SAMBIRO 44
Kasi Vikondwelero Vyose Vikukondweska Chiuta?
Yehova wakukhumba kuti tikondwenge na umoyo ndipo nyengo zinyake tingachita viphikiro. Kweni kasi vikondwelero na maholide ghose ghakukondweska Chiuta? Kasi tingalongora wuli kuti tikutemwa Yehova pa nkhani iyi?
1. Chifukwa wuli vikondwelero vinandi vikukwiyiska Yehova?
Panji mungazizwa kumanya kuti vikondwelero vinandi vikukolerana yayi na fundo za mu Baibolo kweniso kuti vikamba na ŵanthu awo ŵakusopa Chiuta yayi. Vikondwelero vinyake vikukolerana na visopa vyautesi, vyamizimu panji vikukhozgera chisambizgo chakuti munthu wali na mzimu uwo ukulutilira kuŵa wamoyo para wafwa. Ndipo vinyake vikukhozgera fundo yakuti uyo wakuchitako vikondwelero ivi waŵenge na mwaŵi. (Yesaya 65:11) Yehova wakuchenjezga ŵateŵeti ŵake kuti: “Jipaturani kwa iwo, lekani kukhwaska chinthu chaukazuzi.”—2 Ŵakorinte 6:17. a
2. Kasi Yehova wakujipulika wuli na vikondwelero ivyo vikupeleka ntchindi zambura kwenelera ku ŵanthu?
Yehova wakutichenjezga kuti tileke ‘kuthemba ŵanthu.’ (Ŵazgani Yeremiya 17:5.) Maholide ghanyake ghakuchindika ŵalongozgi panji ŵasilikari. Ŵanyake ŵakukondwelera vimanyikwiro vya charu panji zuŵa ilo charu chawo chikapokera wanangwa. (1 Yohane 5:21) Ndipo vikondwelero vinyake vikukhozgera ndyali panji mawupu agho ghakulwera wanangwa wa ŵanthu. Kasi Yehova wakujipulika wuli para tikupeleka ntchindi zambura kwenelera kwa munthu panji mawupu ghanyake, chomenechomene agho ghakususkana na khumbo lake?
3. Kasi ni vinthu wuli iyo vingapangiska kuti vikondwelero viŵe vyambura kuzomerezgeka kwa Chiuta?
Baibolo likukanizga “kumwa vinyo mwakujumphizga, kwenda mu viphikiro ivyo mukuŵa vyongo, [kweniso] kuphalizgana pa kumwa.” (1 Petrosi 4:3) Mu vikondwelero vinyake ŵanthu ŵakuchita vinthu mwambura kujikora kweniso vinthu vinandi vyaukazuzi. Ntheura kuti tilutilire kuŵa paubwezi na Yehova, tikwenera yayi kuchitako vinthu vyaukazuzi ivi.
MANYANI VINANDI
Wonani ivyo mungachita kuti musankhe mwamahara vikondwelero panji maholide agho ghakukondweska Yehova.
4. Kanani kuchita vikondwelero ivyo vikukwiyiska Yehova
Ŵazgani Ŵaefeso 5:10, kufuma apo dumbiskanani mafumbo agha:
-
Kasi ntchinthu wuli icho tikwenera kughanaghanirapo chomene para tikusankha kuchitako vikondwelero panji maholide?
-
Kasi ni vikondwelero panji maholide wuli agho ghakutemwa kuchitika uko mukukhala?
-
Kasi mukuwona kuti maholide agha ghakukondweska Yehova?
Mwachiyelezgero, kasi muli kughanaghanirapo kuti Chiuta wakujipulika wuli para ŵanthu ŵakukondwelera mazuŵa ghakubabikira? Baibolo likuyowoyapo yayi kuti ŵateŵeti ŵakugomezgeka ŵa Yehova ŵakakondweleranga mazuŵa ghakubabikira, m’malo mwake likuyowoya za vikondwelero viŵiri vya ŵanthu awo ŵakasopanga Chiuta yayi. Ŵazgani Genizesi 40:20-22 na Mateyu 14:6-10. Kufuma apo, dumbiskanani mafumbo agha:
-
Kasi ni vinthu wuli vyakuyana ivyo vikachitika pa vikondwelero ivi?
-
Kuyana na ivyo vikachitika pa vikondwelero ivi, kasi mukughanaghana kuti Yehova wakuviwona wuli vikondwelero vya mazuŵa ghakubabikira?
Kweni panji mungajifumba kuti, ‘Kasi Yehova wangajipulika wuli usange ningachitako vikondwelero vya mazuŵa ghakubabikira panji ivyo vikukolerana yayi na malemba?’ Ŵazgani Ekisodo 32:1-8. Kufuma apo, wonelerani VIDIYO na kudumbiskana mafumbo agha.
-
Chifukwa wuli ntchiwemi kuti nyengo zose tighanaghanirenge vinthu ivyo vikukondweska Yehova?
-
Kasi tingachita wuli nthena?
Kasi tingamanya wuli usange vikondwelero vinyake vikukwiyiska Chiuta?
-
Kasi vikususkana na fundo za mu malemba? Kuti mumanye vinandi, fufuzani umo vikondwelero ivi vikambira.
-
Kasi vikupeleka ntchindi zambura kwenelera ku ŵanthu, mawupu, panji vimanyikwiro vya charu? Tikwenera kuchindika chomene Yehova na kugomezga kuti iyo ndiyo wazamumazga masuzgo ghose pa charu chapasi.
-
Kasi mitheto yake kweniso ivyo vikuchitika vikususkana na fundo za mu Baibolo? Tikwenera kulutilira kuŵa ŵakutowa mwauzimu.
5. Wovwirani ŵanyinu kuti ŵachindikenge ivyo mukugomezga
Nyengo zinyake chingaŵa chakusuzga kuti mukane para ŵanyinu ŵakumuchichizgani kuti muchiteko vikondwelero ivyo vikukwiyiska Yehova. Ŵalongosolerani mwakuzikira kweniso mwantchindi ivyo mukugomezga. Kuti mumanye umo mungachitira, wonelerani VIDIYO.
Ŵazgani Mateyu 7:12, kufuma apo dumbiskanani mafumbo agha:
-
Kuyana na ivyo vili pa lemba ili, kasi mukwenera kuphalira ŵabali ŵinu kuti ŵakwenera yayi kukondwelera maholide?
-
Kasi mungaŵalongora wuli ŵabali ŵinu kuti mukuŵatemwa na kuŵachindika nangauli imwe mukondwelerengeko yayi maholide ghanyake?
6. Yehova wakukhumba kuti tikondwenge
Yehova wakukhumba kuti tipaturenge nyengo ya kuchezgera na kukondwa pamoza na banja kweniso ŵabwezi ŵithu. Ŵazgani Mupharazgi 8:15, kufuma apo dumbiskanani fumbo ili:
-
Kasi vesi ili likulongora wuli kuti Yehova wakukhumba kuti tikondwenge?
Yehova wakukhumba kuti ŵanthu ŵake ŵaŵenge na nyengo ya kuchezgera pamoza. Wonelerani VIDIYO kuti muwone umo ŵabali na ŵadumbu ŵakuchezgera pa maungano gha mitundu yose.
Ŵazgani Ŵagalatiya 6:10, kufuma apo dumbiskanani mafumbo agha:
-
Kasi tingalongora kuti tikuchita “icho ntchiwemi” ku ŵanyithu pekha para tikukondwelera nawo maholide ghakumanyikwa?
-
Kasi ni mphani apo munthu wangaŵa wakukondwa nadi, para wakupeleka vyawanangwa chifukwa cha maholide panji para wakupeleka chifukwa cha kukhumba yekha?
-
Nyengo zinandi Ŵakhristu ŵakunozgera vinthu vyapadera ŵana ŵawo panji kuŵapa vyawanangwa. Usange muli na ŵana, kasi ntchinthu wuli chapadera icho mungaŵachitira?
IVYO ŴANYAKE ŴAKUYOWOYA: “Nilije navyo ntchito umo maholide ghakambira. Ine chikuru nkhukondwa pamoza na ŵabali kweniso ŵabwezi ŵane.”
-
Kasi imwe mukuti wuli?
MWAKUDUMURA
Yehova wakukhumba kuti tikondwenge pamoza na banja kweniso ŵabwezi ŵithu. Kweni wakukhumba yayi kuti tichitenge vikondwelero ivyo vikumukwiyiska.
Kuweleramo
-
Kasi ni mafumbo wuli agho tikwenera kujifumba kuti timanye vikondwelero ivyo vikukwiyiska Yehova?
-
Kasi tingawovwira wuli ŵa mu banja lithu kweniso ŵabwezi kuti ŵapulikiske chifukwa icho tikuchitirako yayi vikondwelero vinyake?
-
Kasi tikumanya wuli kuti Yehova wakukhumba kuti tikondwenge?
SANGANI FUNDO ZAKUSAZGIKIRA
Manyani vikondwelero na maholide agho Ŵakhristu ŵakukondwelerako yayi.
“Chifukwa Wuli Ŵakaboni ŵa Yehova Ŵakuchitako Yayi Maholide Ghanyake?” (Nkhani ya pa Intaneti)
Wonani vifukwa vinayi ivyo tikugomezgera kuti Chiuta wakukondwa yayi para ŵanthu ŵakukondwelera mazuŵa ghakubabikira.
“Chifukwa Wuli Ŵakaboni ŵa Yehova Ŵakukondwelera Yayi Mazuŵa Ghakubabikira?” (Nkhani ya pa Intaneti)
Wonani umo muwukirano munyake wakachitira mwamahara apo ŵanyake ku sukulu ŵakamunenanga kuti wakukondwelerako yayi Khisimasi.
Ndiwe Wakuzirwa Kwa Yehova (11:35)
Ŵakhristu ŵanandi ŵali kusankha kuleka kukondwelerako Khisimasi. Kasi ŵakujipulika wuli na ivyo ŵali kusankha?
“Ŵali Kusanga Chinthu Chiwemi Chakuluska Khisimasi” (Gongwe la Mulinda, Disembala 1, 2012)
a Wonani Mazgu Ghakuumaliro 5 kuti mumanye ivyo mungachita para ŵanthu ŵanyake ŵakukondwelera maholide agho ghakukwiyiska Chiuta.
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
