Kasi mwaŵazga mwakupwelelera magazini gha Gongwe la Mulinda gha chaka chino? Yezgani kuzgora mafumbo agha:

Kasi Yehova wali kutilekera chakuwonerapo wuli cha umo wakuchitira vinthu na ŵanakazi?

Wakuchita nawo vinthu mwambura kutemwera, ndipo wakutemwera ŵanalume yayi. Chiuta wakuŵategherezga ŵanakazi, ndipo wakuŵikako mahara pa umo ŵakujipulikira na ivyo ŵakufipa navyo mtima. Ndipo wakuŵapa milimo.—w24.01, pp. 15-16.

Kasi tingalondezga wuli lemba la Ŵaefeso 5:​7, ilo likuti: “Kuchitako nawo yayi”?

Mpositole Paulosi wakachenjezganga kuti tileke kuchezga panji kwenderana na ŵanthu awo ŵangatitondeska kulondezga fundo za Chiuta. Ivi vikusazgapo ŵanthu awo tikuchezga nawo maso na maso panji pa malo ghakuchezgerapo gha pa Intaneti.—w24.03, pp. 22-23.

Kasi tikwenera kujivikilira ku nkhani wuli zautesi?

Tikwenera kuŵa maso na nkhani zambura ukaboni izo ŵabwezi ŵithu ŵangatiphalira, maimelu ghakufuma ku ŵanthu awo tikuŵamanya yayi, kweniso ŵanthu ŵakugaluka awo ŵakuŵa nga ŵakukhumba kumanya unenesko.—w24.04, p. 12.

Kasi ni vichi ivyo tikumanya kweniso ivyo tikumanya yayi pakukhwaskana na umo Yehova wazamweruzgira Themba Solomoni na ŵanthu awo ŵakafwa mu Sodomu na Gomora kweniso pa nyengo ya Chigumula?

Tikumanya yayi usange Yehova wali kuŵaparanyirathu kwamuyirayira. Ndipouli, tikumanya kuti iyo ndiyo wakumanya vyose ndipo wali na lusungu lukuru.—w24.05, pp. 3-4.

Kasi Chiuta pakuŵa “Jalawe” vikutisimikizgira vichi? (Doto. 32:4)

Tingabisama kwa Yehova. Iyo ngwakugomezgeka, ndipo nyengo zose wakusunga malayizgo ghake. Ndipo wakusintha yayi wunthu wake panji malayizgo ghake.—w24.06, pp. 26-28.

Kasi ntchivichi chingamovwirani kuti muzgoŵere mpingo uphya?

Gomezgani Yehova, ndipo wamovwiraninge nga umo wakawovwilira ŵateŵeti ŵake mu nyengo yakale. Gegani kuyaniska mpingo wasono na mpingo winu wakale. Muchitengeko milimo mu mpingo uphya, ndipo yezgayezgani kusanga ŵabwezi ŵaphya.—w24.07, pp. 26-28.

Kasi tikusambiramo vichi mu ntharika zitatu izo zili pa Mateyu chaputara 25?

Ntharika ya mberere na mbuzi yikudidimizga waka kukhumbikwa kwa kuŵa ŵakugomezgeka. Ntharika ya ŵamwali ŵakuchenjera na ŵakupusa yikudidimizga kukhumbikwa kwa kuŵa maso na kunozgekera. Ndipo ntharika ya matalente yikudidimizga kukhumbikwa kwa kulimbikira pa kuchita uteŵeti.—w24.09, pp. 20-24.

Kasi khonde la tempile la Solomoni likaŵa litali wuli?

Pa 2 Midauko 3:​4, mipukutu yinyake yakale pa vesi ili pali “120,” agho ni mamita 53 (mafiti 175) kufuma pasi kuya muchanya. Kweni mu mipukutu yinyake yakugomezgeka, pa vesi ili pali “mikono 20,” agho ni mamita 9 (mafiti 30) kufuma pasi kuya muchanya. Nambara iyi ndiyo yikulongora kuti yikukolerana na usani wa viliŵa vya tempile.—w24.10, p. 31.

Kasi fundo yakuti muteŵeti wakovwira wakwenera kuŵa “mfumu wa muwoli yumoza” yikung’anamurachi? (1 Tim. 3:12)

Yikung’anamura kuti wakwenera kuŵa na muwoli yumoza pera ndipo wakwenera yayi kuchita uleŵi. Kweniso wakwenera yayi kuphotokerana na ŵanakazi ŵanyake.—w24.11, p. 19.

Chifukwa wuli tingayowoya kuti lemba la Yohane 6:53 likuyowoya ivyo vikwenera kuchitika pa Mugonero wa Fumu yayi?

Lemba la Yohane 6:53 likuyowoya kukhumbikwa kwa kurya thupi la Yesu na kumwa ndopa zake. Yesu wakayowoya mazgu agha mu 32 C.E., ku Galileya, kuphalira Ŵayuda awo ŵakakhumbikwiranga kuŵa na chipulikano mwa iyo. Kweni Mugonero wa Fumu ukamba kuchitika mu chaka chakulondezgapo mu Yerusalemu. Ndipo pa nyengo iyi Yesu wakayowoyanga na ŵanthu awo wamuwusa nawo lumoza kuchanya.—w24.12, pp. 10-11