo tikwenera kulondezgera malango gha Yehova pa nkhani ya kusopa kutuŵa. d (Ezek. 40:1-4; 43:10-12) Ndipo nase tikupindura para tikupatura nyengo yakusambira na kughanaghanirapo pa vinthu vyakunyang’amira vya mu Mazgu gha Chiuta.

16. Kasi mtima wakukhora ukamuvikilira wuli Bob? (Salimo 112:7)

¹⁶ Muŵe ŵakukhora mu mtima. Themba Davide likayowoya vya chitemwa chake kwa Yehova apo likimba kuti: “Mtima wane ngwakukhora, A Chiuta.” (Sal. 57:7) Nase tingaŵa na mtima wakukhora, na kugomezga na mtima wose mwa Yehova. (Ŵazgani Salimo 112:7.) Wonani umo fundo iyi yikawovwilira Bob, uyo tamuzunura kale mu nkhani iyi. Wati waphalirika kuti ndopa ziŵikikenge waka pamphepete kuchitira waka pangozi, mwaluŵiro wakazgora kuti para pali maghanoghano ghakuti ŵamupenge ndopa, mbwenu wafumenge waka mu chipatala nyengo yeneyiyo. Pamanyuma, wakayowoya kuti: “Nkhaziwulika yayi kuzgora, ndipo nkhafipanga mtima yayi na icho chingachitika para nakana ndopa.”

17. Kasi tingasambirako vichi kwa Bob? (Wonaniso chithuzi.)

 ¹⁷ Bob wakaŵa wakukhora chifukwa wakasankhirathu vyakuchita pambere wandalute ku chipatala. Chakwamba, wakakhumbanga kukondweska Yehova. Chachiŵiri, wakasambira mwakupwelelera ivyo Baibolo na mabuku ghithu ghakuyowoya pa nkhani ya umoyo na ndopa kuti ni vyakupatulika. Chachitatu, wakakhorwa kuti para walondezgenge ulongozgi wa Yehova wasangenge vitumbiko. Nase tingaŵa nawo mtima wakukhora nanga tingasangana na viyezgo wuli.

18. Kasi chiyelezgero cha Baraki chikutisambizga vichi pa nkhani ya kugomezga Yehova? (Wonani chithuzi cha pa chikopi.)

¹⁸ Gomezgani mwa Yehova. Wonani umo Baraki vinthu vikamwendera makora chifukwa cha kulondezga ulongozgi wa Yehova. Nangauli Ŵaisrayeli ŵakaŵavya vilwero vya nkhondo kweniso ŵakaŵa ŵambura kunozgeka kurwa nkhondo, kweni Yehova wakaphalira Baraki kuti wakarwe na Sisera na ŵasilikari ŵake, awo ŵakaŵa na vilwero vinandi. (Ŵeru. 5:8) Ntchimi yanakazi Debora yikaphalira Balaki kuti walute pa malo ghakuthambalara kuti wakarwe na Sisera uyo wakaŵa na magileta 900 gha nkhondo. Pa malo ghakuthambalara agha chikaŵa chakusuzga kuti Ŵaisrayeli ŵalimbane na magileta ghakuchimbira chomene. Nangauli vikaŵa nthena, Baraki wakapulikira. Apo ŵankhondo ŵa Baraki ŵakakhiranga Phiri la Tabori, Yehova wakalokweska chivura kufuma kuchanya. Magileta gha Sisera ghakaphatira mu mathipa, ndipo Yehova wakamovwira Baraki kuthereska Sisera. (Ŵeru. 4:1-7, 10, 13-16) Mwakuyana waka, nase Yehova watovwirenge kuti tithereske ŵalwani ŵithu para tikulutilira kumugomezga kweniso kulondezga ulongozgi uwo wakutipa kwizira mu gulu lake.—Doto. 31:6.

19. Chifukwa wuli mukwenera kulutilira kuŵa ŵakukhora?

¹⁹ Chikuru tichali kukhala mu charu cha Satana ichi, tikwenera kulutilira kurwa nkhondo ya chipulikano kuti tilutilire kuŵa ŵakukhora. (1 Tim. 6:11, 12; 2 Pet. 3:17) Mphanyi taŵikapo mtima kuleka kusunkhunyika na nthambuzgo, viyezgo ivyo vingiza mwauryarya, vinjeru vya ŵanthu, maupusikizgi, na vyakutimbanizga. (Efe. 4:14) Kweniso tilutilire kutchintha, na kulutilira kuŵa ŵakukhora pakusopa Yehova, na ŵambura kusunkhunyika pakupulikira malango. Panyengo yimozamoza, tikwenera kuchita vinthu mwamahara. Mu nkhani yakulondezgapo, tizamuwona umo Yehova na Yesu ŵaliri chiyelezgero chiwemi pa nkhani iyi.