KASI uli kupulikapo ŵantu ŵakuyowoya za umariro wa caru capasi?— Mazuŵa ghano ŵantu ŵanandi ŵakuyowoya nadi za umariro wa caru capasi. Ŵantu ŵanyake ŵakughanaghana kuti caru cizamuparanyika mu nkondo iyo ŵantu ŵazamugwiriskira ncito mabomba ghankongono comene. Kweni kasi ukughanaghana kuti Ciuta wazamkuparanya caru cithu cakutowa na macanya ghake pamoza na nyenyezi zake izo zikupereka ungweru?—

Nga ndi umo tikasambilira, Baibolo likuyowoya za umariro wa caru. “Caru cikuruta,” likuyowoya nteura Baibolo.  (1 Yohane 2:17) Kasi ukughanaghana kuti caru capasi cizamuparanyika?— Yayi, Baibolo likuyowoya kuti Ciuta wakalenga caru capasi kuti “ciŵenge cakukhalamo,” nadi pano, kuti ŵantu ŵakhalengemo mwakufwasa. (Yesaya 45:18) Lemba la Salmo 37:29 likuyowoya kuti: ‘Ŵakunyoroka ŵazamupokera caru na kukhala mwenemumo kwamuyirayira.’ Pa cifukwa ici Baibolo likuyowoya kuti caru cikhalirirenge muyirayira.—Salmo 104:5; Mupharazgi 1:4.

Mwanteura, kasi umariro wa caru capasi ukung’anamura vici?— Tingasanga zgoro usange tingasanda mwakupwererera ivyo vikacitika mu mazuŵa gha Nowa. Baibolo likurongosora kuti: ‘Caru ico cikaŵako nyengo yira cikaparanyika, cikati cazura na maji.’—2 Petros 3:6.

Kasi ŵanji ŵakapona pa nyengo ya umariro wa caru apo cigumula cikacitika, mu nyengo ya Nowa?— Baibolo likuyowoya kuti Ciuta ‘wakamusungirira Nowa, mupharazgi wa urunji, na ŵanyake ŵankonde na ŵaŵiri, para Ciuta wakiziska cigumula pa caru ca ŵacikana-Ciuta.’—2 Petros 2:5.

Ipo, kasi ni caru wuli ico cikaparanyika? Kasi cikaŵa caru capasi panji ŵantu ŵaheni?— Baibolo likuyowoya kuti cikaŵa “caru ca ŵacikana-Ciuta.” Awona kuti, Nowa wakucemeka kuti ‘mupharazgi.’ Kasi ukughanaghana kuti iye wakapharazganga vici?— Nowa wakacenjezganga ŵantu za umariro wa “caru ico cikaŵako nyengo yira.”

Peneapo Yesu wakayowoyanga za Cigumula cikuru, wakaphalira ŵasambiri ŵake ivyo ŵantu ŵakacitanga pambere caru cikaŵa cindaparanyike. Ivi ndivyo Yesu wakaŵaphalira: ‘Mu mazuŵa ghara, apo Cigumula cikaŵa cindize, [ŵantu] ŵakaryanga, ŵakamwanga, ŵakatoranga, ŵakatengwanga, mupaka likiza zuŵa ilo Nowa wakanjira mu cingaraŵa, ndipo ŵakamanya cara mupaka cikiza Cigumula, ndipo cikaŵakukura wose.’ Ndipo Yesu wakati ndimo ŵantu ŵacitirenge pambere caru ici cindamare.—Mateyu 24:37-39.

Mazgu gha Yesu ghakurongora kuti tingasambirapo sambiro pa ivyo  ŵantu ŵakacitanga apo Cigumula cikaŵa cindacitike. Apo tikasambiranga Cipaturo 10 ca buku lino, kasi ukukumbukira ivyo ŵantu ŵara ŵakacitanga?— Ŵanarumi ŵanyake ŵakaŵa vinkara panji kuti ŵakari comene ndipo ŵakasuzganga ŵanyawo. Kweni Yesu wakayowoyaso kuti ŵantu ŵanandi ŵakategherezganga yayi apo Nowa wakaŵapharazgiranga ivyo wakatumika na Ciuta.

Mwanteura nyengo yikakwana iyo Yehova wakamuphalira Nowa kuti Waparanyenge ŵantu ŵaheni na cigumula. Maji ghakeneranga kuzura caru cose capasi, nanga ndi mapiri ghakeneranga kubizgika. Yehova wakamuphalira Nowa kuti wazenge cingaraŵa cikuru. Cikaŵa nga ndi bokosi likuru nga ni umo cikuwonekera pa cithuzithuzi ico ciri pa peji 238.

Ciuta wakamuphalira Nowa kuti wazenge cingaraŵa cikuru, cakuti iye na mbumba yake na vinyama vinandi ŵangakwanamo makora. Nowa na mbumba yake ŵakagwira ncito mwakulimbikira comene. Ŵakadumura makuni ghakuru, ndipo ŵakamba kuzenga cingaraŵa mwakugwiriskira ncito makuni agha. Ncito iyi yikatora virimika vinandi cifukwa cingaraŵa cikaŵa cikuru comene.

Kasi ukukumbuka vintu vinyake ivyo Nowa wakacitanga mu virimika ivyo wakazenganga cingaraŵa?— Iye wakapharazganga na kucenjezga ŵantu za kwiza kwa Cigumula. Kasi ŵantu ŵakategherezga? Palije uyo wakategherezga kurekapo Nowa na mbumba yake. Kweni ŵantu wose ŵakaŵa ŵakutangwanika na vintu vinyake. Kasi ukukumbuka ivyo Yesu wakayowoya kuti ŵakacitanga?— Ŵakaŵa ŵakutangwanika na kurya na kumwa ndiposo kutora na kutengwa. Ŵakamanyanga yayi kuti ŵakaŵa ŵantu ŵaheni, ndipo ŵakaŵavye nyengo yakutegherezga ivyo Nowa wakaŵaphaliranga. Tiye tiwone ivyo vikaŵacitikira.

Pamanyuma pakuti Nowa na mbumba yake ŵanjira mu cingaraŵa, Yehova wakajara cijaro. Ŵantu awo ŵakaŵa kuwaro ŵakagomezganga yayi kuti Cigumula cizenge. Kweni mwa mabuci maji ghakamba kuwa kufuma kucanya! Kuti yikaŵa vula iyo yikurokwa mazuŵa ghose  yayi, kweni yikaŵa vula yikuru comene! Kwa kanyengo kacoko waka maji ghakaŵa nga ni mironga yikuru, kupoma congo cikuru. Ghakawiska makuni ghakuru na kututuzga malibwe ghakuru nga ndikuti ghakaŵa ghacoko. Wuli pakuyowoya za ŵantu awo ŵakaŵa kuwaro kwa cingaraŵa?— Yesu wakati: ‘Cigumula cikiza ndipo cikaŵakukura wose.’ Ŵantu wose awo ŵakaŵa kuwaro kwa cingaraŵa ŵakafwa. Cifukwa wuli?— Nga ndi umo Yesu wakayowoyera, ‘ŵakamanyanga cara.’ Ŵakategherezganga yayi!—Mateyu 24:39; Genesis 6:5-7.

Kumbukira kuti, Yesu wakayowoya kuti ivyo vikaŵacitikira ŵantu aŵa ni sambiro kwa ise lero. Kasi tingasambirapo vici?— Tingasambira kuti ŵantu ŵakaparanyika cifukwa cakuti ŵakaŵa ŵaheni pera cara, kweniso ŵanandi ŵa iŵo ŵakaŵa ŵakutangwanika na milimo yawo ndipo ŵakakhumba cara kuti ŵasambire za Ciuta na ivyo Iye wakakhumbanga kucita. Tikwenera kucenjera comene kuti tireke kuŵa nga ndiwo, asi ntena?—

Kasi ukughanaghana kuti Ciuta wazamuparanyaso caru na cigumula?— Yayi, Ciuta wakalayizga kuti wazamuparanyaso yayi caru na cigumula. Iye wakati: “Nkuŵika ciŵingavura cane mu bingu, ticiŵenge cimanyikwiro.” Yehova wakayowoya kuti ciŵingavura ciŵenge cimanyikwiro cakuti “maji ghatighaŵengeso cigumula cara kuparanya vyamoyo vyose.”—Genesis 9:11-17.

Mwanteura tingaŵa na cisimikizgo kuti Ciuta wazamuparanyaso yayi caru na maji. Nadi pano, nga ndi umo tawonera, Baibolo likuyowoya nadi za umariro wa caru. Peneapo Ciuta  wazamuparanya caru ici, kasi mbanjani awo wazamuponoskeka?— Kasi ŵazamuŵa ŵantu awo ŵakatemwanga vintu vinyake mwakuti ŵakakhumbanga yayi kusambira za Ciuta? Panji ŵazamuŵa awo ŵakaŵa ŵakutangwanika comene mwakuti ŵakaŵavye nyengo ya kuŵazga Baibolo? Kasi iwe ukutipo wuli?—

Ise tikukhumba kuti tizakaŵe ŵamoza ŵa ŵantu awo Ciuta wazamuŵaponoska, asi ntena?— Kasi cingaŵa cakukondweska yayi usange mbumba yithu yingaŵa nga ndi mbumba ya Nowa mwakuti Ciuta wazakatiponoske tose?— Kuti tizakapone pa umariro wa caru, tikwenera kumanya umo Ciuta wazamuparanyira caru na umo wazamwiziskira caru cake cipya caurunji. Tiye tiwone umo wazamucitira.

Baibolo likutipa zgoro pa lemba la Daniel cipaturo 2 vesi 44. Lemba ili likuyowoya za mu nyengo yithu apo likuti: “Ndipo mu mazuŵa gha mathemba agha Ciuta wa kucanya wati wimike uthemba, uwo kuti wamkuparanyika cara muyirayira, panji mazaza ghake ghasidike ku fuko linyake cara. Wamkuteketa mauthemba ghose agha na kughamara kweni uwu tiwimilire muyirayira.”

Kasi ukupulikiska ici?— Baibolo likuyowoya kuti boma la Ciuta lizamuparanya maboma ghose gha ŵantu. Cifukwa wuli?— Cifukwa ghakumupulikira yayi Uyo Ciuta wamwimika kuŵa Themba. Kasi Themba ilo ninjani?— Ni Yesu Kristu!

Yehova Ciuta wali na wenelero wose wakusanka mtundu wa boma ilo likwenera kuwusa, ndipo wali kusanka Mwana wake, Yesu, kuŵa Themba. Sono-sono apa Themba ilo Ciuta wasanka, Yesu Kristu, lizamurongozga pa kuparanya maboma ghose gha pa caru capasi. Baibolo pa Civumbuzi cipaturo 19, vesi 11 mupaka 16, likurongosora kuti iye wazamuparanya maboma ghose, nga ndi umo cithuzithuzi ici cikurongorera. Mu Baibolo, nkondo ya Ciuta yakuparanya maboma ghose gha caru yikucemeka Haramagedoni.

Ciuta wakayowoya kuti Ufumu wake uzamuparanya maboma ghose  gha ŵantu. Kweni kasi iye wakutipempa ise kuti tizakaparanye maboma agha?— Yayi, mu Baibolo, Haramagedoni yikucemeka kuti “nkondo ya zuŵa likuru la Ciuta, Mwene-nkongono-zose.” (Civumbuzi 16:14, 16) Haramagedoni ni nkondo ya Ciuta, ndipo Ciuta wazamugwiriskira ncito Yesu Kristu kurongozga ŵangelo ŵakucanya kurwa nkondo iyi. Kasi nkondo ya Haramagedoni yili pafupi? Tiye tiwone umo tingamanyira.