Nyengo zinyake, masuzgo na viyezgo vingatifyenya chomene mwakuti nkhongono zingatimalira, ndipo tingamba kuguguzika waka. Kweni pa nyengo zanthena izi tunkhongono tungakwera para tingaghanaghanira mboniwoni ya Ezekiyeli ya kuwezgerapo vinthu. Chifukwa wuli? Uchimi uwu ukutiphalira kuti Chiuta uyo wali na nkhongono kuwezgeramo umoyo mu viwangwa vyakomira, wangatondeka yayi kutikhozga pakulimbana na masuzgo gha mtundu uliwose, nanga ni agho taŵanthu tingawona nga kuti ghangamara yayi.—Ŵazgani Salimo 18:29; Fil. 4:13.

Tingakumbuka kuti kale chomene, pambere Ezekiyeli wandaŵeko, ntchimi Mozesi yikayowoya kuti Yehova wali na nkhongono kweniso khumbo lakuti wawovwire ŵanthu ŵake kwizira mu nkhongono zake. Mozesi wakalemba kuti: “Chiuta ni malo ghakubisamamo kwamba kale chomene, mawoko ghake ghamuyirayira ghali kusi kwa iwe.” (Doto. 33:27) Nadi, tikugomezga kuti usange tachimbilira kwa Chiuta withu mu nyengo za suzgo, iyo waŵikenge mawoko ghake kusi kwithu, kutinyamura makoramakora, na kutovwira kuti tiyimilireso.—Ezek. 37:10.