PAKUYOWOYA icho chikamukopa kuti wasambire unenesko, Lisa * wakati: “Icho chikanikopa chomene ni lusungu ulo ŵabali na ŵadumbu ŵakalongora.” Ndimo vikaŵiraso na Anne, uyo wakati: “Lusungu ndilo lukanikopa, kuluska ivyo nkhasambiranga.” Ŵadumbu wose ŵaŵiri aŵa sono ŵakusangwa kuŵazga Baibolo na kughanaghanirapo, kweni lusungu ulo ŵabali na ŵadumbu ŵakalongora, ndilo lukaŵakhukiska chomene.

Kasi tingalongora wuli lusungu ulo lungakhukiska awo tikukhala nawo? Tiyeni tiwone nthowa ziŵiri: kwizira mu vyakuyowoya na vyakuchita vithu. Kufuma apo, tiwonenge awo tikwenera kuŵalongora lusungu.

Mwanakazi wamahara uyo wakuyowoyeka pa Zintharika chaputara 31 wali na “dango la lusungu” pa lulimi lwake. (Zinth. 31:26) Wakuzomerezga “dango” ili kulongozga ivyo wakuyowoya kweniso umo wakuyowoyera. Ŵadada nawo ŵakwenera kuŵa na “dango” ili pa lulimi lwawo. Ŵapapi ŵanandi ŵakumanya kuti para ŵangayowoya mwaukali, mwana wawo vingamuŵinya ndipo wangapulika yayi ivyo ŵakuyowoya. Ntheura kuti ŵana ŵawo ŵategherezge na kupulikira, ŵapapi ŵakwenera kuyezgayezga kuyowoya mwalusungu.

Kwali ndimwe mupapi panji yayi, kasi mungachita wuli kuti muyowoyenge mwalusungu? Tikusanga zgoro mu chigaŵa chakwamba cha Zintharika 31:26, apo pakuti: “Wakujura mulomo wake mu vinjeru.” Icho chikukhumbikwa apa nkhusankha mazgu mwavinjeru kweniso umo mazgu agho ghafumirenge. Pambere tindayowoye, tingachita makora kujifumba kuti, ‘Kasi ivyo nkhukhumba kuyowoya vikwiyiskenge ŵanthu, panji vichitiskenge kuti paŵe mtende?’ (Zinth. 15:1) Nadi, ni vinjeru kughanaghanirapo dankha pambere tindayowoye.

Ntharika yinyake yikuti: “Kayowoyero kawakawaka kali nga nkhulasa kwa lupanga.” (Zinth. 12:18) Para tikughanaghanirapo umo mazgu ghithu kweniso kapulikikwiro kake vikhwaskirenge ŵanji, vitovwirenge kuti tipwelelerenge kayowoyero kithu. Nadi, para tikulondezga “dango la lusungu” tingayowoya yayi mazgu ghakupweteka panji kuyowoya mwaganyavu. (Efe. 4:31, 32) M’malo mwa kuŵa na maghanoghano ghambura kwenelera na kayowoyero kaheni, tiyowoyenge mazgu ghalusungu kweniso ghakupulikikwa makora. Yehova wakalongora chiyelezgero chiwemi pa nkhani iyi apo wakayowoyanga na muteŵeti wake Eliya uyo wakaŵa na wofi. Mungelo uyo wakimiranga Yehova wakayowoya “tumazgu twamyaa, twapasipasi.” (1 Mathe. 19:12) Ndipouli, kuŵa walusungu kukusazgapo vinandi padera pakuyowoya waka mazgu ghalusungu. Tikweneraso kuchita milimo ya lusungu. Munthowa wuli?

Para tikuyezga Yehova, tiyowoyenge mazgu ghawemi kweniso tichitenge vinthu mwalusungu. (Efe. 4:32; 5:1, 2) Lisa, uyo tamuzunura kale, wakalongosora lusungu ulo Ŵakaboni ŵakalongora. Iyo wakati: “Mbumba yakwithu yati yaphalirika mwamabuchi kuti yifumemo mu nyumba, mbumba ziŵiri za mu mpingo  zikatora holide ku ntchito kwawo kuti zitovwireko kupakira vinthu. Pa nyengo iyi, nkhaŵa kuti nindambe kusambira Baibolo!” Milimo ya lusungu iyi ndiyo yikamukhukiska Lisa kuti wambe kusambira unenesko.

Anne, uyo tamuzunura kukwambilira kwa nkhani iyi, nayo wakawonga chomene lusungu ulo Ŵakaboni ŵakamulongora. Iyo wakati: “Pakuwona umo ŵanthu ŵaliri mu charu, vikanisuzganga kugomezga ŵanthu.” Iyo wakatiso: “Nkhati nakumana na Ŵakaboni, nawoso nkhaŵagomezga yayi. Nkhajifumba kuti, ‘Chifukwa wuli ŵakulongora kuti ŵakunweka nane?’ Kweni lusungu lwanadi ulo wakanilongoranga uyo wakanisambizganga Baibolo lukanovwira kuti nambe kumugomezga.” Kasi chikachitika ntchivichi? “Pamanyuma, nkhamba kuŵikapo mtima pa ivyo nkhasambiranga.”

Wonani kuti Lisa na Anne ŵakakopeka na milimo ya lusungu iyo ŵanthu mu mpingo ŵakaŵalongora, ndipo ivi vikaŵawovwira kuti ŵasambire unenesko. Lusungu ulo mpingo ukaŵalongora lukaŵawovwira kuti ŵambe kugomezga Yehova na ŵanthu ŵake.

Ŵanthu ŵanyake ŵakuyowoya mwalusungu na kumwemwetera chifukwa chakuti uko ŵakakulira ndimo ŵanthu ŵakuchitira. Vili makora waka usange ŵanthu ŵakuchita vinthu munthowa iyi chifukwa cha kutolera kakhaliro ka ku kwawo. Kweni usange tikulongora lusungu chifukwa cha kutolera kakhaliro kakwithu pera, ndikuti tikuyezga lusungu lwa Chiuta yayi.—Yaniskani na Milimo 28:2.

Lusungu lwanadi ntchimoza mwa vipambi vya mzimu utuŵa. (Gal. 5:22, 23) Ntheura kuti tiŵe na lusungu lwanadi, tikwenera kuzomerezga mzimu wa Chiuta kulongozga maghanoghano na vyakuchita vithu. Para tachita nthena, tiyezgenge Yehova na Yesu. Nakuti pakuŵa Ŵakhristu tikughanaghanira chomene ŵanyithu. Ntheura icho chikutikhukiska kulongora lusungu, nkhutemwa Yehova Chiuta kweniso ŵanthu ŵanyithu. Lekani lusungu lwithu lukuŵa lwanadi lwakufumira pasi pa mtima kweniso ulo Chiuta wakukondwa nalo.

Ntchipusu kulongora lusungu ku awo ŵatichitirapo lusungu panji ku awo tikuŵamanya. (2 Sam. 2:6) Ndipo nthowa yimoza iyo tikuŵalongolera lusungu, nkhuŵawonga. (Kol. 3:15) Kweni wuli usange tikuwona kuti munthu munyake ngwakwenelera yayi kuti timulongore lusungu?

Wonani fundo iyi: Yehova ntchakuwonerapo chiwemi chomene pakulongora lusungu lukuru ku awo mbambura kwenelera, ndipo Mazgu ghake ghakutisambizga sambiro lakukhumbikwa chomene pa nkhani ya kulongora lusungu. Mazgu ghakuti “lusungu lukuru” ghakuzunulika kanandi waka mu Malemba Ghachigiriki. Kasi Chiuta wakutilongora wuli lusungu?

Yehova walongora lusungu ku ŵanthu wose pakuŵapa ivyo ŵakukhumbikwira kuti ŵalutilire kuŵa ŵamoyo. (Mat. 5:45) Nakuti, nanga ni apo tikaŵa tindamumanye Yehova, iyo wakatilongora lusungu. (Efe. 2:4, 5, 8) Mwachiyelezgero, wakapeleka Mwana wake wapadera yekha, kuzakafwira ŵanthu wose. Mpositole Paulosi wakalemba kuti Yehova wakapeleka chiwombolero “mwakuyana na usambazi wa lusungu lwake lukuru.” (Efe. 1:7) Chinyake ntchakuti, nangauli tikumunangira na kumukhuŵazga Yehova, iyo wakulutilira kutilongozga na kutisambizga. Ivyo wakutisambizga kweniso mazgu ghake vili nga “vula yamswera.” (Doto. 32:2) Palije icho tingamuwezgerapo Yehova pa lusungu lose ulo wakutilongora. Unenesko ngwakuti tikuthemba pa lusungu lwa Yehova kuti vinthu vizakatiyendere makora munthazi.—Yaniskani na 1 Petrosi 1:13.

Tikukayika yayi kuti lusungu lwa Yehova nduwemi na lwakukhukiska. Ntheura, m’malo mwakuchita kusankha awo tingaŵalongora lusungu, nase tiyezgenge Yehova pakuŵa ŵalusungu ku ŵanthu nyengo zose. (1 Tes. 5:15) Para tikulongora lusungu nyengo zose, tikuŵa nga ni moto wakuthukira mu nyengo ya kuzizima. Tikusanguluska ŵamumbumba yithu, ŵabali na ŵadumbu, ŵanyithu ku ntchito, ŵanyithu ku sukulu, kweniso ŵazengezgani.

Ghanaghanirani ŵanji mu mbumba panji mu mpingo awo ŵangasanga chandulo na mazgu kweniso milimo yinu yalusungu. Panji mu mpingo winu mungaŵa munthu uyo wakukhumbikwira wovwiri kupwelelera nyumba na maluŵa panji kuchita vinthu vinyake nga nkhugura vinthu. Chinyake ntchakuti, usange mwakumana na munthu mu uteŵeti uyo wakukhumbikwira wovwiri, kasi imwe mungamovwirako yayi?

Pakuyezga Yehova, mphanyi vyakuyowoya na vyakuchita vithu vyalongozgeka na “dango la lusungu.”