Yesu wakaluta ku msumba wa Efurayimu, kumpoto chadera kuvuma kwa Yerusalemu. Apa wakayigwentha Sanihedirini chifukwa yikakhumbanga kumukoma. Wakakhala mu msumba wura pamoza na ŵasambiri, kutali na ŵalwani ŵake. (Yohane 11:54) Kweni Paska likaŵa pafupi kuchitika mu 33 C.E., ntheura Yesu wakambaso ulendo. Wakenda kulazga kumpoto kujumpha mu Samariya m’paka ku Galileya. Aka kakaŵa kaumaliro kufikako ku malo agha pambere wandafwe.

Kukwambilira kwa ulendo wura, apo Yesu wakendanga muzi na muzi, wakasangana na ŵanalume 10 awo ŵakaŵa na nthenda ya vyoni. Nyengo zinyake, nthenda iyi yikurya viŵaro vya thupi, nga njoŵe, vigunwe, panji makutu. (Maŵazgo 12:10-12) Dango la Chiuta likatenge para munthu wali na vyoni wachemerezgenge kuti: “Nafipirwa, nafipirwa!” ndipo wakhalenge payekha.—Levitiko 13:45, 46.

Ntheura, ŵanalume 10 ŵara ŵakaŵa pataliko na Yesu. Kweni ŵakachemerezganga kuti: “Yesu, Msambizgi, mutilengere lusungu!” Yesu wakati waŵawona, wakati: “Lutani ndipo mukajilongore ku ŵasembe.” (Luka 17:13, 14) Apa wakalongora kuti wakachindikanga Dango la Chiuta, ilo likaŵapanga mazaza ŵasofi kuphalira munthu uyo wachira ku vyoni kuti ngwakutowa. Para ŵamuphalira nthena, munthu wakizangaso na kukhala pamoza na ŵanyake.—Levitiko 13:9-17.

Ŵavyoni ŵara ŵakaŵa na chigomezgo kuti Yesu wali na nkhongono zakuchitira minthondwe. Ŵakanyamuka kuya ku ŵasembe, nangauli ŵakaŵa kuti ŵandachire. Apo ŵakalutanga, ŵakatumbikika chifukwa cha kuŵa na chipulikano mwa Yesu. Ŵakamba kuwona kuti thupi lawo lawelerapo, ŵachira.

Ŵavyoni 9 pa awo ŵakachira ŵakalutilira na ulendo wawo. Kweni yumoza wakalutilira yayi. Munthu uyu wakaŵa Musamariya, ndipo wakawelera kukapenja Yesu. Chifukwa wuli? Munthu yura wakawonga chomene pa ivyo Yesu wakamuchitira. Munthu yura “wakachemerezganga na kupeleka uchindami kwa Chiuta.” Wakamanya kuti Chiuta ndiyo wamuchizga. (Luka 17:15) Wakati wamusanga Yesu, munthu yura wakajikama pamaso pake, wakamuwonga.

Yesu wakayowoya na ŵanthu awo ŵakamuzingilizga kuti: “Asi awo ŵatozgeka ŵanguŵapo 10? Kasi ŵanyake 9 ŵali nkhu? Kasi palije uyo wawelera kuti wazakapeleke uchindami kwa Chiuta, padera pa munthu uyu wa mtundu unyake?” Penepapo Yesu wakaphalira Musamariya yura kuti: “Wuka ndipo lutanga. Chipulikano chako chakuchizga.”—Luka 17:17-19.

Pakuchizga ŵavyoni 10 ŵara, Yesu wakalongora kuti Yehova Chiuta wakaŵa nayo. Sono yumoza wa 10 ŵara wakachira chifukwa cha ivyo Yesu wakachita, kweniso wakwenera kuti wakaŵa na chigomezgo cha kusanga umoyo. Pasono Chiuta wakuchizgaso ŵanthu kwizira mwa Yesu mu nthowa iyi yayi. Kweni para tili na chipulikano mwa Yesu, nase tiŵenge pa nthowa yakuya ku umoyo wamuyirayira. Kasi tikuwonga nga umo wakachitira Musamariya yura?