YOMARA na ŵadumbu ŵake—Marcelo na Hiver—ŵakukhala mu muzi unyake uchoko ku Guatemala. Yomara wakamba kusambira Baibolo na Ŵakaboni, ndipo pamanyuma ŵadumbu ŵake nawo ŵakamba kusambira Baibolo. Kweni pakaŵa suzgo linyake. Wose ŵatatu ŵakawonanga yayi, ndipo ŵakamanyangaso yayi kuŵazga mabuku gha ŵanthu ŵambura kuwona. Ntheura, uyo wakaŵasambizganga Baibolo ndiyo wakaŵaŵazgiranga ndime na mavesi gha mu Baibolo panyengo iyo ŵakasambiranga.

Chikaŵaso chakusuzga kuti ŵawunganenge. Paŵekha, ŵakaŵa kuti ŵangenda yayi mtunda wa maminiti 40 kufika pa Nyumba ya Ufumu iyo yikaŵa kufupi nawo. Kweni ŵabali mu mpingo ŵakanozga ndondomeko yakuti ŵaŵatorenge kwiza nawo pa maungano ghose. Ndipo ŵati ŵamba kupika nkhani za ŵana ŵasukulu pa maungano ghamukati mwasabata, ŵabali ŵakaŵawovwiranga kusunga pamtima vigaŵa ivyo ŵapika.

Mu Meyi 2019, maungano gha mpingo ghakamba kuchitika mu muzi wakwawo. Panyengo iyi, mbumba yinyake iyo yikachitanga upayiniya wanyengozose yikaŵa kuti yasamira mu muzi uwu. Mbumba iyi yikajiŵikira chilato chakuti yisambizge ŵanthu ŵatatu aŵa kuŵazga na kulemba vilembo vya braille, nangauli yikamanyanga yayi umo yingaŵasambizgira. Ntheura yikaluta ku layibulare kuti yikasambire vyakukhwaskana na mabuku gha braille kweniso umo yingasambizgira ŵanji kughagwiliskira ntchito.

Myezi yichoko waka yikati yajumphapo, ŵanthu ŵatatu aŵa ŵakamanya kuŵazga mabuku gha braille, ndipo ivi vikaŵawovwira kuti ŵakure luŵiro mwauzimu. a Sono Yomara, Marcelo, na Hiver mbapayiniya ŵanyengozose. Marcelo ni muteŵeti wakovwira. Sabata yiliyose ŵakutangwanika chomene kuteŵetera Yehova. Ŵanthu aŵa mbamwamphu chomene, ndipo vyawovwiraso ŵanji kuti nawo ŵaŵe ŵamwamphu.

Ŵanthu ŵatatu aŵa ŵakuwonga chomene wovwiri uwo mpingo ukupeleka. Yomara wakuti: “Ŵakaboni ŵa Yehova ŵatilongora chitemwa chanadi kufuma waka pa zuŵa lakwamba ilo tikakumanirana.” Marcelo wakusazgirapo kuti: “Tili na ŵabwezi ŵawemi mu mpingo withu, ndipo tikuwona kuti tili pakati pa mbumba ya pa charu chose iyo njakukolerana.” Yomara na ŵadumbu ŵake ŵakulindilira mwakunweka zuŵa ilo ŵazamuwona charu chikuzgoka kuŵa paradiso.—Sal. 37:10, 11; Yes. 35:5.