NKHANI YAKUSAMBIRA 7
SUMU 15 Lumbani Mwana Wakwamba wa Yehova
Umo Tikupindulira Pakuti Yehova Wakutigowokera
“Imwe mukugowokera zanadi.”—SAL. 130:4.
FUNDO YIKURU
Mu nkhani iyi tiwonenge mazgu ghanyake gha mu Baibolo agho ghatovwirenge kuti timuwongenge chomene Yehova chifukwa wakutigowokera.
1. Chifukwa wuli kanandi ntchakusuzga kumanya ivyo munthu wakung’anamura para wati nakugowokera?
“NAKUGOWOKERA.” Mungajipulika makora chomene usange mwapulika mazgu agha, chomenechomene para mukumanya kuti mukayowoya panji kuchita chinthu chinyake icho chikakhuŵazga munthu. Kweni kasi mazgu ghakuti “nakugowokera,” chomene ghakung’anamurachi? Kasi vingaŵa kuti munthu uyo wakuyowoya mazgu agha wakung’anamura kuti ubwezi winu wawelerapo? Panji kasi wakung’anamura waka kuti wakukhumbaso yayi kudumbiskana vya nkhani iyo? Nyengo zinyake chingaŵa chakusuzga kumanya ivyo munthu wakung’anamura para wayowoya kuti nagowoka.
2. Kasi Malemba ghakulongosora wuli umo Yehova wakugowokelera? (Wonaniso mazgu ghamusi.)
2 Umo Yehova wakutigowokelera ise taŵanthu ŵakwananga vikupambana chomene na umo ise tikugowokelera ŵanyithu. Kugowoka kwa Yehova nkhwapadera chomene, palije wangayana nayo. Pakuyowoya za Yehova, wamasalimo wakati: “Imwe mukugowokera zanadi, mwakuti muwopeke.” a (Sal. 130:4) Enya, para Yehova wagowoka, ‘wakugowoka zanadi.’ Iyo wakutilongora ng’anamuro leneko la kugowoka. Nyengo zinyake awo ŵakalemba Baibolo ŵakagwiliskiranga ntchito lizgu linyake la Chihebere pakuyowoya za kugowokera kwa Yehova, ilo ŵakaligwiliskiranga ntchito yayi para ŵakuyowoya za kugowoka kwa ŵanthu.
3. Kasi kugowokera kwa Yehova kukupambana wuli na kwa ise taŵanthu? (Yesaya 55:6, 7)
3 Para Yehova wagowokera munthu, wakusisitirathu zakwananga zake. Wakuwezgeraposo ubwezi uwo ukatimbanizgika. Nadi, Yehova ngwakugowokera chomene ndipo wakuvuka yayi kutigowokera.—Ŵazgani Yesaya 55:6, 7.
4. Kasi Yehova wakutovwira wuli kuti timanye ng’anamuro lenecho la kugowokera?
4 Usange umo Yehova wakugowokelera vikupambana na umo ise tingagowokelera, ipo kasi tingamanya wuli ng’anamuro leneko la kugowoka? Yehova wakutovwira kwizira mu mazgu ghanyake agho ghakulongosora umo wakugowokelera. Mu nkhani iyi, tisandenge ghanyake mwa mazgu agha. Ghatovwirenge kuwona umo Yehova wakuwuskirapo zakwananga zithu, kweniso panyengo yimozamoza na kuwezgerapo ubwezi uwo ukatimbanizgika chifukwa cha kwananga. Apo tikusanda mazgu agha, timuwongenge chomene Dada withu walusungu Yehova, uyo wakutigowokera munthowa zinandi.
YEHOVA WAKUWUSKAPO KWANANGA
5. Kasi chikuchitika ntchivichi para Yehova watigowokera zakwananga zithu?
5 Mu Baibolo, kanandi kwananga kukuyaniskika na katundu muzito. Pakulongosora zakwananga zake, Themba Davide likati: “Mphuvya zane zabizga mutu wane. Zikunitonda kunyamura nga ni katundu muzito.” (Sal. 38:4) Kweni Yehova wakugowokera zakwananga za ŵanthu awo ŵapera. (Sal. 25:18; 32:5) Lizgu la Chihebere ilo lili kung’anamulika ‘kugowoka,’ kanandi likung’anamura “kunyamura” panji “kuyegha.” Yehova tingamuyaniska na munthu wankhongono chomene uyo mwakuyelezgera wakutithura katundu muzito wa kwananga pa chiŵegha chithu na kuyegha ndiyo.
‘Kugowokera’ (Sal. 32:5)
6. Kasi Yehova wakutaya pa mtunda utali wuli zakwananga zithu?
6 Mu Baibolo muliso mazgu ghanyake agho ghakulongora umo Yehova wakunyamulira zakwananga zithu na kuzitaya kutali. Lemba la Salimo 103:12 likutiphalira kuti: “Umo uliri utali kufuma kumafumiro gha dazi kuya kumanjiliro gha dazi, ndimo waŵikira maubudi ghithu kutali na ise.” Kumafumiro gha dazi kuli kutalikirana chomene na kumanjiliro gha dazi. Ndipo vizamukumanapo yayi. Ichi chikung’anamura kuti Yehova wakuŵika zakwananga zithu kutali chomene kuluska umo ise tingaghanaghanira. Ivi vikutisimikizgira kuti Yehova wakutigowokera zanadi ndipo wakukonthoraso yayi.
“Umo uliri utali kufuma kumafumiro gha dazi kuya kumanjiliro gha dazi” (Sal. 103:12)
7. Kasi Baibolo likulongosora wuli ivyo Yehova wakuchita na zakwananga zithu? (Mika 7:18, 19)
7 Nangauli mwakuyelezgera Yehova wakuŵika kutali zakwananga zithu, kweni kasi chikung’anamura kuti wakuzisunga? Yayi. Pakuyowoya za Yehova, Themba Hezekiya likalemba kuti: “Mwaponya zakwananga zane zose ku msana winu.” Panji nga umo mazgu ghamusi ghakuyowoyera, “mwawuskapo zakwananga zane pamaso pinu.” (Yes. 38:9, 17, mazgu ghamusi) Mazgu agha ghakulongora kuti para Yehova wawuskapo zakwananga za awo ŵapera zanadi, wakuzitaya kutali ndipo wakuzikumbukaso yayi. Fundo ya pa lemba ili yingang’anamulikaso kuti: “Mwapangiska [zakwananga zane] kuŵa nga kuti zikachitikapo yayi.” Baibolo likudidimizgaso fundo iyi na mazgu ghanyake agho ghali pa Mika 7:18, 19. (Ŵazgani.) Pa lemba ili Yehova wakuyowoya kuti wakuponya zakwananga zithu pasi pa nyanja. Mu nyengo yakale, chikaŵa chambura machitiko kuti munthu wasange chinthu icho chaponyeka pasi pa nyanja iyo njakunyang’amira.
“Mwaponya zakwananga zane zose ku msana winu” (Yes. 38:17)
“Zakwananga zawo zose muzamuziponya pasi pa nyanja” (Mika 7:19)
8. Kasi tasambira vichi kufika apa?
8 Mazgu agho tadumbiskana mu nkhani iyi ghakulongora kuti para Yehova watigowokera, wakuwuskirapothu zakwananga zithu, ntheura tikwenera yayi kujiyimbaso mulandu. Nadi, nga umo wakayowoyera Davide, “mbakukondwa awo milimo yawo yiheni yagowokereka na awo zakwananga zawo zabenekelereka. Wakukondwa ni munthu uyo Yehova wazamukonthora yayi kwananga kwake.” (Rom. 4:7, 8) Uku ndiko kugowokera kwanadi!
YEHOVA WAKUSISITA ZAKWANANGA
9. Kasi Yehova wakugwiliskira ntchito mazgu wuli pakulongosora umo wakutigowokelera?
9 Yehova wakugwiliskiraso ntchito mazgu ghanyake gha mu Baibolo, agho ghakutovwira kumanya umo wakusisitira zakwananga za awo ŵapera kwizira mu sembe yakuwombora. Mwakuyelezgera Yehova wakuyowoyeka kuti wakusuka na kuwuskapo zakwananga. Ndipo ivi vikovwira kuti wakwananga watozgeke. (Sal. 51:7; Yes. 4:4; Yer. 33:8) Yehova wakulongosora umo wakuchitira na zakwananga za awo ŵapera, wakuti: “Nanga zakwananga zinu ziŵe nga ntchinthu chiswesi, zizgokenge zituŵa nga ntchiwuvi chakukhoma. Nanga ziŵe chee, nga ni salu yiswesi, ziŵenge tututu, nga ni weya utuŵa.” (Yes. 1:18) Para pa salu panthonyera chinthu chiswesi, ntchakusuzga chomene kuchiwuskapo. Kweni na mazgu agha, Yehova wakutisimikizgira kuti zakwananga zithu zingasukika makora mwakuti zingawonekaso yayi.
“Nanga zakwananga zinu ziŵe nga ntchinthu chiswesi, zizgokenge zituŵa nga ntchiwuvi chakukhoma” (Yes. 1:18)
10. Kasi ni mazgu wuli ghanyake agho Yehova wakugwiliskira ntchito kuti walongosore umo iyo wakugowokelera?
10 Nga umo tikawonera mu nkhani iyo yajumpha, zakwananga zikuyaniskikaso na “ngongoli.” (Mat. 6:12; Luka 11:4, mazgu ghamusi) Ntheura nyengo yiliyose para tanangira Yehova, vikuŵa nga tikusazgirako ngongoli. Tikuŵa kuti tili na ngongoli yikuru kwa iyo! Kweni para Yehova watigowokera, vikuŵa nga kuti watigowokera ngongoli iyo tikaŵa nayo. Iyo wakulozgaso yayi ngongoli ya zakwananga izo zagowokereka kale. Ntheura nga umo munthu wakukondwera para ngongoli yake yagowokereka, nase tikukondwa para Yehova watigowokera.
“Mutigowokere ngongoli yithu” (Mat. 6:12, mazgu ghamusi)
11. Kasi chikung’anamurachi para Baibolo likuti zakwananga zithu ‘zasisitika’? (Milimo 3:19)
11 Yehova wakutigowokera waka ngongoli panji zakwananga zithu yayi, kweni wakuzisisitaso. (Ŵazgani Milimo 3:19.) Kuti tipulikiske makora fundo iyi, tingayelezgera kuti munthu uyo wakamukongozgani ndalama wagwarapo mzere pa figara la ndalama izo mukasayinirana. Ndipouli, waliyose wangawona figara la ndalama izo wagwarapo mzere. Kweni ivi vikupambanako na kusisita chinthu. Kuti tipulikiske fundo iyi, tikwenera kukumbuka kuti mu nyengo yakale ŵakagwiliskiranga ntchito inki iyo yikaŵa yambura kusuzga kusisita na maji. Munthu wakatoranga kasalu kakunyewa na kusisita ivyo vyalembeka. Ntheura para ngongoli ‘yasisitika,’ yikawonekangaso yayi. Munthu wakamanyangaso yayi kuti pakalembeka vichi. Vikaŵa nga kuti ngongoli iyo kukaŵavye. Ntchakukhozga chomene kumanya kuti Yehova wakugowoka waka yayi zakwananga zithu, kweni wakuzisisitirathu!—Sal. 51:9.
“Mwakuti zakwananga zinu zisisitike” (Mil. 3:19)
12. Kasi mazgu ghakuti bingu la bii, ghakutovwira kupulikiska vichi?
12 Yehova wakugwiliskira ntchito mazgu ghakuyanako waka kuti walongosore umo wakusisitira zakwananga. Iyo wakuti: “Nisisitenge maubudi ghako nga nkhusikizga kwa bingu, na zakwananga zako nga ni bingu la bii.” (Yes. 44:22) Para Yehova wagowoka, vikuŵa nga wagwiliskira ntchito bingu la bii kuti wasikizge zakwananga zithu mwakuti zileke kuwonekaso kwa waliyose.
“Nisisitenge maubudi ghako nga nkhusikizga kwa bingu” (Yes. 44:22)
13. Kasi tikujipulika wuli para Yehova watigowokera zakwananga zithu?
13 Kasi mazgu agho tawona mu nkhani iyi ghakutisambizgachi? Para Yehova watigowokera zakwananga zithu, tikwenera yayi kujiyimba mulandu umoyo withu wose na zakwananga izo tikachita. Kwizira mu ndopa za Yesu Khristu, zakwananga zithu zikusisitikirathu. Vikuŵa nga kuti tikachitapo yayi kwananga. Umu ndimo Yehova wakutigowokelera zakwananga zithu usange talapa.
YEHOVA WAKUWEZGERAPO UBWEZI UWEMI
Chifukwa chakuti Adada ŵithu ŵakuchanya ŵakutigowokera, vikovwira kuti tiŵe nawo paubwezi uwemi (Wonani ndime 14)
14. Chifukwa wuli tingagomezga kuti Yehova wakugowoka zanadi? (Wonaniso vithuzi.)
14 Pakuti Yehova wakutigowokera zanadi, vikutovwira kuti tiŵeso nayo paubwezi uwemi. Vikovwiraso kuti tileke kujiyimba mulandu chomene. Tikweneraso yayi kufipa mtima kuti Yehova watisungira chakusingo ndipo wakupenjerezga nthowa yakuti watilangire. Vingachitika yayi kuti Yehova wachite nthena. Chifukwa wuli tingamugomezga Yehova para wayowoya kuti watigowokera? Kwizira mwa ntchimi Yeremiya, Yehova wakayowoya kuti: “Nizamuŵagowokera maubudi ghawo ndipo nizamukumbukaso chara kwananga kwawo.” (Yer. 31:34) Pakuyowoya za mazgu agha, mpositole Paulosi nayo wakagwiliskira ntchito mazgu ghakuyanako waka ghakuti: “Nizamukumbukaso yayi zakwananga zawo.” (Heb. 8:12) Kweni kasi mazgu agha ghakung’anamurachi chomene?
“Nizamukumbukaso chara kwananga kwawo” (Yer. 31:34)
15. Kasi Yehova wakukumbukiraso yayi zakwananga zithu munthowa wuli?
15 Mu Baibolo, mazgu ghakuti ‘kukumbuka’ ni nyengo zose yayi apo ghangang’anamura kukumbukira chinthu chinyake panji kughanaghanira ivyo vikachitika kumasinda. M’malo mwake, ghangang’anamura kuchitapo kanthu. Chigeŵenga icho chikapayikika pafupi na Yesu chikapempha kuti: “Yesu, muzakanikumbuke para mukunjira mu Ufumu winu.” (Luka 23:42, 43) Apa chikapemphanga Yesu kuti waghanaghane waka vya icho yayi. Ivyo Yesu wakazgora vikalongora kuti wazamuchitapo kanthu pakuchiwuska chigeŵenga ichi. Ntheura para Yehova wayowoya kuti wakukumbukaso yayi zakwananga zithu, wakung’anamura kuti wakuchitaposo kanthu yayi panji kutiyimba mulandu pa ivyo tikachita. Nakuti kunthazi wazamutilanga yayi chifukwa cha zakwananga izo wali kutigowokera kale.
16. Kasi Baibolo likulongosora wuli wanangwa uwo tikusanga chifukwa chakuti Yehova wakutigowokera?
16 Baibolo likugwiliskiraso ntchito mazgu ghanyake kuti timanye wanangwa uwo tikusanga chifukwa chakuti Yehova wakutigowokera zanadi. Pakuti ndise ŵakwananga, tikuyaniskika na “ŵazga ŵa kwananga.” Kweni chifukwa chakuti Yehova wakutigowokera, tili nga mbazga awo ‘ŵafwatulika ku kwananga.’ (Rom. 6:17, 18; Chivu. 1:5) Nadi, pakuti Yehova wakutigowokera zanadi tikukondwa chomene chifukwa cha kumanya kuti tafwatulika ku wuzga.
“Muli kufwatulika ku kwananga” (Rom. 6:18)
17. Kasi kugowokera kukovwira wuli kuti tichire? (Yesaya 53:5)
17 Ŵazgani Yesaya 53:5. Mu mazgu ghaumaliro agho tidumbiskanenge, tikuyaniskika na ŵanthu awo ŵali na nthenda yakofya chomene. Chifukwa cha sembe yakuwombora iyo Yehova wakapeleka kwizira mwa Mwana wake, mwakuyelezgera tili kuchizgika. (1 Pet. 2:24) Sembe yakuwombora yikovwira kuti chiŵe chamachitiko kuti ubwezi withu na Yehova, uwo ukatimbanizgika chifukwa cha kulwara mwauzimu uwelerepo. Nga umo munthu uyo wachizgika ku nthenda yakofya wakuŵira wakukondwa chomene, nase tikukondwa chomene para tachizgika mwauzimu na kuŵaso paubwezi na Yehova chifukwa chakuti watigowokera.
“Chifukwa cha vilonda vyake tikachizgika” (Yes. 53:5)
UMO TIKUPINDULIRA PAKUTI YEHOVA WAKUTIGOWOKERA
18. Kasi tasambira vichi mu nkhani iyi pakusanda mazgu agho ghakusangika mu Baibolo ghakuyowoya vya umo Yehova wakugowokelera? (Wonaniso bokosi lakuti “Umo Yehova Wakutigowokelera.”)
18 Kasi tasambira vichi mu nkhani iyi pakusanda mazgu agho ghakusangika mu Baibolo ghakuyowoya vya umo Yehova wakugowokelera? Tasambira kuti para watigowokera, wakukonthoraso yayi panji kukumbuka. Ichi chikutovwira kuti tiŵe paubwezi uwemi na iyo. Panyengo yimozamoza, tamanya kuti kugowokereka kwanadi ntchawanangwa. Ndipo chawanangwa ichi chikufuma kwa Yehova, uyo chifukwa cha chitemwa chake na lusungu lwake lukuru, wakutigowokera taŵanthu ŵakwananga. Ndipo palije munthu uyo wangamuchichizga Yehova kuti wamupe chawanangwa ichi.—Rom. 3:24.
19. (a) Kasi tikwenera kuwonga vichi? (Ŵaroma 4:8) (b) Kasi tizamudumbiskana vichi mu nkhani yakulondezgapo?
19 Ŵazgani Ŵaroma 4:8. Tikuwonga chomene kuti Yehova ni Chiuta uyo ‘wakugowokera zanadi.’ (Sal. 130:4) Ndipouli, kuti watigowokere vikuthembaso pa chinthu chinyake chakuzirwa. Yesu wakalongosora kuti: “Usange mukugowokera chara ŵanthu maubudi ghawo, Awiskemwe nawo ŵamugowokeraninge chara maubudi ghinu.” (Mat. 6:14, 15) Ntheura ntchakuzirwa chomene kuyezga Yehova pa nkhani yakugowokera. Kasi tingachita wuli nthena? Mu nkhani yakulondezgapo tizamuwona umo tingachitira.
SUMU 46 Tikumuwongani Yehova
a Lizgu lakwambilira la Chihebere likugwiliskira ntchito mazgu ghakuti “kugowokera” agho ghakulongora kuti uku ndiko nkhugowokera kwanadi, nangauli pali mang’anamuro ghakupambanapambana gha kugowokera. Mabaibolo ghanandi ghakulongora yayi mphambano yakuzirwa iyi, kweni Baibolo la Mang’anamuliro gha Charu Chiphya likulongora, ndipo likupambanako na Mabaibolo ghanyake pa umo lemba la Salimo 130:4 lili kung’anamulikira.
