Kasi mwaŵazga mwakupwelelera magazini gha Gongwe la Mulinda gha chaka chino? Yezgani kuzgora mafumbo agha:

Kasi titumbikikenge wuli usange tikupatura nyengo kuyowoyeskana na Yehova, kutegherezga, na kughanaghanira vya iyo?

Tisankhenge vinthu mwamahara, tiŵenge msambizgi muwemi, tiŵenge na chipulikano chakukhora, kweniso chitemwa chithu pa Yehova chikurenge.—w22.01, pp. 30-31

Kasi tovwirikenge wuli usange tikugomezga Yehova na ŵabali awo waŵasora kulongozga?

Sono ndiyo nyengo yakusambilira kugomezga nthowa izo Chiuta wakuchitira vinthu, ndipo tikwenera yayi kukayikira ulongozgi na ivyo ŵalara ŵadumura. Para suzgo yikuru yayamba, tizamuŵa kuti tili ŵakunozgeka kupulikira nanga tingapokera ulongozgi uwo ukuwoneka wachilendo, wambura kovwira panji kupulikikwa makora.—w22.02, pp. 4-6.

Kasi fundo ya mungelo yikaŵa yakuti wuli pakuphalira Zekariya vyakukhwaskana na “chingwe chakunyoloskera mu woko la [Kazembe] Zerubabeli”? (Zek. 4:8-10)

Mboniwoni iyi yikasimikizgiranga ŵanthu ŵa Chiuta kuti, nangauli tempile ili lingawoneka lapasi mu mawonekero pakuyaniska na lakwamba, kweni limarenge kuzengeka ndipo lizamuŵa lakwenelera mu maso gha Chiuta.—w22.03, pp. 16-17.

Kasi tingachita wuli kuti tiŵe “chakuwonerapo . . . mu kayowoyero”? (1 Tim. 4:12)

Tikwenera kuyowoya mwalusungu na mwantchindi mu uteŵeti, tikwenera kwimba sumu zakulumba Yehova na mtima wose kweniso kuzgorapo pa maungano nyengo zose. Ndiposo tikwenera kuyowoya unenesko na kuzenga ŵanyithu, kweniso tikwenera kugega kayowoyero kaheni.—w22.04, pp. 6-9.

Chifukwa wuli mawonekero gha vikoko vinayi (maufumu) ivyo vikuzunulika mu Daniyeli chaputara 7 ghali mu chikoko chimoza icho chikulongosoreka pa Chivumbuzi 13:1, 2?

Chikoko cha mu Chivumbuzi 13 chikwimira ufumu umoza yayi, nga ufumu wa Romu. Kweni chikwimira maufumu ghose gha ndyali agho ghaŵa kuti ghakuwusa ŵanthu kufuma kale m’paka sono.—w22.05, p. 9.

Kasi ni nthowa wuli yakuzirwa iyo tingalongolera kuti tikugomezga kuti Chiuta wakuchita vinthu mwaurunji?

Usange munyake watinena, kutikhuŵazga, panji kutinangira, tikwenera kuyezgayezga kukorako ukali withu na kuleka kumusungira vyakusingo, ndipo nkhani yose tikwenera kuyileka mu mawoko gha Yehova. Iyo wazamuwuskapo viheni vyose ivyo vili kwiza chifukwa cha kwananga.—w22.06, pp. 10-11.

Kasi mubali uyo wakupeleka lurombo pa ungano wakwenera kukumbuka vichi?

Lurombo lukwenera yayi kuŵa nthowa yakupelekera ulongozgi ku mpingo panji vipharazgo. Tikwenera yayi ‘kuyowoya mazgu ghanandinandi,’ chomene pa lurombo lwakujulira maungano. (Mat. 6:7)—w22.07, pp. 24-25.

Kasi “awo ŵakachitanga vinthu viheni ŵazamuwukira ku cheruzgo” munthowa wuli? (Yoh. 5:29)

Iwo ŵazamweruzgika chifukwa cha zakwananga izo ŵakachitanga apo ŵakaŵa ŵachali ŵamoyo yayi. Kweni nyengo na nyengo ŵazamusandikanga kuyana na ivyo ŵazamuchita pamanyuma pakuti ŵawuskika.—w22.09, p. 18.

Kasi J. F. Rutherford wakayowoya chipharazgo wuli chakukondweska pa ungano wa mu Seputembala 1922?

Pa ungano uwo ukachitikira ku Cedar Point, Ohio, U.S.A., wakapharazga kuti: “Themba likuwusa! Imwe ndimwe ŵapharazgi ŵake. Ntheura pharazgani, pharazgani, pharazgani, Themba na Ufumu wake!”—w22.10, pp. 3-5.

Kasi lemba la Yesaya chaputara 30 likuyowoya nthowa wuli zitatu izo Chiuta wakutovwilira kuzizipizga?

Chaputara ichi chikulongora kuti (1) wakutegherezga na kuzgora malurombo ghithu, (2) wakutilongozga, kweniso (3) wakutitumbika sono kweniso munthazi.—w22.11, p. 9.

Chifukwa wuli tingayowoya kuti mazgu gha pa Salimo 37:10, 11, 29 ghakafiskika mu nyengo yakale ndipo ghazamufiskikaso munthazi?

Mazgu gha Davide ghakulongosora vitumbiko ivyo Ŵaisrayeli ŵakasangwa navyo, nga ni mu nyengo ya muwuso wa Solomoni. Yesu wakayowoyaso za paradiso uyo wizenge munthazi ndipo wakakora mazgu gha mu vesi 11. (Mat. 5:5; Luka 23:43)—w22.12, pp. 8-10, 14.