1. Kasi ŵanyake ŵakujipulika wuli pa nkhani ya kudumbiskana na ŵanthu mu uteŵeti? (Wonaniso chithuzi.)

 PAKUŴA ŵanthu ŵa Yehova, tikupharazgira ŵanji chifukwa tikuŵatemwa chomene Adada ŵithu ŵakuchanya, kweniso tikukhumba kovwira ŵazengezgani ŵithu kumanya Chiuta. Ŵapharazgi ŵanandi ŵakukondwa chomene na ntchito yakupharazga. Kweni ndimo viliri yayi ku ŵanyake. Chifukwa wuli? Ŵanyake ŵali na soni chomene ndipo ŵakujikayikira. Ŵanyakeso ŵakufwatuka yayi kuluta ku nyumba ya munthu kwambura kuchemeka. Apo ŵanyake ŵakopa kuti panji ŵanthu ŵamukana uthenga wawo. Ŵanyake ŵakukhumba yayi vya kugazgana na ŵanthu. Nangauli ŵabali na ŵadumbu aŵa ŵakumutemwa chomene Yehova, kweni nyengo zinyake vikuŵasuzga kupharazga makani ghawemi ku ŵanthu awo ŵakuŵamanya yayi. Ndipouli, ŵakumanya kuti ntchito iyi njakuzirwa chomene, ndipo nyengo zose ŵakuyezgayezga kuchitako. Ndipo Yehova wakukondwa nawo chomene!

2. Usange nyengo zinyake vikumusuzgani kukondwa mu uteŵeti, chifukwa wuli mukwenera yayi kugongowa?

² Kasi ndimo namwe mukujipulikira ndipo nyengo zinyake mukutondeka kukondwa mu uteŵeti? Para ni nthena, kugongowa yayi. Usange mukujikayikira vingalongora kuti ndimwe wakujiyuyura, ndipo mukukhumba yayi kuti ŵanthu ŵaghanaghanenge waka vya imwe panji kuti mukanganenge nawo. Nakuti palije uyo wangatemwa kuti ŵanthu ŵamususkenge, chomenechomene para wakukhumba kuŵawovwira. Adada ŵinu ŵakuchanya ŵakumanya makora masuzgo agho mukusangana nagho, ndipo mbakunozgeka kumovwirani. (Yes. 41:13) Mu nkhani iyi, tiwonenge masachizgo ghankhondi agho ghangatovwira kulimbana na masuzgo agha,  kweniso umo tingachitira kuti tikondwenge chomene mu uteŵeti.

ZOMEREZGANI KUTI MAZGU GHA CHIUTA GHAMUPANI NKHONGONO

3. Kasi ntchivichi chikawovwira ntchimi Yeremiya kuti yipharazgire ŵanji?

³ Kwamba kale chomene, mazgu gha Chiuta ghakukhozga ŵateŵeti ŵake usange ŵapika mulimo unonono. Mwachiyelezgero, ghanaghanirani vya ntchimi Yeremiya. Iyo wakajikayikiranga Yehova wati wamupa ntchito yakupharazga. Yeremiya wakati: “Nkhumanya yayi kuyowoya, pakuti ndine msepuka.” (Yer. 1:6) Kasi wakachita wuli kuti waleke kujikayikira? Ivyo Chiuta wakamuphalira vikamupa nkhongono. Iyo wakati: “Vikaŵa nga moto wakugolera wajalirika mu viwangwa vyane, nkhavuka kuwukora.” (Yer. 20:​8, 9) Nangauli chigaŵa icho Yeremiya wakatumika chikaŵa chakusuzga, kweni uthenga uwo wakatumika kukapharazga ukamupa nkhongono izo wakakhumbikwiranga kuti wafiske mulimo uwu.

4. Kasi ntchivichi chikuchitika usange tikuŵazga Mazgu gha Chiuta na kughanaghanirapo? (Ŵakolose 1:​9, 10)

⁴ Ŵakhristu ŵakusanga nkhongono kufuma mu Mazgu gha Chiuta. Apo mpositole Paulosi wakalemberanga kalata mpingo wa ku Kolose, wakaŵaphalira kuti usange ŵamanya makora unenesko, viŵawovwirenge kuti ‘ŵendenge mwakwenelera Yehova’ apo ŵakulutilira “kupambika vipambi mu mulimo wose uwemi.” (Ŵazgani Ŵakolose 1:​9, 10.) Mulimo uwemi uwu ukusazgapo ntchito yakupharazga makani ghawemi. Ntheura para tikuŵazga Mazgu gha Chiuta na kughanaghanirapo, chipulikano chithu mwa Yehova chikukhora ndipo tikwamba kuwona ntchito yakupharazga makani ghawemi gha Ufumu kuŵa yakuzirwa chomene.

5. Kasi tingachita wuli kuti tipindurenge chomene para tikuŵazga na kusambira Baibolo?

⁵ Kuti tipindurenge chomene na Mazgu gha Chiuta, tikwenera kugega kuchimbilira pa kuŵazga, kusambira, na kughanaghanirapo mwapachanyapachanya waka. Muŵenge na nyengo yakukwana yakuchitira vinthu ivi. Para mwasanga lemba linyake ilo mukulipulikiska yayi, lekani kulijumpha waka. M’malo mwake, gwiliskirani ntchito Watch Tower Publications Index panji Buku Lakupenjera Nkhani la Ŵakaboni ŵa Yehova kuti mumanye ivyo vesi ilo likung’anamura. Para mukuŵa na nyengo yakukwana yakusambilira, mugomezgenge chomene kuti ivyo Baibolo likuyowoya mbunenesko. (1 Tes. 5:21) Para mwakhorwa kuti Mazgu gha Chiuta mbunenesko, mukondwenge chomene kuphalirako ŵanji ivyo mwasambira.

 NOZGEKERANI MAKORA PAMBERE MUNDANJIRE MU UTEŴETI

6. Chifukwa wuli tikwenera kunozgekera makora uteŵeti?

⁶ Para mwanozgekera makora uteŵeti, chikuŵa chipusu kufwatuka kudumbiskana na ŵanji. Yesu wakaŵanozgekereska ŵasambiri ŵake pambere wandaŵatume kukapharazga. (Luka 10:​1-11) Chifukwa chakuti ŵakalondezga ivyo Yesu wakaŵasambizga, ŵasambiri ŵakakondwa chomene na ivyo ŵakafiska mu uteŵeti.—Luka 10:17.

7. Kasi tinganozgekera wuli uteŵeti? (Wonaniso chithuzi.)

⁷ Kasi tinganozgekera wuli uteŵeti? Tikwenera kughanaghanirapo umo tingalongosolera mwaluso fundo za unenesko mu mazgu ghithu na ghithu. Tingachitaso makora kughanaghanirapo umo ŵanthu ŵakuchitira na uthenga withu mu chigaŵa icho tikupharazgako, na kuwona umo tingakaŵazgolera. Kufuma apo, para tikupharazgira ŵanthu tikwenera kufwatuka, kumwemwetera na kuŵa ŵaubwezi.

8. Kasi Ŵakhristu ŵali nga ni viŵiya vyadongo ivyo vikuyowoyeka mu chiyelezgero cha mpositole Paulosi mu nthowa wuli?

⁸ Mpositole Paulosi wakalongosora udindo withu pa ntchito yakupharazga apo wakati: “Tili na usambazi uwu mu viŵiya vyadongo.” (2 Kor. 4:7) Kasi ni usambazi wuli? Ni ntchito yakuponoska umoyo wa ŵanthu ya kupharazga makani ghawemi gha Ufumu. (2 Kor. 4:1) Kasi viŵiya vyadongo ni vichi? Vikwimira ŵateŵeti ŵa Chiuta, awo ŵakupharazgira ŵanji makani ghawemi. Mu nyengo ya Paulosi, ŵamalonda ŵakagwiliskiranga ntchito viŵiya vyadongo kuti ŵayeghemo vinthu vyakuzirwa chomene nga ni chakurya, vinyo, na ndalama. Mwakuyana waka, Yehova wali kutiŵikizga chinthu chakuzirwa chomene icho ni makani ghawemi. Na wovwiri wa Yehova, tingasanga nkhongono izo tikukhumbikwira kuti tipharazge mwakugomezgeka makani ghawemi.

LOMBANI KUTI MUŴE NA CHIKANGA

9. Kasi tingachita wuli kuti tileke kopa ŵanthu panji kopa kuti ŵanthu ŵamukana uthenga withu? (Wonaniso chithuzi.)

⁹ Nyengo zinyake tingamba kopa ŵanthu panji kopa kuti ŵanthu ŵamukana uthenga withu. Kasi tingatonda wuli suzgo ili? Ghanaghanirani lurombo ulo ŵapositole ŵakalomba ŵati ŵakanizgika kupharazga. M’malo mwa kuchita wofi, ŵakalomba Yehova kuti waŵawovwire “kuti ŵalutilire kuyowoya mazgu [ghake] na chikanga.” Yehova wakazgora lurombo lwawo nyengo yeneyiyo. (Mil. 4:​18, 29, 31) Usange nase nyengo zinyake tamba kopa ŵanthu, tikwenera kulomba Yehova kuti watovwire. Tikwenera kulomba Yehova kuti  watovwire kuti tiŵatemwenge chomene ŵanthu, ivyo vitovwirenge kuti tileke kopa kuŵapharazgira makani ghawemi.

10. Kasi Yehova wakutovwira wuli kuti tifiske udindo withu pakuŵa Ŵakaboni ŵake? (Yesaya 43:​10-12)

¹⁰ Yehova wali kutisankha kuŵa Ŵakaboni ŵake, ndipo wakutilayizga kuti watovwirenge kuti tiŵe na chikanga. (Ŵazgani Yesaya 43:​10-12.) Wonani nthowa zinayi izo wakutovwilira. Yakwamba, Yesu wakuŵa nase nyengo zose para tikupharazga makani ghawemi. (Mat. 28:​18-20) Yachiŵiri, Yehova wakutuma ŵangelo kuti ŵatovwirenge. (Chivu. 14:6) Yachitatu, Yehova watipa mzimu utuŵa kuŵa movwiri, kuti utovwirenge kukumbukira vinthu ivyo tili kusambira. (Yoh. 14:​25, 26) Yachinayi, Yehova watipa ŵabali na ŵadumbu kuti tenderenge lumoza mu uteŵeti. Na wovwiri wa Yehova kweniso wa ŵabali na ŵadumbu, tili na vyose ivyo tikukhumbikwira kuti tiŵe ŵachikanga na kulutilira kupharazga.

ŴANI ŴAKUNOZGEKA KUSINTHA NDIPO MUWONENGE VINTHU MWAKWENELERA

11. Kasi mungachita wuli kuti musangenge ŵanthu ŵanandi mu uteŵeti? (Wonaniso chithuzi.)

¹¹ Kasi mukugongowa para ŵanthu mukuŵasanga viŵi yayi pa nyumba zawo? Mwalekerachi kujifumba kuti: ‘Kasi ŵanthu ŵa mu chigaŵa chane ŵakuŵa nkhu pa nyengo iyi?’ (Mil. 16:13) ‘Kasi ŵakuŵa ku ntchito panji ku msika?’ Para ni nthena, kasi mukuwona kuti mungasanga ŵanthu ŵanandi usange mungachita upharazgi wa mu msewu? Mubali munyake zina lake Joshua wakuti, “Nkhusanga mipata yakupharazga para nkhwenda mu malo agho ŵakuguliskira malonda kweniso agho ŵakwimikapo magalimoto.” Iyo na muwoli wake Bridget, ŵakusangaso ŵanthu ŵanandi pa nyumba zawo, usange ŵaluta kukapharazga mise chomene kweniso pa Sabata mise.—Efe. 5:​15, 16.

12. Kasi tingamanya wuli ivyo ŵanthu ŵakugomezga panji kufipa navyo mtima?

¹² Usange ŵanthu mbakunweka viŵi yayi na uthenga winu, yezgani kumanya ivyo ŵakugomezga panji ivyo ŵakufipa navyo mtima. Joshua na muwoli wake Bridget ŵakugwiliskira ntchito fumbo ilo likuŵa pa peji lakwamba la mathirakiti kuti ŵambiske chidumbirano. Mwachiyelezgero, para ŵakugwiliskira ntchito thirakiti lakuti Kasi Mukughanaghana Kuti Baibolo Ni Buku Wuli? ŵakuyowoya kuti: “Ŵanthu ŵanyake ŵakuwona kuti Baibolo ni Mazgu gha Chiuta, apo ŵanyake ŵakukayikira. Kasi imwe mukughanaghana wuli?” Kanandi ivi vikuŵawovwira kuti chidumbirano chilutilire.

13. Chifukwa wuli tikwenera kuwona kuti uteŵeti withu ukwenda makora nanga vingaŵa kuti ŵanthu ŵakukana uthenga withu? (Zintharika 27:11)

 ¹³ Kuti tiyowoye kuti uteŵeti withu ukwenda makora, vikuthemba waka pa umo ŵanthu ŵakuchitira na uthenga withu yayi. Chifukwa wuli? Chifukwa tikuŵa kuti tachita ivyo Yehova na Mwana wake ŵakukhumba kuti tichitenge—kuchitira ukaboni. (Mil. 10:42) Nanga vingaŵa kuti tindasange munthu waliyose wakuti tiyowoye nayo mu uteŵeti, panji ŵanthu ŵakana uthenga withu, tingaŵa ŵakukondwa chifukwa tikumanya kuti tikukondweska Adada ŵithu ŵakuchanya.—Ŵazgani Zintharika 27:11.

14. Chifukwa wuli tikwenera kukondwa para mupharazgi munyithu wasanga munthu wakunweka mu chigaŵa icho tikupharazgako?

¹⁴ Tikukondwaso chomene para mupharazgi munyithu wasanga munthu wakunweka mu chigaŵa icho tikupharazgako. Gongwe la Mulinda likuyaniska mulimo withu wakupharazga na ntchito ya kupenja mwana uyo wazgeŵa. Ŵanandi ŵakovwirapo pa kumupenja, ndipo ŵakugaŵana kwakunjilira kuti ŵamusange luŵiro. Para mwana uyu wasangika, waliyose wakuŵa na chifukwa chakukondwera, uyo wangumusanga pera yayi. Mwakuyana waka, ntchito ya kuzgora ŵanthu kuŵa ŵasambiri nja munthu yumoza pera yayi, kweni tose. Mupharazgi waliyose ngwakukhumbikwa kuti tipharazge chigaŵa chose, ndipo tose tikukondwa chomene usange munthu wamba kuwungana.

LUTILIRANI KUTEMWA YEHOVA NA ŴANTHU

15. Kasi kulondezga fundo ya pa Mateyu 22:​37-39 kungatovwira wuli kuti tisazgireko mwamphu withu mu uteŵeti? (Wonaniso chithuzi.)

¹⁵ Tingasazgirako mwamphu withu pa mulimo wakupharazga para tikulutilira kutemwa chomene Yehova na ŵazengezgani ŵithu. (Ŵazgani Mateyu 22:​37-39.) Ghanaghanirani waka umo Yehova wakukondwera para wakutiwona tikuchita mulimo uwu, kweniso umo ŵanthu ŵakukondwera para ŵamba kusambira Baibolo! Ghanaghaniraniso thumbiko lakuzirwa la umoyo wamuyirayira ilo ŵakulindilira wose awo ŵazomera uthenga withu na kusankha kuteŵetera Yehova.—Yoh. 6:40; 1 Tim. 4:16.

16. Kasi tingachita wuli kuti tikondwenge na uteŵeti withu nanga vingaŵa kuti tikufumapo yayi panyumba chifukwa cha masuzgo ghanyake? Yowoyani viyelezgero.

¹⁶ Kasi mukufumapo yayi panyumba chifukwa cha masuzgo ghanyake? Para ni nthena, ghanaghanirani ivyo mungachita kuti mulongore kuti mukumutemwa Yehova kweniso ŵazengezgani ŵinu. Mu nyengo ya muliri wa COVID-19,  Samuel na Dania ŵakakhalanga waka pa nyumba. Mu nyengo yose yakusuzga iyi, iwo ŵakachitanga waka upharazgi wa pa foni, kulemba makalata, na kuchitiska masambiro gha Baibolo kwizira pa Zoom. Samuel wakapharazgiranga ŵanthu awo wakasangananga nawo ku chipatala uko wakapokeranga wovwiri wa kansa. Iyo wakuti: “Masuzgo ghakupangiska kuti tisuzgikenge maghanoghano, kutigulura nkhongono, kweniso ghangakhwaska umoyo withu wauzimu. Ntheura tikwenera kuyezgayezga kuŵa ŵakukondwa apo tikuteŵetera Yehova.” Padera pa masuzgo agha, Dania wakawa ndipo wakawukanga yayi pa bedi kwa myezi yitatu. Kufuma apo wakamba kwendera kanjinga ka ŵanthu ŵakupendera kwa myezi 6. Iyo wakuti: “Nkhayezgayezganga waka kuchita vyose ivyo ningafiska. Nkhapharazgira nesi uyo wakiza kuzakanovwira, kweniso awo ŵakizanga kuzakapelekera katundu ku nyumba kwithu. Nkhapharazgiraso mwanakazi munyake pa foni uyo wakugwira ntchito ku kampani yakuguliska munkhwala ndipo chidumbirano chikenda makora chomene.” Nangauli Samuel na Dania ŵakatondekanga kuchita vinandi chifukwa cha umo vinthu vikaŵira kwa iwo, kweni ŵakachita ivyo ŵangafiska ndipo ŵakaŵa ŵakukondwa.

17. Kasi mungachita wuli kuti mupindure chomene na masachizgo gha mu nkhani iyi?

¹⁷ Masachizgo agho tawona mu nkhani iyi ghangatovwira chomene para ghose tingaghagwiliskira ntchito. Sachizgo lililose likuŵa nga ni ivyo vikukhumbikwa kuti tiphike chakurya chinyake. Para tasazga makora vyose ivyo vikukhumbikwa, tikuphika chakurya chakunowa chomene. Ntheura para talondezga masachizgo ghose agho ghali mu nkhani iyi, tiŵenge ŵakunozgeka kutonda maghanoghano ghakugongoweska ndipo tikondwenge chomene mu uteŵeti.