1-2. Chifukwa wuli tingawona nga kuti Yehova wakuzgora yayi malurombo ghithu?

 “UKONDWERE chomene mwa Yehova, ndipo wakupenge ivyo mtima wako ukukhumba.” (Sal. 37:4) Ili ni layizgo lakukondweska chomene. Kweni kasi tikwenera kukhazga kuti Yehova watipenge nyengo yeneyiyo chilichose icho tamupempha? Chifukwa wuli ntchakuzirwa kujifumba fumbo ili? Ghanaghanirani viyelezgero vyakulondezgapo ivi. Mudumbu wambura kutengwa wakulomba kuti walute ku Sukulu ya Ŵapharazgi ŵa Ufumu. Kweni vyaka vikujumphapo waka, ŵakumuchema yayi. Mubali wachinyamata wakulomba Yehova kuti wamuchizge ku nthenda yake yakofya mwakuti wachite vinandi mu mpingo. Kweni vikusintha yayi. Ŵapapi Ŵachikhristu ŵakulomba kuti mwana wawo wakhalilire mu unenesko. Kweni mwana wawo wakusankha kuleka kuteŵetera Yehova.

² Vingachitika kuti namwe muli kumulombapo chinthu chinyake Yehova, kweni wandamupani. Ntheura mungamba kughanaghana kuti Yehova wakuzgora waka malurombo gha ŵanthu ŵanyake, ghinu yayi. Panyake mungambaso kughanaghana kuti muli kunanga chinthu chinyake lekani Yehova wakumuzgorani yayi. Ndimo mudumbu munyake zina lake Janice b wakaghanaghaniranga. Iyo na mfumu wake ŵakalombanga kwa Yehova kuti ŵakateŵetere pa Beteli. Iyo wakuti: “Nkhakhazganga kuti patorenge nyengo yichoko waka mbwenu ŵatichema ku Beteli.” Kweni vyaka vikajumphangapo waka kwambura kuŵachema. Janice wakutiso: “Nkhaŵa na chitima kweniso nkhapulikiskanga yayi. Nkhajifumbanga kuti, ‘Kasi nili kumunangira vichi Yehova?’  Nalomba mwakudunjika kanandi waka kuti nkhukhumba kukateŵetera ku Beteli. Chifukwa wuli wakunizgora yayi?”

3. Kasi tidumbiskanenge vichi mu nkhani iyi?

³ Nyengo zinyake, tingakayikira usange Yehova wakupulika malurombo ghithu. Ndimo vikaŵiraso na ŵanthu ŵakugomezgeka ŵa mu nyengo yakale. (Yobu 30:20; Sal. 22:2; Hab. 1:2) Kasi ntchivichi chingamukhorweskani kuti Yehova wapulikenge malurombo ghinu? (Sal. 65:2) Kuti tizgore fumbo ili, chakwamba tiyeni tizgore dankha mafumbo ghakulondezgapo agha: (1) Kasi tikwenera kukhazga vichi kwa Yehova? (2) Kasi Yehova wakukhazga vichi kwa ise? (3) Chifukwa wuli nyengo zinyake tingakhumbikwira kusintha vinthu vinyake ivyo talomba?

4. Kuyana na Yeremiya 29:​12, kasi Yehova wakulayizga kuti wachitenge vichi?

⁴ Yehova walayizga kuti wapulikenge malurombo ghithu. (Ŵazgani Yeremiya 29:12.) Chiuta withu wakutitemwa chifukwa chakuti tikumuteŵetera mwakugomezgeka, ntheura wazamulekapo yayi kupulika malurombo ghithu. (Sal. 10:17; 37:28) Kweni ichi chikung’anamura kuti watipenge chilichose icho tamulomba yayi. Vinyake tikwenera kulindilira waka, tizamupika mu charu chiphya.

5. Kasi Yehova wakughanaghanira vichi para wakutegherezga malurombo ghithu? Longosorani.

⁵ Yehova wakuwona dankha usange malurombo ghithu ghakukolerana na khumbo lake. (Yes. 55:​8, 9) Chimoza mwa khumbo la Chiuta ntchakuti charu chapasi chizure na ŵanthu ŵakukondwa awo mbakukolerana kweniso ŵakujilambika ku muwuso wake. Kweni Satana wakuti ŵanthu ŵangaŵa ŵakukondwa para ŵangajiwusanga ŵekha. (Gen. 3:​1-5) Kuti walongore kuti Satana ni mutesi, Yehova wazomerezga ŵanthu kuti ŵajiwusenge ŵekha. Kweni muwuso wa ŵanthu wiziska masuzgo ghanandi mazuŵa ghano. (Muph. 8:9) Tikumanya kuti pasono Yehova wangamazga yayi masuzgo ghose agho tikusangana nagho. Chifukwa para wangachita nthena, mbwenu ŵanthu ŵawonenge nga kuti ni maboma gha ŵanthu agho ghamazga masuzgo. Ŵangamba kughanaghana kuti ŵanthu ŵangajiwusa ŵekha makora waka.

6. Chifukwa wuli tikwenera kukhorwa kuti Yehova nyengo zose wachitenge vinthu mwachitemwa kweniso mwaurunji?

⁶ Yehova wangazgora malurombo ghakuyana waka mu nthowa zakupambana. Mwachiyelezgero, apo Themba Hezekiya likalwara chomene, likaŵeyelera Yehova kuti walichizge. Yehova wakazgora nadi lurombo lwake ndipo wakalichizga. (2 Mathe. 20:​1-6) Kweni apo mpositole Paulosi wakaŵeyelera Yehova kuti wawuskemo “munga mu thupi” lake, panji kuti wamuchizge ku ulwari wake, Yehova wakawuskapo yayi suzgo lake. (2 Kor. 12:​7-9) Ghanaghaniraniso vya Yakobe na Petrosi. Wose ŵaŵiri Themba Herode likakhumbanga kuŵakoma. Mpingo ukamulombera Petrosi kweniso panji Yakobe nayo ukamulombera. Ndipouli, Yakobe wakakomeka, apo Petrosi wakathaskika mwamunthondwe. (Mil. 12:​1-11) Nyengo zinyake tingajifumba kuti, ‘Chifukwa wuli Yehova wakaponoska Petrosi pera, Yakobe yayi?’ Baibolo likuyowoya yayi. c Icho tingasimikizga ntchakuti nthowa za Yehova ‘zose ni zaurunji.’ (Doto. 32:4) Nakuti tikumanya kuti Petrosi na Yakobe wose Yehova wakaŵatemwanga. (Chivu. 21:14) Nyengo zinyake Yehova wangazgora lurombo lwithu munthowa iyo takhazganga yayi. Kweni chifukwa chakuti tikugomezga kuti nyengo zose Yehova wakuchita vinthu mwachitemwa kweniso mwaurunji, tikudandawura yayi na nthowa iyo wasankha kuzgolera malurombo ghithu.—Yobu 33:13.

7. Kasi tikwenera kugega vichi, ndipo chifukwa wuli?

 ⁷ Tikuyezgayezga kugega kujiyaniska na ŵanyithu. Mwachiyelezgero, tingamupempha Yehova chinthu chinyake, kweni tingapika yayi ivyo talomba. Pamanyuma, tingamanya kuti munyithu munyake nayo wakalomba mwakuyana waka, ndipo vikuwoneka kuti Yehova wakamupa ivyo wakalomba. Mudumbu munyake zina lake Anna vyanthena ivi vikamuchitikirapo. Wakalombanga kuti mfumu wake Matthew, wachire ku nthenda yake ya kansa. Panyengo yakuyana waka, ŵadumbu ŵaŵiri ŵachekuru nawoso ŵakatamburanga na kansa. Anna wakafwilirapo chomene kulombera Matthew na ŵadumbu aŵa. Ŵadumbu aŵa ŵakachira, kweni Matthew wakafwa. Pakwamba, Anna wakajifumbanga usange ŵadumbu ŵaŵiri aŵa ŵakachira chifukwa chakuti Yehova wakanjilirapo. Ndipo usange ni nthena, wakalekerachi pera kuzgora malurombo agho wakalomberanga mfumu wake? Unenesko ngwakuti tikumanya yayi umo ŵadumbu ŵaŵiri aŵa ŵakachilira. Ivyo tikumanya ni vyakuti Yehova wali na nthowa yakuzakamazgira masuzgo ghose kunthazi, ndipo wakunwekera chomene kuzakawuska ŵabwezi ŵake awo ŵali kufwa.—Yobu 14:15.

8. (a) Kuyana na Yesaya 43:​2, kasi Yehova wakutovwira wuli? (b) Kasi lurombo lungatovwira wuli para tikusangana na viyezgo vyakusuzga? (Wonani vidiyo yakuti Lurombo Lukutovwira Kuzizipizga.)

⁸ Yehova watovwirenge nyengo zose. Yehova pakuŵa Dada withu wachitemwa, wakukhumba yayi kuti tisuzgikenge. (Yes. 63:9) Ndipouli, wakutivikilira ku viyezgo vyose yayi, ivyo tingaviyaniska na milonga panji dimi la moto. (Ŵazgani Yesaya 43:2.) Nangauli vili nthena, wakutilayizga kuti watovwirenge kuti ‘tambuke’ panji kuti titonde viyezgo ivi. Ndipo wazomerezgenge yayi kuti viyezgo ivyo tikukumana navyo vinange ubwezi withu na iyo. Yehova wakutipaso nkhongono yake ya mzimu utuŵa kuti yitovwire kuzizipizga. (Luka 11:13; Fil. 4:13) Ntheura, tingaŵa na chigomezgo chose kuti nyengo zose Yehova watipenge ivyo tikukhumbikwira nadi mwakuti tizizipizge na kulutilira kuŵa ŵakugomezgeka kwa iyo. d

9. Kuyana na Yakobe 1:​6, 7, chifukwa wuli tikwenera kugomezga kuti Yehova watovwirenge?

⁹ Yehova wakukhazga kuti timugomezgenge. (Heb. 11:6) Nyengo zinyake, tingamba kuwona nga kuti suzgo yithu yajumpha msinkhu withu. Tingamba na kukayikira wuwo usange Yehova watovwirenge. Kweni Baibolo likutisimikizgira kuti na nkhongono ya Chiuta ‘tingaŵenuka chiliŵa.’ (Sal. 18:29) Ntheura m’malo mwa kulutilira kukayikira, tikwenera kulomba na chipulikano chose, na kugomezga kuti Yehova wazgorenge malurombo ghithu.—Ŵazgani Yakobe 1:​6, 7.

10. Longosorani umo tingachitira kuti tichitenge vinthu kuyana na malurombo ghithu.

¹⁰ Yehova wakukhazga kuti tichitenge vinthu mwakuyana na malurombo ghithu. Mwachiyelezgero, mubali wangalomba Yehova kuti wamovwire kutora holide ku ntchito mwakuti walute ku ungano wa chigaŵa. Kasi Yehova wangazgora wuli lurombo lwanthena? Wangamupa chikanga icho wakukhumbikwira kuti wakakumane na abwana ŵake. Kweni mubali wangakhumbikwira kuti walute wakakumane na abwana ŵake na kuŵapempha. Nyengo zinyake wangakhumbikwira kuti waŵapemphe mwakuwerezgawerezga. Wangapangaso ndondomeko yakuti wasinthane mazuŵa na ŵantchito ŵanyake. Ndipo usange ntchakwenelera, wangapempha kuti watore holide na kumudumurako malipiro ghake.

11. Chifukwa wuli tikwenera kulomba mwakuwerezgawerezga vya masuzgo ghithu?

¹¹ Yehova wakukhazga kuti timulombenge mwakuwerezgawerezga ivyo tikukhumba. (1 Tes. 5:17)  Yesu wakalongora kuti malurombo ghithu ghanyake ghangazgoreka nyengo yeneyiyo yayi. (Luka 11:9) Ntheura kugongowa yayi! Koserani kulomba mwakuwerezgawerezga. (Luka 18:​1-7) Para tikulutilira kulomba vya nkhani yinyake, tikulongora Yehova kuti ivyo tikulomba ni vyakuzirwa chomene kwa ise. Tikulongoraso kuti tili na chipulikano kuti wangatovwira.

12. (a) Kasi ni fumbo wuli lakwamba ilo tikwenera kujifumba pa nkhani ya malurombo ghithu, ndipo chifukwa wuli? (b) Kasi tingachita wuli kuti tiwoneseske kuti malurombo ghithu ghakulongora kuti tikumuchindika Yehova? (Wonani bokosi lakuti “ Kasi Malurombo Ghane Ghakulongora Kuti Nkhumuchindika Yehova?”)

¹² Usange tikupika yayi ivyo talomba, tikwenera kujifumba mafumbo ghatatu agha. Lakwamba ndakuti, ‘Kasi ivyo nkhulomba ni vyakwenelera nadi?’ Kanandi, tikughanaghana kuti tikumanya icho ntchakwenelera kwa ise. Kweni nyengo zinyake ivyo tingalomba vingaŵa kuti vitovwirenge kwanyengo yitali yayi. Usange tikulomba Yehova kuti watovwire pa suzgo linyake, nyengo zinyake pangaŵa nthowa yiwemi chomene yakumazgira suzgo lithu kuluska nthowa iyo tikulomba. Ndipo vinthu vinyake ivyo tingalomba vingaŵa vyambura kukolerana na khumbo la Yehova. (1 Yoh. 5:14) Mwachiyelezgero, wonani chiyelezgero cha ŵapapi awo taŵazunura mu nkhani iyi. Ŵakalomba Yehova kuti wawoneseske kuti mwana wawo wakhalilire mu unenesko. Pempho ili lingawoneka nga ndakwenelera. Kweni Yehova wachichizgengepo waliyose yayi kuti wamuteŵeterenge. Wakukhumba kuti tose, kusazgapo ŵana ŵithu, tisankhe tekha kumuteŵetera. (Doto. 10:​12, 13; 30:​19, 20) Ntheura ŵapapi ŵakwenera kulomba Yehova kuti waŵawovwire kumufika pamtima mwana wawo mwakuti wambe kumutemwa Yehova na kuŵa mubwezi wake.—Zinth. 22:6; Efe. 6:4.

13. Kuyana na Ŵahebere 4:​16, kasi mphawuli apo Yehova wangatovwira? Longosorani.

¹³ Fumbo lachiŵiri ndakuti, ‘Kasi ni nyengo  yakwenelera kwa Yehova yakuti wazgore lurombo lwane?’ Nyengo zinyake tingawona kuti tikukhumbikwira kuti Yehova wazgore mwaluŵiro malurombo ghithu. Ndipouli, Yehova ndiyo wakumanya makora nyengo yakwenelera yakutovwilira. (Ŵazgani Ŵahebere 4:16.) Para tikupika nyengo yeneyiyo yayi ivyo talomba, tingamba kughanaghana kuti zgoro la Yehova ndakuti ‘Yayi.’ Kweni wangaŵa kuti wachali wandazgore. Mwachiyelezgero, ghanaghanirani vya muwukirano yura wangulomba kuti wachire ku nthenda yake. Usange Yehova wangamuchizga mwamunthondwe, Satana wangayowoya kuti muwukirano uyu wakulutilira kuteŵetera Yehova chifukwa chakuti wamuchizga. (Yobu 1:​9-11; 2:4) Kweniso Yehova wali kutema kale nyengo iyo wazamuwuskirapo matenda ghose. (Yes. 33:24; Chivu. 21:​3, 4) M’paka kufika panyengo iyi, tileke kukhazga kuti Yehova watichizgenge mwamunthondwe. Ntheura mubali uyu wakwenera kulomba Yehova kuti wamupe nkhongono na mtende wa mumtima kuti wazizipizge ulwari wake na kulutilira kuteŵetera Chiuta mwakugomezgeka.—Sal. 29:11.

14. Kasi mukusambirako vichi kwa Janice?

¹⁴ Ghanaghaniraniso vya Janice, uyo wakalomba kuti wakateŵetere pa Beteli. Pakajumpha vyaka vinkhondi kuti wapulikiske umo Yehova wakazgolera lurombo lwake. Iyo wakuti: “Yehova wakagwiliskira ntchito nyengo iyi kunisambizga na kuniyenga. Nkhakhumbikwiranga kuti nambe kumugomezga chomene. Kweniso nkhakhumbikwiranga kusintha pa umo nkhuchitira sambiro la namwene. Ndipo nkhakhumbikwirangaso kumanya kuti ningaŵa wachimwemwe kulikose uko ningateŵetera Yehova.” Pamanyuma, Janice na mfumu wake ŵakachemeka kuti ŵakambe kwendera dera. Para wakulaŵiska kumasinda, Janice wakuti: “Yehova wakazgora malurombo ghane, kweni munthowa iyo nkhakhazganga yayi. Vikanitolera nyengo kuti nimanye kuti zgoro ilo Yehova wakanizgora likaŵa  liwemi chomene. Nkhumuwonga chomene pakuwona umo wanilongolera chitemwa na lusungu lwake.”

15. Chifukwa wuli nyengo zinyake tikwenera kulomba mwachisanisani waka?(Wonaniso chithuzi.)

¹⁵ Fumbo lachitatu ndakuti, ‘Kasi nkhwenera kulombaso chinthu chinyake?’ Nangauli ntchiwemi waka kulomba mwakudunjika ivyo tikukhumba, kweni nyengo zinyake ntchiwemi kulomba waka mwachisanisani mwakuti timanye ivyo Yehova wakukhumba kwa ise. Ghanaghanirani vya chiyelezgero cha mudumbu munyake uyo wakalombanga kuti wakanjire Sukulu ya Ŵapharazgi ŵa Ufumu. Wakakhumbanga kuti wakanjire sukulu iyi mwakuti wakateŵetere uko kukukhumbikwa ŵapharazgi ŵanandi. Ntheura apo wakalutiliranga kulomba kuti wachemeke kuti wakanjire sukulu, wakalombangaso Yehova kuti wamovwire kumanya nthowa zinyake izo wangasazgirako uteŵeti wake. (Mil. 16:​9, 10) Pamanyuma wakwenera kuchita vinthu kuyana na lurombo lwake pakufumba mulaŵiliri wadera usange mpingo wapafupi ukukhumbikwira ŵapayiniya ŵanandi. Panji wangalembera kalata ofesi ya munthavi kufumba uko kukhumbikwa ŵapharazgi ŵanandi ŵa Ufumu. e

16. Kasi tikwenera kukhorwa kuti vichi?

¹⁶ Nga umo tasambilira, tili na chigomezgo chose kuti Yehova wazgorenge malurombo ghithu mwachitemwa kweniso mwaurunji. (Sal. 4:3; Yes. 30:18) Nyengo zinyake tingapokera zgoro ilo takhazganga yayi. Kweni Yehova wasulengeko yayi malurombo ghithu. Iyo wakutitemwa chomene. Ndipo watisidengepo yayi. (Sal. 9:10) Ntheura lutilirani ‘kuthemba mwa iyo nyengo zose,’ na kupungulira mitima yinu kwa iyo mu lurombo.—Sal. 62:8.