Baibolo likuyowoya mwakupulikikwa makora kuti Yehova ndiyo wangayowoyerathu vyamunthazi. (Yes. 45:21) Ndipouli, likulongosora vyose yayi vya umo Yehova wakuchitira kuti wamanyirethu vyamunthazi panji unandi wa vinthu ivyo wakusankha kumanyirathu. Ntheura tikumanya vyose yayi vyakukhwaskana na vinjeru vya Yehova pa nkhani iyi. Ndipouli, wonani fundo zichoko waka izi.

Yehova wangachita chilichose icho wakukhumba, kweni nyengo zinyake wakusankha kuleka kuchita vinthu vinyake. Yehova wangagwiliskira ntchito vinjeru vyake vyambura chigoti kuti wayowoyerethu chilichose icho wasankha. (Rom. 11:33) Kweni chifukwa chakuti ngwakujikora, wangasankhaso kuleka kumanya vinyake ivyo vichitikenge munthazi.​—Yaniskani na Yesaya 42:14.

Yehova wakupangiska kuti khumbo lake lichitike. Kasi fundo iyi yikukolerana wuli na vinjeru vyake pa nkhani ya kuyowoyerathu vyamunthazi? Lemba la Yesaya 46:10 likuti: “Nkhuyowoyerathu kufuma pakwamba ivyo vizamuchitika, kwamba kale chomene nkhuyowoyerathu vinthu ivyo vindachitike. Ine nkhuti: ‘Fundo yane yiyimenge, nichitenge chilichose icho nakhumba.’”

Ntheura chifukwa chimoza icho Yehova wangayowoyerathu vyamunthazi ntchakuti wali na nkhongono zakupangiskira vinthu kuchitika. Para Yehova wakukhumba kumanyirathu ivyo vichitikenge munthazi, wakuchita nga umo ise tikuchitira yayi kuti nyengo zinyake tikuwonelera dankha kuumaliro wa filimu mwakuti timanye umo yili kumalira. M’malo mwake, Yehova wangasankha kuyowoyerathu nyengo iyo chinthu chinyake chizamuchitikira na kupangiska kuti chinthu icho chichitike para nyengo iyo yakwana.​—Eks. 9:5, 6; Mat. 24:36; Mil. 17:31.

Pa chifukwa ichi lekani Baibolo likugwiliskira ntchito mazgu nga ghakuti “nkhachinozga,” “nkhachipanga,” panji ‘nkhachighanaghana,’ kulongosora ivyo Yehova wakuchita pa nkhani ya ivyo vichitikenge munthazi. (2 Mathe. 19:25; mazgu ghamusi; Yes. 46:11, Tumbuka Bible) Mazgu agha ghali kung’anamulika kufuma ku lizgu ilo likukolerana na lizgu ilo likung’anamura “muwuvi.” (Yer. 18:4) Nga umo muwuvi waluso wangawumbira chinthu chakutowa na dongo, Yehova nayo wangapangiska vinthu vinyake kuchitika mwakuti wafiske khumbo lake.​—Efe. 1:11.

Yehova wakuzirwiska wanangwa wakusankha uwo wali kuŵapa ŵanthu. Yehova wali kulemberathu yayi ivyo vichitikirenge waliyose. Kweniso ndiyo yayi wakupangiska kuti ŵanthu ŵamitima yiwemi ŵachite chinthu icho chingaŵalongozgera ku pharanyiko. Kweni wakupeleka wanangwa ku waliyose kusankha nthowa iyo wakwenera kwenda, ndipo wakutichiska kuti tisankhe nthowa yakwenelera.

Wonani viyelezgero viŵiri ivi. Chakwamba ntchakukhwaskana na ŵanthu ŵa mu Nineve. Yehova wakayowoyerathu kuti msumba uwu uzamuparanyika chifukwa cha uheni uwo ukazura mu msumba uwu. Kweni ŵanthu ŵa mu msumba uwu ŵakati ŵapera, Yehova “wakaghanaghanirapo pa soka ilo wakayowoya kuti wizenge nalo pa iwo, ndipo wakiza nalo chara.” (Yona 3:​1-10) Yehova wakasintha maghanoghano ghake agho wakayowoyerathu ghakukhwaskana na msumba uwu, chifukwa ŵanthu ŵa mu Nineve ŵakagwiliskira ntchito wanangwa wawo wakusankha ndipo ŵakapera Yehova wati waŵachenjezga.

Chiyelezgero chachiŵiri ni uchimi wakukhwaskana na Sayirasi kuti wazamuthereska na kufumiska Ŵayuda ku wuzga na kulangura kuti tempile la Yehova lizengekeso. (Yes. 44:26–45:4) Themba la Peresiya Sayirasi likafiska nadi uchimi uwu. (Ezir. 1:1-4) Ndipouli, Sayirasi wakasopanga Chiuta waunenesko yayi. Nangauli Yehova wakagwiliskira ntchito Sayirasi kuti wafiske uchimi uwu, kweni wakamuchichizga yayi Sayirasi kuti wambe kumusopa iyo.​—Zinth. 21:1.

Nakuti izi ni fundo zichoko waka zakukhwaskana na umo Yehova wakugwiliskilira ntchito vinjeru vyake pa nkhani ya kuyowoyerathu vyamunthazi. Unenesko ngwakuti palije munthu uyo wangazipulikiska makora nthowa zose za Yehova. (Yes. 55:​8, 9) Kweni ivyo tikumanya vyakukhwaskana na Yehova vikukhozga chipulikano chithu chakuti iyo nyengo zose wakuchita icho ntchakunyoloka, kusazgapo na para wakuyowoyerathu vyamunthazi.