1. Chifukwa wuli tikwenera kunozgekera kuti titambuzgikenge?

USIKU wakuti machero wakomekenge, Fumu yithu Yesu yikati wose awo ŵasankha kuŵa ŵasambiri ŵake, ŵatinkhikenge. (Yoh. 17:14) Kufuma nyengo yira m’paka sono, Ŵakhristu ŵakugomezgeka ŵakutambuzgika na ŵanthu awo ŵakutinkha kusopa kwaunenesko. (2 Tim. 3:12) Apo umaliro wa charu ichi ukusendelera, tikukhazga kuti ŵalwani ŵithu ŵatiwukirenge chomene.—Mat. 24:9.

2-3. (a) Kasi tikwenera kumanya vichi pa nkhani ya wofi? (b) Kasi tisambirenge vichi mu nkhani iyi?

² Kasi tikwenera kuchita vichi kuti tizakazizipizge para tamba kutambuzgika? Ntchakukhumbikwa viŵi yayi kughanaghanira umo tizamutambuzgikira. Usange ndivyo tingachita, mbwenu tambenge kopa na kusuzgika maghanoghano. Para tikughanaghanira waka masuzgo agho ghakwiza munthazi, tingathera pambere nyengo ya kutambuzgika yindafike. (Zinth. 12:25; 17:22) Wofi ni nthowa yikuru iyo ‘mulwani withu Dyabulosi’ wangatithereskera. (1 Pet. 5:8, 9) Kasi tinganozgekera wuli kuti tizakazizipizge panyengo ya kutambuzgika?

³ Mu nkhani iyi, tisambirenge umo tingakhozgera ubwezi withu na Yehova kweniso kuzirwa kwa kuchita nthena. Tisambirengeso umo tingachitira kuti tiŵe na chikanga. Paumaliro, tiwonenge ivyo tingachita para ŵanthu ŵakutitinkha.

4. Kuyana na Ŵahebere 13:5, 6, kasi tikwenera kugomezga kuti vichi, ndipo chifukwa wuli?

⁴ Gomezgani kuti Yehova wakumutemwani ndipo wamulekaninge yayi. (Ŵazgani Ŵahebere 13:5, 6.) Gongwe la Mulinda linyake lakumasinda likati: “Munthu uyo wakumumanya makora  Chiuta wakumugomezga chomene panyengo ya suzgo.” Fundo iyi njaunenesko nadi. Kuti tizizipizge para tikutambuzgika, tikwenera kumutemwa Yehova na kumugomezga na mtima wose, ndipo tingakayikanga yayi kuti wakutitemwa.—Mat. 22:36-38; Yak. 5:11.

5. Ntchivichi chingamovwirani kumanya kuti Yehova wakumutemwani?

⁵ Muŵazgenge Baibolo zuŵa lililose na chilato chakuti musendelere kwa Yehova. (Yak. 4:8) Apo mukuŵazga, ghanaghaniranipo mikhaliro ya Yehova. Wonani umo wakumutemwerani kwizira mu ivyo wakuyowoya na kuchita. (Eks. 34:6) Ŵanyake vikuŵasuzga kugomezga kuti Chiuta wakuŵatemwa, chifukwa cha ivyo vili kuŵachitikira. Para ndimo viliri kwa imwe, zuŵa lililose yezgani kulemba vinthu ivyo vikulongora kuti Yehova wamuchitirani lusungu. (Sal. 78:38, 39; Rom. 8:32) Usange mukuweleramo ivyo mwalemba na kughanaghanirapo ivyo mwaŵazga mu Mazgu gha Chiuta, mungalemba vinthu vinandi ivyo Yehova wamuchitirani. Para mukuwonga vyose ivyo Yehova wakumuchitirani, ubwezi winu na iyo ukhorenge chomene.—Sal. 116:1, 2.

6. Kuyana na Salimo 94:17-19, kasi lurombo lwakufuma pasi pamtima lungamovwirani wuli?

⁶ Mulombenge nyengo zose. Ghanaghanirani za mwana uyo adada ŵake ŵamunyamura. Mwana wakujipulika kuti ngwakuvikilirika ndipo wakuŵaphalira mwakufwatuka adada ŵake vyose ivyo vyamuchitikira pa zuŵa ilo. Namwe mungaŵa paubwezi wanthena uwu na Yehova para mukumulomba kufumira pasi pamtima zuŵa lililose. (Ŵazgani Salimo 94:17-19.) Apo mukulomba kwa Yehova, ‘pungurani mtima winu nga ni maji’ na kuŵaphalira Adada ŵinu ŵakuchanya vyose ivyo mukwenjerwa navyo. (Chit. 2:19) Kasi chichitikenge ntchivichi para mwachita nthena? Muŵenge na “mtende wa Chiuta uwo ukuluska maghanoghano ghose.” (Fil. 4:6, 7) Para mukulomba kufumira pasi pamtima, mujipulikenge kuti muli pafupi chomene na Yehova.—Rom. 8:38, 39.

7. Chifukwa wuli mukwenera kugomezga kuti ivyo Chiuta walayizga mu Ufumu wake vizamufiskika nadi?

⁷ Gomezgani kuti ivyo Ufumu wa Chiuta walayizga vizamufiskika. (Maŵa. 23:19) Para mukukayikira ivyo Chiuta wali kulayizga, mbwenu Satana na charu chake ŵamofyaninge. (Zinth. 24:10; Heb. 2:15) Kasi mungakhozga wuli chipulikano chinu mu Ufumu wa Chiuta? Sandani ivyo Chiuta walayizga mu Ufumu wake na kuwona chifukwa icho mukugomezgera kuti malayizgo agho ghazamufiskika nadi. Kasi ivi vimovwiraninge wuli? Tiyeni tiwone ivyo vikachitikira Stanley Jones uyo wakajalirika mu jele kwa vyaka 7 chifukwa cha chipulikano chake. * Kasi chikamovwira ntchivichi kuti wazizipizge? Jones wakati: “Chifukwa chakuti nkhakhozga chipulikano chane mu Ufumu wa Chiuta na kuleka kukayika nanga  mphachoko, vikanovwira chomene kuti nileke kuthera.” Para muli na chipulikano chakukhora mu ivyo Chiuta walayizga, musendelerenge kwa iyo, ndipo mulekenge yayi kuteŵetera Yehova chifukwa cha wofi.—Zinth. 3:25, 26.

8. Usange pasono tikuwungana, vizamutovwira wuli munthazi? Longosorani.

⁸ Muwunganenge nyengo zose. Maungano ghakutovwira kuti tisendelere kwa Yehova. Usange tikuwungana nyengo zose, vizamutovwira kuti tizakazizipizge para tikutambuzgika. (Heb. 10:24, 25) Chifukwa wuli tikuyowoya nthena? Para tunthu tuchokotuchoko tukutitondeska kuwungana, ntchivichi chingazakachitika munthazi apo tizamukhumbikwira kuŵika umoyo withu pangozi kuti tiwungane pamoza na ŵabali ŵithu? Kweni para sono ndipo tikuŵikapo mtima kuwungana, tizamuleka yayi para ŵalwani ŵazakatikanizga kuwungana. Sono ndiyo nyengo yakuti titemwenge chomene kuwungana. Usange tikutemwa kwiza ku maungano, pazamuŵavya ŵakususka awo ŵazamutitondeska kupulikira Chiuta.—Mil. 5:29.

9. Chifukwa wuli kusunga malemba pamtima ni nthowa yiwemi yakunozgekelera nthambuzgo?

⁹ Sungani pamtima malemba agho mukughatemwa. (Mat. 13:52) Panyake mungaŵa kuti mukuluwa luŵiro vinthu, kweni Yehova wangamovwirani na mzimu wake utuŵa kuti mukumbukenge malemba. (Yoh. 14:26) Wonani ivyo vikachitikira mubali munyake uyo wakajalirika mu Jele layekha ku East Germany. Mubali uyu wakati: “Nkhaŵa wakukondwa chomene chifukwa panyengo iyi nkhaŵa kuti nasunga kale malemba ghanandi pamtima. Panyengo iyi, nkhaghanaghanirangapo nkhani zakupambanapambana za mu Baibolo.” Malemba agha ghakamovwira mubali withu uyu kusendelera kwa Yehova na kulutilira kugomezgeka.

10. Chifukwa wuli tikwenera kusunga pamtima sumu?

¹⁰ Mwimbenge na kusunga pamtima sumu izo zikulumba Yehova. Apo Paulosi na Sila ŵakajalirika mu jele ku Filipi, ŵakimbanga sumu zakulumba Yehova izo ŵakazisunga pamtima. (Mil. 16:25) Mwakuyana waka, apo ŵabali ŵithu mu nyengo ya boma la Soviet Union ŵakatolekera ku Siberia, kasi ŵakazizipizga wuli? Mudumbu Mariya Fedun wakati: “Tikimbanga sumu zose izo tikazimanyanga kufuma mu buku lithu la sumu.” Mudumbu uyu wakatiso sumu izi zikaŵakhozga chomene ndipo ŵakajipulikanga kuti ŵali pafupi chomene na Yehova. Kasi mukukhozgeka para  mukwimba sumu zakulumba Yehova izo mukutemwa? Para ndimo viliri sungani pamtima sumu izi.—Wonani bokosi lakuti “ Nipani Chikanga.”

11-12. (a) Kuyana na 1 Samuyeli 17:37, 45-47, chifukwa wuli Davide wakaŵa na chikanga? (b) Kasi tikusambirako vichi kwa Davide?

¹¹ Kuti muzizipizge nthambuzgo, mukwenera kuŵa na chikanga. Kasi mungachita wuli usange mulije chikanga? Kumbukani kuti chikanga chenecho chikuthemba pa msinkhu, nkhongono, panji maluso agho tili nagho yayi. Ghanaghanirani ivyo Davide wakachita apo wakaŵa muchoko. Iyo wakachita chikanga kutimbana na Goliyati. Para tingayaniska Davide na Goliyati, Davide wakaŵa muchoko, wambura nkhongono, kweniso wakamanyanga yayi kurwa nkhondo. Davide wakaŵavya na lupanga wuwo. Ndipouli, wakaŵa na chikanga chomene. Mwachikanga, Davide wakaluta kukarwa na chinkhara chakujituntha chira.

¹² Chifukwa wuli Davide wakaŵa na chikanga nthena? Wakagomezga kuti Yehova wakaŵa nayo. (Ŵazgani 1 Samuyeli 17:37, 45-47.) Davide wakaŵika maghanoghano ghake pa ukuru wa Goliyati yayi. M’malo mwake, wakawona kuti Goliyati wakaŵa kanthu yayi mu maso gha Yehova. Kasi tikusambirapo vichi apa? Tiŵenge na chikanga para tikugomezga kuti Yehova wali nase, ndipo ngwankhongono chomene kuluska ŵalwani ŵithu. (2 Mid. 20:15; Sal. 16:8) Kasi tingachita wuli kuti tiŵe na chikanga pambere nthambuzgo yindize?

13. Kasi tingachita wuli kuti tiŵe na chikanga? Longosorani.

¹³ Tingaŵa na chikanga chomene para tikupharazga makani ghawemi gha Ufumu wa Chiuta. Chifukwa wuli? Chifukwa upharazgi ukutovwira kuti tigomezgenge Yehova na kuleka kopa ŵanthu. (Zinth. 29:25) Nga umo thupi lithu likuŵira lankhongono para tikuchita maseŵero, chikanga chithu chikukura para tikupharazga nyumba na nyumba, ku malo uko kukusangika ŵanthu ŵanandi, kupharazga mwamwaŵi, na ku malo uko ŵakuchitirako malonda. Para sono tikutemwa kupharazga, tizamuŵa ŵakunozgeka kupharazga nanga ntchito yithu yingakanizgika.—1 Tes. 2:1, 2.

14-15. Kasi tikusambirako vichi kwa Nancy Yuen na Valentina Garnovskaya?

¹⁴ Tingasambirako vinandi ku ŵadumbu ŵaŵiri ŵakugomezgeka awo ŵakalongora chikanga. Nangauli, Nancy Yuen wakaŵa mufupi,  kweni wakaŵa wachikanga. * Wakakana kuleka kupharazga makani ghawemi gha Ufumu wa Chiuta. Ntheura ŵakamujalira mu jele vyaka vyakujumpha 20 ku China. Ŵalara ŵa boma awo ŵakamufumbanga, ŵakayowoya kuti wakaŵa “munthu wamtafu chomene” mu charu chawo.

¹⁵ Valentina Garnovskaya nayo ŵakamujalira mu jele katatu ku Russia, ndipo wakakhala mu jele vyaka pafupifupi 21. * Chifukwa wuli ŵakamujalira? Wakalimbikiranga kupharazga, nakuti ŵalara ŵa boma ŵakati “ntchigeŵenga chakofya chomene.” Ntchivichi chikawovwira ŵadumbu ŵakugomezgeka aŵa kuti ŵaŵe na chikanga nthena? Ŵakagomezga kuti Yehova wakaŵa nawo.

16. Kasi tingachita wuli kuti tiŵe na chikanga chanadi?

¹⁶ Nga umo tasambilira mu nkhani iyi, kuti tiŵe na chikanga, tikwenera kuthemba nkhongono zithu panji maluso ghithu yayi. M’malo mwake, tikwenera kugomezga kuti Yehova wali nase ndipo ndiyo wakutilwera nkhondo. (Doto. 1:29, 30; Zek. 4:6) Iyi ni nthowa yikuru iyo tingaŵira na chikanga chanadi.

17-18. Kuyana na lemba la Yohane 15:18-21, kasi Yesu wakati vichi? Longosorani.

¹⁷ Tikukondwa para ŵanthu ŵakutichindika, ndipouli para ŵanthu ŵakutitinkha tileke kughanaghana kuti ndise ŵambura kuzirwa. Yesu wakati: “Ŵakukondwa ndimwe para ŵanthu ŵakumutinkhani, ndiposo para ŵakumukanani na kumutombozgani na kunanga zina linu chifukwa cha Mwana wa munthu.” (Luka 6:22) Kasi Yesu wakang’anamurangachi?

¹⁸ Palije Mkhristu uyo wakukondwa para wakutinkhika. Kweni apa Yesu wakatiphaliranga ivyo vitichitikirenge. Tili ku chigaŵa cha charu yayi. Tikulondezga ivyo Yesu wakasambizganga ndipo tikupharazga ivyo iyo wakapharazganga. Lekani charu chikutitinkha. (Ŵazgani Yohane 15:18-21.) Tikukhumba  kukondweska Yehova. Para ŵanthu ŵakutitinkha chifukwa chakuti tikukhumba kukondweska Yehova, mbwenu palije suzgo.

19. Kasi tingaŵayezga wuli ŵapositole?

¹⁹ Mungakhozgekanga soni yayi na ivyo ŵanthu ŵakuchita panji kuyowoya chifukwa chakuti ndimwe Kaboni wa Yehova. (Mika 4:5) Tingaleka kopa ŵanthu para tingaghanaghanira ivyo vikachitikira ŵapositole ku Yerusalemu Yesu wati wakomeka. Ŵakamanyanga kuti ŵalongozgi ŵa chisopa Chachiyuda ŵakaŵatinkhanga. (Mil. 5:17, 18, 27, 28) Ndipouli, zuŵa lililose ŵakalutanga mu tempile na kujilongora pakweru kuti ŵakaŵa ŵasambiri ŵa Yesu. (Mil 5:42) Ŵakaleka yayi kupharazga chifukwa cha wofi. Nase tingaleka kopa para tikujiphara pakweru kuti ndise Ŵakaboni ŵa Yehova, kwali nkhu ntchito, ku sukulu na uko tikukhala.—Mil. 4:29; Rom. 1:16.

20. Chifukwa wuli ŵapositole ŵakaŵa ŵakukondwa nangauli ŵakatinkhikanga?

²⁰ Chifukwa wuli ŵapositole ŵakaŵa ŵakukondwa? Ŵakamanyanga kuti ŵanthu ŵakuŵatinkha, ndipo ŵakawona kuti ni mwaŵi ukuru kutinkhika chifukwa cha kuchita khumbo la Yehova. (Luka 6:23; Mil. 5:41) Mpositole Petrosi wakalemba kuti: “Nanga musuzgike chifukwa cha urunji, muŵenge ŵakukondwa.” (1 Pet. 2:19-21; 3:14) Para tamanya kuti tikutinkhika chifukwa cha kuchita icho ntchiwemi, tilekenge yayi kuteŵetera Yehova.

21-22. (a) Kasi mwasankha kuchita vichi kuti munozgekere nthambuzgo? (b) Kasi mu nkhani yakulondezgapo tizamusambira vichi?

²¹ Tikumanya yayi apo ŵanthu ŵazamwambira kutitambuzga panji apo boma lizamukanizgira ntchito yithu. Ndipouli, tikumanya kuti sono ndiyo nyengo yakuti tikhozgere ubwezi withu na Yehova. Tingakhozga ubwezi uwu, para tikulutilira kuŵa na chikanga kweniso tikuzizipizga para ŵanthu ŵakutitinkha. Ivyo tikuchita sono vizamutovwira kuti tilutilire kuteŵetera Yehova panyengo ya nthambuzgo.

²² Kasi tingachita wuli para takanizgika kuchita mulimo withu? Mu nkhani yakulondezgapo, tizamusambira fundo za mu Baibolo izo zizamutovwira kulutilira kuteŵetera Yehova nanga ntchito yithu yingaŵa kuti njakukanizgika.