MUŴE ŴALUSUNGU

Yesu wakaŵa munthu wambura kwananga, ntheura wakasuzgikapo yayi na vinthu vinandi ivyo ŵanthu ŵanyake ŵakasuzgikanga navyo. Kweni wakachitiranga chitima ŵanthu. Wakaŵa wakunozgeka kuŵawovwira, ndipo nyengo zinyake wakaŵawovwiranga kuluska umo ŵeneko ŵakaghanaghaniranga. Yesu wakawovwiranga ŵanthu chifukwa cha lusungu. Ghanaghaniranipo chomene ivyo vikuyowoyeka mu Mutu 32, 37, 57, 99.

MUŴE ŴAKUFWATUKA NA ŴANJI

Ŵanthu wose, ŵana na ŵachekuru wuwo, ŵakizanga kwa Yesu mwakufwatuka chifukwa wakaŵa wakujiwona yayi. Ŵanthu ŵakafwasanga para ŵali na Yesu chifukwa ŵakawonanga kuti wakuŵatemwa. Kuti musimikizge, wonani Mutu 25, 27, 95.

MULOMBENGE NYENGO ZOSE

Nyengo zose Yesu wakalombanga kwa Awiske. Wakalombanga kwayekha kweniso para wali na ŵanthu awo ŵakasopanga Chiuta mwaunenesko. Wakalombanga pa chakurya pera yayi. Wakalombanga kuti wawonge Awiske, kuŵalumba, na kupempha mahara pambere wandachite vinthu. Wonani mu Mutu 24, 34, 91, 122, 123.

KUJIGHANAGHANIRA MWEKHA YAYI

Nyengo zinyake Yesu wakalekanga kupumura kuti wawovwire ŵanthu. Wakaghanaghananga vyake pera yayi. Apa napo wali kutisambizga umo nase tikwenera kuchitira. Sambirani vinandi mu Mutu 19, 41, 52.

MUGOWOKENGE

Yesu wakasambizganga ŵanthu kuti ŵagowokenge. Iyo wakagowokeranga ŵasambiri ŵake na ŵanthu ŵanyake. Ghanaghaniranipo ivyo vikuyowoyeka mu Mutu 26, 40, 64, 85, 131.

MULIMBIKIRENGE NTCHITO

Malemba ghakayowoyerathu kuti Ŵayuda ŵanandi ŵazamukana Mesiya kweniso kuti ŵalwani ŵazamumukoma. Ntheura Yesu wakhumbenge, mphanyi wakaŵa na mphwayi na kuleka kuŵawovwira. Kweni ndimo wakachitira yayi. Ŵakalimbikira chomene kovwira ŵanthu kuti ŵasopenge mwaunenesko. Ivyo wakachita vikutovwira tose kuti tilimbikirenge kupharazga, nanga ŵanyake ŵakane panji kutisuska. Wonani Mutu 16, 72, 103.

MUŴE ŴAKUJIYUYURA

Yesu wakamanyanga vinandi kweniso wakaŵa wavinjeru kuluska ŵanthu wose. Chifukwa chakuti wakaŵa wakufikapo, wakaghanaghananga na kuchita makora vinthu kuluska waliyose. Kweni wakateŵeteranga ŵanthu mwakujiyuyura. Mungawona umo wakachitiranga mu Mutu 10, 62, 66, 94, 116.

MUZIKIRENGE PAKUCHITA VINTHU

Kanandi Yesu wakazikiranga pakovwira ŵapositole ŵake na ŵanthu ŵanyake usange ŵatondeka kuchita ivyo waŵaphalira. Mwakuzikira, wakawerezgangapo visambizgo ivyo ŵakeneranga kuvipulikiska mwakuti ŵaŵe ŵabwezi ŵa Yehova. Wonani Mutu 74, 98, 118, 135.