1-3. Kasi ntchimi yakufuma ku Yuda yikatondeka kuchita vichi? Ndipo chikachitika ntchivichi? (Wonani chithuzi chakwamba.)

MU NYENGO ya Themba Yerobowamu, Yehova wakatuma ntchimi kufuma ku Yuda kuti yikaphalire themba lakugaruka la Israyeli ili uthenga wacheruzgo. Ntchimi yakujiyuyura yira yikafiska uthenga, ndipo Yehova wakayivikilira kwa Yerobowamu uyo wakakalipa chomene pa nyengo yira.—1 Mathe. 13:1-10.

² Apo ntchimi yikaweranga, yikakumana na munthu muchekuru wakufuma ku Beteli. Munthu uyu wakati ni ntchimi ya Yehova. Wakapusika ntchimi yachinyamata kuti yileke kupulikira ulongozgi wa Yehova wakuti yileke ‘kurya chingwa panji kumwa maji mu Israyeli’ na kuleka ‘kuwelera na nthowa iyo yikizamo.’ Ivi vikamukwiyiska chomene Yehova. Apo munthu wa Yehova wakufuma ku Yuda wakaweranga, wakakumana na nkhalamu pa msewu ndipo yikamukoma.—1 Mathe. 13:11-24.

³ Chifukwa wuli ntchimi yakujiyuyura iyi yikajiŵikamo na kulutira lumoza na munthu mutesi? Baibolo likuyowoya yayi chifukwa chake. Panji yikaluwa kuti yikeneranga ‘kwenda mwakujiyuyura na Chiuta wake.’ (Ŵerengani Mika 6:8.) Para Baibolo  likuyowoya kuti munthu wakwenda na Yehova, likung’anamura kuti wakumugomezga Yehova, wakumanya kuti ndiyo ni Fumu, na kumupulikira. Munthu wakujiyuyura wakumanya makora kuti nyengo zose wakwenera kuyowoyeskana na Adada ŵake ŵachitemwa, awo mbankhongonozose. Ntchimi iyi mphanyi yikafumba Yehova kuti wayilongosolere makora. Kweni Baibolo likuyowoyapo yayi kuti ndimo ntchimi iyi yikachitira. Nyengo zinyake nase tingakhumbikwira kusankha chakuchita pa nkhani yakusuzga, ndipo tingamanya makora yayi chakuchita. Kweni para tingajiyuyura na kupenja ulongozgi wa Yehova vingatovwira kuti tileke kusankha vinthu ivyo pamanyuma tingazakalira navyo.

4. Kasi tisambirenge vichi mu nkhani iyi?

⁴ Mu nkhani iyo yajumpha tikasambira chifukwa icho Ŵakhristu ŵakwenera kuŵira ŵakujiyuyura, kweniso ivyo munthu wakujiyuyura wakuchita. Kweni kasi mphawuli apo chingaŵa chakusuzga kujiyuyura? Ndipo tingachita wuli kuti tiŵe ŵakujiyuyura nanga tingakumana na viyezgo? Kuti tizgore mafumbo agha, tiyeni tiwone vinthu vitatu ivyo vingatiyezga usange tili ŵakujiyuyura. Tiwonengeso umo tingachitira mwamahara para takumana na chiyezgo.—Zinth. 11:2.

5, 6. Kasi Barazilayi wakalongora wuli kuti ngwakujiyuyura?

⁵ Para vinthu vinyake panji uteŵeti wasintha, tingalongora kuti ndise ŵakujiyuyura panji yayi. Nyengo yinyake Davide wakapempha Barazilayi uyo wakaŵa na vyaka 80 kuti wakakhale nayo mu nyumba yachifumu. Barazilayi wakapika mwaŵi ukuru chomene. Wazomerenge mphanyi wakakhala na themba. Kweni Barazilayi wakakana. Chifukwa wuli? Chifukwa chakuti wakaŵa muchekuru. Wakaphalira Davide kuti iyo wakakhumba yayi kulisuzga themba. Ntheura Barazilayi wakati Kimuhamu, uyo panji wakaŵa mwana wake, ndiyo walute nayo.—2 Sam. 19:31-37.

⁶ Barazilayi wakaŵa wakujiyuyura lekani wakachita mwamahara. Kasi wakakana kuluta na Davide chifukwa chakuti wakagwenthanga udindo? Panji wakakananga kumusuzga ndipo wakakhumbanga waka kupumura kunyumba kwake? Yayi. Iyo wakamanyanga kuti wakaŵa muchekuru ndipo vinyake wangakwaniska yayi. Wakakhumba yayi kuzomera ivyo wangatondeka kufiska. (Ŵerengani Ŵagalatiya 6:4, 5.) Para tikukhumba chomene malo ghapachanya, udindo, panji kumanyikwa, tingamba kujiwona, kuphalizgana na ŵanyithu, ndipo paumaliro vinthu vingatiŵira makora yayi. (Gal. 5:26) Kweni ŵanthu ŵakujiyuyura, ŵakugwilira lumoza ntchito na ŵanyawo kuti ŵachindike Chiuta na kovwilira ŵanthu.—1 Kor. 10:31.

7, 8. Kasi kujiyuyura kungatovwira wuli kuti tileke kujithemba?

⁷ Para munthu wali na milimo yinandi, wakuŵaso na udindo ukuru ndipo nyengo zinyake wangamba kujikuzga. Nehemiya wakati wapulika masuzgo agho ŵanthu ŵa Chiuta ŵakakumananga nagho mu Yerusalemu, wakalomba kwa Yehova. (Neh. 1:4, 11) Themba Aritazekisesi likati limika Nehemiya kuti walaŵilirenge chigaŵa, vinthu vikamba kwenda makora. Nangauli Nehemiya wakaŵa na udindo wapachanya, musambazi, kweniso wamazaza, iyo wakathemba ivyo wakamanyanga yayi panji maluso ghake. Wakalutilira kwenda na Chiuta. Wakaleka yayi kuŵerenga Dango la Chiuta na kupenja ulongozgi wa Yehova. (Neh. 8:1, 8, 9) Nehemiya wakasuzganga ŵanthu yayi, kweni wakaŵateŵeteranga.—Neh. 5:14-19.

 ⁸ Ivyo Nehemiya wakachita vikutisambizga kuti tileke kujithemba para tapokera uteŵeti panji udindo. Para mulara wakuthemba waka maluso ghake, wangamba kunozgekera nkhani panji kuchita vinthu vinyake vya mpingo kwambura kulomba dankha kwa Yehova kuti wamovwire. Ŵanyake ŵangamba kusankha dankha chakuchita pamanyuma na kulomba Yehova kuti watumbike ivyo ŵasankha. Kweni kasi uku nkhujiyuyura? Munthu wakujiyuyura wakumanya kuti Chiuta ndiyo wakwenera kumulongozga, kweniso wakumanya ivyo wakwenera kuchita mu gulu la Chiuta. Maluso ghithu ndigho ngakuzirwa chomene yayi. Kanandi chikuŵa chakusuzga chomene kuthemba Chiuta para takumana na suzgo ilo tikakumanapo nalo. Panyengo iyi ndipo tikwenera kuchenjera chomene kuti tileke kujithemba. (Ŵerengani Zintharika 3:5, 6.) Pakuŵa ŵamunyumba ya Chiuta, tikuchita milimo yithu mu banja panji mu mpingo, m’malo mwa kughanaghanira waka umo tingasangira maudindo.—1 Tim. 3:15.

9, 10. Kasi kujiyuyura kungatovwira wuli para ŵanthu ŵakutinena?

⁹ Nyengo zinyake chingaŵa chakusuzga kujikora para ŵanthu ŵakutisuska. Kanandi Hana wakakhaliranga waka kulira chifukwa chakuti muwolimwa munyake, Penina, wakamunyozanga. Hana wakaŵa chumba, kweni mfumu wake wakamutemwanga chomene. Zuŵa linyake Hana wakalombanga pa chihema, ndipo Eli, uyo wakaŵa wasembe mukuru, wakamunena kuti waloŵera. Kasi mukughanaghana kuti Hana wakajipulika wuli? Nangauli vikaŵa makora yayi, Hana wakajiyuyura na kujikora, ndipo wakamuzgora mwantchindi Eli. Ivyo wakalomba vili kulembeka mu Baibolo. Pemphero ili likulongora kuti Hana wakaŵa na chipulikano ndipo wakamutemwanga Yehova.—1 Sam. 1:5-7, 12-16; 2:1-10.

¹⁰ Para tili ŵakujiyuyura ‘tilutilirenge kuchita uwemi kuti tithereske uheni.’ (Rom. 12:21) Vinthu vili makora yayi mu charu cha Satana  ichi, ndipo tikwenera kulimbikira kuti tileke kukhalira waka kukwenyelera na nkharo izo ŵanthu ŵaheni ŵakuchita. (Sal. 37:1) Tikukwenyelera chomene para uyo watibudira ni mubali panji mudumbu. Kweni munthu wakujiyuyura wakuyezga Yesu. Baibolo likuti, “Apo wakatukikanga, wakawezgera kutuka yayi . . . kweni wakajipeleka kwa uyo wakweruzga mwaurunji.” (1 Pet. 2:23) Yesu wakamanya kuti kuwezgera nkhwa Yehova. (Rom. 12:19) Ŵakhristu nawo ŵakwenera kujiyuyura na kuleka “kuwezgera uheni pa uheni.”—1 Pet. 3:8, 9.

11, 12. (a) Kasi para tili ŵakujiyuyura tikuchita wuli para ŵanthu ŵakutilumba? (b) Kasi para tili ŵakujiyuyura tikuvwara wuli?

¹¹ Nyengo zinyake tingamba kujikuzga para ŵanthu ŵangatilumba chomene panji kutihaya. Wonani umo Esitere wakachitira apo ŵanthu ŵakamulumbanga chomene. Iyo wakaŵa wakutowa chomene. Nyengo yinyake ŵanthu ŵakakhaliranga waka kumupa chakurya chapadera na kumuphaka mafuta ghapachanya chaka chose. Zuŵa lililose wakakhalanga na ŵasungwana ŵanyake ŵa mu Ufumu wa Peresiya awo ŵakaphalizgananga kutowa kuti themba likasorepo. Iyo wakalutilira kuchindika ŵanyake, wakajikuzgapo yayi. Kweniso wakajitukumura panji kunyada yayi wakati wasankhika na themba kuŵa fumukazi.—Est. 2:9, 12, 15, 17.

¹² Para tili ŵakujiyuyura tikuvwara na kujitozga mwakwenelera kweniso tikuchita vinthu mwamahara ndiposo mwantchindi. Tikumanya kuti ŵanthu ŵakutitemwa chifukwa cha kujitukumura yayi panji kujihaya. Kweni ŵakutitemwa chifukwa cha “mzimu wakufwasa na wakuzika.” (Ŵerengani 1 Petrosi 3:3, 4; Yer. 9:23, 24) Tingamba kujikuzga mu mtima, ndipo paumaliro mu vyakuchita. Mwachiyelezgero, tingamba kujilumba na udindo withu, kujihaya kuti tikumanya nkhani zachisisi, panji tikumanyana chomene na ŵabali ŵaudindo. Nyengo zinyake vinthu ivyo tikachita na ŵanyithu tingavilongosora nga tikachita tekha mwakuti tilumbike. Yesu wakajihayanga yayi. Ivyo iyo wakayowoyanga vikafumanga mu Malemba Ghachihebere. Iyo wakakhumbanga kuti awo ŵakupulika ŵamanye kuti ivyo wakayowoyanga vikafumanga kwa Yehova. Wakayowoyanga vinjeru vyake yayi.—Yoh. 8:28.

13, 14. Kasi tikusankha wuli vyakuchita para tili ŵakujiyuyura?

¹³ Para tikusankha vyakuchita, tingamanya usange tili ŵakujiyuyura panji yayi. Nyengo yinyake apo Paulosi wakaŵa ku Kesareya, ntchimi Agabu yikamuphalira kuti para walutenge ku Yerusalemu, ŵamumukaka panji na kukomeka wuwo. Chifukwa cha kopa kuti Paulosi wangakakakika panji kukomeka, ŵabali ŵakamuŵeyelera kuti waleke kulutako. Kweni Paulosi wakakolerana nawo yayi. Wakajithembanga yayi kweniso wakopanga ŵanthu yayi. Iyo wakagomezga chomene Yehova ndipo wakaŵa wakunozgeka kufiska uteŵeti wake kulikose uko Yehova wamutuma. Ŵabali ŵakati ŵapulika ivyo Paulosi wakayowoya, ŵakaleka kumukanizga.—Mil. 21:10-14.

¹⁴ Para tili ŵakujiyuyura tichitenge vinthu mwamahara nangauli tikumanya yayi umo vimalirenge. Tiyelezgere kuti tamba uteŵeti wanyengozose, tingajifumba kuti, kasi nizamuchita wuli para nalwara? Kasi nizamuŵawovwira wuli ŵapapi ŵane para ŵachekura? Kasi nizamujiwovwira wuli para nachekura? Kulije uko tingasanga mazgoro gha mafumbo agha nanga tingatchezera kulomba panji kupenjerezga mazgoro. (Muph. 8:16, 17) Kweni  para tikugomezga Yehova, tikumanya kuti palije icho tingachita patekha. Para tapenjerezga ulongozgi mu mabuku ghithu, kufumba ŵanyithu, na kulomba Chiuta kuti watovwire, tikwenera kulondezga waka ulongozgi uwo tasanga pakovwirika na mzimu wa Chiuta. (Ŵerengani Mupharazgi 11:4-6.) Para tachita nthena, Yehova wazamutumbika ivyo tasankha panji kutovwira kuti tisankheso makora.—Zinth. 16:3, 9.

15. Kasi tingachita wuli kuti tijiyuyurenge?

¹⁵ Pakuti kujiyuyura nkhuwemi, tingachita wuli kuti tijiyuyurenge? Tiyeni tiwone nthowa zinayi. Yakwamba, tingaŵa ŵakujiyuyura na kuchindika Yehova para tikughanaghanira mikhaliro yake yikuru na udindo wake. (Yes. 8:13) Kuluwa yayi kuti tikwenda na ŵangelo panji munthu yayi, kweni na Chiuta Wankhongonozose. Para tikukumbuka fundo iyi, ‘tijiyuyurenge pasi pa woko lankhongono la Chiuta.’—1 Pet. 5:6.

16. Kasi tingaŵa ŵakujiyuyura para tikughanaghanira vichi?

¹⁶ Yachiŵiri njakuti, para tikughanaghanira chitemwa cha Yehova, tikuŵa ŵakujiyuyura. Mpositole Paulosi wakalemba kuti viŵaro ivyo vikuwoneka vyakuzirwa pachoko, Yehova ‘wali kuvipa ntchindi zinandi chomene.’ (1 Kor. 12:23, 24) Mwakuyana waka, tose tili ŵakuzirwa kwa Yehova. Iyo wakutiyaniska na ŵanyithu yayi, kweniso wakuleka yayi kutitemwa para tabudiska vinyake. Chifukwa chakuti wakutitemwa, palije icho tikopa apo tikumuteŵetera pamoza na ŵanthu ŵake.

17. Kasi pali uwemi wuli para tikuwonamo viwemi mu ŵanyithu?

¹⁷ Yachitatu, kuwona viwemi mu ŵanyithu. Para tikuchita nthena ndikuti tikuyezga Chiuta, ndipo tikuwonga Yehova chifukwa cha uteŵeti uwo watipa. M’malo mwa kupenjerezga tuvifukwa mu ŵanyithu, na kukhumba kupoka maudindo ghawo, nyengo zose tikujiyuyura na kupokera ulongozgi wa ŵanyithu na kulondezga masachizgo ghawo. (Zinth. 13:10) Nase tikukondwa para ŵanyithu ŵapika milimo yinyake. Ndipo tikulumba Yehova para tikuwona kuti wakutumbika “ŵabali [ŵithu] wose awo ŵali mu charu.”—1 Pet. 5:9.

18. Kasi tingasambizga wuli njuŵi yithu kuti tiŵe na mikhaliro iyo Chiuta wali nayo?

¹⁸ Yaumaliro, nkharo yithu yingasintha kweniso tingachindika ŵanyithu para tikusambizga njuŵi yithu na fundo za mu Baibolo. Tichitenge vinthu mwamahara para tikujiyuyura na kuwona vinthu umo Yehova wakuviwonera. Tizamuŵa na njuŵi yiwemi chomene para tikulimbikira kusambira Baibolo, kulomba, na kulondezga ivyo tikusambira. (1 Tim. 1:5) Tikusambira kuti tikwenera kudangizga dankha vyakukhumba vya ŵanyithu. Para ise tachita chigaŵa chithu, Yehova wakutilayizga kuti, ‘wazamumalizga kutisambizga.’ Wazamutovwira kuti tiŵe ŵakujiyuyura na kuŵa nga ndiyo.—1 Pet. 5:10.

19. Ntchivichi chingatovwira kuti tilutilire kuŵa ŵakujiyuyura?

¹⁹ Ntchimi yakufuma ku Yuda yikakomeka ndipo ubwezi wake na Chiuta ukamara chifukwa cha kujikwezga kamoza pera. Kweni vingachitika kuŵa wakujiyuyura para tikuyezgeka. Tighanaghanirenge umo ŵakachitira ŵateŵeti ŵakugomezgeka ŵakale kweniso umo ŵakuchitira ŵateŵeti ŵakujiyuyura mazuŵa ghano. Para tikulutilira kwenda na Yehova, tijiyuyurenge chomene. (Zinth. 8:13) Ntchakuzirwa chomene kwenda na Yehova kuluska udindo uwo tingaŵa nawo mu gulu lake. Tiyeni tikoleske mwaŵi uwu na kulutilira kwenda mwakujiyuyura na Yehova.