NKHANI YAKUSAMBIRA 4
Chifukwa Wuli Tikwenera Kusangikapo pa Chikumbusko?
“Lutilirani kuchita ichi kuti munikumbukenge.”—LUKA 22:19.
SUMU 20 Mukapeleka Mwana Winu Wakuzirwa
IVYO VILI MU NKHANI IYI *
1-2. (a) Kasi mphawuli apo tikumukumbukanga chomene wakutemweka withu uyo wali kufwa? (b) Kasi Yesu wakambiska vichi pa usiku wakuti namachero wafwenge?
NANGA pangajumpha nyengo yitali kufuma apo ŵakutemweka ŵithu ŵakafwira, kweni tikuŵakumbukira nipera. Chomene tikuŵakumbukanga pa zuŵa ilo ŵakafwira.
2 Chaka chilichose, tikuŵa pakati pa ŵanthu mamiliyoni ghanandi pa charu chose awo ŵakuwungana pa zuŵa la kukumbukira nyifwa ya munthu uyo tikumutemwa chomene, Yesu Khristu. (1 Pet. 1:8) Tikukumana pamoza kuti tikumbukire uyo wakapeleka umoyo wake kuŵa sembe kuti watiwombore ku kwananga na nyifwa. (Mat. 20:28) Nakuti Yesu wakakhumbanga kuti ŵalondezgi ŵake ŵakumbukirenge nyifwa yake. Pa usiku wakuti namachero wafwenge, wakambiska Mugonero wa Fumu ndipo wakalangura kuti: “Lutilirani kuchita ichi kuti munikumbukenge.” *—Luka 22:19.
3. Kasi tidumbiskanenge vichi mu nkhani iyi?
3 Mbanthu ŵachoko waka mwa awo ŵakuŵapo pa Chikumbusko cha Nyifwa ya Khristu awo ŵali na chigomezgo chakuluta kuchanya. Kweni ŵanthu mamiliyoni ghanandi awo ŵali na chigomezgo chakuzakakhala pa charu chapasi nawoso ŵakuŵapo. Mu nkhani iyi, tiwonenge vifukwa ivyo magulu ghose ghaŵiri ghakuŵira ghakukhumbisiska kuŵapo pa Chikumbusko chaka chilichose. Tiwonengeso vyandulo ivyo tikusanga para tasangikapo pa ungano uwu. Tiyeni tambe na kuwona vifukwa vinyake ivyo ŵakuphakazgika ŵakuŵirapo pa ungano uwu.
CHIFUKWA ICHO ŴAKUPHAKAZGIKA ŴAKUSANGIKIRAPO
4. Chifukwa wuli ŵakuphakazgika ndiwo ŵakurya chingwa kweniso kumwa vinyo pa Chikumbusko?
4 Chaka chilichose, ŵakuphakazgika awo ŵakuŵapo pa Chikumbusko ŵakurya chingwa na kumwa vinyo. Chifukwa wuli ŵakurya chingwa kweniso kumwa vinyo? Kuti tizgore fumbo ili, ghanaghanirani ivyo vikachitika pa usiku waumaliro waumoyo wa Yesu pa charu chapasi. Pamanyuma pa Paska, Yesu wakambiska chakuchitika chapadera icho sono chikuchemeka kuti Mugonero wa Fumu. Wakapeleka chingwa na vinyo ku ŵapositole ŵake 11 ŵakugomezgeka ndipo wakaŵaphalira kuti ŵarye na kumwa. Yesu wakayowoya vya mapangano ghaŵiri, phangano liphya na phangano la Ufumu. * (Luka 22:19, 20, 28-30) Mapangano agha ghakajura nthowa ku ŵapositole 11 ŵara kweniso ŵanthu ŵanyake ŵachoko waka kuti ŵakaŵe mafumu na ŵasembe kuchanya. (Chivu. 5:10; 14:1) Ŵakuphakazgika awo ŵachali pa charu chapasi, ndiwo ŵakwenera kurya chingwa na kumwa vinyo pa Chikumbusko chifukwa ndiwo ŵali mu mapangano ghaŵiri agha.
5. Kasi ŵakuphakazgika ŵakumanya vichi vya chigomezgo icho ŵali kupika?
5 Wonani chifukwa chinyake icho ŵakuphakazgika ŵakuŵira ŵakunweka kusangikapo pa Chikumbusko: Kusangikapo pa ungano wapadera uwu kukuŵapa mwaŵi wa kughanaghanirapo vya chigomezgo chawo. Yehova waŵapa chigomezgo chapadera, uwo ni umoyo wambura kufwa kweniso thupi lambura kuvunda kuchanya, kuti ŵakawuse pamoza na Yesu Khristu uyo wakawuskika, kweniso pamoza na ŵa 144,000 ŵanyawo awo ŵali kale kuchanya, ndipo kuluska vyose, kuti ŵakaŵe pamoza na Yehova Chiuta! (1 Kor. 15:51-53; 1 Yoh. 3:2) Ŵakuphakazgika ŵakumanya kuti ŵali kuchemeka kuti ŵakasangwe na vitumbiko ivi kuchanya. Kweni kuti ŵaŵe ŵakwenelera kuluta kuchanya, ŵakwenera kulutilira kugomezgeka m’paka nyifwa yawo. (2 Tim. 4:7, 8) Chikumbusko chikuŵapa chimwemwe chikuru ŵakuphakazgika apo ŵakughanaghanirapo vya chigomezgo chawo chakuchanya. (Tito 2:13) Wuli pakuyowoya vya ŵa “mberere zinyake”? (Yoh. 10:16) Kasi ni vifukwa wuli ivyo nawo ŵakusangikirapo pa Chikumbusko?
CHIFUKWA ICHO ŴA MBERERE ZINYAKE ŴAKUSANGIKIRAPO
6. Chifukwa wuli ŵa mberere zinyake ŵakuŵapo pa Chikumbusko chaka chilichose?
6 Ŵa mberere zinyake nawo ŵakuŵapo pa Chikumbusko, kweni ŵakuryako yayi chingwa na kumwa vinyo, iwo ŵakuwonelera waka. Mu 1938, awo ŵakaŵa na chigomezgo cha kuzakakhala pa charu chapasi, nawo ŵakachemeka kakwamba kuti ŵakaŵepo pa Chikumbusko. Gongwe la Mulinda la Malichi 1, 1938, likayowoya kuti: “Ntchakwenelera kuti ŵa mberere zinyake nawo ŵaŵepo pa ungano uwu na kuwonelera ivyo vikuchitika. . . . Vikwenera kuŵa nthena chifukwa nawo ni nyengo yakuti ŵakondwelere.” Ŵalendo ŵakuŵa ŵakukondwa para ŵachemeka ku ukwati kuti ŵakawonelere, mwakuyana waka, ŵa mberere zinyake nawo ŵakukondwa kuŵapo pa Chikumbusko nangauli ŵakuwonelera waka.
7. Chifukwa wuli ŵa mberere zinyake ŵakulindilira mwakunweka kuzakategherezga nkhani ya pa Chikumbusko?
7 Ŵa mberere zinyake nawo ŵakughanaghanirapo chomene vya chigomezgo chawo. Ŵakulindilira mwakunweka kuzakategherezga nkhani ya Chikumbusko, chifukwa nkhani iyi chomene yikuyowoya ivyo Yesu na ŵa 144,000 awo ŵamuwusa nayo lumoza ŵazamuchitira ŵanthu ŵakugomezgeka munyengo ya Muwuso wa Vyaka 1000. Pasi pa muwuso wa Fumu yawo Yesu Khristu, awo ŵamuwusa kuchanya ŵazamovwirapo pa kuzgora charu chapasi kuŵa paradiso na kovwira ŵanthu ŵakugomezgeka kuŵa ŵarunji. Chikuŵa chakukondweska chomene ku ŵanthu mamiliyoni ghanandi, awo nawo ŵakuŵapo pa Chikumbusko kughanaghanira vya umo mauchimi gha mu Baibolo ghazamufiskikira munthazi, nga agho ghakusangika pa Yesaya 35:5, 6; 65:21-23; na Chivumbuzi 21:3, 4. Para ŵakughanaghanira kuti ŵali lumoza na ŵakutemweka ŵawo mu charu chiphya, ŵakukhozga chigomezgo chawo cha munthazi kweniso ŵakuŵikapo mtima chomene kuteŵetera Yehova.—Mat. 24:13; Gal. 6:9.
8. Kasi ntchifukwa wuli chinyake icho ŵa mberere zinyake ŵakusangikirapo pa Chikumbusko?
8 Wonani chifukwa chinyake icho ŵa mberere zinyake ŵakusangikirapo pa Chikumbusko. Ŵakukhumba kulongora chitemwa chawo kweniso kukhozgera ŵakuphakazgika. Mazgu gha Chiuta ghakayowoyerathu kuti pazamuŵa kukolerana kukuru pakati pa ŵakuphakazgika na awo ŵali na chigomezgo chakuzakakhala pa charu chapasi. Mwawuli? Tiyeni tiwone viyelezgero vichoko waka.
9. Kasi uchimi uwo uli pa Zekariya 8:23 ukulongora wuli umo ŵa mberere zinyake ŵakuŵawonera ŵakuphakazgika?
9 Ŵazgani Zekariya 8:23. Uchimi uwu ukulongora makora umo ŵa mberere zinyake ŵakuwonera ŵabali na ŵadumbu ŵawo ŵakuphakazgika. Mazgu ghakuti “Muyuda” na “mwaŵanthu imwe” ghakuyowoya vya gulu limoza, awo Mbakhristu ŵakuphakazgika awo ŵachali pa charu chapasi. (Rom. 2:28, 29) “Ŵanthu 10 ŵakufuma mu mitundu ya viyowoyero vyose,” ŵakwimira ŵa mberere zinyake. ‘Ŵakukoleska,’ panji kudemelera ku ŵakuphakazgika, mwa kuchitira lumoza kusopa kutuŵa. Ntheura pa zuŵa la Chikumbusko, ŵa mberere zinyake ŵakulongora kuti ŵakukolerana na ŵakuphakazgika mwa kusangikapo pa ungano uwu.
10. Kasi Yehova wachita vichi pakufiska uchimi uwo uli pa Ezekiyeli 37:15-19, 24, 25?
10 Ŵazgani Ezekiyeli 37:15-19, 24, 25. Yehova wafiska uchimi uwu mwakupangiska ŵakuphakazgika na ŵa mberere zinyake kuchitira vinthu lumoza mwakukolerana. Uchimi uwu ukuzunura tumakuni tuŵiri, kakhuni ka Yuda na ka Efurayimu. Awo ŵali na chigomezgo cha kuchanya ŵali nga nkhakhuni ‘ka Yuda’ (fuko ilo mukafumanga mathemba gha Israyeli), ndipo awo ŵali na chigomezgo chakuzakakhala pa charu chapasi ŵali nga nkhakhuni “ka Efurayimu.” * Yehova wakeneranga kugumanya magulu ghose ghaŵiri kuti ghaŵe “kakhuni kamoza.” Ichi chikung’anamura kuti ŵakuteŵetera mwakukolerana pasi pa Fumu yawo yimoza, Yesu Khristu. Chaka chilichose ŵakuphakazgika na ŵa mberere zinyake ŵakwiza pa Chikumbusko, nga magulu ghaŵiri ghakupambana yayi, kweni nga “mskambo umoza” pasi pa “muliska yumoza.”—Yoh. 10:16.
11. Kasi “mberere” izo zikuzunulika pa Mateyu 25:31-36, 40 zikulongora wuli kuti zikukhozgera ŵabali ŵa Khristu?
11 Ŵazgani Mateyu 25:31-36, 40. “Mberere” mu ntharika iyi zikwimira ŵanthu ŵarunji mu nyengo ya umaliro, awo ŵali na chigomezgo chakuzakakhala pa charu chapasi, awo mba mberere zinyake. Ŵakukhozgera mwakugomezgeka ŵabali ŵa Khristu, mwa kuŵawovwira kufiska udindo ukuru uwo ŵali nawo, iyo ni ntchito ya kupharazga pa charu chose na kuzgora ŵanthu kuŵa ŵasambiri.—Mat. 24:14; 28:19, 20.
12-13. Kasi ni nthowa wuli zinyake izo ŵa mberere zinyake ŵakulongolera kuti ŵakukhozgera ŵabali ŵa Khristu?
12 Chaka chilichose para kwakhala masabata ghachoko waka pambere zuŵa la Chikumbusko lindakwane, ŵa mberere zinyake ŵakukhozgera ŵabali ŵa Khristu pakuchita nawo ntchito iyo yikuchitika pa charu chose yakuchemera ŵanthu ŵakunweka ku Chikumbusko. (Wonani bokosi la mutu wakuti “ Kasi Mwanozgekera Nyengo ya Chikumbusko?”) Ŵakuwoneseskaso kuti vyose vyakukhwaskana na Chikumbusko vyanozgeka, nanga vingaŵa kuti mu mpingo wawo mulije uyo ngwakuphakazgika. Ŵa mberere zinyake ŵakuŵa ŵakukondwa kovwira ŵabali ŵa Khristu mu nthowa iyi. Ŵa mberere zinyake aŵa ŵakumanya kuti Yesu wakuwona ivyo iwo ŵakuchitira ŵabali ŵake ŵakuphakazgika, nga kuti ŵakumuchitira iyo.—Mat. 25:37-40.
13 Kasi ni vifukwa wuli vinyake ivyo tose, kwali tili na chigomezgo wuli, tikusangikirapo pa Chikumbusko?
CHIFUKWA ICHO TOSE TIKUSANGIKIRAPO
14. Kasi Yehova na Yesu ŵali kulongora wuli chitemwa chikuru kwa ise?
14 Tikuwonga chitemwa icho Yehova na Yesu ŵali kutilongora. Yehova walongora chitemwa chake kwa ise mu nthowa zinandi, kweni nthowa yikuru iyo walongolera chitemwa chake kwa ise ndiyo kutuma Mwana wake wapadera kuzakasuzgika na kutifwira. (Yoh. 3:16) Ndipo Yesu nayo wakalongora chitemwa chikuru pakuzomera kupeleka umoyo wake chifukwa cha ise. (Yoh. 15:13) Palije icho tingawezgera Yehova na Yesu pa chitemwa icho ŵalongora kwa ise. Kweni tingalongora kuti tikuwonga kwizira mu ivyo tikuchita pa umoyo withu wa zuŵa na zuŵa. (Kol. 3:15) Ndipo tikusangikapo pa Chikumbusko na chilato chakuti tighanaghanirepo chitemwa chawo icho ŵali kutingolora kweniso kuti nase tilongore chitemwa chithu kwa iwo.
15. Chifukwa wuli ŵakuphakazgika na ŵa mberere zinyake wose ŵakuwonga chomene chawanangwa cha sembe yakuwombora?
15 Tikuwonga chawanangwa cha sembe yakuwombora. (Mat. 20:28) Sembe yakuwombora njakuzirwa chomene ku ŵakuphakazgika chifukwa yikupangiska chigomezgo chawo kuŵa chanadi. Chifukwa cha chipulikano chawo mu sembe ya Khristu, Yehova wakuŵawona kuŵa ŵarunji kweniso ŵana ŵake. (Rom. 5:1; 8:15-17, 23) Ŵa mberere zinyake nawo ŵakuwonga sembe yakuwombora iyi. Chifukwa chakuti ŵali na chipulikano mu sembe ya Yesu, ŵali na njuŵi yituŵa pamaso pa Chiuta, ŵakuchita uteŵeteti wakupatulika, kweniso ŵali na chigomezgo kuti ŵazamufuma “mu suzgo yikuru.” (Chivu. 7:13-15) Nthowa yimoza iyo ŵakuphakazgika na ŵa mberere zinyake ŵakulongolera kuti ŵakuwonga sembe yakuwombora, nkhusangikapo pa Chikumbusko chaka chilichose.
16. Kasi ntchifukwa wuli chinyake icho tikusangikirapo pa Chikumbusko?
16 Chifukwa chinyake icho tikusangikirapo pa Chikumbusko ntchakuti tikukhumba kupulikira Yesu. Kwali chigomezgo chithu ntcha kuchanya panji pa charu chapasi, waliyose wa ise wakukhumba kupulikira dango ilo Yesu wakapeleka pa usiku uwo wakambiskira Chikumbusko lakuti: “Lutilirani kuchita ichi kuti munikumbukenge.”—1 Kor. 11:23, 24.
VYANDULO IVYO TOSE TIKUSANGA CHIFUKWA CHA KUSANGIKAPO
17. Kasi Chikumbusko chikutovwira wuli kusendelera kwa Yehova?
17 Tikusendelera pafupi na Yehova. (Yak. 4:8) Nga umo tasambilira, Chikumbusko chikutipa mwaŵi wakughanaghanirapo vya chigomezgo icho Yehova watipa kweniso kughanaghanirapo pa chitemwa chikuru icho Yehova wali kutilongora. (Yer. 29:11; 1 Yoh. 4:8-10) Para tikughanaghanirapo vya chigomezgo chithu chanadi cha munthazi kweniso pa chitemwa cha Chiuta chambura kumara kwa ise, tikukhozga chitemwa chithu kwa Yehova kweniso kukhozga ubwezi withu na iyo.—Rom. 8:38, 39.
18. Kasi para tikughanaghanirapo pa ivyo Yesu wakachita tikuchiskika kuchitachi?
18 Tikuchiskika kuyezga Yesu. (1 Pet. 2:21) Para Chikumbusko chili pafupi, tikughanaghanirapo pa nkhani za mu Baibolo zakukhwaskana na sabata yaumaliro ya umoyo wa Yesu pa charu chapasi, nyifwa yake, na chiwuka chake. Ndipo mise pa zuŵa la Chikumbusko, nkhani ya Chikumbusko yikutikumbuska chitemwa cha Yesu pa ise. (Efe. 5:2; 1 Yoh. 3:16) Para tikuŵerenga vya kujipata uko Yesu wakachita na kughanaghanirapo, tikuchiskika “kulutilira kwenda nga umo iyo wakenderanga.”—1 Yoh. 2:6.
19. Kasi tingachita wuli kuti tikhalilire mu chitemwa cha Chiuta?
19 Tikuŵikapo mtima chomene kukhalilira mu chitemwa cha Chiuta. (Yuda 20, 21) Tikukhalilira mu chitemwa cha Chiuta para tikuchita vyose ivyo tingafiska kuti timupulikirenge, kutuŵiska zina lake, na kukondweska mtima wake. (Zinth. 27:11; Mat. 6:9; 1 Yoh. 5:3) Ntheura kusangikapo pa Chikumbusko kukutichiska kuti tiŵikepo mtima chomene kuchita vinthu ivyo Yehova wakukondwa navyo, ndipo para tachita nthena viŵenge nga tikuyowoya kwa Yehova kuti, ‘Nkhukhumba kukhalilira mu chitemwa chinu kwamuyirayira!’
20. Kasi tili na vifukwa wuli viwemi vyakusangikirapo pa Chikumbusko?
20 Kwali chigomezgo chithu ntcha kuzakakhala kwamuyirayira kuchanya panji pa charu chapasi, tili na vifukwa viwemi vyakusangikirapo pa Chikumbusko. Chaka chilichose para tawungana pamoza pa zuŵa ili, tikukumbukira nyifwa ya uyo tikumutemwa chomene, Yesu Khristu. Kweni pa vyose, tikukumbukira chitemwa chikuru chomene, chitemwa icho Yehova wali kutilongora pakutipa Mwana wake kuŵa sembe yakuwombora. Chaka chino, Chikumbusko chizamuchitika mise pa Chinkhondi, Epulero 15, 2022. Tikumutemwa chomene Yehova na Mwana wake. Ntheura pa zuŵa la kukumbukira nyifwa ya Yesu, chakuzirwa chomene kwa ise kuluska chilichose, nkhusangikapo pa Chikumbusko.
SUMU 16 Lumbani Ya Chifukwa cha Mwana Wake Wakuphakazgika
^ Kwali chigomezgo chithu ntcha kuchanya panji pa charu chapasi, tikulindilira mwakunweka kusangikapo pa Chikumbusko chaka chilichose. Mu nkhani iyi, tidumbiskanenge vifukwa vya mu Malemba ivyo tikusangikirapo pa Chikumbusko kweniso uwemi wakuchita nthena.
^ Mazgu agha ghali kung’anamulikaso kuti “Chitani ichi kuti mundikumbuke ine” (Tumbuka Bible) ndiposo “Chitani ichi kuti mundikumbuke” (Baibolo la Phangano Liphya).
^ Kuti mumanye vinandi vyakukhwaskana na phangano liphya na phangano la Ufumu, wonani nkhani ya mutu wakuti “Muzamuŵa ‘Ufumu wa Ŵapristi’” mu Gongwe la Mulinda la Okutobala 15, 2014, pp. 15-17.
^ Kuti mumanye vinandi vyakukhwaskana na uchimi wa tumakuni tuŵiri uwo ukusangika pa Ezekiyeli chipaturo 37, wonani mu buku lakuti Yehova Wawezgerapo Kusopa Kutuŵa!, peji 130-135, ndime 3-17.
