“Ŵakaboni aŵa ŵakaŵa ŵawemi ku ŵanthu pera yayi kweniso na ku ntcheŵe zane wuwo. Zuŵa linyake, Elaine uyo wakimilira pafupi na kashelufu ka matayala, wakatupasa mabisiketi tuntcheŵe twane tuŵiri. Kufuma waka pa zuŵa ili, nyengo yiliyose para tasendelera kufika apo Ŵakaboni ŵakayimikanga kashelufu kawo, ntcheŵe zane zikaguzanga kuti zilute ku Ŵakaboni kuti zikarye mabisiketi.

“Pakajumpha myezi yinandi ivi vikuchitika. Ntcheŵe zane zikakondwanga chomene na mabisiketi agha, ndipo nane nkhakondwanga kudumbiskanapo na Ŵakaboni mwakudumura. Kweni nkhakhumbanga yayi kuzgoŵerana nawo chomene. Panyengo iyo nkhaŵa na vyaka vyakujumpha 70, nkhamanyanga yayi ivyo Ŵakaboni ŵakagomezganga. Chifukwa chakuti nkhaŵa wakukhuŵara na mipingo yinandi ya Chikhristu, nkhawona kuti ntchiwemi nisambirenge waka Baibolo panekha.

“Panyengo iyi, nkhawonaso Ŵakaboni ŵanyake muvigaŵa vyakupambanapambana vya msumba uwu, ŵimilira kunyuma kwa tumashelufu twawo. Nawoso ŵakaŵa ŵaubwezi chomene. Nyengo zose ŵakazgoranga mafumbo ghane mwakugwiliskira ntchito Baibolo, ndipo ivi vikanipangiska kuti niŵagomezgenge chomene.

“Zuŵa linyake Elaine wakanifumba kuti, ‘Kasi mukumanya kuti vinyama ntchawanangwa chakufuma kwa Chiuta?’ Nkhazgora kuti, ‘Enya nkhumanya makora chomene.’ Mbwenu apa Elaine wakaniŵazgira lemba la Yesaya 11:6-9. Kufuma waka apa nkhakhumbanga chomene kusambira Baibolo, kweni nkhakhumba yayi kutora chilichose kufuma ku Ŵakaboni kuti nkhaŵazge.

“Mazuŵa ghakulondezgapo, nkhakondwanga chomene kudumbiskana nkhani za chandulo mwakudumura na Elaine na mfumu wake Brent. Ŵakanipempha kuti nkhaŵazge buku la Mateyu m’paka Milimo kuti nipulikiske makora ng’anamuro lakuŵa Mkhristu waunenesko. Nkhaŵazga nadi. Pati pajumpha nyengo yichoko waka, nkhazomera kusambira Baibolo na Brent na Elaine. Umu mukaŵa mukatikati mwa chaka cha 2016.

“Nkhalindiliranga mwakunweka sabata yiliyose kuti nisambire Baibolo na kuluta ku Nyumba ya Ufumu kukachita maungano. Nkhakondwanga chomene kusambira ivyo Baibolo likuyowoya. Pati pajumpha chaka na myezi nkhaŵa Kaboni wa Yehova wakubatizika. Pasono nili na vyaka 79 ndipo ndine wakukondwa chomene kuti nasanga chisopa chaunenesko. Yehova wanitumbika mwakunizomerezga kuŵa mu mbumba yake ya pa charu chose chapasi.”